MUKANDA YA ZOLE NA BAKORINTO

1 Polo, ntumwa ya Kristu Yezu na luzolo ya Nzambi, mpi Timoteo+ mpangi na beto, na dibundu ya Nzambi yina kele na Korinto mpi na basantu yonso yina kele na Akaya ya mvimba:+

2 Ntima ya mbote ya nene mpi ngemba ya Nzambi Tata na beto mpi ya Mfumu Yezu Kristu kuvanda na beno.

3 Lukumu kuvanda na Nzambi mpi Tata ya Mfumu na beto Yezu Kristu,+ Tata ya mawa mingi+ mpi Nzambi yina ke lembikaka bantu na mitindu yonso;+ 4 yandi ke lembikaka beto* na bampasi* na beto yonso,+ sambu beto kuka kulembika bantu ya nkaka+ na bampasi* ya mutindu na mutindu ti kulembika yina beto ke bakaka na Nzambi.+ 5 Sambu, mutindu bampasi ya beto ke monaka sambu na Kristu kele mingi,+ mutindu mosi mpi kulembika ya beto ke bakaka na nzila ya Kristu kele mingi. 6 Yo yina, kana beto ke kutana ti bampasi,* yo kele sambu beno baka kikesa mpi beno guluka; mpi kana beto ke baka kikesa, yo kele sambu beno baka kikesa, yina ke sadisaka beno na kukanga ntima na bampasi yina beto mpi ke monaka. 7 Ebuna, kivuvu na beto sambu na beno ke nikanaka ve, sambu beto ke zaba nde, mutindu beno ke mona bampasi bonso beto, mutindu mosi mpi bo ta lembika beno bonso beto.+

8 Bampangi, beto ke zola nde beno zaba mpasi yina beto kutanaka ti yo na provense ya Azia.+ Beto monaka mpasi mingi mpi yo lutaka ngolo na beto, yo yina beto zabaka ve kana beto zolaka kuzinga.+ 9 Ya kieleka, beto yindulaka nde bo zengilaka beto nkanu ya lufwa. Mambu yina salamaka sambu beto tula ntima na Nzambi+ yina ke tedimisaka bafwa, kansi na beto mosi ve. 10 Yandi gulusaka beto na kigonsa ya nene ya lufwa mpi yandi ta gulusa beto; beto ke tula ntima nde yandi ta landa mpi kugulusa beto.+ 11 Beno mpi beno lenda sadisa beto kana beno ke bondila sambu na beto,+ na mpila nde bantu mingi kupesa matondo sambu na beto sambu na mambote yina beto ke baka na mvutu yina Nzambi ke pesa na bisambu ya bantu mingi.*+

12 Kima yina beto ke kudikumisa sambu na yo, yo yai: kansansa na beto ke ta kimbangi nde beto me kuditwadisaka na nsi-ntoto, mpi mingi-mingi na ntwala na beno, ti busantu mpi masonga ya me katuka na Nzambi, ti mayele ya kinsuni ve,+ kansi ti ntima ya mbote ya nene ya Nzambi. 13 Sambu beto ke sonikila beno ve sambu na konso diambu yina katula kaka sambu na mambu yina beno lenda tanga* mpi kubakisa, mpi mono ke tula ntima nde beno ta landa kubakisa mambu yai mbote-mbote,* 14 mutindu beno me bakisa mpi na kiteso mosi buna nde beto kele kikuma ya kudikumisa sambu na beno, mutindu mosi mpi beno ta vanda kikuma ya kudikumisa sambu na beto na kilumbu ya Mfumu na beto Yezu.

15 Yo yina sambu mono vandaka kutula ntima mutindu yai, mono vandaka ntete kukana na kukwisa kuna na beno, sambu beno vanda ti dibaku ya zole ya kuwa kiese;* 16 sambu mono zolaka kukwisa kutala beno ntangu mono zolaka kukwenda na Masedonia, mpi kuvutuka na beno ntangu mono zolaka kukatuka na Masedonia, mpidina beno zolaka kufidisa mono na nzila sambu mono kwenda na Yudea.+ 17 Ntangu mono vandaka ti dibanza yina, keti mono bakaka mambu na nsaka? To keti mono kanaka mambu na mutindu ya kinsuni, yo yina mono ke tuba “Ee, ee,” mpi na nima “Ve, ve”? 18 Kansi beno lenda tula ntima na Nzambi nde mambu yina beto ke songa beno kele ve “ee” kansi na nima “ve.” 19 Sambu Mwana ya Nzambi, Yezu Kristu, yina beto, disongidila mono, Silvanusi,* mpi Timoteo+ longaka beno, yandi kumaka ve “ee” mpi na nima “ve,” kansi sambu na yandi “ee” me kumaka “ee.” 20 Sambu ata balusilu ya Nzambi kele mingi nki mutindu, yo me kumaka “ee” na nzila na yandi.+ Yo yina mpi na nzila na yandi beto ke tubaka “Amen” na Nzambi,+ sambu beto pesa yandi nkembo. 21 Kansi Nzambi+ muntu ke pesa kipiku nde beto ti beno beto kele bantu ya Kristu mpi yandi muntu tulaka beto mafuta. 22 Yandi me tulaka beto+ mpi kashe na yandi mpi yandi me tulaka mpeve+ na bantima na beto bonso kidimbu ya mambu yina ta kwisa.*

23 Ntangu yai, mono ke binga Nzambi na kuvanda mbangi na mono,* nde kana mono me kwisa ntete ve na Korinto, yo kele sambu mono ke zola kukeba beno. 24 Beto kele ve bamfumu ya lukwikilu na beno,+ kansi beto kele banduku ya kisalu sambu na kiese na beno, sambu beno kele ya kutelama sambu na lukwikilu na beno.

2 Mono me baka lukanu ya kukwisa diaka ve kuna na beno ti mawa. 2 Sambu kana mono pesa beno mawa, nani ta pesa mono kiese katula kaka muntu yina mono pesaka mawa? 3 Mono sonikilaka beno mambu yina, sambu ntangu mono ta kwisa, mono wa ve mawa sambu na bantu yina yo lombaka nde mono wa kiese sambu na bo, sambu mono ke tula ntima nde mambu yina ke pesa mono kiese kupesa beno yonso kiese ya mutindu mosi. 4 Sambu mono sonikilaka beno ti mpasi mingi mpi mawa mingi na ntima, mpi ti mansanga mingi, sambu na kupesa beno ve mawa,+ kansi sambu beno zaba nde mono ke zolaka beno mingi.

5 Ebuna, kana muntu mosi pesaka bankaka mawa,+ mono ve muntu ya yandi pesaka mawa, kansi beno yonso na kiteso mosi buna—sambu mono vanda ve makambu ngolo na mambu ya mono ke tuba. 6 Ndola yina bantu mingi pesaka muntu yina me fwana; 7 kansi ntangu yai, beno fwete lolula yandi na ntima ya mvimba mpi kulembika yandi,+ sambu mawa ya mingi kibeni kulutila* yandi ve.+ 8 Yo yina, mono ke siamisa beno na kusonga yandi nde beno ke zolaka yandi.+ 9 Sambu yai kikuma ya mono sonikilaka beno: sambu na kuzaba kana beno ta monisa bulemfu na beno na mambu yonso. 10 Kana beno lolula konso muntu sambu na konso diambu yina, mono mpi me lolula yandi. Ya kieleka, konso diambu ya mono lolulaka (kana mono lolulaka diambu mosi buna), mono salaka yo sambu na mambote na beno na meso ya Kristu, 11 sambu Satana+ kununga* beto ve, sambu beto me zaba mayele* na yandi.+

12 Ntangu mono kumaka na Troasi+ sambu na kuzabisa nsangu ya mbote ya me tala Kristu mpi bo kangudilaka mono kielo na kisalu ya Mfumu, 13 mono kudiyangisaka mingi sambu mono monaka ve mpangi na mono Tito.+ Yo yina mono songaka bo na kubikala mbote, ebuna mono kwendaka na Masedonia.+

14 Kansi beto ke pesa Nzambi matondo; yandi ke twadisaka beto ntangu yonso na ndonga ya bantu yina me nunga kumosi ti Kristu, mpi na nzila na beto yandi ke sala nde nsudi ya kitoko ya nzayilu na yandi kuwakana* na bisika yonso! 15 Sambu na meso ya Nzambi, beto kele nsudi ya kitoko ya Kristu na kati ya bantu yina ke guluka mpi na kati ya bantu yina ke fwa; 16 sambu na bantu yina ke fwa, yo kele nsudi ya lufwa yina ke nata na lufwa,+ sambu na bantu yina ke guluka, yo kele nsudi ya kitoko ya luzingu yina ke nata na luzingu. Ebuna nani me fwana kibeni sambu na mambu yai? 17 Beto bantu me fwana, sambu beto kele ve bantu yina ke tekaka* ndinga ya Nzambi+ bonso bantu mingi, kansi beto ke tubaka na masonga yonso, kumosi ti Kristu, ee, bonso bantu yina Nzambi me tindaka mpi beto ke salaka yo na meso na yandi.

3 Keti beto ke yantika kutuba diaka beto mosi nde beto me fwana? To keti bonso bantu ya nkaka, beto kele ti mfunu ya kusonikila beno to beno sonikila beto mikanda ya ke tuba nde beto me fwana? 2 Beno mosi, beno kele mukanda na beto;+ bo me sonikaka yo na bantima na beto, bantu yonso me zaba yo mpi ke tangaka yo. 3 Sambu beno ke monisa nde beno kele mukanda ya Kristu yina beto bansadi+ me sonikaka; bo me sonikaka yo ve ti tinta kansi ti mpeve ya Nzambi ya moyo, na zulu ya matadi+ ve kansi na zulu ya bantima.+

4 Beto ke tulaka ntima na Nzambi mutindu yina na lusadisu ya Kristu. 5 Beto ke tuba ve nde beto lenda sala kisalu yai na ngolo na beto mosi, kansi Nzambi+ muntu ke sadisaka beto na kusala yo; 6 yandi me sadisaka beto sambu beto vanda bansadi ya kuwakana ya mpa,+ ya nsiku ya kusonika ve+ kansi ya mpeve; sambu nsiku ya kusonika ke pesaka ndola ya lufwa,+ kansi mpeve ke pesaka luzingu.+

7 Kana nsiku yina ke nataka lufwa mpi yina bo sonikaka na zulu ya matadi+ kwisaka ti nkembo mingi yo yina bana ya Izraele monaka mpila ve ya kutala luse ya Moize sambu na nkembo ya luse na yandi,+ nkembo yina zolaka kumana, 8 sambu na nki kisalu ya kupesa mpeve+ fwete vanda ve ti nkembo mingi kuluta?+ 9 Sambu kana nsiku yina ke pesaka ndola+ vandaka ya nkembo,+ kisalu ya kukumisa bantu bantu ya lunungu+ zolaka kuvanda na nkembo mingi kuluta! 10 Ya kieleka, ata kima yina bo kumisaka ntete kima ya nkembo, bo katulaka yo nkembo sambu na nkembo yina me luta yo.+ 11 Sambu kana kima yina bo zolaka kukatula kwisaka ti nkembo,+ nkembo ya kima yina ke bikala zolaka kuvanda mingi kuluta!+

12 Sambu beto kele ti kivuvu yai,+ beto ke sadilaka masonga ya nene, 13 mpi beto ke salaka ve mambu yina Moize salaka; yandi vandaka kutula lele na luse na yandi+ sambu bana ya Izraele kumona ve mambu yina zolaka kukumina kima yina bo zolaka kukatula. 14 Kansi mabanza na bo lembaka.+ Sambu tii bubu yai, lele yina me katukaka ve ntangu bo ke tangaka kuwakana ya ntama,+ sambu yo ke katukaka kaka na nzila ya Kristu.+ 15 Ya kieleka, tii bubu yai konso ntangu ya bo ke tangaka mikanda ya Moize,+ lele ke vandaka na zulu ya bantima na bo.+ 16 Kansi kana muntu kuvutuka na Yehowa,* lele yina ke katukaka.+ 17 Sambu Yehowa* kele Mpeve,+ ebuna kisika mpeve ya Yehowa* kele, kimpwanza kele pana.+ 18 Mpi beto yonso, ntangu beto kele ti baluse ya kukonda kufika mpi ke monisa nkembo ya Yehowa* bonso batala-tala ke pesaka nsemo, beto ke sobaka mpi ke kumaka na kifwani mosi katuka na kiteso mosi ya nkembo tii na kiteso ya nkaka,* kaka mutindu Yehowa,* Mpeve,*+ ke salaka yo.

4 Yo yina, sambu beto kele ti kisalu yai sambu na mawa yina Nzambi wilaka beto, beto ke yambula ve. 2 Kansi beto me losaka mambu ya nsoni, mambu ya kinsweki, mpi beto ke tambulaka ve na mayele ya mbi to kukatula ngolo ya ndinga ya Nzambi;+ kansi ntangu beto ke monisaka kieleka, beto ke kumaka mbandu ya mbote sambu na kansansa ya konso muntu na meso ya Nzambi.+ 3 Kana nsangu ya mbote yina beto ke zabisaka kele ya kufika, yo kele ya kufika na kati ya bantu yina ke fwa, 4 na kati ya bantu yina nzambi ya ngidika yai ya bima*+ me fwaka meso ya mabanza ya bantu yina ke kwikilaka ve,+ sambu nsemo ya nsangu ya mbote ya nkembo ya Kristu, yina kele kifwani ya Nzambi,+ kukota ve.+ 5 Sambu beto ke samunaka ve mambu na beto mosi, kansi beto ke samunaka nde Yezu Kristu kele Mfumu mpi nde beto kele bampika na beno sambu na Yezu. 6 Sambu Nzambi muntu tubaka nde: “Nsemo kusema na kati ya mpimpa,”+ mpi yandi pedisaka nsemo na bantima na beto sambu na kupesa yo nsemo+ ti nzayilu ya nkembo ya Nzambi na nsadisa ya luse ya Kristu.

7 Kansi beto kele ti kimvwama yai+ na mabungu ya ntoto,+ sambu ngolo yina me luta ngolo ya bantu kuvanda ya Nzambi kansi ya beto ve.+ 8 Bo ke kamuna beto ngolo na mitindu yonso, kansi bo ke kanga beto ve tii na kiteso yina beto lenda nikana ve; beto ke zaba ve kima ya kusala, kansi beto me konda ve nzila ya kubasikila;*+ 9 bo ke monisa beto mpasi, kansi Nzambi me yambula beto ve;+ bo ke losa beto na ntoto, kansi bo ke fwa beto ve.+ 10 Ntangu yonso beto ke nata na nitu na beto bampasi ya lufwa yina Yezu kutanaka na yo,+ sambu luzingu ya Yezu kumonana mpi na nitu na beto. 11 Sambu beto bantu yina kele na luzingu, beto ke mona ntangu yonso lufwa+ na meso sambu na Yezu, sambu luzingu ya Yezu kumonana mpi na nsuni na beto ya ke fwaka. 12 Yo yina, lufwa ke sala na kati na beto, kansi luzingu na kati na beno.

13 Ntangu yai, sambu beto kele ti lukwikilu ya mutindu mosi bonso yina bo me sonikaka nde: “Mono monisaka lukwikilu, yo yina mono tubaka”;+ beto mpi ke monisa lukwikilu, yo yina beto ke tubaka, 14 sambu beto ke zaba nde Muntu yina futumunaka Yezu ta futumuna beto mpi ti Yezu mpi yandi ta nata beto ti beno+ na ntwala ya Yezu. 15 Mambu yai yonso kele sambu na mambote na beno, sambu ntima ya mbote ya nene kukuma diaka mingi sambu bantu mingi ke pesa matondo na nkembo ya Nzambi.+

16 Yo yina, beto ke yambula ve, ata muntu yina beto kele na nganda ke beba, kansi muntu yina beto kele na kati ke kuma ya mpa konso kilumbu. 17 Sambu ata mpasi* ke zinga mingi ve mpi yo kele ve kizitu, yo ke basisila beto nkembo yina ke landa kaka kukuma nene* mpi yina kele ya mvula na mvula;+ 18 ntangu beto ke tula ve meso na beto na bima yina ke monanaka, kansi na bima yina ke monanaka ve.+ Sambu bima yina ke monanaka kele sambu na ntangu fioti, kansi bima yina ke monanaka ve kele ya mvula na mvula.

5 Sambu beto me zaba nde kana nzo na beto ya ntoto, tenta yai, kufwa,+ Nzambi ta pesa beto nzo mosi, nzo yina bo me salaka ve na maboko;+ yo ta zinga mvula na mvula na zulu. 2 Sambu na kati ya nzo yai beto ke dila na ntima, mpi beto kele ti nzala ya ngolo ya kulwata nzo na beto ya zulu,+ 3 sambu ntangu beto ta lwata yo, bo ta mona beto ve kinkonga. 4 Ya kieleka, beto bantu yina kele na tenta yai, beto ke dila na ntima, beto ke kudiyangisa mingi, sambu beto ke zola ve kukatula nzo yai, kansi beto ke zola kulwata nzo yina ya nkaka,+ sambu luzingu kumina nitu yina ke fwaka.+ 5 Nzambi+ muntu yidikaka beto sambu na diambu yai; yandi pesaka beto mpeve bonso kidimbu ya mambu yina ta kwisa.*+

6 Yo yina, beto kele na kikesa mingi ntangu yonso mpi beto me zaba nde ntangu beto ke zinga na kati ya nitu, beto kele ntama ti Mfumu,+ 7 sambu beto ke tambulaka na lukwikilu, kansi ve na mambu yina ke monanaka. 8 Beto kele ti kikesa mingi mpi beto ke zola nde beto vanda ntama ti nitu mpi beto kwenda kuzinga ti Mfumu.+ 9 Yo yina, yo vanda beto ke zinga ti yandi to beto kele ntama ti yandi, lukanu na beto kele nde yandi ndima beto. 10 Sambu beto yonso fwete monika na ntwala ya kisika ya kusambisa ya Kristu, sambu bo futa konso muntu na kutadila mambu yina yandi salaka ntangu yandi vandaka na nitu, yo vanda ya mbote to ya mbi.+

11 Yo yina, sambu beto me zaba nde beto fwete vanda ti boma ya Mfumu, beto ke landa kundimisa bantu, kansi Nzambi me zaba beto mbote. Mono ke tula ntima nde kansansa na beno mpi me zaba beto mbote. 12 Beto ke zola ve kudikumisa diaka sambu na beno, kansi beto ke tuba mambu yai yonso sambu na kusiamisa beno na kudikumisa sambu na beto, sambu beno kuka kupesa mvutu na bantu yina ke kudikumisa sambu na mambu yina ke monanaka na meso+ kansi ve sambu na mambu yina kele na ntima. 13 Sambu kana beto vandaka bantu ya kilawu,+ yo vandaka sambu na Nzambi; kana beto kele ti mabanza ya mbote, yo kele sambu na beno. 14 Sambu zola yina Kristu kele na yo ke yalaka beto, sambu beto me sukisaka nde, muntu mosi fwaka sambu na bantu yonso;+ na mutindu yina bantu yonso me fwaka. 15 Mpi yandi fwaka sambu na bantu yonso sambu bantu yina ke zinga kuzinga diaka ve sambu na bo mosi,+ kansi sambu na muntu yina fwaka sambu na bo mpi yina Nzambi futumunaka.

16 Yo yina, katuka ntangu yai beto me zaba ve ata muntu mosi na kutadila mabanza ya kinsuni.+ Ata beto zabaka ntete Kristu na kinsuni, ya kieleka beto ke zaba yandi diaka ve mutindu yina.+ 17 Yo yina, kana muntu kele na bumosi ti Kristu, yandi kele lugangu ya mpa;+ bima ya ntama me lutaka; bima ya mpa me salama. 18 Kansi bima yonso ke katukaka na Nzambi; yandi wakanisaka beto ti yandi mosi na nzila ya Kristu+ mpi yandi pesaka beto kisalu ya kuwakanisa diaka bantu ti yandi,+ 19 disongidila, Nzambi vandaka kuwakanisa nsi-ntoto ti yandi mosi na nzila ya Kristu,+ yandi vandaka kutangila bo ve bifu na bo,+ mpi yandi pesaka beto nsangu ya kuwakanisa diaka bantu ti yandi.+

20 Yo yina, beto kele mimonisi*+ na kisika ya Kristu,+ bonso nde Nzambi vandaka kubondila bantu na nzila na beto. Sambu beto kele bantu yina ke sala na kisika ya Kristu, beto ke bondila bantu nde: “Beno wakana diaka ti Nzambi.” 21 Muntu yina zabaka disumu ve,+ yandi kumisaka yandi disumu sambu na beto, sambu beto kuma lunungu ya Nzambi+ na nzila na yandi.

6 Sambu beto ke sala kumosi ti yandi,+ beto ke bondila beno mpi na kundima ve ntima ya mbote ya nene ya Nzambi mpi kukonda kulungisa lukanu na yo.+ 2 Sambu yandi ke tuba nde: “Mono waka nge na ntangu ya me ndimama, mpi mono sadisaka nge na kilumbu ya luguluku.”+ Yai ntangu ya me ndimama kibeni. Yai kilumbu ya luguluku.

3 Beto ke pesaka ve bantu kikuma ya kubula sakuba ata na diambu mosi, sambu bantu kumona ve kifu na kisalu na beto;+ 4 kansi na mambu yonso beto ke monisaka nde beto kele bansadi ya Nzambi,+ na kukanga ntima na mambu mingi, na bampasi, na bantangu ya kukonda bima, na mambu ya mpasi,+ 5 na kubula ya bo ke bula beto, na baboloko,+ na mubulu, na kisalu ya ngolo, na bampimpa kukonda mpongi, na bantangu ya kukonda madia;+ 6 na bunkete, na nzayilu, na ntima ya nda,+ na ntima ya mbote,+ na mpeve santu, na zola ya kukonda luvunu,+ 7 na kutuba ya kieleka, na ngolo ya Nzambi;+ na nzila ya binwaninu ya lunungu+ na diboko ya kitata* mpi na diboko ya kimama,* 8 na nzila ya nkembo mpi ya nsoni, na nzila ya lukumu ya mbi mpi ya lukumu ya mbote. Bo ke mona beto bonso bantu ya luvunu, kansi beto ke tubaka kieleka, 9 bo ke mona beto bonso bantu ya me zabanaka ve, kansi beto me zabanaka, bo ke tadila beto bonso bantu yina me fwana na kufwa, kansi beto ke zinga,+ bo ke pesa beto ndola, kansi bo ke fwa beto ve,+ 10 bo ke mona beto bonso bantu yina kele na mawa, kansi beto kele na kiese ntangu yonso, bo ke mona beto bonso bansukami, kansi beto ke kumisa bantu mingi bamvwama, bo ke mona beto bonso bantu ya kele ti kima ve, kansi beto kele ti bima yonso.+

11 Beto me kangula munoko sambu na kutubila beno,* bampangi ya Korinto, mpi beto me kangula kibeni ntima na beto. 12 Beto ke yiminaka beno ve lutondo na beto,+ kansi beno ke yiminaka beto lutondo na beno. 13 Yo yina mono ke tuba bonso nde mono ke tubila bana na mono, beno mpi beno kangula kibeni ntima na beno.*+

14 Beno vukana ve* ti bantu yina ke kwikilaka ve.+ Sambu inki kuwakana kele na kati ya lunungu ti kufwa bansiku?+ To inki kuwakana kele na kati ya nsemo ti mpimpa?+ 15 Diaka, inki kuwakana kele na kati ya Kristu ti Beliale?*+ To inki kima muntu yina ke kwikilaka* kele ti yo na kimvuka ti muntu yina ke kwikilaka ve?+ 16 Mpi nki kuwakana kele na kati ya tempelo ya Nzambi ti biteki?+ Sambu beto kele tempelo ya Nzambi ya moyo;+ mutindu Nzambi tubaka nde: “Mono ta zinga na kati na bo+ mpi mono ta tambula na kati na bo; mono ta vanda Nzambi na bo, mpi bo ta vanda bantu na mono.”+ 17 “Yehowa* ke tuba nde: ‘Yo yina beno basika na kati na bo, beno kabwana ti bo, mpi beno yambula kusimba kima ya mvindu’”;+ “‘ebuna mono ta yamba beno.’”+ 18 “Yehowa* Nkwa-Ngolo Yonso ke tuba nde: ‘Mono ta kuma tata na beno,+ mpi beno ta kuma bana na mono ya babakala mpi ya bankento.’”+

7 Bampangi ya mono ke zolaka mingi, sambu beto kele ti balusilu yai,+ beto katula na nitu na beto mvindu yonso ya kinsuni mpi ya mpeve,+ sambu beto kumisa busantu na beto ya kulunga na boma ya Nzambi.

2 Beno pesa beto kisika na ntima na beno.+ Beto me salaka ve ata muntu mosi mbi, beto me bebisaka ve ata muntu mosi, beto me kusaka ve ata muntu mosi sambu na mambote na beto mosi.+ 3 Mono ke tuba ve mambu yai sambu na kubedisa beno. Sambu mono tubaka ntete nde beno kele na ntima na beto sambu beto fwa kumosi mpi beto zinga kumosi. 4 Mono ke tubila beno ti masonga ya nene. Mono ke kudikumisa mingi sambu na beno. Mono me fuluka ti kikesa; mono kele na kiese mingi na bampasi na beto yonso.+

5 Ya kieleka, ntangu beto kumaka na Masedonia,+ nitu* na beto pemaka ve, kansi beto landaka kumona mpasi na mitindu yonso—bitumba vandaka na nganda, mpi boma na kati. 6 Kansi Nzambi yina ke lembikaka bantu yina me lemba,+ yandi lembikaka beto na nzila ya Tito ntangu yandi kwisaka; 7 yo kele kaka ve sambu yandi kwisaka kansi mpi sambu beno lembikaka yandi, mutindu yandi kwisaka kusonga beto nzala na beno ya ngolo ya kumona mono, mawa na beno ya ngolo, mpi dikebi na beno ya masonga* sambu na mono; yo yina mono waka kiese mingi kuluta.

8 Sambu, ata mono pesaka beno mawa na mukanda na mono,+ mono kele na mpasi ve sambu na yo. Ata mono monaka ntete mpasi sambu na yo, (sambu mukanda yina pesaka beno mawa, ata yo vandaka kaka sambu na ntangu fioti), 9 ntangu yai mono kele ve na kiese kaka sambu beno waka mawa, kansi mono kele na kiese sambu mawa na beno nataka beno na kubalula ntima. Sambu beno waka mawa na kuwakana ti luzolo ya Nzambi, yo yina beto salaka beno ata mbi mosi ve. 10 Sambu kuwa mawa na mutindu yina ke sepedisa Nzambi ke nataka na kubalula ntima mpi na luguluku, mpi yo ke pesaka ve mpasi;+ kansi mawa ya nsi-ntoto ke nataka na lufwa. 11 Sambu mawa yina beno waka na kuwakana ti luzolo ya Nzambi natilaka beno kikesa ya mingi, ee, beno kudikumisaka bunkete, beno waka makasi, beno waka boma, beno monisaka nzala ya ngolo, mpi kikesa, mpi beno sungikaka mambu ya mbi!+ Na mambu yonso beno monisaka nde beno salaka mbote* na diambu yai. 12 Ata mono sonikilaka beno, mono salaka yo ve sambu na muntu yina salaka mbi,+ to sambu na muntu yina bo salaka mbi, kansi yo vandaka sambu kikesa na beno sambu na beto kumonana na kati na beno na meso ya Nzambi. 13 Yo yina beto bakaka kikesa.

Kansi, katula kikesa yina beto bakaka, beto waka kiese mingi kuluta sambu na kiese ya Tito, sambu beno yonso, beno pesaka yandi kikesa mingi. 14 Sambu kana mono kudikumisaka sambu na beno na ntwala na yandi, beno pesaka mono nsoni ve; kansi mutindu mambu yonso ya beto songaka beno vandaka ya kieleka, mutindu mosi mpi kudikumisa yina beto kudikumisaka na ntwala ya Tito monanaka ya kieleka. 15 Diaka, lutondo na yandi sambu na beno kele nene kibeni ntangu yandi ke yibukaka bulemfu na beno yonso+ mpi mutindu beno yambaka yandi ti boma mpi matekita. 16 Mono kele na kiese sambu mono lenda tudila beno ntima na mambu yonso.*

8 Ntangu yai bampangi, beto ke zola nde beno zaba mambu ya me tala ntima ya mbote ya nene ya Nzambi yina yandi monisilaka mabundu ya Masedonia.+ 2 Na nsungi ya kumekama ya ngolo na kati ya bampasi, kiese na bo ya mingi mpi kinsukami na bo ya ngolo salaka nde bo monisa mingi kikalulu na bo ya kukaba. 3 Sambu, yo vandaka na kutadila bima na bo,+ ee, mono ke ndimisa nde yo vandaka nkutu kuluta bima na bo,+ 4 sambu na luzolo na bo mosi, bo landaka kubondila beto ngolo sambu na kuvanda ti dibaku ya mbote ya kupesa makabu mpi ya kuvukana na kisalu ya kusadisa basantu.+ 5 Mpi bo salaka kaka ve mutindu beto vandaka kutula kivuvu, kansi ntete bo kudipesaka na Mfumu mpi na beto na nzila ya luzolo ya Nzambi. 6 Yo yina beto pesaka Tito+ kikesa nde, kaka mutindu yandi yantikisaka kisalu yai na kati na beno, yandi fwete manisa mpi kisalu yina mosi ya beno ke sala ya kupesa na luzolo ya mbote. 7 Kansi mutindu beno kele bamvwama na mambu yonso, na lukwikilu, na kutuba, na nzayilu, na kudipesa, mpi na zola na beto sambu na beno, beno vanda mpi bamvwama sambu na kupesa dikabu yai.+

8 Mono ke tuba ve mambu yai sambu na kupesa beno nsiku, kansi sambu na kusadisa beno na kuzaba mutindu bantu ya nkaka ke kudipesaka mpi sambu na kumeka bukieleka ya zola na beno. 9 Sambu beno me zaba ntima ya mbote ya nene ya Mfumu na beto Yezu Kristu, nde ata yandi vandaka mvwama yandi kumaka nsukami sambu na beno,+ sambu beno kuma bamvwama na nzila ya kinsukami na yandi.

10 Mono ke pesa dibanza na mono na diambu yai:+ Yo kele sambu na mambote na beno, sambu mvula mosi me luta tuka beno yantikisaka kisalu yai mpi beno monisaka nzala na beno ya kusala yo. 11 Ebuna ntangu yai, beno manisa mpi kisalu yina beno yantikaka kusala, mpidina luzolo na beno ya mbote kulungana na kuwakana ti yina beno kele na yo. 12 Sambu kana luzolo ya mbote kele ntete, Nzambi ke ndimaka yo mingi-mingi na kutadila yina muntu kele na yo,+ kansi ve na kutadila yina muntu kele na yo ve. 13 Sambu mono ke zola ve kukumisa yo pete sambu na bantu ya nkaka, kansi mpasi sambu na beno; 14 kansi, mono ke zola nde bima yina beno kele na yo mingi ntangu yai kufika bima yina bo me konda, mpidina bima yina bo kele na yo mingi kufika mpi bima yina beno me konda, sambu beno yonso kuvanda kiteso mosi. 15 Mutindu bo me sonikaka nde: “Muntu yina vandaka ti bima mingi vandaka ve ti bima mingi kuluta, mpi muntu yina vandaka ti bima fioti vandaka ve ti bima fioti kuluta.”+

16 Yo yina, beto ke pesa matondo na Nzambi sambu yandi tulaka na ntima ya Tito+ dikebi ya masonga ya mutindu mosi ti yina beto kele na yo sambu na beno, 17 sambu yandi ndimaka kibeni kikesa yina beto pesaka yandi, mpi sambu yandi kele ti nzala ya ngolo, yandi ke kwisa kuna na beno na luzolo na yandi mosi. 18 Kansi beto ke tinda kumosi ti yandi mpangi yina lukumu na yandi sambu na nsangu ya mbote me panzanaka na mabundu yonso. 19 Yina kaka ve, kansi dibundu solaka yandi mpi na kuvanda nduku na beto ya nzietelo ntangu beto ke pesa dikabu yai ya ntima ya mbote sambu na nkembo ya Mfumu mpi sambu na kumonisa luzolo na beto ya mbote ya kusadisa. 20 Mpidina beto ke buya nde muntu kutonga beto sambu na dikabu yai ya nene ya bo me pesa beto na kukabula.+ 21 Sambu beto ‘ke kebaka mambu yonso na masonga, na meso ya Yehowa* kaka ve, kansi mpi na meso ya bantu.’+

22 Diaka, beto ke tinda ti bo mpangi na beto yina beto me mekaka mbala mingi mpi me monaka nde yandi kele kikesa na mambu mingi, kansi ntangu yai yandi kele kikesa mingi kuluta sambu yandi ke tudilaka beno ntima kibeni. 23 Kansi kana kele ti ngiufula sambu na Tito, yandi ke salaka ti mono mpi yandi kele nduku ya kisalu sambu na mambote na beno; to kana kele ti bangiufula sambu na bampangi na beto, bo kele bantumwa ya mabundu mpi nkembo ya Kristu. 24 Yo yina, beno monisila bo banzikisa ya zola na beno,+ mpi beno songa mabundu sambu na nki beto kudikumisaka sambu na beno.

9 Yo kele kibeni mfunu ve nde mono sonikila beno sambu na kisalu ya kusadisa basantu,+ 2 sambu mono me zaba luzolo na beno ya mbote yina mono ke kudikumisa sambu na yo na Bakristu ya Masedonia, nde ntangu yai bampangi ya Akaya kele ya kuyilama katuka mvula mosi, mpi kikesa na beno me siamisa bantu mingi na kati na bo. 3 Kansi mono ke tinda bampangi, sambu kudikumisa na beto sambu na beno kuvanda ve ya mpamba na diambu yai mpi sambu beno vanda kibeni ya kuyilama, mutindu mono tubaka. 4 Kana ve, kana bampangi ya Masedonia kukwisa ti mono mpi bo mona nde beno kele ve ya kuyilama, beto ti beno, beto ta wa nsoni sambu na ntima ya beto ke tudilaka beno. 5 Yo yina, mono yindulaka nde yo kele mfunu na kusiamisa bampangi na kukwisa kuna na beno na ntwala mpi na kuyidika na ntwala dikabu ya luzolo ya mbote yina beno silaka, sambu yo vanda ya kuyilama bonso dikabu ya luzolo ya mbote, kansi ve bonso kima yina beto me baka na ngolo.

6 Kansi mono zolaka kutuba nde, muntu yina ke kuna bambuma fioti ta katula mpi bambuma fioti, mpi muntu yina ke kuna bambuma mingi ta katula mpi bambuma mingi.+ 7 Konso muntu kusala mutindu yandi me kana na ntima na yandi, ti kubokuta ve* to sambu bo ke pusa yandi,+ sambu Nzambi ke zolaka muntu yina ke pesaka na kiese.+

8 Diaka, Nzambi lenda monisila beno ntima ya mbote na yandi yonso ya nene na kiteso ya mingi sambu beno vanda konso ntangu ti bima yonso yina beno kele na yo mfunu na mambu yonso, mpi beno vanda ti bima mingi sambu na konso kisalu ya mbote.+ 9 (Mutindu bo me sonikaka nde: “Yandi me kaba bima mingi;* yandi me pesa na bansukami. Lunungu na yandi ke vandaka kimakulu.”+ 10 Muntu yina ke pesaka bankeni mingi na muntu ya ke kunaka mpi yina ke pesaka mampa sambu na kudia, yandi ta pesa beno nkeni sambu beno kuna, yandi ta kumisa yo mingi, mpi yandi ta kumisa mingi bambuma ya lunungu na beno.) 11 Na mambu yonso beno ke baka balusakumunu sambu beno ke monisaka kikalulu ya kukaba na mitindu yonso, kikalulu yina ke nata bantu mingi na kupesa Nzambi matondo; 12 sambu kisalu yai ya beno ke sala kele ve kaka sambu na kulungisa mbote banzala ya basantu,+ kansi mpi sambu yo pusa bantu mingi na kupesa Nzambi matondo. 13 Bantu ke pesa Nzambi nkembo sambu lusadisu yai ya beno ke pesa ke monisa nde beno ke lemfukaka na nsangu ya mbote ya Kristu, mutindu beno tubaka yo na meso ya bantu yonso, mpi sambu beno ke pesa bo ti bantu yonso ya nkaka makabu na luzolo yonso.+ 14 Mpi ntangu bo ke bondila sambu na beno, bo ke monisila beno zola sambu na ntima ya mbote ya kukonda ndilu yina Nzambi me monisilaka beno.

15 Beto pesa Nzambi matondo sambu na dikabu na yandi ya ofele yina beto lenda tendula ve.

10 Mono Polo, mono ke bondila beno na mawete mpi na ntima ya mbote ya Kristu,+ ata mono ke vandaka muntu ya kukonda mfunu na kati na beno ntangu mono kele na ntwala na beno,+ kansi mono ke vandaka kikesa ntangu mono kele ve ti beno.+ 2 Mono ke bondila beno sambu ntangu mono ta vanda ti beno, yo lomba ve nde mono vanda kikesa mpi mono baka balukanu ya ngolo yina mono ke kana kubakila bantu ya nkaka yina ke monaka beto bonso nde beto ke tambulaka na mutindu ya kinsuni. 3 Sambu ata beto ke tambula na nsuni, beto ke nwanaka ve na kutadila mutindu beto kele na nsuni. 4 Sambu binwaninu ya bitumba na beto kele ve ya kinsuni,+ kansi Nzambi+ muntu ke kumisaka yo ngolo sambu na kubwisa bima yina me kangamaka ngolo. 5 Sambu beto ke bwisaka bangindu mpi konso kima ya kunanguka yina ke kangaka nzayilu ya Nzambi,+ mpi beto ke tulaka konso dibanza na kimpika sambu na kunata yo na kulemfukila Kristu; 6 mpi beto kele ya kuyilama na kupesa ndola sambu na kukonda bulemfu ya mitindu yonso,+ ntangu beno ta monisa nde beno kele bulemfu kibeni.

7 Beno ke tadilaka mambu mutindu yo ke monanaka na meso. Kana muntu ke tula ntima nde yandi kele muntu ya Kristu, yandi fwete yindula diaka diambu yai: mutindu yandi kele muntu ya Kristu, beto mpi beto kele bantu ya Kristu. 8 Sambu ata mono kudikumisa mwa mingi kuluta sambu na kiyeka yina Mfumu me pesaka beto ya kutunga beno kansi ve ya kubwisa beno,+ mono ta wa ve nsoni. 9 Mono ke zola ve kumonika bonso nde mono ke sosa kupesa beno boma na mikanda na mono. 10 Sambu bo ke tubaka nde: “Mikanda na yandi kele na kilo mpi kiyeka, kansi kana yandi kele awa yandi ke vandaka ngolo ve mpi kutuba na yandi kele mpamba.” 11 Muntu ya mutindu yai fwete zaba nde mambu yina beto ke tubaka na mikanda ntangu beto kele ve ti beno, yo yina mambu ya beto ta sala ntangu beto ta vanda ti beno.+ 12 Sambu beto ke mekaka ve kuditula ndonga mosi to kudifwanisa ti bantu ya nkaka yina ke kuditombulaka bo mosi.+ Kansi, bo ke kondaka mayele ya kubakisa mambu sambu bo ke kuditesaka ti bo mosi mpi bo ke kudifwanisaka ti bo mosi.+

13 Kansi beto, beto ta kudikumisa ve na nganda ya bandilu yina bo me pesaka beto, kansi na kati ya ndilu ya teritware yina Nzambi tesilaka beto,* yandi kumisaka yo mpi tii na beno.+ 14 Ya kieleka, beto ke luta ve bandilu na beto bonso nde beto kumaka ve na beno, sambu beto kele bantu ya ntete yina kwisaka kukuma tii kuna na beno ti nsangu ya mbote ya Kristu.+ 15 Beto ke kudikumisa ve na nganda ya bandilu yina bo me pesaka beto, disongidila sambu na kisalu yina muntu ya nkaka salaka, kansi beto ke tula ntima nde sambu lukwikilu na beno ke landa kukuma ngolo, mambu yina beto salaka lenda kuma mingi, na kati ya teritware na beto. Ebuna beto ta sala diaka mingi, 16 sambu beto zabisa nsangu ya mbote na bansi yina kele ntama kuluta insi na beno, sambu beto kudikumisa ve na mambu yina bo salaka ntama na teritware ya muntu ya nkaka. 17 “Kansi muntu yina ke kudikumisa, yandi kudikumisa na Yehowa.”*+ 18 Sambu Yehowa* ke ndimaka ve muntu yina ke kudikumisaka yandi mosi,+ kansi yandi ke ndimaka muntu yina yandi ke kumisaka.+

11 Mono ke zola nde beno kanga ntima na mwa buzoba na mono. Ya kieleka, beno ke kanga ntima sambu na mono! 2 Sambu mono ke wa kimpala sambu na beno ti kimpala yina me katuka na Nzambi,* sambu mono silaka beno na makwela na bakala mosi sambu mono pesa beno na Kristu bonso mwense ya bunkete.+ 3 Kansi mono ke wa boma nde na mutindu mosi buna, mutindu nioka pukumunaka Eva na mayele na yandi ya mbi,+ mabanza na beno kubeba mpi beno vidisa masonga ti bunkete yina beno fwete monisa na Kristu.+ 4 Ya kieleka, kana muntu mosi kukwisa mpi kusamuna Yezu yina me swaswana ti Yezu yina beto samunaka, to kana beno baka mpeve yina me swaswana ti mpeve yina beno bakaka, to nsangu ya mbote yina me swaswana ti nsangu yina beno ndimaka,+ beno ke kangaka ntima sambu na yandi kukonda mpasi. 5 Sambu mono ke yindula nde mono kudimonisaka ve ata na kima mosi nde mono kele na nsi ya bantumwa na beno ya nene-nene.+ 6 Kansi ata mono me zaba ve kutuba mbote,+ mono me konda ve nzayilu; ya kieleka beto monisilaka beno yo pwelele na mitindu yonso mpi na mambu yonso.

7 To keti mono salaka disumu mutindu mono kudikulumusaka sambu beno baka lukumu, sambu mono zabisaka beno nsangu ya mbote ya Nzambi na kiese yonso kukonda kulomba mbongo?+ 8 Mono bakaka bima ya mabundu ya nkaka na mutindu mono ndimaka bima* yina sambu na kusadila beno.+ 9 Ntangu mono vandaka ti beno mpi mono kondaka bima ya mono vandaka na yo mfunu, mono kumaka ve kizitu sambu na konso muntu, sambu bampangi yina katukaka na Masedonia pesaka mono bima yonso yina mono vandaka na yo mfunu.+ Ee, na mitindu yonso, mono buyaka kukuma kizitu sambu na beno mpi mono ta landa kusala mutindu yina.+ 10 Ntangu yonso yina kieleka ya Kristu kele na mono, mono ta bikisa ve lulendo yina+ na babwala ya Akaya. 11 Sambu na nki kikuma? Keti sambu mono ke zolaka beno ve? Nzambi me zaba nde mono ke zolaka beno.

12 Mono ta landa kusala mambu yina mono ke sala,+ sambu mono katula luvunu ya bantu yina ke sosa kikuma ya kuvanda kiteso mosi ti beto na mambu yina bo ke kudikumisa. 13 Sambu bantu yai kele bantumwa ya luvunu, bansadi yina ke kusaka, mpi bo ke kudikitulaka bonso bantumwa ya Kristu.+ 14 Yo kele diambu ya kuyituka ve, sambu Satana yandi mosi ke landaka kudikitula bonso wanzio ya nsemo.+ 15 Yo yina, yo kele diambu ya kuyituka ve kana bansadi na yandi mpi ke landaka kudikitula bonso bansadi ya lunungu. Kansi nsuka na bo ta vanda na kuwakana ti bisalu na bo.+

16 Mono ke tuba diaka nde: Ata muntu mosi ve kuyindula nde mono kele zoba. Kansi ata beno ke yindula mutindu yina, beno ndima mono bonso muntu ya buzoba, sambu mono mpi mono kudikumisa mwa fioti. 17 Mambu ya mono ke tuba ntangu yai ke landa ve mbandu ya Mfumu, kansi mono ke tuba bonso muntu ya buzoba, yina ke kudikumisa mpi ke kuditudila ntima. 18 Sambu bantu mingi ke kudikumisaka na kinsuni,* mono mpi mono ta kudikumisa. 19 Sambu beno kele bantu ya “mayele” mingi, beno ke kanga ntima na kiese yonso sambu na bazoba. 20 Ya kieleka, beno ke kanga ntima sambu na konso muntu yina ke kumisa beno bampika, konso muntu yina ke dia bima na beno, konso muntu yina ke baka bima ya beno kele na yo, konso muntu yina ke kuditombula na zulu na beno, mpi konso muntu yina ke bula beno na luse.

21 Beto ke wa nsoni na kutuba diambu yai, sambu yo lenda monana bonso nde beto salaka mambu kukonda kikesa.

Kansi kana bantu ya nkaka ke sala mambu ti kikesa—mono ke tuba na buzoba yonso—mono mpi ke sala mambu ti kikesa. 22 Keti bo kele Baebreo? Mono mpi kele Mu-Ebreo.+ Keti bo kele bantu ya Izraele? Mono mpi kele muntu ya Izraele. Keti bo kele bana* ya Abrahami? Mono mpi.+ 23 Keti bo kele bansadi ya Kristu? Mono ke pesa mvutu bonso muntu ya kilawu, mono kele nsadi ya Kristu na mutindu ya kuluta: Mono me salaka kisalu mingi kuluta,+ mono me kotaka boloko mbala mingi kuluta,+ bo me bulaka mono mbala mingi kuluta, mpi mono me monaka lufwa na meso mbala mingi.+ 24 Mbala tanu, Bayuda bulaka mono bafimbu 40 katula mosi,+ 25 mbala tatu bo bulaka mono banti,+ mbala mosi bo losilaka mono matadi,+ mbala tatu maswa ya mono vandaka na kati bebaka,+ mono lutisaka mpimpa mosi ti mwini mosi na nzadi-mungwa; 26 mbala mingi na banzietelo, na bigonsa ya banzadi, na bigonsa ya miyibi, na bigonsa ya ke katuka na bampangi na mono mosi,+ na bigonsa ya ke katuka na makanda,+ na bigonsa na kati ya mbanza,+ na bigonsa na ntoto ya zelo na zelo, na bigonsa na nzadi-mungwa, na bigonsa na kati ya bampangi ya luvunu, 27 na kisalu ya ngolo mpi ya ke lembisaka, mbala mingi na bampimpa kukonda mpongi,+ na nzala ya kudia mpi na nzala ya masa,+ mbala mingi kukonda madia,+ na madidi mpi kukonda bilele.*

28 Katula mambu yina yonso, kele ti mambu yina ke yangisa mono konso kilumbu: susi sambu na mabundu yonso.+ 29 Nani me lemba, mpi mono me lemba ve? Nani me bula sakuba, mpi mono me dasuka ve?

30 Kana mono fwete kudikumisa, mono ta kudikumisa na mambu yina ke monisa kulemba na mono. 31 Nzambi mpi Tata ya Mfumu Yezu, Muntu yina bo fwete kumisa kimakulu, me zaba nde mono ke kusa ve. 32 Na Damasi, guvernere yina vandaka kusala na nsi ya kiyeka ya ntotila Aretasi, vandaka kukengila mbanza Damasi sambu na kukanga mono, 33 kansi bo tulaka mono na kati ya kitunga mpi bo kulumusaka mono na nela na kibaka ya mbanza,+ ebuna mono gulukaka na maboko na yandi.

12 Mono fwete kudikumisa. Yo kele na mfunu ve, kansi ntangu yai mono ta tubila bambona-meso ya kuyituka+ mpi mambu yina Mfumu songaka mono.+ 2 Mono me zaba muntu mosi na bumosi ti Kristu yina, bamvula 14 me luta—yo vanda na nitu to na nganda ya nitu, mono me zaba ve; kansi Nzambi me zaba—bo nataka yandi na zulu ya tatu. 3 Ee, mono me zaba muntu ya mutindu yina—yo vanda na nitu to na nganda ya nitu, mono me zaba ve; kansi Nzambi me zaba— 4 bo nataka yandi na paladisu mpi yandi waka mambu yina bo lenda tuba ve mpi yina muntu kele ve ti nswa ya kutuba. 5 Mono ta kudikumisa sambu na muntu yina, kansi mono ta kudikumisa ve sambu na mono mosi, katula kaka sambu na kulemba na mono. 6 Sambu ata mono kudikumisa, mono ta vanda ve zoba, sambu mono ta tuba kieleka. Kansi mono ke buya kusala mutindu yina, sambu ata muntu mosi ve kuyikila mono mambu ya nkaka kuluta mambu yina yandi ke mona na mono to mambu yina yandi ke wa na mono, 7 kaka sambu bo songaka mono mambu ya kuyituka ya mutindu yina.

Sambu mono kudinangula ve kuluta ndilu, bo pesaka mono nsende na nsuni,+ wanzio ya Satana, sambu yandi landa kubula mono, sambu mono kudinangula ve kuluta ndilu. 8 Mono bondilaka Mfumu mbala tatu sambu na diambu yai, sambu yo katuka na mono. 9 Kansi yandi tubilaka mono nde: “Ntima ya mbote ya nene ya mono me monisila nge me fwana, sambu ngolo na mono ke kuma ya kukuka ntangu nge kele ya kulemba.”+ Ebuna mono ta kudikumisa na kiese yonso sambu na kulemba na mono, sambu ngolo ya Kristu kubikala na zulu na mono bonso tenta. 10 Yo yina, mono ke monaka kiese ntangu mono kele ya kulemba, na mafingu, ntangu mono kele na mfunu ya lusadisu, na mbangika mpi na bampasi, sambu na Kristu. Sambu ntangu mono ke vandaka ya kulemba, na ntangu yo yina mono ke vandaka ngolo.+

11 Mono me kuma zoba. Beno bantu pusaka mono na kukuma mutindu yina, sambu yo lombaka nde beno kumisa mono. Sambu mono kudimonisaka ve ata na kima mosi nde mono kele na nsi ya bantumwa na beno ya nene-nene, ata mono kele muntu ya mpamba.+ 12 Ya kieleka, mono songaka beno bidimbu ya ke monisa nde mono kele ntumwa ti kukanga-ntima mingi,+ mpi na nzila ya bidimbu, ya mambu ya kuyituka, mpi ya bidimbu ya nkumbwa.+ 13 Inki mutindu beno bakaka mambote fioti kuluta mabundu ya nkaka, katula kaka nde mono kumaka ve kizitu sambu na beno?+ Beno lolula mono na ntima ya mvimba sambu na mbi yai.

14 Yai mbala ya tatu ya mono ke zola kukwisa kuna na beno, mpi mono ta kuma ve kizitu. Sambu mono ke sosa ve bima na beno,+ kansi beno mosi; sambu bo ke vingilaka ve nde bana+ kubumba bima sambu na bibuti na bo, kansi nde bibuti kubumba bima sambu na bana na bo. 15 Kansi mono, mono ta pesa na kiese mingi bima yonso ya mono kele na yo mpi mono ta kuditambika ya mvimba sambu na beno.*+ Kana mono ke zolaka beno mingi kibeni, keti beno fwete zola mono fioti? 16 Ata mpidina, mono kumaka ve kizitu sambu na beno.+ Kansi beno ke tuba nde mono vandaka na “mayele ya mbi” mpi nde mono sadilaka “luvunu” sambu na kukanga beno. 17 Mono kusaka beno ve sambu na mambote na mono mosi na nzila ya bantu yina mono tindilaka beno, mpidina ve? 18 Mono siamisaka Tito mpi mono tindaka mpangi mosi ti yandi. Tito kusaka beno ve ata fioti sambu na mambote na yandi mosi, mpidina ve?+ Beto tambulaka na mpeve mosi, mpidina ve? Beto tambulaka na bitambi mosi, mpidina ve?

19 Keti ntangu yina yonso beno ke yindula nde beto ke sosa kusamba na ntwala na beno? Beto ke tuba na ntwala ya Nzambi na bumosi ti Kristu. Kansi bampangi ya beto ke zolaka mingi, mambu yonso ya beto ke salaka kele sambu na kutunga beno. 20 Sambu mono ke wa boma nde na mutindu mosi buna, ntangu mono ta kwisa, mono kuta beno ve mutindu mono ke zola mpi nde mono vanda ve mutindu beno ke zola, kansi yo lenda vanda ti kuswana, kimpala, makasi, kukabwana, kutonga, songi-songi, kufuluka ti lulendo, mpi mavwanga. 21 Ziku ntangu mono ta kwisa diaka, Nzambi na mono ta pesa mono nsoni na ntwala na beno, mpi mono ta vanda na mawa sambu na bantu mingi yina salaka ntete masumu, kansi yina balulaka ntete ve ntima na mambu na bo ya mvindu, na pite,* mpi na mambu ya mbi ya kukonda nsoni* yina bo me salaka.

13 Yai mbala ya tatu ya mono ke kwisa kuna na beno. “Mambu yonso fwete ndimama kana bambangi zole to tatu me ta kimbangi.”+ 2 Ata mono kele ve ti beno ntangu yai, yo kele bonso nde mono vandaka ti beno na mbala ya zole, mpi mono ke kebisa na ntwala bantu yina salaka masumu mpi bantu yonso ya nkaka, nde kana mono kwisa diaka, mono ta wila bo ve mawa, 3 sambu beno ke sosa nzikisa ya ke monisa nde Kristu ke tuba kibeni na nzila na mono; yandi kele ve ya kulemba sambu na beno kansi yandi kele ngolo na kati na beno. 4 Ya kieleka, bo fwaka yandi na zulu ya nti sambu yandi vandaka ya kulemba, kansi yandi kele na moyo sambu na ngolo ya Nzambi.+ Beto mpi, beto kele ya kulemba ti yandi, kansi beto ta zinga ti yandi+ sambu na ngolo ya Nzambi yina yandi ke monisila beno.+

5 Beno landa kudimeka sambu na kuzaba kana beno kele na lukwikilu; beno landa kuditala kana beno kele nki mutindu.+ To keti beno ke zaba ve nde Yezu Kristu kele na bumosi ti beno? Kaka kana bo me ndimaka beno ve. 6 Mono ke tula kibeni ntima nde beno ta zaba nde bo me ndimaka beto.

7 Ntangu yai beto ke samba Nzambi sambu beno sala ve ata diambu mosi ya mbi, yo kele ve sambu beto monana bantu yina bo me ndimaka, kansi sambu beno sala mambu ya mbote, ata beto lenda monana bantu yina bo me ndimaka ve. 8 Sambu beto lenda sala ve ata diambu mosi sambu na kukanga kieleka nzila, kansi kaka sambu na kieleka. 9 Beto ke waka kiese mingi kana beto kele ya kulemba kansi beno kele ngolo. Diambu ya beto ke lomba na kisambu kele nde bo sungika beno. 10 Yo yina mono ke sonika mambu yai ntangu mono kele ve ti beno, sambu ntangu mono ta vanda ti beno, mono vanda ve makambu ngolo ntangu mono ke sadila kiyeka yina Mfumu pesaka mono+ ya kutunga kansi ya kubwisa ve.

11 Yo yina bampangi, beno landa na kuvanda na kiese, na kubika nde bo sungika beno, na kubika nde bo lembika beno,+ na kuvanda ti dibanza mosi,+ na kuzinga na ngemba;+ ebuna Nzambi ya zola mpi ya ngemba+ ta vanda ti beno. 12 Beno pesana mbote ti beze ya santu. 13 Basantu yonso me tindila beno mbote.

14 Ntima ya mbote ya nene ya Mfumu Yezu Kristu, zola ya Nzambi, mpi mambote ya beno ke bakaka kumosi na nzila ya mpeve santu kuvanda ti beno yonso.