MALAKI

1 Nsangu:

Ndinga ya Yehowa sambu na Izraele na nzila ya Malaki:*

2 Yehowa ke tuba nde: “Mono me zolaka beno.”+

Kansi beno ke tuba nde: “Inki mutindu nge me zolaka beto?”

“Keti Ezau vandaka ve mpangi ya Yakobi?”+ Yehowa muntu me tuba. “Kansi mono zolaka Yakobi, 3 mpi mono mengaka Ezau;+ mono salaka nde bangumba na yandi kubikala mpamba+ mpi mono bikisaka dikabu na yandi sambu na bambwa ya nseke ya ntoto-makanga.”+

4 “Ata Edomi ke tuba nde, ‘Bo me panza beto, kansi beto ta vutuka mpi ta tunga diaka bisika yina me fwaka,’ Yehowa ya makesa ke tuba nde, ‘Bo ta tunga, kansi mono ta bwisa yo, mpi bo ta binga bo “teritware ya mambi” mpi “bantu yina Yehowa me bedisaka kimakulu.”+ 5 Meso na beno ta mona yo, mpi beno ta tuba nde: “Yehowa kubaka lukumu na teritware ya Izraele.”’”

6 “‘Mwana ke kumisaka tata,+ mpi nsadi ke kumisaka mfumu na yandi. Yo yina, kana mono kele tata,+ wapi lukumu yina me fwana na mono?+ Mpi kana mono kele mfumu,* wapi boma* yina me fwana na mono?’ Yehowa ya makesa muntu ke tubila beno banganga-nzambi yina ke vweza zina na mono.+

“‘Kansi beno ke tuba nde: “Inki mutindu beto me vweza zina na nge?”’

7 “‘Na mutindu beno ke pesa madia* ya mvindu na mesa-kimenga na mono.’

“‘Mpi beno ke tuba nde: “Inki mutindu beto me kumisa nge mvindu?”’

“‘Ntangu beno ke tuba nde: “Mesa ya Yehowa+ kele kima ya kuvweza.” 8 Mpi ntangu beno ke pesa mbisi ya kufwa-meso bonso kimenga, beno ke tuba nde: “Yo kele mbi ve.” Mpi ntangu beno ke pesa mbisi ya dikulu-kifu to yina ke bela, beno ke tuba nde: “Yo kele mbi ve.”’”+

“Pardo, meka kupesa yo na mfumu ya mbanza na nge. Keti yandi ta wa kiese sambu na nge to keti yandi ta yamba nge mbote?” Yehowa ya makesa muntu me tuba.

9 “Ntangu yai, pardo, beno bondila* Nzambi, sambu yandi monisila beto ntima ya mbote. Ti makabu ya mutindu yai ya me katuka na maboko na beno, keti yandi ta ndima beno?” Yehowa ya makesa muntu me tuba.

10 “Nani na kati na beno kele ya kuyilama sambu na kukanga bakielo?*+ Sambu beno ta pedisa nkutu ve tiya na mesa-kimenga na mono kukonda kufutisa.+ Mono ke sepela na beno ve,” Yehowa ya makesa muntu me tuba, “mpi mono ke wa ve kiese na makabu yonso ya me katuka na maboko na beno.”+

11 “Sambu katuka na ndambu yina ntangu ke basikaka tii na ndambu yina yo ke dindaka,* zina na mono ta vanda nene na kati ya makanda.+ Na konso kisika bo ta sala nde bimenga kubasisa midinga, mpi bo ta pesa makabu na zina na mono, bonso dikabu ya kukonda mvindu; sambu zina na mono ta vanda nene na kati ya makanda,”+ Yehowa ya makesa muntu me tuba.

12 “Kansi beno ke kumisa yo mvindu*+ na mutindu beno ke tuba nde, ‘Mesa ya Yehowa kele mvindu, mpi bo fwete vweza mbuma na yo, disongidila madia na yo.’+ 13 Beno ke tuba mpi nde, ‘Tala! Yo ke lembisa kibeni!’ mpi beno ke finga yo na kuvweza yonso,” Yehowa ya makesa muntu me tuba. “Beno ke nata bambisi ya bo me yiba, ya makulu-kifu mpi ya maladi. Ee, beno ke nata bima yina bonso dikabu! Keti mono fwete ndima yo?”+ Yehowa muntu me tuba.

14 “Bo fwete singa muntu ya mayele ya mbi yina kele ti mbisi ya bakala ya mbote na kibuka na yandi ya bitwisi, kansi yandi ke sala lusilu mpi ke tambikila Yehowa mbisi ya kele ti kifu.* Sambu mono kele Ntotila ya nene,”+ Yehowa ya makesa muntu me tuba, “mpi zina na mono ta vanda zina ya ke pesa makanda boma.”+

2 “Ntangu yai, O beno banganga-nzambi, nsiku yai kele sambu na beno.+ 2 Kana beno buya kuwa mpi beno buya kutula dikebi na kupesa zina na mono nkembo,” Yehowa ya makesa muntu me tuba, “mono ta singa beno,+ mpi mono ta kumisa balusakumunu na beno balusingu.+ Ee, mono me kumisa balusakumunu na beno balusingu, sambu beno ke tudila yo ve dikebi.”

3 “Beno tala! Mono ta bebisa* bankeni yina beno me kuna sambu na beno,+ mpi mono ta panza tufi na baluse na beno, tufi ya bankinsi na beno; mpi bo ta nata beno kisika yo kele.* 4 Ebuna beno ta zaba nde mono me pesa beno nsiku yai sambu kuwakana na mono ti Levi kuvanda kaka,”+ Yehowa ya makesa muntu me tuba.

5 “Kuwakana na mono ti yandi vandaka kuwakana ya luzingu mpi ya ngemba, yina mono pesaka yandi, kumosi ti boma.* Yandi vandaka kuwa mono boma, ee, yandi vandaka na boma sambu na zina na mono. 6 Nsiku* ya kieleka vandaka na munoko na yandi,+ mpi ata diambu mosi ve ya kukonda lunungu wakanaka na munoko na yandi. Yandi tambulaka ti mono na ngemba mpi na kusungama,+ mpi yandi sadisaka bantu mingi na kuyambula kifu. 7 Sambu bikobo ya nganga-nzambi fwete tanina nzayilu, mpi bantu fwete sosa nsiku* na munoko na yandi,+ sambu yandi kele kinati-nsangu ya Yehowa ya makesa.

8 “Kansi beno me yambulaka nzila. Beno me budisaka bantu mingi sakuba na yina me tala nsiku.*+ Beno me bebisaka kuwakana ya Levi,”+ Yehowa ya makesa muntu me tuba. 9 “Yo yina mono ta sala nde bantu yonso kuvweza beno mpi kumona beno mpamba, sambu beno zitisaka ve banzila na mono kansi beno monisaka kikalulu ya kupona-pona na ntangu beno ke sadila nsiku.”+

10 “Keti beto yonso kele ve na tata mosi?+ Keti Nzambi mosi ve muntu gangaka beto? Yo yina, sambu na nki beto ke sadilana mambu kukonda kwikama,+ ebuna beto ke vweza kuwakana ya ba-nkaka na beto? 11 Yuda me sala mambu kukonda kwikama, mpi diambu ya nzanzi me salama na Izraele ti na Yeruzalemi; sambu Yuda me vweza busantu* ya Yehowa,+ yina yandi ke zolaka, mpi yandi me kwela mwana ya nzambi mosi ya nzenza.+ 12 Yehowa ta katula na batenta ya Yakobi konso muntu yina ke salaka diambu yai, ata yandi kele nani,* mpi ata yandi ke pesa Yehowa ya makesa dikabu.”+

13 “Kele ti diambu ya nkaka* ya beno ke sala, yina ke sala nde beno fulusa mesa-kimenga ya Yehowa ti mansanga, ti kudila, mpi ti mabokuta, yo yina yandi ke tulaka diaka ve dikebi na dikabu na beno mpi ke ndimaka ve konso kima ya ke katuka na maboko na beno.+ 14 Mpi beno ke tuba nde, ‘Sambu na nki kikuma?’ Yo kele sambu Yehowa me sala bonso mbangi na kati na nge mpi nkento na nge ya kileke, yina nge me sadila mambu kukonda kwikama, ata yandi kele nduku na nge mpi nkento na nge na kutadila kuwakana.*+ 15 Kansi kele ti muntu mosi yina salaka yo ve, sambu yandi vandaka ti ndambu ya mpeve yina bikalaka. Muntu yina vandaka kusosa inki? Mwana* ya Nzambi. Yo yina beno keba sambu na mpeve na beno, mpi kusadila ve nkento na nge ya kileke mambu kukonda kwikama. 16 Sambu mono* ke mengaka kufwa makwela,”+ Yehowa Nzambi ya Izraele muntu me tuba, “mpi muntu yina ke salaka mambu ya mubulu,”* Yehowa ya makesa muntu me tuba. “Mpi beno keba sambu na mpeve na beno, mpi kusadila ve nkento na nge ya kileke mambu kukonda kwikama.+

17 “Beno me lembisa Yehowa ti bangogo na beno.+ Kansi beno ke tuba nde, ‘Inki mutindu beto me lembisa yandi?’ Ntangu beno ke tuba nde, ‘Konso muntu yina ke sala mambu ya mbi kele muntu ya mbote na meso ya Yehowa, mpi yandi ke waka kiese na muntu yina,’+ to ntangu beno ke tuba nde, ‘Nzambi ya lunungu kele na wapi?’”

3 “Tala! Mono ke tinda kinati-nsangu na mono, mpi yandi ta yidika nzila na ntwala na mono.+ Ebuna na mbala mosi Mfumu ya kieleka, yina beno ke sosa, ta kwisa na tempelo na yandi;+ mpi kinati-nsangu ya kuwakana ta kwisa, yina beno ke waka kiese sambu na yandi. Yandi ta kwisa kibeni,” Yehowa ya makesa muntu me tuba.

2 “Kansi nani ta kanga ntima na kilumbu yina yandi ta kwisa, mpi nani ta kuka kutelama ntangu yandi ta monana? Sambu yandi ta vanda bonso tiya ya muntu yina ke katulaka mvindu na bibende mpi bonso sabuni*+ ya muntu yina ke yobisaka bilele. 3 Yandi ta vanda ya kuvanda bonso muntu yina ke katulaka mvindu na arza+ mpi ke kumisaka yo bunkete ebuna yandi ta kumisa bana ya Levi bunkete; yandi ta katula bo mvindu bonso wolo mpi bonso arza, ebuna bo ta kuma kibeni sambu na Yehowa bantu yina ke pesa dikabu na lunungu. 4 Mpi dikabu ya Yuda ti ya Yeruzalemi ta pesa Yehowa kiese kibeni, bonso na bilumbu ya ntama mpi bonso na bamvula ya ntama kibeni.+

5 “Mono ta kwisa pene-pene na beno sambu na kusambisa beno, mpi na mbala mosi mono ta bedisa bandoki,+ bantu ya ke salaka bizumba, bantu yina ke diaka bandefi ya luvunu,+ bantu yina ke yibaka muntu ya kisalu,+ bantu yina ke yibaka nkento yina kele mufwidi, bantu yina ke yibaka mwana ya me konda tata,*+ mpi bantu yina ke buyaka kusadisa munzenza.*+ Bantu yai waka mono boma ve,” Yehowa ya makesa muntu me tuba.

6 “Sambu mono kele Yehowa; mono ke sobaka ve.*+ Mpi beno kele bana ya Yakobi; beno me mana ve. 7 Yantika bilumbu ya ba-nkaka na beno, beno me yambulaka bansiku na mono mpi beno me zitisaka yo ve.+ Beno vutukila mono, ebuna mono ta vutukila beno,”+ Yehowa ya makesa muntu me tuba.

Kansi beno ke tuba nde: “Inki mutindu beto fwete vutuka?”

8 “Keti muntu lenda yiba Nzambi? Kansi beno ke yiba mono.”

Mpi beno ke tuba nde: “Inki mutindu beto me yiba nge?”

“Na bandambu ya kumi* mpi na makabu. 9 Ya kieleka, beno kele bantu ya bo me singaka,* sambu beno ke yiba mono—ee, dikanda ya mvimba ke sala mutindu yina. 10 Beno nata dikumi yonso* na nzo ya kubumbila bima,+ sambu madia kuvanda na nzo na mono;+ mpi pardo, beno meka mono na diambu yai,” Yehowa ya makesa muntu me tuba, “sambu na kutala kana mono ta kangudila beno ve bakielo ya masa ya zulu+ mpi ta nokisila beno ve lusakumunu bonso mvula tii kuna ata kima mosi ve ta konda.”+

11 “Mpi sambu na beno, mono ta nganina kima yina ke diaka;* yo ta bebisa ve mbuma ya insi na beno, mpi banti ya vinu yina kele na bilanga na beno ta konda ve kubuta mbuma,”+ Yehowa ya makesa muntu me tuba.

12 “Makanda yonso ta binga beno bantu ya kiese,+ sambu beno ta kuma insi ya kiese,” Yehowa ya makesa muntu me tuba.

13 “Mambu ya mbi ya beno me tuba sambu na mono kele ngolo,” Yehowa muntu me tuba.

Mpi beno ke tuba nde: “Inki mutindu beto me tuba mambu ya mbi sambu na nge na kati na beto?”+

14 “Beno ke tuba nde, ‘Kusadila Nzambi kele na mfunu ve.+ Inki mambote beto me baka mutindu beto ke lungisaka mikumba na beto na ntwala na yandi mpi ke tambulaka na mawa na ntwala ya Yehowa ya makesa? 15 Ntangu yai beto ke yindula nde bantu ya lulendo kele bantu ya kiese. Diaka, bantu yina ke salaka mambu ya mbi ke nunga.+ Bo ke meka Nzambi mpi bo ke nunga.’”

16 Na ntangu yina, bantu yina ke waka Yehowa boma solulaka bo na bo, konso muntu ti nduku na yandi, mpi Yehowa vandaka kutula dikebi mpi kuwidikila. Ebuna bo sonikaka mukanda ya kuyibuka na ntwala na yandi+ sambu na bantu yina ke waka Yehowa boma mpi ke yindululaka* zina na yandi.+

17 “Mpi bo ta vanda bantu na mono,”+ Yehowa ya makesa muntu me tuba, “na kilumbu yina mono ta basisa kima ya mfunu.*+ Mono ta wila bo mawa, kaka mutindu tata ke wilaka mwana na yandi yina ke sadilaka yandi mawa.+ 18 Ebuna beno ta mona diaka luswaswanu na kati ya muntu ya lunungu ti muntu ya mbi,+ mpi na kati ya muntu yina ke sadilaka Nzambi ti muntu yina ke sadilaka yandi ve.”

4 “Sambu tala! kilumbu ke kwisa, yo ke pela bonso fulu ya tiya,+ ntangu bantu yonso ya lulendo mpi bayina yonso ke salaka mambu ya mbi ta kuma bonso nianga. Ya kieleka, kilumbu yina ke kwisa ta dia bo,” Yehowa ya makesa muntu me tuba, “mpi yo ta bikisa bo kukonda musisa to lutangu. 2 Kansi sambu na beno bantu yina ke kumisaka zina na mono,* ntangu ya lunungu ta sema mpi nsemo* na yo ta belula bo; ebuna beno ta pumbuka bonso bana-bangombe ya mafuta.”

3 “Mpi beno ta niata bantu ya mbi na makulu na beno, sambu bo ta vanda bonso mfututu na nsi ya makulu na beno na kilumbu yina mono ta sala mambu,” Yehowa ya makesa muntu me tuba.

4 “Beno yibuka Nsiku ya nsadi na mono Moize, bansiku mpi balusambisu yina mono pesaka na Orebi sambu Izraele ya mvimba kulemfukila yo.+

5 “Mono ke tindila beno mbikudi Eliya+ na ntwala nde kilumbu ya Yehowa ya nene mpi ya ke pesa boma kukwisa.+ 6 Mpi yandi ta sala nde bantima ya batata kukuma bonso ya bana, mpi bantima ya bana kukuma bonso ya batata,*+ sambu mono kwisa ve mpi mono bebisa ve ntoto, ebuna mono fwa yo.”

Masonuku ya Kiebreo mpi ya Kiarami me suka awa, kitini ya ke landa kele Masonuku ya Kigreki ya Bukristu)