NA BAGALATIA

1 Mono Polo, bo solaka mono na kuvanda ntumwa, na bantu ve, na nzila ya muntu mpi ve, kansi na nzila ya Yezu Kristu+ mpi na nzila ya Nzambi, Tata na beto,+ yina tedimisaka yandi na bafwa. 2 Mono ti bampangi yonso yina kele ti mono, beto ke sonikila mabundu ya Galatia:

3 Ntima ya mbote ya nene mpi ngemba ya Nzambi Tata na beto mpi ya Mfumu Yezu Kristu kuvanda na beno. 4 Yandi kudipesaka sambu na masumu na beto+ sambu yandi gulusa beto na ngidika ya bima ya mbi*+ ya ntangu yai na kutadila luzolo ya Nzambi, Tata na beto.+ 5 Nkembo kuvanda na yandi mvula na mvula. Amen.

6 Mono ke yituka mutindu beno ke yambula nswalu* Muntu yina bingaka beno ti ntima ya mbote ya nene ya Kristu mpi beno ke landa nsangu ya mbote ya mutindu ya nkaka.+ 7 Na kutuba ya mbote, nsangu ya nkaka ya mbote kele ve; kansi kele ti bantu ya nkaka yina ke kotisa mavwanga na kati na beno+ mpi ke zola kubebisa nsangu ya mbote ya Kristu. 8 Kansi, ata beto to wanzio mosi ya zulu kukwisa kuzabisa beno bonso nsangu ya mbote mambu yina me swaswana ti nsangu ya mbote yina beto zabisaka beno, bo fwete singa yandi. 9 Mutindu beto tubaka ntete, mono ke tuba yo diaka ntangu yai nde, Muntu yina ke zabisa beno bonso nsangu ya mbote mambu yina me swaswana ti nsangu yina beno ndimaka, bo fwete singa yandi.

10 Keti ntangu yai mono ke sosa kundimisa bantu to Nzambi? To keti mono ke sosa kupesa bantu kiese? Kana mono vandaka kaka kupesa bantu kiese, mono zolaka ve kuvanda mpika ya Kristu. 11 Bampangi, mono ke zola beno zaba nde nsangu ya mbote ya mono zabisaka beno me katukaka ve na bantu;+ 12 sambu mono bakaka yo ve na muntu, bo longaka mono yo mpi ve, kansi Yezu Kristu muntu songaka mono yo.

13 Ya kieleka, beno waka nsangu ya bikalulu yina mono vandaka na yo ntete na dibundu ya Bayuda,+ nde mono vandaka kumonisa dibundu ya Nzambi mpasi mpi kufwa yo na kiteso mosi ya nene;*+ 14 mpi mono vandaka kuyela mingi na dibundu ya Bayuda kuluta bantu mingi ya dikanda na mono yina vandaka mvula mosi ti mono, sambu mono vandaka kikesa mingi sambu na bansiku ya batata na mono.+ 15 Kansi ntangu Nzambi, yina salaka nde mono butuka mpi yina bingaka mono na nzila ya ntima ya mbote na yandi ya nene,+ monaka mbote 16 na kusonga mono Mwana na yandi, sambu mono zabisa nsangu na yandi ya mbote na makanda,+ mono kwendaka ve na mbala mosi kulomba dibanza ya muntu;* 17 mono tombukaka mpi ve na Yeruzalemi na bantu yina vandaka bantumwa na ntwala na mono, kansi mono kwendaka na Arabia, mpi na nima mono vutukaka na Damasi.+

18 Ebuna bamvula tatu na nima, mono tombukaka na Yeruzalemi+ sambu mono kwenda kutala Sefasi,*+ mpi mono vandaka ti yandi bilumbu 15. 19 Kansi mono monaka ve bantumwa ya nkaka, katula kaka Yakobo+ mpangi ya Mfumu. 20 Sambu na mambu yina mono ke sonikila beno, mono ke ndimisa beno na ntwala ya Nzambi nde mono ke kusa ve.

21 Na nima, mono kwendaka na baprovense ya Siria mpi ya Silisia.+ 22 Kansi mabundu ya Bukristu ya Yudea zabaka mono ve. 23 Bo vandaka kuwa kaka bantu ya nkaka ke tuba nde: “Muntu yina vandaka ntete kumonisa beto mpasi+ ke zabisa ntangu yai nsangu ya mbote ya lukwikilu yina yandi vandaka kusosa ntete kufwa.”+ 24 Yo yina bo yantikaka kupesa Nzambi nkembo sambu na mono.

2 Na nima ya bamvula 14, mono tombukaka diaka na Yeruzalemi ti Barnabasi;+ mono nataka mpi Tito.+ 2 Mono tombukaka kuna sambu mono monaka mbona-meso, mpi mono tendudilaka bo nsangu ya mbote yina mono vandaka kusamuna na kati ya makanda. Mono salaka yo na kingenga, kansi na ntwala ya bantu yina bo vandaka kuzitisa mingi, sambu na kuzikisa nde mono vandaka ve kubaka ntinu to nde mono bakaka ve ntinu ya mpamba. 3 Ata Tito+ yina vandaka ti mono, bo pusaka yandi ve na kubaka luyotisu,+ ata yandi vandaka Mugreki. 4 Kansi diambu yai basikaka sambu na bampangi ya luvunu yina bo kotisaka na kinsweki,+ mpi yina kudikotisaka na mayele sambu na kutala kimpwanza+ yina beto kele na yo na bumosi ti Kristu Yezu, sambu bo kumisa beto bampika kibeni;+ 5 beto lemfukilaka bo ve,+ ve, ata sambu na ntangu fioti,* sambu kieleka ya nsangu ya mbote kuvanda kaka ti beno.

6 Kansi sambu na bantu yina vandaka kumonika bonso bantu ya mfunu+—ata bo vandaka bantu ya nki mutindu, yo kele na mfunu ve na meso na mono, Nzambi ke tadilaka ve muntu mutindu yandi ke monanaka na meso—ya kieleka, bantu yina bo vandaka kuzitisa mingi songaka mono ve ata kima mosi ya mpa. 7 Kansi, ntangu bo monaka nde bo pesaka mono nsangu ya mbote sambu na bantu yina bo me yotisaka ve,+ mutindu bo pesaka Piere nsangu yina sambu na bantu yina bo me yotisaka— 8 sambu muntu yina pesaka Piere kiyeka ya kuvanda ntumwa ya bantu yina bo me yotisaka, yandi pesaka mono mpi kiyeka ya kuvanda ntumwa ya bantu ya makanda+— 9 ebuna ntangu bo bakisaka ntima ya mbote ya nene yina Nzambi monisilaka mono,+ Yakobo,+ Sefasi,* ti Yoane, bantu yina vandaka kumonana nde bo kele makunzi ya dibundu, bo pesaka mono+ ti Barnabasi diboko ya kitata ya kinduku, sambu beto kwenda na makanda, kansi bo, bo kwenda na bantu yina bo me yotisaka. 10 Bo lombaka beto kaka nde beto yindula bansukami, mpi mono tulaka ngolo na kusala mutindu yina.+

11 Kansi, ntangu Sefasi*+ kwisaka na Antioshe,+ mono nganinaka yandi na meso ya bantu, sambu yo vandaka pwelele nde yandi salaka mbi.* 12 Sambu na ntwala nde bantu ya nkaka yina Yakobo+ tindaka kukuma, yandi vandaka kudia ti bantu ya makanda;+ kansi ntangu bo kumaka, yandi yambulaka kudia ti bo mpi yandi kabwanaka ti bo, sambu yandi waka boma ya bantu yina bo me yotisaka.+ 13 Bayuda ya nkaka mpi vukanaka ti yandi na luvunu yina; bo bendaka nkutu ata Barnabasi na luvunu na bo. 14 Kansi ntangu mono monaka nde bo vandaka kutambula ve nzila mosi ti kieleka ya nsangu ya mbote,+ mono tubilaka Sefasi* na meso na bo yonso nde: “Kana nge, ata nge kele Muyuda, nge ke zinga bonso bantu ya makanda, kansi bonso Bayuda ve, nki mutindu nge lenda pusa bantu ya makanda na kuzinga na kuwakana ti binkulu ya Bayuda?”+

15 Beto bantu yina me butukaka Bayuda, kansi beto kele ve bansumuki yina me katukaka na makanda, 16 beto ke zaba nde Nzambi ke ndimaka muntu bonso muntu ya lunungu na nzila ya bisalu ya nsiku ve, kansi kaka na nzila ya lukwikilu+ na Kristu Yezu.+ Yo yina, beto me kwikilaka na Kristu Yezu, sambu Nzambi kundima beto bonso bantu ya lunungu na nzila ya lukwikilu na Kristu, kansi ve na nzila ya bisalu ya nsiku, sambu Nzambi ta ndima ve ata muntu* mosi bonso muntu ya lunungu na nzila ya bisalu ya nsiku.+ 17 Ebuna, kana ntangu beto ke sosa nde Nzambi kundima beto bonso bantu ya lunungu na nzila ya Kristu, bo me mona nde beto mpi kele bansumuki, keti Kristu kele nsadi ya disumu? Ata fioti ve! 18 Kana mono ke tunga diaka bima yina mono bwisaka ntete, mono ke monisa nde mono kele muntu ya ke fwaka nsiku. 19 Na nzila ya nsiku mono fwaka na yina me tala nsiku,+ sambu mono vanda na luzingu na yina me tala Nzambi. 20 Bo me tulaka mono na zulu ya nti ti Kristu.+ Mono ve muntu ke zinga diaka,+ kansi Kristu muntu ke zinga na bumosi ti mono. Ya kieleka, luzingu yina mono ke zinga ntangu yai na kinsuni, mono ke zinga yo na nzila ya lukwikilu na mono na Mwana ya Nzambi,+ yina zolaka mono mpi fwaka sambu na mono.+ 21 Mono ke buya* ve ntima ya mbote ya nene ya Nzambi,+ sambu kana lunungu kele na nzila ya nsiku, yo ke songa nde Kristu fwaka sambu na mpamba.+

3 O beno bantu ya Galatia, beno kele bazoba! Nani me kusa beno,+ ata bo tendudilaka beno pwelele mutindu bo tulaka Yezu Kristu na zulu ya nti?+ 2 Mono ke zola kuyula* beno diambu yai mosi: Keti beno bakaka mpeve na nzila ya bisalu ya nsiku to sambu beno kwikilaka na mambu yina beno waka?+ 3 Keti beno kele bazoba kibeni? Beno yantikaka na kimpeve, keti beno ke manisa na kinsuni?+ 4 Keti beno kutanaka ti bampasi mingi sambu na mpamba? Mono lenda ndima ve nde yo vandaka sambu na mpamba kibeni. 5 Ebuna, muntu yina ke pesaka beno mpeve mpi ke salaka bidimbu ya nkumbwa+ na kati na beno, keti yandi ke salaka yo sambu na bisalu ya nsiku to sambu beno kwikilaka na mambu yina beno waka? 6 Kaka mutindu Abrahami “kwikilaka na Yehowa,* mpi Nzambi tadilaka yandi bonso muntu ya lunungu sambu na yo.”+

7 Ya kieleka beno me zaba nde bantu yina kele ti lukwikilu bantu kele bana ya Abrahami.+ 8 Sambu masonama ya santu monaka na ntwala nde Nzambi ta ndima bantu ya makanda bonso bantu ya lunungu na nzila ya lukwikilu, yo zabisaka Abrahami nsangu ya mbote na ntwala nde: “Na nzila na nge, makanda yonso ta baka lusakumunu.”+ 9 Yo yina, bantu yina kele ti lukwikilu ke baka lusakumunu kumosi ti Abrahami, yina vandaka ti lukwikilu.+

10 Bantu yonso yina ke tulaka ntima na bisalu ya nsiku, bo me singaka bo, sambu bo me sonikaka nde: “Bika bo singa konso muntu yina ke landaka ve mambu yonso ya bo me sonikaka na rulo ya Nsiku mpi yina ke zitisaka yo ve.”+ 11 Diaka, yo kele pwelele nde Nzambi+ ke ndimaka ve ata muntu mosi bonso muntu ya lunungu na nzila ya nsiku, sambu “muntu ya lunungu ta zinga sambu na lukwikilu.”+ 12 Nsiku me simbama ve na lukwikilu. Kansi, “muntu yina ke salaka mambu yai ta zinga na nzila na yo.”+ 13 Kristu sumbaka beto,+ mpi yandi katulaka beto na kimpika+ ya kusinga ya Nsiku mutindu yandi kumaka muntu ya bo me singaka na kisika na beto, sambu bo me sonikaka nde: “Konso muntu yina bo me tula na zulu ya nti,+ bo me singaka yandi.” 14 Yo salamaka mutindu yina sambu makanda kubaka lusakumunu ya Abrahami na nzila ya Kristu Yezu,+ sambu na nzila ya lukwikilu na beto, beto baka mpeve yina bo me silaka.+

15 Bampangi, mono ke sadila mbandu mosi ya luzingu ya bantu: Kana bo me ndima kuwakana, ata muntu mosi mpamba me dima yo, muntu mosi ve lenda fwa yo to kuyika mambu ya nkaka na zulu na yo. 16 Bo pesaka balusilu na Abrahami mpi na mwana* na yandi.+ Yo ke tuba ve nde, “mpi na bana* na nge,” bonso nde bo kele mingi. Kansi yo ke tuba nde, “mpi na mwana* na nge,” disongidila muntu mosi, Kristu.+ 17 Mono ke tuba diaka nde: Nsiku yina kwisaka bamvula 430 na nima+ ke fwa ve kuwakana yina Nzambi salaka ntete mpi yo ke katula ve lusilu yina. 18 Sambu kana dikabu me simbama na nsiku, yo me simbama diaka ve na lusilu; kansi Nzambi me pesaka yo na Abrahami na luzolo yonso na nzila ya lusilu.+

19 Ebuna sambu na nki Nzambi pesaka Nsiku? Yandi yikaka yo sambu yo monisa mambu ya mbi pwelele,+ tii kuna mwana* yina bo silaka yandi ta kwisa;+ mpi yandi pesaka yo na nzila ya bawanzio,+ na maboko ya muwakanisi mosi.+ 20 Mfunu ya muwakanisi ke vandaka ve kana yo ke tadila kaka muntu mosi, kansi Nzambi kele yandi mosi. 21 Yo yina, keti Nsiku ke kanga balusilu ya Nzambi nzila? Ata fioti ve! Sambu kana bo pesaka bantu nsiku yina lenda pesa luzingu, Nzambi zolaka kutadila bantu bonso bantu ya lunungu na nzila ya nsiku yina. 22 Kansi Masonama ya Santu kangaka bima yonso na kimpika ya disumu, sambu bo pesa bantu yina ke kwikila lusilu yina ke katuka na kukwikila na Yezu Kristu.

23 Ata mpidina, na ntwala nde lukwikilu kukuma, nsiku vandaka kukengila beto, yo vandaka kukanga beto na kimpika, mpi beto vandaka kuvingila lukwikilu yina zolaka kumonana.+ 24 Yo yina, Nsiku me kumaka ndesi* na beto yina ke nataka na Kristu,+ sambu Nzambi kundima beto bonso bantu ya lunungu na nzila ya lukwikilu.+ 25 Kansi ntangu yai ya lukwikilu me kuma,+ beto kele diaka ve na nsi ya kiyeka ya ndesi.*+

26 Ya kieleka, beno yonso, beno kele bana ya Nzambi+ na nzila ya lukwikilu na beno na Kristu Yezu.+ 27 Sambu beno yonso bantu yina bakaka mbotika na Kristu, beno me lwataka Kristu.+ 28 Muyuda to Mugreki kele ve,+ mpika to muntu yina kele na kimpwanza kele ve,+ bakala to nkento kele ve,+ sambu beno yonso kele muntu mosi na bumosi ti Kristu Yezu.+ 29 Diaka, kana beno kele bantu ya Kristu, beno kele kibeni bana* ya Abrahami,+ bantu yina ta baka dikabu+ yina bo silaka yandi.+

4 Kansi mono ke tuba nde, ntangu muntu yina ta baka dikabu kele ntete mwana-fioti, yandi me swaswana ve ti mpika, ata yandi kele mfumu ya bima yonso, 2 kansi yandi kele na nsi ya kiyeka ya bankengidi mpi ya bakapita tii na kilumbu yina tata na yandi me tulaka tuka ntama. 3 Beto mpi, ntangu beto vandaka bana-fioti, beto vandaka na kimpika ya mambu ya ntete-ntete ya nsi-ntoto.+ 4 Kansi ntangu ntangu lungaka, Nzambi tindaka Mwana na yandi, yina butukaka na nkento mosi+ mpi yina vandaka na nsi ya nsiku,+ 5 sambu yandi sumba mpi yandi katula bantu yina kele na nsi ya nsiku na kimpika,+ sambu Nzambi kundima beto bonso bana na yandi.+

6 Sambu beno kele bana, Nzambi me tinda mpeve+ ya Mwana na yandi na kati ya bantima na beto,+ mpi yo ke tuba na ndinga ya ngolo nde: “Aba,* Tata!”+ 7 Yo yina, nge kele diaka ve mpika kansi nge kele mwana; mpi kana nge kele mwana, nge kele mpi muntu yina ta baka dikabu na nzila ya Nzambi.+

8 Ata mpidina, ntangu beno zabaka ve Nzambi, beno vandaka bampika ya bayina kele kibeni ve banzambi. 9 Kansi ntangu yai ya beno me zaba Nzambi, to ya Nzambi me zaba beno, nki mutindu beno ke vutuka diaka na mambu ya ntete-ntete yina kele ya mpamba+ mpi ya kukonda mfunu mpi beno ke zola diaka kusadila yo bonso bampika?+ 10 Beno ke zitisa kibeni bilumbu, bangonda,+ bansungi, mpi bamvula. 11 Mono ke wa boma sambu na beno, nde na mutindu mosi buna bikesa yina mono salaka sambu na beno kuvanda ya mpamba.

12 Bampangi, mono ke bondila beno nde beno kuma mutindu mono kele, sambu mono mpi mono vandaka mutindu beno kele.+ Beno salaka mono mbi ve. 13 Kansi beno me zaba nde kima pesaka mono dibaku ya ntete ya kuzabisa beno nsangu ya mbote vandaka maladi. 14 Mpi ata maladi na mono vandaka mumekamu sambu na beno, beno vwezaka mono ve mpi beno monaka mono ve nzanzi;* kansi beno yambaka mono bonso wanzio ya Nzambi, bonso Kristu Yezu. 15 Kiese yina beno vandaka na yo me kwenda na wapi? Sambu mono ke ta kimbangi sambu na beno nde, kana mpila vandaka, beno zolaka kukatula meso na beno mpi kupesa mono yo.+ 16 Keti mono me kuma mbeni na beno sambu mono ke tubila beno kieleka? 17 Bo kele ti kikesa sambu na kununga beno, kansi sambu na lukanu ya mbote ve; bo ke zola kukabula beno ti mono, sambu beno vanda ti nzala ya ngolo ya kulanda bo. 18 Kansi, yo kele ntangu yonso mbote nde muntu mosi kusosa beno na kikesa yonso sambu na lukanu ya mbote mpi kaka ve ntangu mono kele ti beno, 19 bana na mono ya fioti,+ bayina mono ke wila diaka mpasi ya kubuta tii kuna Kristu ta salama na kati na beno. 20 Mono kele na nzala ya kuvanda ti beno ntangu yai mpi kutubila beno na mutindu ya nkaka, sambu mono ke zaba ve nki mono fwete sala sambu na beno.

21 Beno bantu yina ke zola kuvanda na nsi ya nsiku, beno tubila mono, Keti beno ke waka ve mambu yina Nsiku ke tubaka? 22 Mu mbandu, bo me sonikaka nde Abrahami vandaka ti bana-babakala zole; mwana mosi ti nsadi ya nkento+ mpi mwana ya nkaka ti nkento yina kele na kimpwanza;+ 23 kansi mwana yina butukaka na nsadi ya nkento butukaka mutindu bantu yonso ke butukaka*+ mpi mwana yina butukaka na nkento yina kele na kimpwanza, butukaka na nzila ya lusilu.+ 24 Mambu yai lenda vanda ti ntendula ya kifwani; sambu bankento yai ke tendula bangwakana zole, mosi ya Ngumba ya Sinai,+ yina ke butaka bana sambu bo vanda bampika, mpi yo kele Agare. 25 Agare ke tendula Sinai,+ ngumba mosi na Arabia, mpi yandi me fwanana ti Yeruzalemi ya bubu, sambu yandi ti bana na yandi, bo kele na kimpika. 26 Kansi Yeruzalemi ya kuluta zulu kele na kimpwanza, mpi yandi kele mama na beto.

27 Sambu bo me sonikaka nde: “Vanda na kiese, nge nkento ya mukobo yina ke butaka ve; tula milolo ya kiese, nge nkento yina me waka ntete ve mpasi ya kubuta; sambu bana ya nkento yina bo me bikisaka kele mingi kibeni kuluta bana ya nkento yina kele ti bakala.”+ 28 Bampangi, beto kele bana ya lusilu, mutindu Izaki mpi vandaka.+ 29 Kansi na ntangu yina, mwana yina butukaka mutindu bantu yonso ke butukaka* yantikaka kumonisa mwana yina butukaka na nzila ya mpeve mpasi;+ yo kele mpi mutindu mosi ntangu yai.+ 30 Kansi, masonama ya santu ke tuba inki? “Kula nsadi ya nkento ti mwana na yandi, sambu mwana ya nsadi ya nkento ta baka ve ata fioti dikabu ti mwana ya nkento yina kele na kimpwanza.”+ 31 Yo yina bampangi, beto kele ve bana ya nsadi ya nkento, kansi ya nkento yina kele na kimpwanza.

5 Kristu me katulaka beto na kimpika sambu beto vanda na kimpwanza ya mutindu yina. Yo yina, beno telama ngolo+ mpi beno kuditula diaka ve na nsi ya vangu ya kimpika.+

2 Mono Polo, mono ke tubila beno nde kana bo yotisa beno, Kristu ta vanda ve na mfunu sambu na beno.+ 3 Mono ke tubila diaka konso muntu yina bo ke yotisa nde yandi fwete zitisa Nsiku yonso.+ 4 Beno bantu yina ke sosa nde Nzambi kundima beno bonso bantu ya lunungu na nzila ya nsiku,+ beno kele ya kukabwana ti Kristu; beno kele diaka ve na ntima ya mbote na yandi ya nene. 5 Kansi beto, na nzila ya mpeve, beto ke vingila ti nzala ya ngolo lunungu yina beto ke tula ntima mpi yina ke katukaka na lukwikilu. 6 Sambu na bantu yina kele na bumosi ti Kristu Yezu, luyotisu to kukonda luyotisu kele mfunu ve,+ kansi kima kele mfunu kele lukwikilu yina ke salaka ti zola.

7 Beno vandaka kubaka ntinu mbote.+ Nani kangaka beno nzila na kulanda kulemfuka na kieleka? 8 Mabanza ya mutindu yai me katuka ve na Muntu yina ke binga beno. 9 Levire fioti ke vimbisaka pate yonso ya fufu.+ 10 Mono ke tula ntima nde beno bantu yina kele na bumosi ti Mfumu,+ beno ta vanda ve na mabanza ya nkaka; kansi muntu yina ke kotisa beno na mavwanga,+ yo vanda nani, yandi ta baka ndola yina me fwana na yandi. 11 Kansi sambu na mono, bampangi, kana mono ke landa kulonga luyotisu, sambu na nki bo ke landa kumonisa mono mpasi? Kana yo kele mutindu yina, kima yina ke budisaka sakuba sambu na nti ya mpasi*+ kele diaka ve. 12 Mono ke zola nde bantu yina ke sosa kuvwalangasa mabanza na beno kudikumisa batongu.*

13 Bampangi, bo bingaka beno sambu beno vanda na kimpwanza; kansi beno sadila ve kimpwanza yina bonso dibaku ya kulanda banzala ya kinsuni,+ kansi na zola beno sadilana bonso bampika.+ 14 Sambu Nsiku yonso me lungana na* nsiku mosi, disongidila: “Nge fwete zola nkweno na nge bonso nge mosi.”+ 15 Kansi, kana beno ke tatikana mpi ke diana,+ beno keba sambu beno manisana ve.+

16 Kansi mono ke tuba nde, Beno landa kutambula na mpeve+ ebuna beno ta lungisa ve ata nzala mosi ya kinsuni.+ 17 Sambu nsuni, na nzala na yo, ke wakanaka ve ti mpeve, mpi mpeve ke wakanaka ve ti nsuni; bima yai zole ke wakanaka ve, yo yina beno ke salaka ve mambu yina beno ke zolaka kusala.+ 18 Diaka, kana mpeve ke twadisa beno, beno kele ve na nsi ya nsiku.

19 Bisalu ya nitu ke monanaka pwelele, mpi yo kele pite,*+ mambu ya mvindu, kusala mambu ya mbi kukonda nsoni,*+ 20 lusambu ya biteki, bisalu ya bampeve ya mbi,*+ kimbeni, kuswana, kimpala, nganzi, kukonda kuwakana, kukabwana, kusala tu-mabundu, 21 kulula, kulawuka malafu,+ bankinsi yina bantu ke salaka mambu ya kisaka-saka,* mpi mambu ya me fwanana ti yai.+ Mono ke kebisa beno sambu na mambu yai, mutindu mono kebisaka beno ntete, nde bantu yina ke salaka mambu yai ta baka ve* Kimfumu ya Nzambi.+

22 Kansi, mbuma ya mpeve kele zola, kiese, ngemba, ntima ya nda, ntima ya mbote, bumbote,+ lukwikilu, 23 mawete, kudiyala.+ Ata nsiku mosi ve ke buyisaka mambu yai. 24 Diaka, bantu yina kele bantu ya Kristu Yezu me tulaka nsuni ti banzala na yo ya ngolo+ mpi ya mbi na zulu ya nti.

25 Kana beto ke zinga na mpeve, bika beto landa kutambula mpi na mpeve,+ na mutindu yina me fwana. 26 Beto kuma ve lulendo,+ beto basisa ve mpeve ya kutesana ti bankaka,+ mpi beto wilana ve kimpala.

6 Bampangi, kana muntu mosi ke kwenda na nzila ya mbi na ntwala nde yandi bakisa yo, beno bantu yina kele ya kuyela na kimpeve, beno sosa kusungika muntu yina na mawete.+ Kansi kudikeba,+ sambu nge mpi nge mekama ve.+ 2 Beno landa na kunatilana bizitu,+ mpidina beno ta lungisa nsiku ya Kristu.+ 3 Sambu kana muntu ke yindula nde yandi kele mfunu na ntangu yandi kele mfunu ve,+ yandi ke kudikusa. 4 Kansi konso muntu fwete tadila mambu yina yandi mosi ke sala,+ ebuna yandi ta vanda ti kikuma ya kuwa kiese sambu na yandi mosi, kansi ve na kudifwanisa ti muntu ya nkaka.+ 5 Sambu konso muntu ta nata kilo na yandi mosi.+

6 Diaka, konso muntu yina bo ke longa* ndinga ya Nzambi fwete kabula bima yonso ya mbote ti muntu yina ke pesa malongi yina.*+

7 Beno kudikusa ve: Bo ke sekaka Nzambi ve. Sambu konso kima yina muntu ke kuna, yandi ta katula yo mpi;+ 8 sambu muntu yina ke kuna sambu na nsuni na yandi ta katula lufwa na nsuni na yandi, kansi muntu yina ke kuna sambu na mpeve ta katula luzingu ya mvula na mvula na mpeve.+ 9 Yo yina, beto yambula ve kusala mambu ya mbote, sambu na ntangu yina me fwana, beto ta katula bambuma kana beto yambula ve.*+ 10 Yo yina, ntangu yonso ya beto kele ti dibaku,* beto sala mambu ya mbote na bantu yonso, kansi mingi-mingi na bantu yina kele bampangi na beto na lukwikilu.

11 Beno tala mutindu mono me sonikila beno ti bisono ya nene, na diboko na mono mosi.

12 Bantu yonso yina ke zola kumonika bantu ya mbote na kinsuni,* bo bantu ke sosa kupusa beno na kubaka luyotisu, kansi bo ke sala yo kaka sambu bo monisa bo ve mpasi sambu na nti ya mpasi* ya Kristu. 13 Sambu ata bantu yina ke baka luyotisu, bo mosi ke zitisaka ve Nsiku, kansi bo ke zola nde beno,+ beno baka luyotisu sambu bo mona kikuma ya kudikumisa sambu na beno. 14 Kansi mono ke kudikumisa ve ata fioti, katula kaka sambu na nti ya mpasi* ya Mfumu na beto Yezu Kristu;+ na nzila na yandi bo me fwaka* nsi-ntoto sambu na mono mpi mono sambu na nsi-ntoto. 15 Sambu luyotisu mpi kukonda luyotisu kele mfunu ve,+ kansi kima kele mfunu kele lugangu ya mpa.+ 16 Bantu yonso yina ke tambula na mutindu yina me fwana na kulanda munsiku yai, ngemba mpi mawa kuvanda na bo, ee, na Izraele ya Nzambi.+

17 Katuka ntangu yai, ata muntu mosi ve kuyangisa mono, sambu na nitu na mono, mono kele ti bidimbu ya ke songa nde mono kele mpika ya Yezu.+

18 Bampangi, ntima ya mbote ya nene ya Mfumu na beto Yezu Kristu kuvanda ti mpeve yina beno ke monisa. Amen.