NA BAFILIPI

1 Polo ti Timoteo, bampika ya Kristu Yezu, na basantu yonso yina kele na bumosi ti Kristu Yezu, bayina kele na Filipi,+ mpi na bankengi ti bansadi ya kisalu:+

2 Ntima ya mbote ya nene mpi ngemba ya Nzambi Tata na beto mpi ya Mfumu Yezu Kristu kuvanda ti beno.

3 Mono ke pesaka Nzambi na mono matondo ntangu yonso kana mono yibuka beno 4 konso ntangu ya mono ke bondilaka sambu na beno yonso. Konso ntangu mono ke bondilaka na kiese,+ 5 sambu beno pesaka maboko na* nsangu ya mbote yantika kilumbu ya ntete tii ntangu yai. 6 Sambu mono ke tula ntima nde muntu yina yantikaka kisalu ya mbote na kati na beno, yandi ta kumisa yo na nsuka+ tii na kilumbu ya Kristu Yezu.+ 7 Yo kele mbote kibeni nde mono yindula mutindu yai sambu na beno yonso, sambu beno kele na ntima na mono, beno bantu yina ke baka ntima ya mbote ya nene kumosi ti mono, yo vanda na miniololo na mono+ mpi ntangu mono ke nwanina mpi ke sala ngolo sambu bamfumu ya luyalu kupesa mono nswa ya kusamuna nsangu ya mbote.+

8 Sambu Nzambi me zaba nde mono kele ti nzala ya ngolo ya kumona beno yonso ti lutondo bonso yina Kristu Yezu kele na yo. 9 Mpi mono ke landa kusamba nde, zola na beno kulanda kukuma kaka mingi+ ti nzayilu ya sikisiki+ mpi luswasukusu mingi kibeni;+ 10 sambu beno zikisa mambu ya kuluta mfunu,+ sambu beno vanda bunkete mpi beno budisa ve bantu ya nkaka+ sakuba tii na kilumbu ya Kristu; 11 mpi nde beno fuluka ti mbuma ya lunungu, yina ke kwisaka na nzila ya Yezu Kristu,+ sambu na nkembo mpi lukumu ya Nzambi.

12 Bampangi, mono ke zola beno zaba nde, mambu yina kuminaka mono me salaka nde nsangu ya mbote kukwenda na ntwala, 13 yo yina miniololo na mono+ sambu na Kristu me zabana+ na Basoda yonso yina ke kengilaka ntotila ya Roma mpi na bantu yonso ya nkaka. 14 Ntangu yai, bampangi mingi yina ke sadilaka Mfumu ke baka kikesa sambu na miniololo na mono, mpi bo ke monisa kikesa mingi kibeni sambu na kuzabisa ndinga ya Nzambi kukonda boma.

15 Ya kieleka, bantu ya nkaka ke samunaka nsangu ya Kristu sambu na kimpala mpi ntembe, kansi bankaka ke salaka yo ti bangindu ya mbote. 16 Bantu yina ke salaka yo ti bangindu ya mbote, ke samunaka nsangu ya Kristu sambu na zola, sambu bo me zaba nde bo me solaka mono sambu na kunwanina nsangu ya mbote;+ 17 kansi bantu yina ke salaka yo sambu na kimpala mpi ntembe, ke salaka yo ti mpeve ya kuswana, kansi ve ti kikuma ya mbote, sambu lukanu na bo kele ya kubasisila mono mavwanga na boloko. 18 Nki mbuma yo me butaka? Kaka nde na mitindu yonso, yo vanda na luvunu to na kieleka, bo ke samuna nsangu ya Kristu mpi mono ke wa kiese sambu na yo. Ya kieleka, mono ta landa mpi na kuwa kiese, 19 sambu mono me zaba nde yo ta gulusa mono kana beno ke bondila+ mpi mpeve ya Yezu Kristu+ kupesa lusadisu. 20 Yo ke wakana ti kuvingila na mono mpi kivuvu na mono nde mono ta wa ve nsoni ata na diambu mosi, kansi nde ti masonga yonso Kristu ta baka nkembo ntangu yai na nzila ya nitu na mono, mutindu yo ke vandaka ntangu yonso katuka ntama, yo vanda mono kele na luzingu to mono me fwa.+

21 Sambu na mono, kuzinga kele Kristu+ mpi kufwa kele luta.+ 22 Kana mono fwete landa kuzinga na nitu, yo kele mbuma ya kisalu na mono; kansi mono ke zabisa ve kima yina mono ta sola. 23 Mono ke zaba ve nki mono ta sola na mambu yai zole, sambu mono kele ti nzala ya kubaka kimpwanza mpi ya kuvanda ti Kristu,+ sambu ya kieleka, yo kele kima ya kuluta mbote.+ 24 Kansi, yo kele mfunu kuluta nde mono bikala na nsuni sambu na beno. 25 Sambu mono ke tula ntima na diambu yai, mono ke zaba nde mono ta bikala mpi mono ta landa kuvanda ti beno yonso sambu beno kwenda na ntwala mpi sambu beno yangalala sambu na lukwikilu na beno, 26 sambu kiese na beno kukuma mingi kibeni na Kristu Yezu sambu na mono ntangu mono ta vanda diaka ti beno.

27 Beno kuditambusa* kaka na mutindu yina me fwana na nsangu ya mbote ya Kristu,+ sambu ata mono kwisa kutala beno to ata mono kele ve, mono wa nsangu na beno nde beno ke telama ngolo na mpeve mosi,+ mpi beno ke sala ngolo kumosi ti moyo mosi sambu na lukwikilu yina ke katuka na nsangu ya mbote, 28 mpi beno bika ve ata fioti nde bambeni na beno kupesa beno boma. Diambu yai kele nzikisa ya ke monisa lufwa+ sambu na bo, kansi luguluku sambu na beno;+ mpi kidimbu yai me katuka na Nzambi. 29 Sambu bo me pesaka beno dibaku ya mbote kaka ve ya kukwikila na Kristu, kansi mpi ya kumona mpasi sambu na yandi.+ 30 Sambu beno ke nwana bitumba ya mutindu mosi ti yina beno monaka mono ke nwana,+ bitumba yina beno ke wa ntangu yai nde mono ke landa kunwana.

2 Ebuna, kana kele ti kikesa ya kupesa na kati ya Kristu, kana kele ti ndembikilu ya zola, kana kele ti kinduku ya kimpeve,* kana kele ti lutondo mpi mawa, 2 beno kumisa kiese na mono mingi kibeni mpi beno monisa nde beno kele ti ngindu ya mutindu mosi, mpi zola ya mutindu mosi, mpi nde beno kele kibeni na bumosi* mpi beno kele ti mabanza ya mutindu mosi.+ 3 Beno sala ve ata diambu mosi ti mpeve ya kuswana+ to sambu na kumonisa nde beno me luta bankaka,+ kansi ti kudikulumusa yonso beno tadila bankaka nde bo me luta beno.+ 4 Beno sosa kaka ve mambote na beno mosi,+ kansi mpi mambote ya bantu ya nkaka.+

5 Beno landa kuvanda ti mabanza yai yina Kristu Yezu mpi vandaka ti yo,+ 6 ata yandi vandaka bonso Nzambi,+ yandi yindulaka ve ata fioti kukuma kiteso mosi ti Nzambi.+ 7 Ve, kansi yandi yambulaka bima yonso mpi yandi kumaka bonso mpika,+ mpi kumaka muntu.*+ 8 Kuluta diaka, ntangu yandi kwisaka bonso muntu,* yandi kudikulumusaka mpi lemfukaka tii na lufwa,+ ee, lufwa na zulu ya nti ya mpasi.*+ 9 Yo yina Nzambi tombulaka yandi na kisika mosi ya kunanguka+ mpi pesaka yandi na luzolo yonso zina yina me luta bazina yonso ya nkaka,+ 10 sambu na zina ya Yezu mabolongo yonso—ya bayina kele na zulu mpi ya bayina kele na ntoto mpi ya bayina kele na nsi ya ntoto+—kufukama 11 mpi konso ludimi kundima pwelele nde Yezu Kristu kele Mfumu+ na nkembo ya Nzambi, Tata na beto.

12 Yo yina, bampangi na mono ya mono ke zolaka mingi, mutindu beno ke lemfukaka ntangu yonso, kaka ve ntangu mono kele* ti beno, kansi ti luzolo mingi kuluta ntangu yai ya mono kele ve ti beno, beno landa kusala ngolo sambu na luguluku na beno mosi ti boma mpi matekita. 13 Sambu Nzambi muntu ke pesaka beno kikesa sambu na mambu yina ke pesaka yandi kiese, mpi yandi ke pesaka beno nzala ti ngolo ya kusala mambu. 14 Beno landa kusala mambu yonso kukonda kubokuta+ mpi kukonda kutulana ntembe,+ 15 sambu beno kuma bantu ya kukonda kifu mpi ya me sala mbi ve, bana ya Nzambi+ yina me konda mvindu na kati ya ndonga ya bantu ya mbi mpi ya me bebaka,+ na kati na yo beno ke pela bonso minda na nsi-ntoto.+ 16 Beno simba ngolo ndinga ya luzingu.+ Sambu mono vanda ti kikuma ya kuwa kiese na kilumbu ya Kristu, sambu mono ke zaba nde mono bakaka ve ntinu ya mpamba mpi kisalu ya ngolo ya mono salaka kele ve ya mpamba. 17 Kansi, ata mono kudipesa bonso makabu ya malafu+ yina bo ke tiamuna na zulu ya kimenga+ mpi ya kisalu ya santu* yina lukwikilu na beno me nataka beno na kusala, mono kele na kiese mpi mono ke yangalala ti beno yonso. 18 Mutindu mosi, beno mpi beno fwete vanda na kiese mpi kuyangalala ti mono.

19 Mono ke tula ntima na Mfumu Yezu na kutindila beno Timoteo+ ntama mingi ve, sambu mono baka kikesa ntangu mono ta baka bansangu na beno. 20 Sambu mono kele ve ti muntu ya nkaka yina kele ti nkadilu bonso ya yandi; yandi ke kudibanzaka na masonga yonso sambu na mambu na beno. 21 Sambu bantu yonso ya nkaka ke sosa mambote na bo mosi, kansi ya Yezu Kristu ve. 22 Kansi beno me zaba nzikisa yina yandi pesaka sambu na yandi mosi, nde bonso mwana+ ti tata na yandi, yandi salaka ti mono bonso mpika sambu na kunata nsangu ya mbote na ntwala. 23 Yo yina, yandi kele muntu yina mono ke zola kutinda ntangu mono ta zaba mutindu mambu ta kwendila sambu na mono. 24 Ya kieleka, mono ke tula ntima nde mono mpi ta kwisa ntama mingi ve, kana yo kele luzolo ya Mfumu.+

25 Kansi ntangu yai, mono ke mona nde yo kele mfunu nde mono tindila beno Epafrodite yina kele mpangi na mono mpi nduku na mono ya kisalu mpi soda bonso mono, mpi muntu yina beno tindaka sambu na kulungisa banzala na mono,+ 26 sambu yandi kele ti nzala ya ngolo ya kumona beno yonso mpi yandi kele na mawa sambu beno waka nde yandi belaka. 27 Ya kieleka, yandi belaka mpi zolaka kufwa; kansi Nzambi wilaka yandi mawa, nkutu, yandi kaka ve kansi mono mpi, sambu mono vanda ve ti mawa na zulu ya mawa. 28 Yo yina, mono ke tinda yandi nswalu-nswalu, sambu ntangu beno ta mona yandi beno vanda diaka na kiese, ebuna mono mpi ta kudiyangisa diaka ve mingi. 29 Yo yina, beno yamba yandi na kiese yonso mutindu beno ke yambaka balongoki ya Mfumu, mpi beno landa kupesa bantu ya mutindu yina lukumu,+ 30 sambu yandi zolaka kufwa sambu na kisalu ya Kristu,* mpi yandi tulaka luzingu* na yandi na kigonsa, sambu yandi yinga beno sambu beno vandaka ve awa sambu na kusadila mono.+

3 Nsuka-nsuka, bampangi na mono, beno landa kuwa kiese na Mfumu.+ Mono ke mona ve mpasi na kusonikila beno mambu ya mutindu mosi, mpi yo kele sambu na kutanina beno.

2 Beno keba na bambwa; beno keba na bantu yina ke salaka mambu ya mbi; beno keba na bantu yina ke zenga-zengaka nitu.+ 3 Sambu beto bantu kele ti luyotisu ya kieleka,+ beto bantu yina ke salaka kisalu ya santu na nsadisa ya mpeve ya Nzambi, beto bantu ke kudikumisaka na Kristu Yezu,+ mpi beto bantu ke tulaka ve ntima na nsuni, 4 ata mono kele ti bikuma ya kutula ntima na nsuni kuluta bantu yonso ya nkaka.

Kana kele ti muntu ya nkaka yina ke yindula nde yandi kele ti bikuma ya kutula ntima na nsuni, mono kele ti yo mingi kuluta: 5 bo yotisaka mono na kilumbu ya nana,+ mono kele muntu ya Izraele, muntu ya dikanda ya Benyamini, Mu-Ebreo yina butukaka na Baebreo;+ na mambu ya nsiku, mono vandaka Mufarize;+ 6 sambu na kikesa, mono vandaka kumonisa dibundu mpasi;+ sambu na lunungu yina me simbama na nsiku, mono kudimonisaka kukonda kifu. 7 Kansi bima yina vandaka mfunu sambu na mono, mono me yambulaka yo na luzolo yonso sambu na Kristu.+ 8 Diaka, mono ke tadilaka mpi bima yonso bonso nde yo kele bima ya me vilaka, sambu na mfunu mingi kibeni ya nzayilu ya Mfumu na mono Kristu Yezu. Sambu na yandi, mono me ndimaka kuvidisa bima yonso mpi mono ke tadilaka yo bonso kita ya mvindu, sambu mono zwa Kristu 9 mpi mono vanda na bumosi ti yandi, sambu na lunungu na mono mosi ve yina ke katuka na kuzitisa Nsiku, kansi sambu na lunungu yina kele na nzila ya lukwikilu+ na Kristu,+ lunungu yina ke katukaka na Nzambi mpi yina me simbama na lukwikilu.+ 10 Lukanu na mono kele ya kuzaba yandi, ya kuzaba ngolo ya lufutumuku na yandi,+ ya kumona bampasi yina yandi monaka,+ mpi ya kundima kufwa mutindu yandi fwaka,+ 11 sambu na kumona kana mpila kele, mono kuma na lufutumuku ya ntete na bafwa.+

12 Yo kele ve nde mono me bakaka yo to nde mono me kumaka ya kukuka, kansi mono ke sala ngolo+ sambu na kutala kana mono lenda baka mpi kima yina Kristu Yezu solaka mono*+ sambu na yo. 13 Bampangi, mono ke kuditadila ntete ve nde mono me baka yo; kansi kima mosi kele ya kieleka: Ntangu mono ke vila mambu yina kele na nima+ mpi ke landa mambu yina kele na ntwala,+ 14 mono ke sala ngolo sambu na kulungisa lukanu na mono, disongidila, kubaka lufutu+ ya kukwenda na zulu mutindu Nzambi me bingaka+ mono na nzila ya Kristu Yezu. 15 Yo yina, bantu yina kele ya kuyela+ na kati na beto kuvanda ti mabanza yai, mpi kana beno kele ti mabanza ya mutindu ya nkaka na konso diambu yina, Nzambi ta monisa beno mabanza ya mbote. 16 Na kiteso yina beto me yela, beto landa kutambula na mutindu yina me fwana na nzila yai mosi.

17 Bampangi, beno yonso beno landa mbandu na mono,+ mpi beno talaka bantu yina ke tambula na mutindu yina ke wakana ti mbandu yina beto pesaka beno. 18 Sambu kele ti bantu mingi—mono vandaka kutubila bo mbala mingi kansi ntangu yai mono ke tubila bo mpi ti kudila—bayina ke tambula bonso bambeni ya nti ya mpasi* ya Kristu. 19 Nsuka na bo kele lufwa, nzambi na bo kele divumu na bo, nkembo na bo kele kibeni nsoni na bo, mpi bo ke yindulaka kaka mambu ya nsi-ntoto.+ 20 Kansi nswa na beto ya bankwa-bwala+ kele na zulu,+ mpi beto ke vingila ti nzala ya ngolo ngulusi yina ke katuka kuna, Mfumu Yezu Kristu;+ 21 yandi ta kitula nitu na beto ya kukonda lukumu sambu yo fwanana ti* nitu na yandi ya nkembo+ na nsadisa ya ngolo na yandi ya nene ya ke sadisaka yandi na kutula bima yonso na nsi ya kiyeka na yandi.+

4 Yo yina, bampangi na mono ya mono ke zolaka mpi ya mono kele ti nzala ya ngolo ya kumona, kiese mpi mpu na mono ya kimfumu,+ beno telama ngolo+ na bumosi ti Mfumu na mutindu yai, bampangi na mono ya mono ke zolaka mingi.

2 Mono ke siamisa Evodia mpi mono ke siamisa Sentishe na kuvanda ti mabanza ya mutindu mosi na bumosi ti Mfumu.+ 3 Ee, mono ke lomba nge mpi, sambu nge kele nduku ya kieleka ya kisalu, na kulanda kusadisa bankento yai ya me salaka* ngolo na lweka na mono sambu na nsangu ya mbote, kumosi ti Klema mpi banduku na mono ya nkaka ya kisalu, yina bazina na bo kele na mukanda ya luzingu.+

4 Beno vanda ntangu yonso na kiese sambu na Mfumu. Mono ke tuba diaka nde, Beno vanda na kiese!+ 5 Bantu yonso kuzaba kikalulu na beno ya kuvanda ve makambu ngolo.*+ Mfumu kele pene-pene. 6 Beno kudiyangisa ve sambu na konso kima yina,+ kansi na mambu yonso na nzila ya kisambu mpi ntangu beno ke bondila ti kupesa matondo, beno zabisa Nzambi mambu ya beno ke lomba;+ 7 ebuna ngemba+ ya Nzambi yina me luta mayele yonso ya kubakisa mambu ta tanina bantima na beno+ mpi mabanza na beno na nzila ya Kristu Yezu.

8 Nsuka-nsuka bampangi, mambu yonso yina kele ya kieleka, mambu yonso yina bo lenda zitisa, mambu yonso yina kele ya lunungu, mambu yonso yina kele ya bunkete, mambu yonso yina ke pusaka na kuzola, mambu yonso yina kele ya lukumu, mambu yonso yina kele ya mbote, mpi mambu yonso yina me fwana na kubaka lukumu, beno landa kuyindula* mambu yai.+ 9 Mambu yina beno longukaka, ndimaka, waka, mpi monaka na mono, beno sala yo,+ ebuna Nzambi ya ngemba ta vanda ti beno.

10 Mono kele na kiese mingi na Mfumu sambu nsuka-nsuka beno me yantika kudibanza diaka sambu na mono.+ Ata beno vandaka kudibanza sambu na mono, beno vandaka ve ti mpila ya kumonisa yo. 11 Mono ke tuba ve mambu yai sambu mono kele na mfunu ya kima, sambu mono me longukaka na kuwa kiese na bima yina mono kele na yo.+ 12 Mono me zaba kuzinga ti bima fioti+ mpi kuzinga ti bima mingi. Na mambu yonso mpi na konso mutindu yina mono ke zinga, mono me longukaka kinsweki ya kuvanda ya kufuluka mpi ya kuvanda na nzala, ya kuzinga ti bima mingi mpi ya kuzinga kukonda bima. 13 Sambu na mambu yonso, mono kele ti ngolo na nzila ya muntu yina ke pesaka mono ngolo.+

14 Kansi, beno salaka mbote mutindu beno sadisaka mono na bampasi na mono. 15 Ya kieleka, beno bantu ya Filipi, beno me zaba mpi nde ntangu beno waka nsangu ya mbote na mbala ya ntete, ntangu mono katukaka na Masedonia, ata dibundu mosi ve sadisaka mono to ndimaka lusadisu na mono, katula kaka beno;+ 16 sambu ntangu mono vandaka na Tesalonika, beno tindilaka mono lusadisu mbala zole sambu na kusadisa mono. 17 Mono ke sosa ve dikabu, kansi mono ke sosa mbuma yina ta kumisa kimvwama na beno mingi. 18 Kansi, mono kele ti bima yonso yina mono kele na yo mfunu mpi mono kele na yo nkutu mingi kuluta. Mono me konda kima ve, sambu ntangu yai mono me baka na maboko ya Epafrodite+ bima yina beno tindaka, kimenga ya nsudi ya kitoko,+ yina Nzambi ke ndimaka mpi yina ke pesaka yandi kiese. 19 Ebuna, Nzambi na mono ta lungisa kibeni banzala na beno yonso+ na kutadila kimvwama na yandi ya nkembo na nzila ya Kristu Yezu. 20 Nkembo kuvanda na Nzambi mpi Tata na beto mvula na mvula. Amen.

21 Beno pesa mbote na mono na konso santu na bumosi ti Kristu Yezu. Bampangi yina kele ti mono me tindila beno mbote. 22 Basantu yonso, kansi mingi-mingi bayina kele na nzo ya Kaisali,+ bo me tindila beno mbote.

23 Ntima ya mbote ya nene ya Mfumu Yezu Kristu kuvanda ti mpeve yina beno ke monisa.