NA BAEFEZO

1 Mono Polo, ntumwa ya Kristu Yezu na luzolo ya Nzambi, mono ke sonikila basantu yina kele na Efezo,+ bayina kele ya kwikama na bumosi ti Kristu Yezu:

2 Ntima ya mbote ya nene mpi ngemba ya Nzambi Tata na beto mpi ya Mfumu Yezu Kristu kuvanda na beno.

3 Lukumu kuvanda na Nzambi mpi Tata ya Mfumu na beto Yezu Kristu, sambu yandi me sakumunaka beto ti balusakumunu yonso ya kimpeve na bisika ya zulu na bumosi ti Kristu;+ 4 yandi solaka beto sambu beto vanda na bumosi ti Kristu na ntwala ya luyantiku ya nsi-ntoto, sambu beto vanda bantu ya santu mpi ya kukonda mvindu+ na ntwala na yandi na zola. 5 Sambu yandi kanaka na ntwala+ na kundima beto bonso bana na yandi+ na nzila ya Yezu Kristu, na kutadila mambu yina ke pesaka yandi kiese mpi luzolo na yandi,+ 6 sambu bantu kupesa yandi lukumu sambu na ntima ya mbote na yandi ya nene ya nkembo+ yina yandi monisilaka beto na luzolo yonso na nzila ya Mwana na yandi ya yandi ke zolaka mingi.+ 7 Na nzila na yandi, Nzambi me katulaka beto na kimpika na nsadisa ya nkudulu na nzila ya menga ya muntu yina,+ disongidila, yandi me lolulaka bifu na beto,+ na kutadila bunene ya ntima ya mbote na yandi ya nene.

8 Yandi monisilaka beto ntima ya mbote ya nene mingi na mutindu yandi pesaka beto mayele yonso mpi mayele yonso ya kubakisa mambu, 9 na mutindu yandi zabisaka beto kinsweki ya santu+ ya luzolo na yandi. Yo ke wakana ti mambu yina ke pesaka yandi kiese, mambu yina yandi mosi kanaka 10 sambu na kutwadisa mambu na nsuka ya ntangu ya bo me tulaka, sambu na kuvukisa bima yonso na Kristu, bima yina kele na zulu ti bima yina kele na ntoto.+ Ee, yo kele na yandi, 11 muntu yina beto kele na bumosi ti yandi mpi yina bo me solaka beto na kubaka dikabu ti yandi;+ bo kanaka na ntwala sambu na beto na kuwakana ti lukanu ya muntu yina ke lungisaka mambu yonso mutindu yandi ke bakaka lukanu na kulanda luzolo na yandi, 12 yo yina beto bantu ya ntete yina ke tula ntima na Kristu, beto fwete pesa Nzambi lukumu mpi nkembo. 13 Kansi beno mpi, beno tudilaka yandi ntima ntangu beno waka ndinga ya kieleka, nsangu ya mbote ya luguluku na beno. Ntangu beno kwikilaka, bo tulaka beno kidimbu+ na nzila na yandi ti mpeve santu yina Nzambi silaka. 14 Mpeve santu kele kipiku yina yandi me pesaka na ntwala* ya ke monisa nde beto ta baka dikabu na beto,+ sambu na kukatula bantu+ ya Nzambi na kimpika na nzila ya nkudulu,+ sambu na lukumu mpi nkembo na yandi.

15 Yo yina mono mpi, katuka ntangu mono waka nsangu ya lukwikilu na beno na Mfumu Yezu mpi zola yina beno ke monisila basantu yonso, 16 mono ke yambula ve kupesa Nzambi matondo sambu na beno. Mono ke landa kutula beno na bisambu na mono, 17 sambu Nzambi ya Mfumu na beto Yezu Kristu, Tata ya nkembo, kupesa beno mpeve sambu beno vanda mayele mpi beno zaba yandi mbote-mbote.+ 18 Yandi me pesaka nsemo na meso ya ntima na beno sambu beno zaba na nki kivuvu yandi bingaka beno, bimvwama ya nkembo yina yandi me bumbaka bonso dikabu sambu na basantu;+ 19 mpi beno zaba nde ngolo yina yandi me monisilaka beto bantu yina ke kwikilaka kele mingi kibeni.+ Yo ke wakana ti mutindu yandi ke sadilaka ngolo na yandi ya kukonda ndilu, 20 yina yandi monisilaka Kristu ntangu yandi tedimisaka yandi na bafwa mpi yandi vandisaka yandi na diboko na yandi ya kitata+ na bisika ya zulu, 21 na zulu kibeni ya konso luyalu, kiyeka, ngolo, kimfumu, mpi ya konso zina yina bo lenda tanga,+ kaka na ngidika ya bima yai* ve, kansi mpi na ngidika yina ke kwisa. 22 Yandi me tulaka mpi bima yonso na nsi ya makulu na yandi,+ mpi yandi me tulaka yandi mfumu ya bima yonso na dibundu;+ 23 dibundu yina kele nitu na yandi,+ mpi yo kele ya kufuluka ti yandi, mpi yandi muntu ke fulusaka bima yonso na mutindu yonso.

2 Diaka, Nzambi vutulaka beno na luzingu ata beno vandaka ya kufwa na bifu mpi na masumu na beno;+ 2 beno vandaka kutambula ntete na mambu yina na kulanda ngidika ya bima* ya nsi-ntoto yai,+ na kulanda mfumu ya kiyeka ya mupepe,+ mpeve+ yina ke sala ntangu yai na bana ya kukonda bulemfu. 3 Ee, beto yonso, beto vandaka ntete kuditwadisa na kati na bo na kulanda banzala ya nitu na beto;+ beto vandaka kusala mambu yina nitu mpi bangindu na beto vandaka kuzola,+ mpi beto vandaka bana yina me fwana nde Nzambi kuwila bo makasi+ bonso bantu ya nkaka. 4 Kansi Nzambi, sambu yandi kele ya kufuluka na mawa,+ mpi sambu na zola ya nene yina yandi ke zolaka beto,+ 5 yandi vutulaka beto na luzingu ti Kristu, ata ntangu beto vandaka ya kufwa na bifu na beto+—yandi me gulusaka beno na ntima ya mbote na yandi ya nene. 6 Diaka, yandi futumunaka beto kumosi mpi yandi vandisaka beto kumosi na bisika ya zulu na bumosi ti Kristu Yezu,+ 7 sambu na bangidika ya bima yina ke kwisa,* yandi monisa kimvwama ya kukonda ndilu ya ntima ya mbote na yandi ya nene na nzila ya bumbote yina yandi monisilaka beto na bumosi ti Kristu Yezu.

8 Yandi me gulusaka beno na nsadisa ya ntima ya mbote yai ya nene na nzila ya lukwikilu,+ mpi yo kele ve sambu na mambu yina beno salaka; kansi, yo kele dikabu ya Nzambi. 9 Ve, yo kele ve sambu na bisalu na beno,+ sambu muntu mosi ve kuvanda ti bikuma ya kudikumisa. 10 Beto kele kisalu ya maboko ya Nzambi* mpi yandi gangaka+ beto na bumosi ti Kristu Yezu+ sambu na bisalu ya mbote; Nzambi yidikaka bisalu yina na ntwala sambu beto sala yo.

11 Yo yina, beno yibuka nde na ntangu mosi buna beno bantu ya makanda na kinsuni, beno vandaka bantu yina bantu ya bo ke bingaka “luyotisu” vandaka kubinga nde “kukonda luyotisu;” luyotisu yina me salamaka na nsuni, na maboko ya bantu. 12 Na ntangu yina, beno vandaka ve ti Kristu, beno vandaka ntama ti dikanda ya Izraele, mpi beno vandaka banzenza na bangwakana ya lusilu;+ beno vandaka ve ti kivuvu, mpi beno vandaka ve ti Nzambi na nsi-ntoto.+ 13 Kansi ntangu yai, na bumosi ti Kristu Yezu, beno bantu yina vandaka ntete ntama ti Nzambi, beno me kuma pene-pene ti yandi na nsadisa ya menga ya Kristu. 14 Sambu yandi kele ngemba na beto,+ yandi muntu salaka nde bimvuka yina zole kukuma kimvuka mosi+ mpi yandi muntu bwisaka kibaka ya kati-kati yina vandaka kukabisa bo.+ 15 Na nzila ya nitu na yandi, yandi katulaka kimbeni, disongidila Nsiku yina kele ti bantuma mpi bansiku, sambu yandi kumisa bimvuka yina zole muntu mosi ya mpa+ na bumosi ti yandi mosi mpi sambu yandi tula ngemba; 16 sambu yandi wakanisa kibeni bimvuka yonso zole mpi yo kuma nitu mosi sambu na Nzambi na nzila ya nti ya mpasi,*+ sambu yandi fwaka kimbeni+ na nzila na yandi mosi. 17 Ebuna yandi kwisaka mpi yandi zabisaka nsangu ya mbote ya ngemba na beno bantu yina vandaka ntama ti Nzambi, mpi ngemba na bantu yina vandaka pene-pene ti yandi, 18 sambu na nzila na yandi, beto bantu ya bimvuka yonso zole, beto lenda kwenda na ntwala ya Tata na nsadisa ya mpeve mosi.

19 Yo yina, beno kele diaka ve banzenza,+ kansi beno kele bantu ya insi mosi+ ti basantu mpi beno kele bantu ya nzo ya Nzambi,+ 20 mpi bo me tungaka beno na zulu ya fondasio ya bantumwa mpi ya bambikudi,+ mpi Kristu Yezu yandi mosi kele ditadi ya kinkonko ya fondasio.+ 21 Na bumosi ti yandi, nzo ya mvimba yina bo me vukisaka mbote-mbote,+ ke yela sambu na kukuma tempelo ya santu sambu na Yehowa.*+ 22 Na bumosi ti yandi beno mpi, bo ke tunga beno kumosi sambu beno kuma kisika yina Nzambi lenda zinga na nsadisa ya mpeve.+

3 Yo yina, mono Polo, muntu ya boloko+ ya Kristu Yezu sambu na beno, bantu ya makanda— 2 ya kieleka, kana beno waka nsangu ya kisalu ya kikapita+ ya ntima ya mbote ya nene ya Nzambi yina yandi pesaka mono sambu na beno, 3 bo zabisaka mono kinsweki ya santu na nzila ya mbona-meso, mutindu mono sonikaka na ntwala na bunkufi. 4 Yo yina, kana beno tanga mambu yai, beno lenda bakisa nde mono me zaba kinsweki ya santu+ ya Kristu. 5 Na bandonga ya nkaka ya bantu, Nzambi zabisaka ve kinsweki yai na bana ya bantu mutindu yandi me monisaka yo ntangu yai na bantumwa na yandi ya santu mpi na bambikudi na nsadisa ya mpeve,+ 6 disongidila, nde na bumosi ti Kristu Yezu mpi na nzila ya nsangu ya mbote, bantu ya makanda fwete vanda bantu yina ta baka dikabu ti beto, bantu ya nitu mosi ti beto,+ mpi bantu yina ta baka mambote ya lusilu ti beto. 7 Mono kumaka nsadi ya kinsweki yai na kutadila dikabu ya ofele ya ntima ya mbote ya nene ya Nzambi yina yandi monisilaka mono na nsadisa ya ngolo na yandi.+

8 Nzambi monisilaka mono ntima ya mbote yai ya nene,+ mono muntu yina kele muntu ya fioti kuluta muntu ya fioti kibeni na basantu yonso,+ sambu mono zabisa na makanda nsangu ya mbote ya bimvwama ya kukonda nsuka ya Kristu 9 mpi sambu mono sadisa bantu na kubakisa mutindu bo ke twadisa mambu ya kinsweki ya santu+ yina Nzambi me bumbaka tuka ntama; yandi muntu salaka bima yonso. 10 Yo vandaka mutindu yai sambu ntangu yai na nzila ya dibundu,+ baluyalu mpi biyeka yina kele na bisika ya zulu kuzaba mayele ya Nzambi yina ke monanaka na mitindu ya kuswaswana.+ 11 Yo ke wakana ti lukanu ya kukonda nsuka yina yandi yidikaka na kuwakana ti Kristu,+ Yezu Mfumu na beto, 12 na nzila na yandi beto ke tubaka ti masonga mpi beto ke kwendaka na ntwala ya Nzambi+ ti kutula ntima na nsadisa ya lukwikilu ya beto kele na yo na yandi. 13 Yo yina, mono ke lomba beno nde beno lemba ve sambu na bampasi ya mono ke mona sambu na beno, sambu yo ke tendula nkembo sambu na beno.+

14 Yo yina, mono ke fukama na ntwala ya Tata; 15 mabuta yonso na zulu mpi na ntoto me bakaka zina na yo na yandi. 16 Mono ke samba nde, na nsadisa ya nkembo na yandi ya nene, yandi pesa beno nzila ya kukuma ngolo na kimuntu na beno ya kati,+ ti ngolo, na nsadisa ya mpeve na yandi, 17 mpi nde na nzila ya lukwikilu na beno Kristu kuzinga na kati ya bantima na beno ti zola.+ Beno vanda ti misisa ya ngolo+ mpi beno kangama ngolo na fondasio,+ 18 sambu kumosi ti basantu yonso beno kuka kubakisa mbote-mbote bunene, bunda, ntela, mpi mudindu, 19 mpi sambu beno zaba zola ya Kristu+ yina me luta nzayilu, sambu beno fuluka ti bikalulu yonso ya Nzambi yina yandi ke pesaka.

20 Ntangu yai Nzambi lenda sala mingi kibeni kuluta mambu yonso yina beto ke lombaka to ke yindulaka+ na kuwakana ti ngolo na yandi yina ke salaka na beto.+ 21 Nkembo kuvanda na yandi, na nzila ya dibundu mpi na nzila ya Kristu Yezu, na bandonga yonso ya bantu mvula na mvula. Amen.

4 Yo yina, mono muntu ya boloko+ sambu na Mfumu, mono ke bondila beno nde beno tambula na mutindu yina me fwana+ na kubinga yina bo bingaka beno, 2 ti kudikulumusa+ mpi mawete yonso, ti ntima ya nda;+ konso muntu kukanga ntima na mambu ya muntu ya nkaka na zola,+ 3 beno sala ngolo na kutanina bumosi ya mpeve na ngemba yina ke vukisaka beto.+ 4 Nitu kele mosi,+ mpi mpeve kele mosi,+ mutindu mosi kivuvu+ yina bo bingaka beno sambu na yo kele kaka mosi; 5 Mfumu mosi,+ lukwikilu mosi, mbotika mosi; 6 Nzambi mosi mpi Tata ya bantu yonso; yandi kele na zulu ya bantu yonso, yandi ke salaka na nzila ya bantu yonso mpi na bantu yonso.

7 Kansi, Nzambi monisilaka konso muntu na kati na beto ntima ya mbote ya nene na kutadila mutindu yina Kristu tesaka dikabu ya ofele.+ 8 Sambu yo ke tuba nde: “Ntangu yandi tombukaka na zulu, yandi nataka bampika; yandi pesaka bantu bonso makabu.”+ 9 Ebuna, bangogo “yandi tombukaka” ke tendula inki? Yo ke tendula nde yandi kulumukaka mpi na bisika ya nsi, disongidila na ntoto. 10 Muntu yina kulumukaka, yandi mpi muntu tombukaka+ ntama kuluta zulu yonso,+ sambu yandi lungisa mambu yonso.

11 Yandi pesaka bankaka bonso bantumwa,+ bankaka bonso bambikudi,+ bankaka bonso bansamuni ya nsangu ya mbote,*+ bankaka bonso bangungudi mpi balongi,+ 12 sambu na kusungika* basantu, sambu na kisalu ya kusadila bantu ya nkaka, na kutunga nitu ya Kristu,+ 13 tii kuna beto yonso ta kuma na bumosi ya lukwikilu mpi ta zaba mbote-mbote Mwana ya Nzambi, sambu beto kuma na nkadilu ya muntu yina me yela kibeni,+ mpi kuyela na beto ta kuma kibeni kiteso mosi ti kuyela ya Kristu. 14 Yo yina, beto fwete vanda diaka ve bana-fioti, yina kitembo ke nikisaka mpi yina konso mupepe ya malongi+ ke nataka ndambu na ndambu na nzila ya luvunu ya bantu, na nzila ya mayele ya mbi na balukanu ya luvunu. 15 Kansi beto tuba kieleka, mpi beto yela na zola na mambu yonso na kuwakana ti muntu yina kele ntu, disongidila Kristu.+ 16 Bo me vukisaka nitu ya mvimba+ mbote-mbote na yandi mpi konso kitini ke sadisaka kitini ya nkaka na kupesa konso kima yina kele mfunu. Kana konso kitini ke sala mbote-mbote, yo ke sadisaka nitu na kuyela ntangu yo ke kuditunga na zola.+

17 Yo yina, mono ke tuba mambu yai mpi mono ke siamisa beno na Mfumu nde, beno fwete landa diaka ve na kutambula mutindu makanda ke tambulaka,+ na kulanda mabanza na bo ya mpamba.*+ 18 Bo kele na mpimpa na mabanza mpi bo kele ntama ti luzingu yina ke katukaka na Nzambi, sambu bo me konda nzayilu mpi sambu bo kele ntima ngolo. 19 Bo me vidisaka bikalulu yonso ya mbote mpi bo me kudipesaka na kusala mambu ya mbi kukonda nsoni*+ sambu na kusala mambu ya mvindu ya mitindu yonso ti lukasi.

20 Kansi beno longukaka ve nde Kristu kele mutindu yina. 21 Ya kieleka, beno waka yandi mpi bo longaka beno na nzila na yandi; kieleka kele na Yezu. 22 Bo longaka beno na kukatula kimuntu ya ntama,+ yina ke wakana ti bikalulu na beno ya ntama mpi yina ke beba na kulanda banzala na yo ya ke kusaka.+ 23 Mpi beno fwete landa kukuma ya mpa na ngolo yina ke twadisaka mabanza na beno,*+ 24 mpi beno fwete lwata kimuntu ya mpa+ yina bo gangaka na kuwakana ti luzolo ya Nzambi na lunungu mpi na kwikama ya kieleka.

25 Yo yina, ntangu yai ya beno me losa luvunu, konso muntu kutubila nkweno na yandi kieleka,+ sambu beto kele bitini ya nitu mosi.+ 26 Beno wa makasi, kansi beno sala ve disumu;+ beno bika ve nde ntangu kudinda mpi beno kele kaka na makasi;+ 27 beno pesa ve Diabulu dibaku.*+ 28 Bika muyibi kuyiba diaka ve, kansi yandi sala kisalu ya ngolo, yandi sala kisalu ya mbote ti maboko na yandi,+ sambu yandi zwa kima ya kupesa muntu yina me konda bima.+ 29 Ata ngogo mosi ve ya kupola kubasika na munoko na beno,+ kansi beno basisa kaka mambu ya mbote sambu na kutunga bantu yina kele na mfunu na yo, sambu yo pesa bawi mambu yina kele mfunu.+ 30 Diaka, beno pesa ve mpeve santu ya Nzambi mawa;+ na nzila na yo, Nzambi me tulaka beno kidimbu+ sambu na kilumbu yina bo ta katula beno na kimpika na nsadisa ya nkudulu.+

31 Beno katula na kati na beno kimbeni ya ngolo ya mitindu yonso,+ makasi, nganzi, makelele, mafingu,+ mpi mambu yonso ya mbi.+ 32 Kansi beno monisa ntima ya mbote beno na beno, beto wila bantu ya nkaka mawa,+ beno lolulana na ntima ya mvimba mutindu Nzambi mpi me lolulaka beno na ntima ya mvimba na nzila ya Kristu.+

5 Yo yina, beno landa mbandu ya Nzambi,+ sambu beno kele bana yina yandi ke zolaka mingi, 2 mpi beno landa kutambula na zola,+ mutindu Kristu mpi zolaka beto*+ mpi yandi pesaka luzingu na yandi sambu na beto* bonso dikabu mpi kimenga ya nsudi ya kitoko na Nzambi.+

3 Bika bo tubila nkutu ve pite* mpi mitindu yonso ya mambu ya mvindu to lukasi na kati na beno,+ mutindu yo me fwana sambu na bantu ya santu;+ 4 to bikalulu ya nsoni, to kutuba mambu ya buzoba, to kutuba mambu ya nsoni sambu na kusekisa+—mambu yina me fwana ve—kansi beno pesa matondo na Nzambi.+ 5 Sambu beno me zaba mambu yai, mpi beno ke bakisa nde, ata muntu mosi ve ya ke salaka pite*+ to ya ke salaka mambu ya mvindu to muntu ya lukasi,+ disongidila muntu ya ke sambilaka biteki, ta baka dikabu na Kimfumu ya Kristu mpi ya Nzambi.+

6 Muntu mosi ve kukusa beno ti bangogo ya kukonda mfunu, sambu makasi ya Nzambi ke kwisila bana ya kukonda bulemfu sambu na mambu yai. 7 Yo yina beno vukana ve ti bo; 8 sambu beno vandaka ntete na mpimpa, kansi ntangu yai beno kele na nsemo+ na kuwakana ti Mfumu.+ Beno landa kutambula bonso bana ya nsemo, 9 sambu mbuma ya nsemo kele mitindu yonso ya bumbote mpi ya lunungu mpi ya kieleka.+ 10 Beno landa kuzikisa mambu yina Mfumu ke ndimaka;+ 11 mpi beno bika kuvukana na bisalu ya mpimpa yina ke butaka ve mbuma;+ kansi beno tungulula yo. 12 Sambu mambu yina bo ke salaka na kinsweki, yo kele nkutu nsoni na kutubila yo. 13 Ntangu yai, mambu yonso yina bo ke tungulula,* nsemo ke monisaka yo pwelele, sambu mambu yonso yina bo ke monisaka pwelele kele nsemo. 14 Yo yina bo ke tuba nde: “Telama na mpongi, O nge muntu yina ke lala, mpi telama na bafwa,+ ebuna Kristu ta pesa nsemo na zulu na nge.”+

15 Yo yina, beno keba mbote-mbote nde mutindu beno ke tambula kuvanda ve bonso bazoba kansi bonso bantu ya mayele, 16 beno sadila ntangu na beno mbote kibeni,*+ sambu bilumbu kele mbi. 17 Yo yina, beno bika kuvanda bazoba, kansi beno landa kubakisa kana luzolo ya Yehowa* kele inki.+ 18 Diaka, beno lawuka ve vinu,+ sambu yo ke nataka na mansoni, kansi beno landa kufuluka ti mpeve. 19 Beno solula beno na beno ti bankunga, mpi bankunga ya kukumisa Nzambi, mpi bankunga ya kimpeve, beno yimba+ ti miziki+ na bantima na beno sambu na Yehowa,*+ 20 ntangu yonso beno pesa matondo+ na Nzambi mpi Tata na beto sambu na mambu yonso, na zina ya Mfumu na beto Yezu Kristu.+

21 Konso muntu kulemfuka na muntu ya nkaka+ sambu na boma ya Kristu. 22 Bankento kulemfuka na babakala na bo+ mutindu bo ke lemfukaka na Mfumu, 23 sambu bakala kele mfumu ya nkento na yandi+ mutindu Kristu kele mfumu ya dibundu,+ yandi kele ngulusi ya nitu yai. 24 Ya kieleka, mutindu dibundu ke lemfukaka na Kristu, bankento mpi fwete lemfuka na babakala na bo na mambu yonso. 25 Babakala, beno landa kuzola bankento na beno,+ mutindu Kristu mpi zolaka dibundu mpi pesaka luzingu na yandi sambu na yo,+ 26 sambu yandi santisa yo, yandi kumisa yo bunkete mpi yandi yobisa yo ti masa na nsadisa ya ndinga ya Nzambi,+ 27 sambu yandi kumisa dibundu kitoko na meso na yandi, kukonda ditono to kifu to konso kima ya mutindu yina,+ kansi ya santu mpi ya kukonda mvindu.+

28 Babakala fwete zola bankento na bo mutindu yina, bonso nitu na bo mosi. Bakala yina ke zolaka nkento na yandi ke kudizolaka yandi mosi, 29 sambu ata muntu mosi ve ke mengaka nitu* na yandi mosi, kansi yandi ke disaka yo mpi ke kebaka yo, mutindu Kristu ke salaka sambu na dibundu, 30 sambu beto kele bitini ya nitu na yandi.+ 31 “Yo yina bakala ta bikisa tata na yandi ti mama na yandi mpi yandi ta kangama* ti nkento na yandi, ebuna bo zole ta vanda nsuni mosi.”+ 32 Kinsweki yai ya santu+ kele nene. Ntangu yai mono ke tuba mambu ya Kristu mpi ya dibundu.+ 33 Kansi, konso muntu na kati na beno fwete zola nkento na yandi+ mutindu yandi ke kudizolaka; na ndambu ya nkaka, nkento fwete vanda ti luzitu ya mudindu sambu na bakala na yandi.+

6 Bana, beno lemfuka na bibuti na beno+ na kuwakana ti Mfumu, sambu yo kele mbote. 2 “Kumisa tata na nge ti mama na nge”+ kele nsiku ya ntete mpi yo kele ti lusilu yai: 3 “Sambu mambu kukwendila mbote sambu na nge* mpi nge zinga mingi na ntoto.” 4 Batata, beno pesa ve bana na beno makasi,+ kansi beno landa kusansa bo na malongi+ mpi na balukebisu* ya Yehowa.*+

5 Bampika, beno lemfuka na bamfumu na beno na ntoto,*+ ti boma mpi matekita, na masonga ya bantima na beno, mutindu beno ke lemfukaka na Kristu, 6 kaka ve ntangu bo ke tala beno, kaka sambu na kupesa bantu kiese,+ kansi bonso bampika ya Kristu yina ke sala luzolo ya Nzambi na moyo* ya mvimba.+ 7 Beno sala kisalu na beno ya kimpika ti mabanza ya mbote, bonso sambu na Yehowa,*+ kansi sambu na bantu ve, 8 sambu beno me zaba nde konso diambu ya mbote yina konso muntu ke sala, Yehowa*+ muntu ta futa yandi, yo vanda yandi kele mpika to yandi kele na kimpwanza. 9 Ebuna beno bamfumu, beno landa kusadila bo mambu mutindu mosi, beno pesa bo boma ve, sambu beno me zaba nde Mfumu na bo ti ya beno kele na zulu,+ mpi yandi ke pona-ponaka ve.

10 Sambu na kumanisa, beno landa kubaka ngolo+ na Mfumu mpi na ngolo na yandi ya nene. 11 Beno lwata binwaninu yonso+ yina Nzambi ke pesaka sambu beno kuka kutelama ngolo na ntwala ya mayele ya mbi ya Diabulu; 12 sambu beto ke nwanaka ve ti menga mpi nsuni, kansi beto ke nwanaka+ ti baluyalu, ti bankwa kiyeka, ti bamfumu ya nsi-ntoto yai ya mpimpa, ti bampeve ya mbi+ yina kele na bisika ya zulu. 13 Yo yina, beno baka binwaninu yonso yina Nzambi ke pesaka,+ sambu beno kuka kunwana ntangu kilumbu ya mbi ta kwisa, mpi na nima ya kulungisa mambu yonso, beno telama ngolo.

14 Yo yina, beno telama ngolo, beno lwata kieleka na luketo na beno bonso mukaba,+ beno lwata kitaninu-ntulu ya lunungu,+ 15 mpi beno lwata na makulu na beno luzolo ya kuzabisa nsangu ya mbote ya ngemba.+ 16 Katula mambu yai yonso, beno baka kitaninu ya nene ya lukwikilu;+ yo ta sadisa beno na kufwa batolo-tolo yonso ya tiya ya muntu ya mbi.+ 17 Diaka, beno ndima mpu ya luguluku,+ mpi mbele ya mpeve, disongidila, ndinga ya Nzambi;+ 18 ntangu beno ke landa kusamba na mpeve+ na konso dibaku ti mitindu yonso ya bisambu+ mpi kubondila. Yo yina, beno bikala ya kusikama mpi beno bondila ntangu yonso sambu na basantu yonso. 19 Beno samba mpi sambu na mono, sambu ntangu mono ke kangula munoko na mono, bo pesa mono mambu yina mono fwete tuba, sambu mono tuba na kikesa yonso ntangu mono ke zabisa kinsweki ya santu ya nsangu ya mbote.+ 20 Sambu na yo mono ke sala bonso mumonisi+ yina bo me kanga miniololo, sambu mono tubila yo ti kikesa mutindu mono fwete tuba.

21 Sambu beno zaba mpi mambu na mono mpi nki mono ke sala, Tisike,+ yina kele mpangi ya beto ke zolaka mingi mpi nsadi ya kwikama na Mfumu, ta zabisa beno mambu yonso.+ 22 Mono ke tindila beno yandi sambu na lukanu yai kibeni, sambu beno zaba nki mutindu beto kele mpi sambu yandi lembika bantima na beno.

23 Bika bampangi kuvanda na ngemba ti zola mpi lukwikilu yina me katuka na Nzambi, Tata na beto mpi na Mfumu Yezu Kristu. 24 Ntima ya mbote ya nene kuvanda ti bantu yonso yina ke zolaka Mfumu na beto Yezu Kristu ti zola ya kukonda nsuka.