AGAI

1 Na mvula ya zole ya ntotila Dariusi, na ngonda ya sambanu, na kilumbu ya ntete ya ngonda, ndinga ya Yehowa kwisaka na nzila ya mbikudi Agai*+ sambu na Zorobabele+ mwana ya Shealtiele, mfumu ya mbanza ya Yuda, mpi sambu na Yozue mwana ya nganga-nzambi ya nene Yehosadaki nde:

2 “Yehowa ya makesa ke tuba nde, ‘Bantu yai ke tuba nde, “Ntangu me lunga ntete ve sambu na kutunga* nzo* ya Yehowa.”’”+

3 Ebuna ndinga ya Yehowa kwisaka diaka na nzila ya mbikudi Agai+ nde: 4 “Keti yai ntangu ya kuzinga na banzo na beno ya kitoko, na ntangu nzo yai kele mayumbu?+ 5 Ntangu yai, Yehowa ya makesa ke tuba nde, ‘Beno tula ntima na beno na* banzila na beno. 6 Beno kunaka bambuma mingi, kansi beno me katula bima fioti.+ Beno ke dia, kansi beno ke fuluka ve. Beno ke nwa, kansi beno ke manisa ve nzala na beno. Beno ke lwata bilele, kansi muntu mosi ve ke wa tiya. Muntu yina ke sala sambu na kubaka lufutu, yandi ke tula lufutu na yandi na saki ya kutobuka-tobuka.’”

7 “Yehowa ya makesa ke tuba nde, ‘Beno tula ntima na beno na* banzila na beno.’

8 “‘Beno kwenda na ngumba mpi beno nata mabaya.+ Beno tunga nzo yina,+ sambu mono wa kiese sambu na yo mpi mono baka nkembo,’+ Yehowa muntu me tuba.”

9 “‘Beno vandaka kuvingila bima mingi kansi beno bakaka bima fioti; mpi ntangu beno kotisaka yo na nzo, mono panzaka yo na mupepe na mono.+ Sambu na inki?’ Yehowa ya makesa muntu me tuba. ‘Sambu nzo na mono kele mayumbu, kansi konso muntu ke tambula sambu na kukeba nzo na yandi.+ 10 Yo yina zulu kangaka malulu na yo, mpi ntoto kangaka mbuma na yo. 11 Mpi mono landaka kuyumisa ntoto, bangumba, bankeni, vinu ya mpa, mafuta, bima yina ke mena na ntoto, bantu ti bitwisi, mpi bisalu yonso ya maboko na beno.’”

12 Ebuna Zorobabele+ mwana ya Shealtiele+ ti Yozue mwana ya nganga-nzambi ya nene Yehosadaki,+ mpi bantu yonso ya nkaka waka ndinga ya Yehowa Nzambi na bo mpi mambu yina mbikudi Agai songaka bo, sambu Yehowa Nzambi na bo muntu tindaka yandi; mpi bantu yantikaka kuwa Yehowa boma.

13 Ebuna Agai, kinati-nsangu ya Yehowa, pesaka bantu nsangu yai na kuwakana ti kisalu yina Yehowa pesaka yandi: “‘Mono kele ti beno,’+ Yehowa muntu me tuba.”

14 Yo yina Yehowa simbaka ntima+ ya Zorobabele mwana ya Shealtiele, mfumu ya mbanza ya Yuda,+ mpi ntima ya Yozue+ mwana ya nganga-nzambi ya nene Yehosadaki, mpi ntima ya bantu yonso ya nkaka; ebuna bo kwisaka mpi bo yantikaka kisalu ya nzo ya Yehowa ya makesa, Nzambi na bo.+ 15 Yo vandaka na kilumbu ya 24 ya ngonda ya sambanu, na mvula ya zole ya ntotila Dariusi.+

2 Na ngonda ya nsambwadi, na kilumbu ya 21 ya ngonda, ndinga ya Yehowa kwisaka na nzila ya mbikudi Agai+ nde, 2 “Pardo yula Zorobabele+ mwana ya Shealtiele, mfumu ya mbanza ya Yuda,+ mpi Yozue+ mwana ya Yehosadaki,+ nganga-nzambi ya nene, mpi bantu yina me bikala nde: 3 ‘Nani na kati na beno monaka nzo* yai ntangu yo vandaka na nkembo na yo ya ntete?+ Inki mutindu beno ke mona yo ntangu yai? Keti beno ke yindula ve nde yo kele mpamba kana bo fwanisa yo ti nkembo na yo ya ntete?’+

4 “‘Kansi ntangu yai vanda ngolo, Zorobabele,’ Yehowa muntu me tuba, ‘mpi vanda ngolo, Yozue mwana ya nganga-nzambi ya nene Yehosadaki.’

“‘Mpi beno vanda ngolo, beno yonso bantu ya insi yai,’+ Yehowa muntu me tuba, ‘mpi beno sala kisalu.’

“‘Sambu mono kele ti beno,’+ Yehowa ya makesa muntu me tuba. 5 ‘Beno yibuka mambu yina mono silaka beno ntangu beno basikaka na Ezipte,+ mpi mpeve na mono kele kaka na kati na beno.*+ Beno wa boma ve.’”+

6 “Sambu Yehowa ya makesa ke tuba nde, ‘Mbala mosi diaka—kubika fioti—ebuna mono ta nikisa zulu ti ntoto ti nzadi-mungwa mpi ntoto ya kuyuma.’+

7 “‘Mpi mono ta nikisa makanda yonso, ebuna bima ya ntalu* ya makanda yonso ta kwisa;+ mpi mono ta fulusa nzo yai ti nkembo,’+ Yehowa ya makesa muntu me tuba.

8 “‘Arza kele ya mono, mpi wolo kele ya mono,’ Yehowa ya makesa muntu me tuba.

9 “‘Na bilumbu ke kwisa, nkembo ya nzo yai ta vanda mingi kuluta yina ya ntete,’+ Yehowa ya makesa muntu me tuba.

“‘Mpi mono ta pesa kisika yai ngemba,’+ Yehowa ya makesa muntu me tuba.”

10 Na kilumbu ya 24 ya ngonda ya uvwa, na mvula ya zole ya Dariusi, ndinga ya Yehowa kwisilaka mbikudi Agai+ nde: 11 “Yehowa ya makesa ke tuba nde, ‘Pardo, yula banganga-nzambi mambu ya me tala nsiku:+ 12 “Kana muntu ke nata musuni ya santu na kati ya lele na yandi, ebuna lele na yandi kusimba dimpa, supu, vinu, mafuta, to madia ya mitindu yonso, keti yo ta kuma santu?”’”

Banganga-nzambi vutulaka nde: “Ve!”

13 Ebuna Agai yulaka nde: “Kana muntu yina kele mvindu sambu yandi simbaka mvumbi* kusimba bima yai, keti yo ta kuma mvindu?”+

Banganga-nzambi vutulaka nde: “Yo ta kuma mvindu.”

14 Yo yina Agai tubaka nde: “‘Yai mutindu bantu yai kele, mpi yai mutindu dikanda yai kele na ntwala na mono,’ Yehowa muntu me tuba, ‘mpi yai mutindu kisalu yonso ya maboko na bo kele; konso kima yina bo ke pesa kuna kele mvindu.’

15 “‘Kansi ntangu yai, pardo, beno tula ntima na beno na* diambu yai katuka bubu tii kuna: Na ntwala nde bo tula ditadi mosi na zulu ya ditadi ya nkaka na tempelo ya Yehowa,+ 16 yo vandaka nki mutindu? Ntangu muntu vandaka kukwisa kisika kita ya bambuma vandaka ti kivuvu nde yandi ta baka bitesilu 20 ya bambuma, yo vandaka kaka 10; mpi ntangu muntu vandaka kukwisa na kikamuninu ya vinu sambu na kubaka bitesilu 50 ya vinu, yo vandaka kaka 20;+ 17 mono bulaka beno—bisalu yonso ya maboko na beno—ti mwini ya ngolo, lubungi,+ mpi mvula ya matadi, kansi ata muntu mosi ve vutukilaka mono,’ Yehowa muntu me tuba.

18 “‘Pardo, beno tula ntima na beno na* diambu yai katuka bubu tii kuna, yantika na kilumbu ya 24 ya ngonda ya uvwa, yantika kilumbu yina bo tulaka fondasio ya tempelo ya Yehowa;+ beno tula ntima na beno na diambu yai: 19 Keti nkeni kele kaka na nzo ya kubumbila bima?*+ Nti ya vinu, ya bafige, ya bagrenade, mpi ya olive—keti yo me basisa ntete ve bambuma? Yantika bubu yai mono ta tinda lusakumunu.’”+

20 Ndinga ya Yehowa kwisilaka Agai na mbala ya zole na kilumbu ya 24 ya ngonda+ yina nde: 21 “Tubila Zorobabele mfumu ya mbanza ya Yuda nde, ‘Mono ta nikisa zulu mpi ntoto.+ 22 Mono ta bwisa bakiti ya bimfumu mpi mono ta manisa ngolo ya bimfumu ya makanda;+ mono ta bwisa pusu-pusu ti bantu yina ke tambusa yo, mpi bampunda ti bantu yina ke tambusa yo ta fwa, konso muntu na mbele ya bitumba ya mpangi na yandi.’”+

23 “‘Na kilumbu yina,’ Yehowa ya makesa muntu me tuba, ‘Mono ta baka nge nsadi na mono Zorobabele,+ mwana ya Shealtiele,’+ Yehowa muntu me tuba, ‘mpi mono ta kumisa nge bonso lupetu ya kubudila kashe, sambu nge kele muntu yina mono me sola,’ Yehowa ya makesa muntu me tuba.”