ZEKARIA
1 Na ngonda ya nana, na mvula ya zole ya Dariusi,+ ndinga ya Yehowa kwisilaka mbikudi Zekaria*+ mwana ya Berekia mwana ya Ido nde: 2 “Yehowa wilaka batata na beno+ makasi ya ngolo kibeni.
3 “Tubila bo nde, ‘Yehowa ya makesa ke tuba nde: “‘Beno vutukila mono,’ Yehowa ya makesa muntu me tuba, ‘ebuna mono ta vutukila beno,’+ Yehowa ya makesa muntu me tuba.”’
4 “‘Beno kuma ve bonso batata na beno, yina bambikudi ya ntama songaka nde: “Yehowa ya makesa ke tuba nde, ‘Pardo, beno yambula banzila na beno ya mbi mpi bisalu na beno ya mbi.’”’+
“‘Kansi bo waka ve, mpi bo tudilaka mono ve dikebi,’+ Yehowa muntu me tuba.
5 “‘Batata na beno kele na wapi ntangu yai? Keti bambikudi zingaka kimakulu? 6 Kansi mambu yina mono tubaka mpi bantuma na mono yina mono pesaka bansadi na mono bambikudi, keti yo kuminaka ve batata na beno?’+ Yo yina, bo vutukilaka mono mpi bo tubaka nde: ‘Yehowa ya makesa me sadila beto mambu na kulanda banzila na beto mpi bisalu na beto, kaka mutindu yandi vandaka ti lukanu ya kusala.’”+
7 Na kilumbu ya 24 ya ngonda ya 11, disongidila, ngonda ya Shebati,* na mvula ya zole ya Dariusi,+ ndinga ya Yehowa kwisilaka mbikudi Zekaria mwana ya Berekia mwana ya Ido nde: 8 “Mono monaka mbona-meso mosi na mpimpa. Muntu mosi vandaka kutambusa mpunda ya mbwaki, mpi yandi telamaka na kati ya banti ya mirte kuna na dibengi; mpi na nima na yandi kuvandaka ti bampunda ya mbwaki, bampunda ya mwa-mbwaki mpi mwa-ndombe, mpi bampunda ya mpembe.”
9 Ebuna mono tubaka nde: “Mfumu na mono, bayai banani?”
Wanzio yina vandaka kusolula ti mono vutulaka nde: “Mono ta songa nge kana bo kele banani.”
10 Ebuna muntu yina telamaka na kati ya banti ya mirte tubaka nde: “Bo kele bantu yina Yehowa me tinda sambu na kutambula na ntoto.” 11 Mpi bo tubilaka wanzio ya Yehowa yina telamaka na kati ya banti ya mirte nde: “Beto me tambula na ntoto, mpi tala! ntoto ya mvimba kele pima mpi na ngemba.”+
12 Ebuna wanzio ya Yehowa tubaka nde: “O Yehowa ya makesa, tii nki ntangu nge ta wa ve mawa sambu na Yeruzalemi mpi bambanza ya Yuda,+ yina nge me wilaka makasi bamvula 70 yai?”+
13 Yehowa pesaka wanzio yina vandaka kusolula ti mono mvutu, na bangogo ya mbote mpi ya ke lembika. 14 Ebuna wanzio yina vandaka kusolula ti mono songaka mono nde: “Tuba na ndinga ya ngolo nde, ‘Yehowa ya makesa ke tuba nde: “Mono kele ti kikesa ya mingi kibeni sambu na Yeruzalemi mpi Sioni.+ 15 Mono kele ti makasi ya ngolo sambu na makanda yina ke zinga na ngemba,+ sambu mono waka makasi na kiteso ya fioti,+ kansi bo kumisaka mpasi yina mingi.”’+
16 “Yo yina, Yehowa ke tuba nde: ‘“Mono ta kwisa kuvutuka na Yeruzalemi ti mawa,+ mpi bo ta tunga nzo na mono na kati ya Yeruzalemi,”+ Yehowa ya makesa muntu me tuba, “mpi bo ta tandula nsinga ya kutesila na zulu ya Yeruzalemi.”’+
17 “Tuba diaka na ndinga ya ngolo nde, ‘Yehowa ya makesa ke tuba nde: “Bambanza na mono ta fuluka diaka ti bumbote; Yehowa ta lembika diaka Sioni+ mpi ta sola diaka Yeruzalemi.”’”+
18 Na nima mono talaka na zulu mpi mono monaka bibongo iya.+ 19 Ebuna mono yulaka wanzio yina vandaka kusolula ti mono nde: “Yai nki?” Yandi vutulaka nde: “Yo kele bibongo yina panzaka Yuda,+ Izraele,+ mpi Yeruzalemi.”+
20 Na nima Yehowa songaka mono bantu iya yina ke salaka bisalu ya maboko. 21 Mono yulaka nde: “Bantu yai ke kwisa kusala nki?”
Yandi tubaka nde: “Yo kele bibongo yina panzaka Yuda na kiteso yina salaka nde ata muntu mosi ve kukaka kutedimisa ntu na yandi. Bibongo yina ya nkaka ta kwisa sambu na kupesa bo boma, sambu na kubwisa bibongo ya makanda yina nangudilaka insi ya Yuda bibongo na yo, sambu na kupanza yo.”
2 Mono talaka mpi mono monaka muntu mosi yina vandaka ti nsinga ya kutesila+ na diboko na yandi. 2 Mono yulaka nde: “Nge ke kwenda na wapi?”
Yandi vutulaka nde: “Mono ke kwenda kutesa Yeruzalemi, sambu na kuzaba nene na yo mpi nda na yo.”+
3 Mpi tala! wanzio yina vandaka kusolula ti mono kwendaka, mpi wanzio ya nkaka kwisaka kukutana ti mono. 4 Ebuna yandi tubilaka yandi nde: “Kwenda ntinu kuna mpi zabisa leke yina ya bakala nde, ‘“Bantu ta zinga na Yeruzalemi+ bonso na mbanza yina kele ve ti bibaka,* sambu bantu mpi bitwisi yina kele na kati na yo ta kuma mingi.+ 5 Mpi mono ta kuma sambu na yandi,” Yehowa muntu me tuba, “kibaka ya tiya na nziunga na yandi,+ mpi mono ta kuma nkembo na kati na yandi.”’”+
6 “Beno kwisa! Beno kwisa! Beno tina insi ya nordi,”+ Yehowa muntu me tuba.
“Sambu mono me panzaka beno na mipepe iya ya zulu,”+ Yehowa muntu me tuba.
7 “Sioni kwisa! Tina, nge muntu ke zingaka ti mwana-nkento ya Babilone.+ 8 Sambu yai mambu yina Yehowa ya makesa ke tuba, yina na nima ya kubaka nkembo* me tinda mono na makanda yina vandaka kubotula beno bima:+ ‘Muntu yina ke simba beno ke simba mbuma ya disu na mono.+ 9 Sambu ntangu yai mono ta nikisila bo diboko na mono, mpi bo ta kuma bima ya kubotula sambu na bampika na bo mosi.’+ Ebuna beno ta zaba kibeni nde Yehowa ya makesa muntu me tinda mono.
10 “Tula milolo ya kiese, O mwana-nkento ya Sioni;+ sambu mono ke kwisa,+ mpi mono ta zinga na kati na nge,”+ Yehowa muntu me tuba. 11 “Makanda mingi ta kwisa kuvukana na Yehowa na kilumbu yina,+ mpi bo ta kuma bantu na mono; ebuna mono ta zinga na kati na nge.” Mpi nge ta zaba kibeni nde Yehowa ya makesa muntu me tinda mono na nge. 12 Yehowa ta baka Yuda bonso dikabu na yandi na ntoto ya santu, mpi yandi ta sola diaka Yeruzalemi.+ 13 Bantu* yonso, beno vanda pima na ntwala ya Yehowa, sambu yandi ke sala mambu katuka na kisika na yandi ya santu.
3 Mpi yandi songaka mono nganga-nzambi ya nene Yozue+ me telama na ntwala ya wanzio ya Yehowa, mpi Satana+ telamaka na diboko ya kitata ya Yozue sambu na kunwanisa yandi. 2 Ebuna wanzio ya Yehowa tubilaka Satana nde: “O Satana,+ bika Yehowa kunganina nge, ee, bika Yehowa, yina me solaka Yeruzalemi,+ kunganina nge! Keti muntu yai kele ve kitini mosi ya nti ya ke pela yina bo me katula na tiya?”
3 Kansi, Yozue lwataka bilele ya mvindu mpi yandi telamaka na ntwala ya wanzio. 4 Wanzio tubilaka bantu yina telamaka na ntwala na yandi nde, “Beno katula yandi bilele na yandi ya mvindu.” Ebuna yandi tubilaka Yozue nde, “Tala, mono me katula kifu* na nge, mpi bo ta lwatisa nge bilele ya kitoko.”*+
5 Yo yina mono tubaka nde: “Bika bo lwatisa yandi tirbani ya bunkete na ntu.”+ Bo lwatisaka yandi tirbani ya bunkete na ntu mpi lwatisaka yandi bilele; mpi wanzio ya Yehowa telamaka pene-pene. 6 Na nima wanzio ya Yehowa tubilaka Yozue nde: 7 “Yehowa ya makesa ke tuba nde, ‘Kana nge tambula na banzila na mono mpi nge lungisa mikumba na nge na ntwala na mono, nge ta vanda zuzi na nzo na mono+ mpi nge ta kebaka* bibansala na mono; ebuna mono ta pesa nge nswa ya kuvanda na kati ya bantu yai ya me telama awa.’
8 “‘Pardo, wa, O Yozue Nganga-Nzambi ya Nene, nge ti banduku na nge yina me vanda na ntwala na nge, sambu bantu yai kele kidimbu; tala! mono ke kwisa kukotisa nsadi na mono+ Lutangu!+ 9 Tala ditadi yina mono me tula na ntwala ya Yozue! Meso nsambwadi kele na zulu ya ditadi yina; mpi mono ke sonika bisono na zulu na yo,’ Yehowa ya makesa muntu me tuba, ‘mpi mono ta katula kifu ya insi yina na kilumbu mosi.’+
10 “‘Na kilumbu yina,’ Yehowa ya makesa muntu me tuba, ‘konso muntu ta binga nkweno na yandi sambu yandi kwisa na nsi ya nti na yandi ya vinu mpi na nsi ya nti na yandi ya bafige.’”+
4 Wanzio yina vandaka kusolula ti mono kwisaka kuvutuka mpi tedimisaka mono, mutindu bo ke tedimisaka muntu na mpongi. 2 Ebuna yandi tubilaka mono nde: “Nge ke mona nki?”
Mono tubaka nde: “Mono ke mona kima ya kutudila minda ya bo me sala ya mvimba na wolo,+ mpi bolo mosi kele na nsongi na yo. Yo kele ti minda nsambwadi na zulu na yo,+ ee, nsambwadi, mpi minda yina kele na zulu na yo kele ti batiyo nsambwadi. 3 Mpi banti zole ya olive kele na lweka na yo,+ nti mosi na diboko ya kitata ya bolo yina mpi nti ya nkaka na diboko ya kimama.”
4 Ebuna mono yulaka wanzio yina vandaka kusolula ti mono nde: “Mfumu na mono, bima yai ke tendula inki?” 5 Wanzio yina vandaka kusolula ti mono yulaka nde: “Keti nge ke zaba ve kana bima yai ke tendula inki?”
Mono vutulaka nde: “Ve, mfumu na mono.”
6 Ebuna yandi tubilaka mono nde: “Yehowa ke tubila Zorobabele nde: ‘“Na kimvuka ya basoda ve, na ngolo ve,+ kansi na mpeve na mono,”+ Yehowa ya makesa muntu me tuba. 7 Nge kele nani, O ngumba ya nene? Na ntwala ya Zorobabele+ nge ta kuma ntoto ya kukonda ngumba.*+ Mpi yandi ta basisa ditadi ya zulu* mpi bantu ta tuba nde: “Yo kele kitoko kibeni! Yo kele kitoko kibeni!”’”
8 Ndinga ya Yehowa kwisilaka mono diaka nde: 9 “Maboko ya Zorobabele me tula fondasio ya nzo yai,+ mpi maboko na yandi ta manisa yo.+ Mpi nge ta zaba nde Yehowa ya makesa muntu me tinda mono na beno. 10 Sambu nani me vweza kilumbu ya luyantiku ya fioti?*+ Sambu bo ta wa kiese mpi ta mona nsinga ya bamaso* na diboko ya Zorobabele. Meso nsambwadi yai kele meso ya Yehowa, yina ke tambulaka na ntoto ya mvimba.”+
11 Ebuna mono yulaka yandi nde: “Banti yai zole ya olive ya kele na diboko ya kitata mpi ya kimama ya kima ya kutudila minda ke tendula inki?”+ 12 Mono yulaka yandi na mbala ya zole nde: “Mabuki zole ya balutangu ya banti ya olive* ya kele ti batiyo zole ya wolo yina ke tiamuna mafuta ya wolo ke tendula inki?”
13 Yandi yulaka mono nde: “Keti nge ke zaba ve ntendula ya bima yai?”
Mono vutulaka nde: “Ve, mfumu na mono.”
14 Yandi tubaka nde: “Yai bantu zole yina bo me tulaka mafuta yina ke telamaka na lweka ya Mfumu ya ntoto ya mvimba.”+
5 Mono talaka diaka, mpi mono monaka rulo mosi ke pumbuka. 2 Yandi yulaka mono nde: “Nge ke mona nki?”
Mono vutulaka nde: “Mono ke mona rulo mosi ke pumbuka; nda na yo maboko* 20 mpi nene na yo maboko 10.”
3 Ebuna yandi tubilaka mono nde: “Yai lusingu yina ke kwenda na ntoto ya mvimba, sambu konso muntu yina ke yiba,+ mutindu bo me sonika na ndambu na yo mosi, bo ke pesa yandi ve ndola; mpi konso muntu yina ke dia ndefi,+ mutindu bo me sonika na ndambu na yo ya nkaka, bo ke pesa yandi ve ndola. 4 ‘Mono muntu me tinda yo,’ Yehowa ya makesa muntu me tuba, ‘mpi yo ta kota na nzo ya muyibi mpi na nzo ya muntu yina ke dia ndefi ya luvunu na zina na mono; ebuna yo ta bikala na kati ya nzo yina mpi yo ta dia yo, mabaya na yo, mpi matadi na yo.’”
5 Ebuna wanzio yina vandaka kusolula ti mono kwisaka na ntwala mpi tubilaka mono nde: “Pardo, tombula meso mpi tala kima yina ke basika.”
6 Mono yulaka nde: “Yai inki?”
Yandi vutulaka nde: “Yai kele efa* yina ke basika.” Yandi yikaka nde: “Yai mutindu yo ke monana na ntoto ya mvimba.” 7 Mpi mono monaka nde bo me nangula mufiniku ya plomb yina vandaka bonso dimbuma, mpi nkento mosi vandaka ya kuvanda na kati ya efa yina. 8 Yo yina yandi tubaka nde: “Yai Mambi.” Ebuna yandi losaka diaka nkento yina na kati ya efa yina, na nima yandi losaka plomb yina vandaka kizitu na munoko na yo.
9 Ebuna mono talaka mpi mono monaka bankento zole ke kwisa na ntwala; bo vandaka kupumbuka na mupepe. Bo vandaka ti mapapu bonso mapapu ya mubila. Mpi bo nangulaka efa yina na kati-kati ya zulu mpi ntoto. 10 Mono yulaka wanzio yina vandaka kusolula ti mono nde: “Bo ke nata efa na wapi?”
11 Yandi vutulaka nde: “Na ntoto ya Shinare*+ sambu na kutungila yandi nzo; ntangu bo ta yidika yo, bo ta tulula yandi kuna na kisika na yandi mosi.”
6 Na nima mono talaka diaka mpi mono monaka bapusu-pusu iya ke kwisa kubasika na kati-kati ya bangumba zole, mpi bangumba yina vandaka ya kwivre. 2 Pusu-pusu ya ntete vandaka ti bampunda ya mbwaki, mpi pusu-pusu ya zole vandaka ti bampunda ya ndombe.+ 3 Pusu-pusu ya tatu vandaka ti bampunda ya mpembe, mpi pusu-pusu ya iya vandaka ti bampunda ya matono-matono.+
4 Mono yulaka wanzio yina vandaka kusolula ti mono nde: “Mfumu na mono, yai inki?”
5 Wanzio vutudilaka mono nde: “Yai kele bampeve iya+ ya zulu yina ke basika na nima ya kumonika na ntwala ya Mfumu ya ntoto ya mvimba.+ 6 Yina* kele ti bampunda ya ndombe ke basika mpi ke kwenda na insi ya nordi;+ bampunda ya mpembe ke basika mpi ke kwenda tii na simu ya nzadi-mungwa; mpi bampunda ya matono-matono ke basika mpi ke kwenda na insi ya sudi. 7 Bampunda ya matono-matono vandaka na nzala ya ngolo ya kubasika sambu na kutambula na ntoto.” Ebuna yandi tubaka nde: “Beno kwenda, beno tambula na ntoto.” Mpi bo yantikaka kutambula na ntoto.
8 Na nima yandi bingaka mono na ndinga ya ngolo mpi tubaka nde: “Tala, bampunda yina ke kwenda na insi ya nordi me sala nde mpeve ya Yehowa kupema na insi ya nordi.”
9 Ndinga ya Yehowa kwisilaka mono diaka nde: 10 “Baka na maboko ya Eldai, Tobiya, mpi Yedaya bima yina bo bakaka na bantu yina kwendaka na insi ya nkaka; mpi na kilumbu yina, nge fwete kwenda na nzo ya Yoziasi mwana ya Sefania kumosi ti bantu yai ya me katuka na Babilone. 11 Nge fwete baka arza ti wolo, mpi nge fwete sala mpu ya kimfumu* ebuna nge fwete tula yo na ntu ya Yozue+ mwana ya Yehosadaki, nganga-nzambi ya nene. 12 Tubila yandi nde,
“‘Yehowa ya makesa ke tuba nde: “Muntu yai zina na yandi Lutangu.+ Yandi ta mena na kisika na yandi, mpi yandi ta tunga tempelo ya Yehowa.+ 13 Yandi muntu ta tunga tempelo ya Yehowa, mpi yandi muntu ta baka lukumu. Yandi ta vanda na kiti na yandi ya kimfumu mpi ta yala; yandi ta vanda mpi nganga-nzambi na kiti na yandi ya kimfumu,+ mpi kuwakana ya ngemba ta vanda na kati ya yonso zole.* 14 Mpi mpu ya kimfumu* ta bikala na tempelo ya Yehowa sambu na kuyibuka* Elemi, Tobiya, Yedaya,+ mpi Eni mwana ya Sefania. 15 Bantu yina kele ntama ta kwisa mpi ta vukana na kutunga tempelo ya Yehowa.” Mpi beno ta zaba nde Yehowa ya makesa muntu me tinda mono na beno. Mpi yo ta salama—kana beno wa ndinga ya Yehowa Nzambi na beno.’”
7 Na mvula ya iya ya ntotila Dariusi, ndinga ya Yehowa kwisilaka Zekaria+ na kilumbu ya iya ya ngonda ya uvwa, disongidila, ngonda ya Kislevi.* 2 Bantu ya Betele tindaka Sharesere mpi Regemi-meleki ti bantu na yandi sambu na kubondila Yehowa yandi wila bo mawa, 3 bo tubilaka banganga-nzambi ya nzo* ya Yehowa ya makesa mpi bambikudi nde: “Keti beto* fwete dila na ngonda ya tanu+ mpi kubuya madia, mutindu beto ke salaka yo katuka bamvula mingi?”
4 Ndinga ya Yehowa ya makesa kwisilaka mono diaka nde: 5 “Tubila bantu yonso ya insi mpi banganga-nzambi nde, ‘Ntangu beno buyaka madia mpi dilaka na ngonda ya tanu mpi na ngonda ya nsambwadi+ na nsungi ya bamvula 70,+ keti beno buyaka kibeni madia sambu na mono? 6 Mpi ntangu beno vandaka kudia mpi kunwa, keti beno vandaka ve kudia mpi kunwa sambu na beno mosi? 7 Keti beno fwete lemfuka ve na mambu yina Yehowa tubaka na nzila ya bambikudi ya ntama,+ ntangu bantu vandaka kuzinga na Yeruzalemi ti na bambanza yina vandaka na nziunga na yo mpi bo vandaka na ngemba, mpi ntangu bantu vandaka kuzinga na Negebi ti na Shefela?’”
8 Ndinga ya Yehowa kwisilaka diaka Zekaria nde: 9 “Yehowa ya makesa ke tuba nde, ‘Beno sambisa ti lunungu ya kieleka,+ mpi beno sadilana mambu ti zola ya kwikama+ mpi mawa. 10 Beno sadila ve luvunu sambu na kubaka bima ya mufwidi ya nkento to ya mwana ya me konda tata,*+ ya munzenza+ to ya nsukami;+ mpi beno kana ve na kusalana mbi na bantima na beno.’+ 11 Kansi bo landaka kubuya na kutula dikebi;+ bo pesaka yandi mukongo na ntu-ngolo yonso,+ mpi bo kangaka makutu sambu na kuwa ve.+ 12 Bo kumisaka bantima na bo bonso diama*+ mpi bo vandaka kuzitisa ve nsiku* mpi mambu yina Yehowa ya makesa tindaka na mpeve na yandi na nzila ya bambikudi ya ntama.+ Yo yina Yehowa ya makesa waka makasi mingi.”+
13 “‘Kaka mutindu bo waka ve ntangu mono* bingaka,+ mutindu mosi mpi mono waka ve ntangu bo vandaka kubinga,’+ Yehowa ya makesa muntu me tuba. 14 ‘Mpi mono panzaka bo ti mupepe ya ngolo na makanda yonso yina bo zabaka ve,+ mpi insi bikalaka mpamba na nima na bo, muntu mosi ve vandaka kuluta to kuvutuka;+ sambu bo kumisaka insi ya kitoko kima ya ke pesa boma.’”
8 Ndinga ya Yehowa ya makesa kwisilaka mono diaka nde: 2 “Yehowa ya makesa ke tuba nde, ‘Mono ta vanda ti kikesa ya mingi kibeni sambu na Sioni,+ mpi ti makasi ya ngolo mono ta vanda ti kikesa sambu na yandi.’”
3 “Yehowa ke tuba nde, ‘Mono ta vutuka na Sioni+ ebuna mono ta zinga na Yeruzalemi;+ bo ta bingaka Yeruzalemi mbanza ya kieleka,*+ mpi ngumba ya Yehowa ya makesa, ngumba ya santu.’”+
4 “Yehowa ya makesa ke tuba nde, ‘Minunu ya babakala ti ya bankento ta vandaka diaka na babala-bala ya nene ya Yeruzalemi, konso muntu ti nti na yandi na diboko sambu na mvula na yandi ya mingi.*+ 5 Mpi babala-bala ya nene ya mbanza ta fuluka ti baleke ya babakala mpi ya bankento yina ke sakana kuna.’”+
6 “Yehowa ya makesa ke tuba nde, ‘Ata yo lenda monana diambu ya mpasi mingi sambu na bantu ya me bikala na kati ya bantu yai na bilumbu yina, keti yo ta monana mpi diambu ya mpasi mingi sambu na mono?’ Yehowa ya makesa muntu me tuba.”
7 “Yehowa ya makesa ke tuba nde, ‘Mono ke gulusa bantu na mono na bansi ya esti mpi ya westi.*+ 8 Mono ta kotisa bo, mpi bo ta zinga na Yeruzalemi;+ bo ta kuma bantu na mono, mpi mono ta kuma Nzambi+ na bo na kieleka* mpi na lunungu.’”
9 “Yehowa ya makesa ke tuba nde, ‘Bika maboko na beno kuvanda ngolo,*+ beno bantu yina ke wa ntangu yai mambu yai na munoko ya bambikudi,+ mambu ya kiteso mosi yina bo tubaka na kilumbu yina bo tulaka fondasio ya nzo ya Yehowa ya makesa sambu na kutunga tempelo. 10 Sambu na ntwala ya ntangu yina, bo vandaka ve kupesa muntu to mbisi lufutu;+ mpi yo vandaka kigonsa na kukwisa mpi kukwenda sambu na mbeni, sambu mono salaka nde bantu yonso kumengana.’
11 “‘Kansi ntangu yai mono ta sadila ve bantu ya me bikala na kati ya bantu yai mambu bonso na bilumbu ya ntama,’+ Yehowa ya makesa muntu me tuba. 12 ‘Sambu bo ta kuna nkeni ya ngemba; nti ya vinu ta buta mbuma na yo mpi ntoto ta basisa bima na yo,+ ebuna zulu ta pesa malulu na yo; mpi bo ta sala nde bantu ya me bikala na kati ya bantu yai kubaka bima yai yonso.+ 13 Mutindu beno kumaka kima ya bo me singa na kati ya makanda,+ O nzo ya Yuda mpi nzo ya Izraele, mono ta gulusa beno, mpi beno ta kuma lusakumunu.+ Beno wa boma ve!+ Bika maboko na beno kuvanda ngolo.’*+
14 “Sambu Yehowa ya makesa ke tuba nde, ‘“Mutindu mono vandaka na lukanu ya kunatila beno mpasi sambu ba-nkaka na beno pesaka mono makasi,” Yehowa ya makesa muntu ke tuba, “mpi mono waka ve mawa,+ 15 ntangu yai, mono kele ti lukanu ya kusadila Yeruzalemi mpi nzo ya Yuda+ mambu ya mbote. Beno wa boma ve!”’+
16 “‘Yai mambu ya beno fwete sala: Konso muntu kutubila mpangi na yandi kieleka,+ mpi mutindu beno ke zenga mambu na bakielo ya bambanza na beno fwete siamisa kieleka mpi ngemba.+ 17 Beno kana ve na kusalana mbi na bantima na beno,+ mpi beno zola ve ndefi ya luvunu;+ sambu yai yonso kele mambu ya mono ke mengaka,’+ Yehowa muntu me tuba.”
18 Ndinga ya Yehowa ya makesa kwisilaka mono diaka nde: 19 “Yehowa ya makesa ke tuba nde, ‘Kubuya madia ya ngonda ya iya,+ kubuya madia ya ngonda ya tanu,+ kubuya madia ya ngonda ya nsambwadi,+ mpi kubuya madia ya ngonda ya kumi+ ta vanda bantangu ya kuyangalala mpi ya kiese sambu na nzo ya Yuda—bankinsi ya kuyangalala.+ Yo yina beno zola kieleka mpi ngemba.’
20 “Yehowa ya makesa ke tuba nde, ‘Yo ta salama diaka nde bantu ya makanda mpi bantu ya bambanza mingi ta kwisa; 21 mpi bantu ya mbanza mosi ta kwenda na bantu ya mbanza ya nkaka mpi ta tuba nde: “Beto kwenda kubondila* Yehowa na masonga yonso sambu yandi wila beto mawa mpi beto sosa Yehowa ya makesa. Mono ke kwenda mpi.”+ 22 Bantu mingi mpi makanda ya ngolo ta kwisa kusosa Yehowa ya makesa na Yeruzalemi+ mpi bo ta bondila* Yehowa sambu yandi wila bo mawa.’
23 “Yehowa ya makesa ke tuba nde, ‘Na bilumbu yina bantu kumi ya bandinga yonso ya makanda+ ta simba, ee, bo ta simba ngolo mvwela* ya Muyuda mosi,* mpi bo ta tuba nde: “Beto ke zola kukwenda ti beno,+ sambu beto me wa nde Nzambi kele ti beno.”’”+
9 Nsangu:
“Ndinga ya Yehowa ke bedisa insi ya Adraki,
Mpi Damasi kele mbanza yina yo ke kana kuta*+
—Sambu meso ya Yehowa kele na zulu ya bantu+
Mpi na zulu ya makanda yonso ya Izraele—
2 Mpi yo ke bedisa Amati,+ yina kele pene-pene na yo,
Mpi yo ke bedisa Tire+ ti Sidoni,+ sambu yo kele mayele mingi.+
3 Tire kuditungilaka mwa ngumba ya ntoto.*
Yo kutikaka arza bonso mfututu
Mpi wolo bonso mvindu ya babala-bala.+
5 Ashkeloni ta mona yo mpi ta wa boma;
Gaza ta wa mpasi ya ngolo,
Ti Ekroni mpi, sambu bo me pesa kivuvu na yo nsoni.
Ntotila mosi ta fwa na Gaza,
Mpi bantu ta zinga ve na Ashkeloni.+
7 Mono ta katula na munoko na yandi bima yina kele ti matono ya menga
Mono ta katula bima ya nzanzi na meno na yandi,
Mpi yandi ta bikala sambu na Nzambi na beto;
Yandi ta kuma bonso mfumu mosi na Yuda,+
Mpi Ekroni ta kuma bonso muntu ya Yebusi.+
8 Mono ta telama bonso nkengidi* sambu na nzo na mono,+
Na mpila nde muntu mosi ve ta luta mpi muntu mosi ve ta vutuka kuna;
Mpi kapita mosi ve* ta luta diaka kuna,+
Sambu ntangu yai, mono me mona yo* na meso na mono.
9 O mwana-nkento ya Sioni, yangalala mingi.
Tula milolo ya kununga, O mwana-nkento ya Yeruzalemi.
Tala! Ntotila na nge ke kwisa na nge.+
Yandi kele muntu ya lunungu, yandi ke gulusaka,*
Yandi kele muntu ya kudikulumusa+ mpi yandi ke tambusa mpunda,
Na zulu ya mwana-mpunda ya bakala, mwana ya mpunda ya nkento.+
10 Mono ta katula pusu-pusu ya bitumba na Efrayimi
Mpi mono ta katula mpunda na Yeruzalemi.
Bo ta katula munduki ya tolo-tolo ya bitumba.
Mpi yandi ta zabisa ngemba na makanda;+
Luyalu na yandi ta vanda katuka na nzadi-mungwa tii na nzadi-mungwa
11 Kansi nge, O nkento, na menga ya kuwakana na nge,
Mono ta tinda bantu na kubasisa bantu na nge ya boloko na dibulu yina me konda masa.+
12 Beno bantu ya boloko yina kele ti kivuvu, beno vutuka na kisika ya ngolo ya lutaninu.+
Bubu mono ke zabisa nge nde,
‘O nkento, mono ta futa nge makabu zole.+
13 Sambu mono ta konika* Yuda bonso munduki na mono ya tolo-tolo.
Mono ta baka Efrayimi bonso tolo-tolo sambu na munduki ya tolo-tolo,
Mpi mono ta tedimisa bana na nge, O Sioni,
Sambu na kunwanisa bana na nge, O Grese,
Mpi mono ta kumisa nge bonso mbele ya bitumba ya soda.’
14 Yehowa ta monana na zulu na bo,
Mpi tolo-tolo na yandi ta basika bonso nzasi.
Yehowa Mfumu ya Kuluta Nene ta bula kibongo,+
Mpi yandi ta kwenda na ntwala ti mipepe ya ngolo ya sudi.
15 Yehowa ya makesa ta nwanina bo,
Ebuna bo ta dia mpi ta niata matadi ya lanse.+
Bo ta nwa mpi bo ta tula makelele, bonso nde bo me lawuka vinu;
Mpi bo ta fuluka bonso bolo,
Bonso binkonko ya mesa-kimenga.+
16 Yehowa Nzambi na bo ta gulusa bo na kilumbu yina
Bonso kimvuka ya bantu na yandi;+
Sambu bo ta vanda bonso matadi ya ntalu ya mpu ya kimfumu yina ke sema na ntoto na yandi.+
17 Sambu bumbote na yandi kele nene kibeni,+
Mpi kitoko na yandi kele mingi kibeni!
Mbuma ta sala nde baleke ya babakala kutoma,
Mpi vinu ya mpa ta sala nde bamwense kutoma.”+
10 “Beno lomba Yehowa mvula na ntangu ya mvula ya nsuka.
Yehowa muntu ke salaka matuti ya mvula ya mupepe ya ngolo,
Yandi muntu ke nokisilaka bo mvula,+
Mpi ke pesaka bantu yonso bima ya bilanga.
2 Sambu biteki ya terafimi* me tuba mambu ya luvunu;*
Mpi banganga-ngombo me mona diambu ya luvunu na mbona-meso.
Bo ke tubila bambona-meso ya kukonda mfunu,
Mpi bo ke meka kulembika bantu kansi mpamba.
Yo yina bo ta yungana bonso mameme.
Bo ta mona mpasi, sambu ngungudi kele ve.
3 Mono me wila bangungudi makasi ya ngolo,
Mpi mono ta sambisa bantwadisi* ya nku;
Sambu Yehowa ya makesa me tula dikebi na mameme na yandi,+ na nzo ya Yuda,
Mpi yandi me kumisa bo bonso mpunda na yandi ya lukumu na bitumba.
4 Muntu ya nene* me basika na kati na yandi,
Ntwadisi* yina ke pesa maboko me basika na kati na yandi,
Munduki ya tolo-tolo ya bitumba me basika na kati na yandi;
Bankengi yonso,* bo yonso na kimvuka, me basika na kati na yandi.
5 Bo ta kuma bonso basoda,
Yina ke niata-niata poto-poto ya babala-bala na bitumba.
6 Mono ta kumisa nzo ya Yuda ngolo,
Mpi mono ta gulusa nzo ya Yozefi.+
Mono ta vutula bo,
Sambu mono ta wila bo mawa;+
Mpi bo ta vanda bonso nde mono me buyaka bo ntete ve;+
Sambu mono kele Yehowa Nzambi na bo, mpi mono ta pesa bo mvutu.
7 Bantu ya Efrayimi fwete kuma bonso soda ya ngolo,
Mpi ntima na bo ta vanda na kiese bonso nde bo me nwa vinu.+
Bana na bo ta mona yo mpi ta wa kiese;
Ntima na bo ta yangalala na Yehowa.+
8 ‘Mono ta budila bo mwita mpi ta vukisa bo;
Sambu mono ta sumba bo diaka,+ ebuna bo ta kuma mingi,
Mpi bo ta landa kuvanda mingi.
9 Ata mono ke panza bo bonso nkeni na kati ya bantu,
Bo ta yibuka mono na bisika ya ntama;
Bo ta baka diaka ngolo mpi ta vutuka, bo ti bana na bo.
10 Mono ta katula bo na insi ya Ezipte mpi ta vutula bo
Mpi mono ta katula bo na Asiria mpi ta vukisa bo;+
Mono ta nata bo na ntoto ya Gileadi+ mpi ya Libani,
Mpi kisika ta vanda diaka ve sambu na bo.+
11 Yandi fwete luta na nzadi-mungwa na mpasi;
Mpi yandi ta manisa bitembo na nzadi-mungwa;+
Bisika yonso ya midindu ya Nile ta yuma.
Bo ta kulumusa lulendo ya Asiria,
Mpi muhangu ya Ezipte ta katuka.+
12 Mono mosi, Yehowa,+ ta kumisa bo ngolo,
Mpi bo ta tambula na zina na yandi,’+ Yehowa muntu me tuba.”
11 “O Libani, kangula bakielo na nge,
Sambu tiya kuyoka banti na nge ya sedre.
2 O nti ya yenevriye, dila sambu nti ya sedre me bwa;
Bo me bwisa banti ya lukumu!
Beno banti ya shene ya Bashani, beno dila,
Sambu bo me bwisa mfinda ya me kangama-kangamaka!
3 Wa! Bangungudi ke dila,
Sambu lukumu na bo me mana.
Wa! Kungana ya bana-bantambu,*
Sambu bo me fwa tu-bamfinda ya me kangama-kangamaka ya kele na lweka ya Yordani.
4 “Yehowa Nzambi na mono ke tuba nde, ‘Gungula mameme yina bo fwete fwa,+ 5 yina bantu yina sumbaka yo ke fwaka yo+ kansi bo ke zengaka ve nde bo me sala mbi. Ebuna bantu yina ke teka yo+ ke tuba nde, “Bika Yehowa kubaka lukumu, sambu mono ta kuma mvwama.” Mpi bangungudi na yo ke wila yo ve mawa.’+
6 “‘Sambu mono ta wila diaka ve bantu ya insi yai mawa,’ Yehowa muntu me tuba. ‘Yo yina mono ta sala nde konso muntu kubwa na maboko ya nkweno na yandi mpi ya ntotila na yandi; bo ta bebisa insi yai, mpi mono ta katula bo ve na maboko na bo.’”
7 Mpi mono yantikaka kugungula mameme yina bo fwete fwa,+ sambu na beno, O beno bantu ya kimvuka ya mameme, beno bantu yina ke mona mpasi. Yo yina mono bakaka banti zole, mono pesaka nti mosi zina Kiese, mpi nti ya nkaka Bumosi,+ ebuna mono yantikaka kugungula mameme. 8 Mono katulaka bangungudi tatu na ngonda mosi, sambu mono* vandaka kukangila bo diaka ve ntima, mpi bo* vandaka kumenga mono. 9 Mpi mono tubaka nde: “Mono ta landa ve kugungula beno. Bika yina ke fwa kufwa, mpi bika yina ke vila kuvila. Sambu na bayina me bikala, bika bo diana misuni.” 10 Yo yina mono bakaka nti na mono Kiese+ ebuna mono zengaka yo, na mutindu yina mono fwaka kuwakana yina mono salaka ti bantu yonso. 11 Yo yina yo zenganaka na kilumbu yina, mpi bantu ya ke mona mpasi na kati ya mameme yina vandaka kutala mono, bo zabaka nde yo kele ndinga ya Yehowa.
12 Ebuna mono tubilaka bo nde: “Kana yo kele mbote na meso na beno, beno pesa mono lufutu na mono; kana ve, beno bika.” Mpi bo pesaka mono* lufutu na mono, mbongo 30 ya bibende.*+
13 Ebuna Yehowa tubilaka mono nde: “Losa yo na kisika ya bo ke bumbaka bima ya ntalu—ntalu ya kitoko yina bo monaka nde yo me fwana sambu na mono.”+ Yo yina mono bakaka mbongo 30 ya bibende yina mpi mono losaka yo na kisika ya bo ke bumbaka bima ya ntalu na nzo ya Yehowa.+
14 Na nima, mono zengaka nti na mono ya zole, Bumosi,+ na mutindu yina mono fwaka kimpangi na kati ya Yuda mpi Izraele.+
15 Ebuna Yehowa tubilaka mono nde: “Ntangu yai, baka bisadilu ya ngungudi ya kukonda mfunu.+ 16 Sambu mono ke bika nde ngungudi mosi kubasika na insi yai. Yandi ta keba ve mameme yina ke vila;+ yandi ta sosa ve dimeme yina kele mwana, yandi ta belula ve dimeme yina me lwala,+ mpi yandi ta disa ve mameme yina lenda telama. Kansi yandi ke dia musuni ya dimeme ya mafuta+ mpi ke pasula maboto ya mameme.+
17 Mawa na ngungudi na mono ya kukonda mfunu,+ yina ke yambula bitwisi!+
Mbele ya bitumba ta zenga yandi diboko mpi ta tobula yandi disu ya kitata.
Diboko na yandi ta yuma kimakulu.
Mpi disu na yandi ya kitata ta fwa* kimakulu.”
12 Luzayisu:
“Ndinga ya Yehowa sambu na Izraele,” Yehowa muntu me tuba,
Muntu yina tandulaka zulu,+
Yina tulaka fondasio ya ntoto,+
Mpi yina salaka mpema* ya muntu na kati na yandi.
2 “Tala, mono ke kumisa Yeruzalemi dikopa* yina ke sala nde bantu yonso ya kele na nziunga kutambula na lunziungu; bo ta ziunga Yuda mpi bo ta ziunga Yeruzalemi.+ 3 Na kilumbu yina mono ta kumisa Yeruzalemi ditadi ya kizitu sambu na bantu yonso. Ntembe kele ve nde bantu yonso yina ke tombula yo ta lwala ngolo;+ mpi makanda yonso ya ntoto ta vukana sambu na kunwanisa yandi.+ 4 Na kilumbu yina,” Yehowa muntu ke tuba, “mono ta kumisa konso mpunda boma mpi mono ta kumisa muntu yina ke tambusa yo kilawu. Mono ta landa kutula meso na mono na nzo ya Yuda, kansi mono ta fwa meso ya bampunda yonso ya bantu. 5 Bamfumu ya Yuda ta tuba na ntima na bo nde, ‘Bantu ya Yeruzalemi kele ngolo sambu na mono na nsadisa ya Yehowa ya makesa Nzambi na bo.’+ 6 Na kilumbu yina mono ta kumisa bamfumu ya Yuda bonso dilonga ya tiya na kati ya bankuni mpi bonso nti ya ke pela na ndonga ya bambuma yina bo me zenga,+ mpi bo ta yoka bantu yonso yina kele na nziunga na bo na diboko ya kitata mpi na diboko ya kimama;+ ebuna bantu ta zinga diaka na Yeruzalemi na kisika na yandi,* na Yeruzalemi.+
7 “Yehowa ta gulusa ntete batenta ya Yuda, sambu kitoko* ya nzo ya Davidi mpi kitoko* ya bantu ya Yeruzalemi kuluta ve mingi kitoko ya Yuda. 8 Na kilumbu yina Yehowa ta vanda lutaninu na nziunga ya bantu ya Yeruzalemi;+ na kilumbu yina, muntu yina ke bula sakuba* na kati na bo ta vanda bonso Davidi, mpi nzo ya Davidi ta vanda bonso Nzambi, bonso wanzio ya Yehowa yina ke kwenda na ntwala na bo.+ 9 Na kilumbu yina mono ta fwa kibeni makanda yonso yina ke kwisa kunwanisa Yeruzalemi.+
10 “Mono ta tiamuna mpeve ya kundimama mpi ya kubondila na zulu ya nzo ya Davidi mpi na zulu ya bantu ya Yeruzalemi, ebuna bo ta tala muntu yina bo tobulaka,+ mpi bo ta dila yandi mutindu bo ke dilaka mwana yina me butuka yandi mosi; bo ta dila yandi ngolo mutindu bo ke dilaka mwana ya ntete. 11 Na kilumbu yina bidilu ta vanda mingi na Yeruzalemi, bonso bidilu na Adadirimoni na Ntoto ya Kukonda Ngumba ya Megido.+ 12 Mpi insi yai ta dila, konso dibuta ta dila yo mosi; dibuta ya nzo ya Davidi ta dila yo mosi, mpi bankento na bo ta dila bo mosi; dibuta ya nzo ya Natani+ ta dila yo mosi, mpi bankento na bo ta dila bo mosi; 13 dibuta ya nzo ya Levi+ ta dila yo mosi, mpi bankento na bo ta dila bo mosi; dibuta ya bantu ya Shimei+ ta dila yo mosi, mpi bankento na bo ta dila bo mosi; 14 mpi mabuta yonso yina me bikala, konso dibuta ta dila yo mosi, mpi bankento na bo ta dila bo mosi.
13 “Na kilumbu yina, bo ta kangudila nzo ya Davidi ti bantu ya Yeruzalemi dibulu ya masa sambu na kukatula masumu na bo ti mvindu na bo sambu na kukumisa bo bunkete.+
2 “Na kilumbu yina,” Yehowa ya makesa muntu ke tuba, “Mono ta vwansa bazina ya biteki na insi yina,+ ebuna bo ta yibuka bo diaka ve; ebuna mono ta katula bambikudi+ mpi mpeve ya mvindu na insi yina. 3 Kana muntu mosi kubikula diaka, tata na yandi ti mama na yandi yina butaka yandi ta tubila yandi nde, ‘Nge ta zinga ve, sambu nge me tuba mambu ya luvunu na zina ya Yehowa.’ Ebuna tata na yandi ti mama na yandi yina butaka yandi ta fwa yandi sambu yandi ke bikula.+
4 “Na kilumbu yina konso mbikudi ta wa nsoni ya mbona-meso na yandi ntangu yandi ke bikula; mpi bo ta lwata ve lele ya kimbikudi ya bo me sala na mika+ sambu na kukusa. 5 Mpi yandi ta tuba nde, ‘Mono kele ve mbikudi. Mono kele muntu ya ke bundulaka ntoto, sambu muntu mosi sumbaka mono ntangu mono vandaka leke.’ 6 Mpi kana muntu kuyula yandi nde, ‘Bamputa yina kele na mapeka* na nge kele nki?’ yandi ta vutula nde, ‘Bo lwadisaka mono na nzo ya banduku na mono.’”*
7 “O mbele ya bitumba, telama sambu na kunwanisa ngungudi na mono,+
Sambu na kunwanisa muntu yina kele nduku na mono,” Yehowa ya makesa muntu me tuba.
“Bula ngungudi,+ mpi kimvuka ya mameme* kupanzana;+
Mpi mono ta balula diboko na mono sambu na kunwanisa bantu ya kukonda mfunu.”
8 “Mpi na insi ya mvimba,” Yehowa muntu me tuba,
“Bo ta katula bandambu na yo zole mpi yo ta fwa;*
Mpi ndambu ya tatu ta bikala na kati na yo.
9 Mono ta lutisa ndambu ya tatu na tiya;
Mpi mono ta katula bo mvindu mutindu bo ke katulaka arza mvindu,
Mpi mono ta meka bo mutindu bo ke mekaka wolo.+
Bo ta binga zina na mono,
Mpi mono ta ndima.
Mono ta tuba nde, ‘Bo kele bantu na mono,’+
Mpi bo ta tuba nde, ‘Yehowa kele Nzambi na beto.’”
14 “Tala! Kilumbu ke kwisa, kilumbu ya Yehowa, ntangu bo ta kabula na kati na nge bima yina bo ta botula nge.* 2 Mono ta vukisa makanda yonso sambu na kunwanisa Yeruzalemi; bo ta botula mbanza, bo ta botula bima na banzo, mpi bo ta ladisa bankento na kingolo-ngolo. Bo ta nata ndambu ya bantu ya mbanza na insi ya nzenza; kansi bantu yina ta bikala, bo ta katula bo ve na mbanza.
3 “Yehowa ta basika mpi ta nwana ti makanda+ yina bonso ntangu yandi ke nwanaka na kilumbu ya bitumba.+ 4 Na kilumbu yina makulu na yandi ta telama na Ngumba ya Banti ya Olive,+ yina ke talana ti Yeruzalemi na esti; mpi Ngumba ya Banti ya Olive ta pasuka na kati-kati, katuka na esti* tii na westi,* yo ta sala muwanda ya nene kibeni; ndambu mosi ya ngumba ta kwenda na nordi mpi ndambu ya nkaka na sudi. 5 Beno ta tina na muwanda ya bangumba na mono, sambu muwanda ya bangumba ta yalumuka tii na Asele. Yo ta lomba nde beno tina, mutindu beno tinaka sambu na kunikana ya ntoto na bilumbu ya Uziya ntotila ya Yuda.+ Yehowa Nzambi na mono ta kwisa, mpi basantu yonso ta vanda ti yandi.+
6 “Na kilumbu yina nsemo ya ngolo ta vanda ve+—bima ta kangama bonso matadi.* 7 Mpi yo ta kuma kilumbu yina me zabana nde yo kele ya Yehowa.+ Yo ta vanda ve ntangu, yo ta vanda mpi ve mpimpa; mpi na nkokila nsemo ta vanda. 8 Na kilumbu yina bamasa ya luzingu+ ta basika na Yeruzalemi,+ ndambu na yo ta kwenda na nzadi-mungwa ya esti*+ mpi ndambu ya nkaka na nzadi-mungwa ya westi.*+ Yo ta salama na nsungi ya mvula mpi na nsungi ya madidi. 9 Ebuna Yehowa ta vanda Ntotila ya ntoto ya mvimba.+ Na kilumbu yina Yehowa ta vanda mosi,+ mpi zina na yandi ta vanda mosi.+
10 “Insi ya mvimba ta kuma bonso Araba,+ katuka na Geba+ tii na Rimoni,+ na sudi ya Yeruzalemi; mpi mbanza yina ta telama na kisika na yo mpi bantu ta zinga kuna,+ katuka na Kielo ya Benyamini+ tii na kisika ya Kielo ya Ntete, tii na Kielo ya Kinkonko, mpi katuka na Nzo-Zulu ya Ananele+ tii na bikamuninu ya vinu* ya ntotila. 11 Bantu ta zinga kuna; mpi bo ta fwa diaka ve mbanza yai ata fioti,+ ebuna bantu ta zinga na Yeruzalemi na lutaninu.+
12 “Yai mpasi yina Yehowa ta pesa bantu yonso yina ke nwanisa Yeruzalemi:+ Misuni na bo ta pola ntangu bo kele ya kutelama na makulu na bo, meso na bo ta pola na mabulu na yo, mpi baludimi na bo ta pola na minoko na bo.
13 “Na kilumbu yina mavwanga yina ta katuka na Yehowa ta panzana na kati na bo; mpi konso muntu ta kanga diboko ya nkweno na yandi, mpi muntu mosi ta nwanisa muntu ya nkaka.*+ 14 Yuda mpi ta nwana bitumba na Yeruzalemi; mpi bo ta vukisa bimvwama ya makanda yonso ya kele na nziunga, wolo, arza, mpi bilele mingi kibeni.+
15 “Mpasi ya me fwanana ti mpasi yina ta bwila mpi bampunda ya bitumba, bampunda ya nkaka, bashamo, bampunda ya fioti, mpi bitwisi yonso yina kele na bacamp yina.
16 “Konso muntu yina ta bikala na makanda yonso yina kwisaka kunwanisa Yeruzalemi, ta kwendaka kufukama* konso mvula+ na ntwala ya Ntotila, Yehowa ya makesa,+ mpi kusala Nkinsi ya Bisasa.*+ 17 Kansi kana muntu mosi na kati ya mabuta ya ntoto kutombuka ve na Yeruzalemi sambu na kufukama na ntwala ya Ntotila, Yehowa ya makesa, mvula ta nokila bo ve.+ 18 Mpi kana dibuta ya Ezipte kutombuka ve mpi kukota ve, mvula ta nokila bo ve. Kansi bo ta baka mpasi yina Yehowa ta pesa makanda yina ke tombuka ve sambu na kusala Nkinsi ya Bisasa. 19 Yo ta vanda ndola sambu na disumu ya Ezipte mpi disumu ya makanda yonso yina ke tombuka ve sambu na kusala Nkinsi ya Bisasa.
20 “Na kilumbu yina bo ta sonika bangogo ‘Busantu kele ya Yehowa!’+ na mikaba ya bampunda. Mpi banzungu ya kulambila*+ yina kele na nzo ya Yehowa ta vanda bonso babolo+ na ntwala ya mesa-kimenga. 21 Mpi konso nzungu ya kulambila* yina kele na Yeruzalemi mpi na Yuda ta vanda ya santu mpi yo ta vanda ya Yehowa ya makesa, mpi bantu yonso yina ke pesa bimenga ta kota mpi ta sadila banzungu ya nkaka sambu na kutokisa bima. Na kilumbu yina, muntu ya Kanana* ta vanda diaka ve na nzo ya Yehowa ya makesa.”+
Yo ke tendula “Yehowa Me Yibuka.”
Tala Bangindu ya Ngika B15.
Disongidila, ya me konda bibaka sambu na kuziunga yo.
Na kisina, “na nima ya nkembo.”
Na kisina, “Nsuni.”
To “mbi.”
To “bamvwela ya kitoko.”
To “ta vanda na kisalu ya kusala na; ta kengila.”
To “ntoto ya lelensi.”
To “ditadi ya bo ke tulaka na zulu ya kibaka to ya nzo.”
To “kilumbu ya bima ya fioti.”
Na kisina, “ditadi, eteni.”
Disongidila, balutangu ya nti ya me fuluka na bambuma.
Diboko mosi kele basantimetre 44,5. Tala Bangindu ya Ngika B14.
Awa bo ke tubila kitunga to dilonga ya kutesila bima. Efa mosi kele balitre 22. Tala Bangindu ya Ngika B14.
Disongidila, Babilonia.
Disongidila, Pusu-pusu.
To “mpu ya nene ya kimfumu.”
Disongidila, na kati ya kisalu na yandi bonso mfumu mpi nganga-nzambi.
To “mpu ya nene ya kimfumu.”
Na kisina, “ta vanda lusungiminu sambu na.”
Tala Bangindu ya Ngika B15.
To “tempelo.”
Na kisina, “mono.”
To “mwana-nsiona.”
To mbala ya nkaka, “ditadi ya ngolo,” bonso ditadi ya emerode.
To “malongi.”
Na kisina, “yandi.”
To “kwikama.”
Na kisina, “sambu na bilumbu ya mingi.”
To “na insi yina ntangu ke basikaka mpi insi yina ntangu ke dindaka.”
To “kwikama.”
To “Beno vanda kikesa.”
To “Beno vanda kikesa.”
To “kulembika luse ya.”
To “ta lembika luse ya.”
To “nsongi ya lele.”
Na kisina, “bakala mosi ya Muyuda.”
Na kisina, “kisika na yo ya kupema.”
To “nzo ya ngolo.”
To mbala ya nkaka, “na zulu ya.”
To “soda yina ke kengilaka na ntwala.”
To “muntu mosi ve ya ke niokulaka bantu.”
Yo ke monana nde yo kele mpasi ya bantu na yandi.
To “mpi yandi me nunga; mpi yandi me guluka.”
Disongidila, Efrate.
Na kisina, “ta niata.”
To “banzambi ya dibuta; biteki.”
To “mambu ya bampeve ya mbi; mambu yina ke yitukisa.”
Na kisina, “bankombo ya babakala.”
Na kisina, “Nzo-zulu yina kele na kinkonko ya kibaka,” kifwani ya muntu ya lukumu to ya mfunu; mfumu.
Na kisina, “Dikunzi,” kifwani ya muntu yina ke sadisa; mfumu.
To “Bamfumu yonso ya kisalu.”
To “bana-bantambu yina kele ti mika mingi na nkingu.”
To “moyo na mono.”
To “mioyo na bo.”
Na kisina, “bo tesaka.”
Mbongo ya bo me salaka na kibende ya bo ke bingaka arza.
Na kisina, “ta mona diaka mbote ve.”
Na kisina, “mpeve.”
To “bolo.”
To “na kisika na yandi yina me fwana.”
To “lukumu.”
To “lukumu.”
To “muntu yina kele ngolo ve.”
Na kisina, “na kati-kati ya maboko?” Disongidila, na ntulu to na mukongo.
To “ya bantu yina ke zolaka mono.”
Na kisina, “bitwisi.”
Na kisina, “ta vila.”
Disongidila, mbanza yina bo ke tubila na verse 2.
To “na ndambu yina ntangu ke basikaka.”
Na kisina, “na nzadi-mungwa.”
To “ta nikana ve,” bonso nde yo me kangama sambu na madidi.
Disongidila, Nzadi-Mungwa ya Kufwa.
Disongidila, Nzadi-Mungwa ya Mediterane.
To “mabungu ya kukamunina vinu.”
Na kisina, “diboko na yandi ta nwanisa diboko ya nduku na yandi.”
To “kusambila.”
To “Bisika ya Kuzinga ya Ntangu Fioti.”
To “banzungu ya kulambila ya kele ti minoko ya nene.”
To “nzungu ya kulambila ya kele ti munoko ya nene.”
To mbala ya nkaka, “muntu ya mumbongo.”