MUKANDA YA NTETE NA BATESALONIKA

1 Mono Polo ti Silvanusi*+ mpi Timoteo,+ beto ke sonikila dibundu ya Batesalonika, bayina kele na bumosi ti Nzambi, Tata na beto mpi ti Mfumu Yezu Kristu:

Ntima ya mbote ya nene mpi ngemba kuvanda ti beno.

2 Beto ke pesaka Nzambi matondo ntangu yonso ntangu beto ke tulaka beno yonso na bisambu na beto,+ 3 sambu beto ke yibukaka ntangu yonso kisalu na beno ya kwikama, kisalu ya ngolo ya beno ke salaka ti zola, mpi kukanga-ntima na beno sambu na kivuvu+ yina beno kele na yo na Mfumu na beto Yezu Kristu na ntwala ya Nzambi mpi Tata na beto. 4 Bampangi yina Nzambi ke zolaka, beto me zaba nde yandi me solaka beno, 5 sambu nsangu ya mbote yina beto ke samunaka kwisaka ve na beno ti bangogo mpamba kansi yo kwisaka mpi ti ngolo, ti mpeve santu, mpi ti kundima ya ngolo, mutindu beno me zaba bantu ya nki mutindu beto kumaka na kati na beno sambu na mambote na beno. 6 Mpi beno kumaka kulanda mbandu na beto+ mpi ya Mfumu,+ sambu beno ndimaka nsangu ti kiese yina ke katukaka na mpeve santu ata beno kutanaka ti bampasi mingi,+ 7 yo yina beno kumaka mbandu sambu na bantu yonso ya ke kwikilaka yina kele na Masedonia mpi na Akaya.

8 Diambu ya kieleka kele nde, nsangu ya Yehowa* katukaka na beno mpi mwanganaka kaka ve na Masedonia mpi na Akaya, kansi nsangu ya lukwikilu na beno na Nzambi me mwanganaka na bisika yonso,+ yo yina beto kele ve ti mfunu ya kutuba ata kima mosi. 9 Sambu bo mosi ke landa kutubila mutindu beto kutanaka ti beno na mbala ya ntete mpi mutindu beno yambulaka biteki na beno+ sambu beto sadila Nzambi ya moyo mpi ya kieleka bonso bampika, 10 mpi sambu beno vingila Mwana na yandi katuka na zulu;+ yandi tedimisaka Mwana yina na bafwa, disongidila, Yezu, yina ke gulusa beto na makasi ya Nzambi yina ke kwisa.+

2 Bampangi, beno me zaba mbote nde ntangu beto kwisaka kutala beno, yo kondaka ve kubuta mbuma.+ 2 Sambu ata bo monisaka beto ntete mpasi mpi bo sadilaka beto mambu kukonda luzitu na Filipi,+ mutindu beno me zaba, beto bakaka kikesa na nzila ya Nzambi na beto sambu na kuzabisa beno nsangu ya mbote ya Nzambi+ na kati ya kimbeni* mingi. 3 Sambu kusiamisa ya beto ke siamisa beno ke katuka ve na bangindu ya kifu, na mambu ya mvindu, to na luvunu, 4 kansi mutindu Nzambi me ndimaka beto mpi yandi me pesaka beto kisalu ya kuzabisa nsangu ya mbote, mutindu mosi mpi beto ke tubaka ve sambu na kupesa bantu kiese, kansi beto ke tubaka sambu na kupesa Nzambi kiese, yandi muntu ke fimpaka bantima na beto.+

5 Ya kieleka, beno me zaba nde beto sadilaka ve ata fioti bangogo ya kuleba mpi beto lwataka ve luse ya luvunu sambu na kubumba bangindu ya lukasi;+ Nzambi kele mbangi na beto! 6 Beto sosaka mpi ve nkembo na bantu, yo vanda na beno to na bantu ya nkaka, ata beto lendaka kuvanda kizitu ya nene sambu beto kele bantumwa ya Kristu.+ 7 Kansi, beto sadilaka beno mambu na mawete, mutindu mama yina ke nwisa ke kebaka bana na yandi na zola yonso. 8 Yo yina, sambu beto vandaka ti lutondo sambu na beno, beto vandaka ti lukanu* ya kupesa beno kaka nsangu ya mbote ya Nzambi ve, kansi mpi luzingu* na beto mosi,+ sambu beno kumaka bantu ya beto ke zolaka mingi.+

9 Ya kieleka, bampangi, beno ke yibuka kisalu na beto ya ngolo mpi ya ke lembisa. Beto vandaka kusala mpimpa ti mwini sambu beto vanda ve kizitu ya nene ata na muntu mosi na kati na beno+ ntangu beto vandaka kuzabisa beno nsangu ya mbote ya Nzambi. 10 Beno kele bambangi, Nzambi mpi kele mbangi, nde beto vandaka bantu ya kwikama, ya lunungu, mpi ya kukonda kifu na meso na beno bantu ya ke kwikilaka. 11 Beno me zaba mbote nde beto landaka kusiamisa beno, kulembika beno, mpi kuta kimbangi na konso muntu na kati na beno,+ mutindu tata+ ke salaka na bana na yandi, 12 sambu beno landa kutambula na mutindu yina me fwana na Nzambi+ yina ke binga beno na Kimfumu+ mpi na nkembo+ na yandi.

13 Ya kieleka, beto ke pesaka mpi Nzambi matondo ntangu yonso sambu na yo,+ sambu ntangu beno ndimaka ndinga ya Nzambi, yina beno waka na beto, beno ndimaka yo ve bonso ndinga ya bantu, kansi mutindu yo kele kibeni, bonso ndinga ya Nzambi, yina ke salaka mpi na beno bantu ya ke kwikilaka. 14 Sambu bampangi, beno kumaka kulanda mbandu ya mabundu ya Nzambi yina kele na Yudea mpi yina kele na bumosi ti Kristu Yezu, sambu bantu ya bwala na beno+ monisaka beno mpasi ya mutindu mosi ti mpasi yina Bayuda ke monisa bo; 15 Bayuda yina fwaka nkutu Mfumu Yezu+ ti bambikudi, mpi bo monisaka beto mpasi.+ Diaka, bo ke pesaka ve Nzambi kiese, kansi bo kele bambeni ya bantu yonso, 16 sambu bo ke sosaka kukanga beto nzila ya kuzabisa bantu ya makanda nsangu yina lenda sadisa bo na kuguluka.+ Na mutindu yina bo ke fulusaka ntangu yonso masumu na bo. Kansi nsuka-nsuka makasi na yandi me kwisila bo.+

17 Kansi bampangi, ntangu beto vandaka ya kukabwana* ti beno kaka sambu na ntangu fioti (na meso, kansi na bantima na beto ve), sambu na nzala na beto ya ngolo, beto salaka bikesa mingi sambu na kumona beno na meso.* 18 Yo yina beto vandaka ti nzala ya kukwisa na beno, ee, mono Polo, mono mekaka mbala zole; kansi Satana kangaka beto nzila. 19 Sambu nki kele kivuvu, kiese, to mpu na beto ya kimfumu ya lukumu na ntwala ya Mfumu na beto Yezu? Keti yo kele ve beno?+ 20 Ya kieleka, beno kele nkembo mpi kiese na beto.

3 Yo yina, ntangu beto lendaka diaka ve kukanga-ntima sambu na yo, beto monaka mbote mingi nde beto bikala na Atene+ beto mosi; 2 mpi beto tindaka Timoteo,+ mpangi na beto mpi nsadi ya Nzambi* yina ke samunaka nsangu ya mbote ya Kristu, sambu na kukumisa beno ngolo* mpi kulembika beno sambu na lukwikilu na beno, 3 sambu bampasi yai kunikisa ve ata muntu mosi. Sambu beno mosi, beno me zaba nde beto lenda tina ve kukutana ti mambu ya mutindu yai.*+ 4 Sambu ntangu beto vandaka ti beno, beto vandaka kuzabisa beno na ntwala nde beto ta kutana ti bampasi, mpi yo salamaka mpidina, mutindu beno me zaba.+ 5 Yo yina, ntangu mono lendaka diaka ve kukanga-ntima sambu na yo, mono tindaka Timoteo sambu mono zaba mutindu kwikama na beno kele,+ kana na mutindu mosi buna Mumeki+ mekaka beno, mpi kana kisalu na beto ya ngolo kumaka ya mpamba.

6 Kansi ntangu yai Timoteo me katuka kuna na beno+ mpi yandi me kwisa kuvutuka. Yandi me pesa beto nsangu ya mbote ya kwikama mpi zola na beno, nde ntangu yonso beno ke landa kuyibuka beto na zola yonso, mpi nde beno kele na nzala ya ngolo ya kumona beto mutindu beto mpi kele na nzala ya ngolo ya kumona beno. 7 Yo yina, bampangi, na kati ya mawa mpi bampasi na beto yonso, beto me baka kikesa sambu na beno mpi sambu na kwikama yina beno ke monisa.+ 8 Beto ke baka kikesa* kana beno ke telama ngolo na Mfumu. 9 Inki mutindu beto lenda pesa Nzambi matondo sambu na beno mpi sambu na kiese ya mingi yina beno ke pesa beto na ntwala ya Nzambi na beto? 10 Mpimpa ti mwini beto ke bondilaka ti kikesa mingi sambu na kumona beno* mpi kuyika mambu yina ke konda na lukwikilu na beno.+

11 Ntangu yai, bika Nzambi na beto mpi Tata yandi mosi ti Mfumu na beto Yezu kupesa beto nzila ya kukwisa kuna na beno. 12 Diaka, Mfumu kusadisa beno sambu zola na beno kuyela, ee, sambu zola yina beno ke zolanaka mpi zola yina beno ke zolaka bantu yonso kukuma mingi,+ mutindu beto ke zolaka beno, 13 sambu yandi pesa kikesa na bantima na beno mpi yandi kumisa beno ya kukonda kifu mpi ya santu na ntwala ya Nzambi+ mpi Tata na beto na ntangu ya kukala ya Mfumu na beto Yezu+ ti basantu na yandi yonso.

4 Na nsuka bampangi, mutindu beto songaka beno mutindu beno fwete tambula sambu na kupesa Nzambi kiese,+ mutindu beno ke tambula, beto ke lomba beno mpi beto ke bondila beno na zina ya Mfumu Yezu na kulanda kusala yo mbote-mbote kibeni. 2 Sambu beno me zaba mambu yina beto songaka* beno na nzila ya Mfumu Yezu.

3 Sambu luzolo ya Nzambi yo yai: Beno fwete vanda santu+ mpi beno fwete sala ve pite.*+ 4 Konso muntu na kati na beno fwete zaba mutindu ya kuyala nitu* na yandi+ na busantu+ mpi na lukumu, 5 kansi ve ti lukasi, ti nzala ya ngolo ya kuvukisa nitu ya bo ke yalaka ve+ bonso makanda yina me zaba ve Nzambi.+ 6 Ata muntu mosi ve fwete sala mpangi na yandi mbi mpi kuyiba banswa ya mpangi na yandi na diambu yai, sambu Yehowa* ke pesaka ndola sambu na mambu yai yonso, mutindu beto songaka beno na ntwala mpi kebisaka beno ngolo. 7 Sambu Nzambi bingaka beto, sambu na mambu ya mvindu ve, kansi sambu na busantu.+ 8 Yo yina, muntu yina ke vweza dilongi yai, yandi ke vweza ve muntu, kansi yandi ke vweza Nzambi+ yina ke pesaka beno mpeve santu na yandi.+

9 Ata mpidina, sambu na zola ya kimpangi,+ beno kele ve ti mfunu nde beto sonikila beno, sambu beno mosi, Nzambi ke longaka beno na kuzolana.+ 10 Ya kieleka, beno ke sala mutindu yina na bampangi yonso ya Masedonia ya mvimba. Kansi, beto ke siamisa beno, bampangi, na kulanda kusala yo diaka mbote-mbote kibeni. 11 Beno sala ngolo na kuzinga na ngemba,+ na kutala kaka mambu na beno mosi,+ mpi na kusala na maboko na beno mosi,+ mutindu beto longaka beno, 12 sambu beno tambula na mutindu ya mbote na meso ya bantu ya nganda+ mpi sambu beno konda ve ata kima mosi.

13 Diaka, bampangi, beto ke zola nde beno zaba mambu yina ke tadila bantu yina me fwaka,*+ sambu beno wa ve mawa bonso bantu ya nkaka yina kele ve ti kivuvu.+ 14 Kana beto ke kwikilaka nde Yezu fwaka mpi telamaka na bafwa,+ mutindu mosi mpi, bantu yina me fwaka* na bumosi ti Yezu, Nzambi ta vutula bo na luzingu sambu bo vanda ti Yezu.+ 15 Sambu mambu ya beto ke zabisa beno na kuwakana ti ndinga ya Yehowa,* yo yai: Beto bantu yina kele na luzingu mpi yina ta vanda na luzingu tii na ntangu ya kukala ya Mfumu ta yita ve ata fioti bantu yina me fwaka;* 16 sambu Mfumu yandi mosi ta katuka na zulu ti ndinga ya kupesa bansiku, ti ndinga ya mfumu ya bawanzio+ mpi ti mpungi ya Nzambi, ebuna bantu yina me fwaka na bumosi ti Kristu ta telama ntete.+ 17 Na nima, beto bantu yina kele na luzingu mpi yina ta guluka, bo ta nata beto na matuti+ kumosi ti bo, sambu na kukutana ti Mfumu+ na mupepe; mpidina beto ta vandaka ntangu yonso ti Mfumu.+ 18 Yo yina, beno landa kupesana kikesa ti bangogo yai.

5 Bampangi, sambu na bantangu mpi bansungi, mfunu kele ve ya kusonikila beno ata kima mosi. 2 Sambu beno me zaba mbote nde kilumbu ya Yehowa*+ ta kwisa kibeni bonso muyibi na mpimpa.+ 3 Na ntangu bo ta tuba nde, “Ngemba mpi lutaninu!” ebuna kaka na ntangu yina lufwa ta kwisila bo na kintulumukina,+ mutindu mpasi ya kubuta ke simbaka nkento yina kele na divumu, mpi bo ta tina ve ata fioti. 4 Kansi beno bampangi, beno kele ve na mpimpa, sambu mwini kubasikila beno na kintulumukina mutindu yo ke basikilaka miyibi, 5 sambu beno yonso kele bana ya nsemo mpi bana ya mwini.+ Beto kele ve bantu ya mpimpa, beto kele mpi ve bantu ya mudidi.+

6 Yo yina, beto lala ve bonso bantu ya nkaka,+ kansi beto kangula meso+ mpi beto tanina mabanza na beto.+ 7 Sambu bantu yina ke lalaka, bo ke lalaka na mpimpa, mpi bantu yina ke lawukaka malafu, bo ke lawukaka malafu na mpimpa.+ 8 Kansi beto bantu yina kele bantu ya mwini, beto tanina mabanza na beto, mpi beto lwata kitaninu-ntulu ya lukwikilu mpi zola, mpi beto lwata kivuvu ya luguluku bonso mpu;+ 9 sambu Nzambi solaka beto ve sambu na makasi, kansi yandi solaka beto sambu beto baka luguluku+ na nzila ya Mfumu na beto Yezu Kristu. 10 Yandi fwaka sambu na beto,+ sambu ata beto kele ya kusikama to beto me lala,* beto ta zinga kumosi ti yandi.+ 11 Yo yina, beno landa kupesana kikesa mpi kutungana,+ mutindu beno ke salaka yo tuka ntama.

12 Bampangi, beto ke lomba beno na kuzitisa bantu yina ke salaka ngolo na kati na beno, bayina ke twadisaka beno na Mfumu, mpi bayina ke kebisaka beno; 13 mpi na kupesa bo lukumu mingi na zola yonso sambu na kisalu na bo.+ Beno vanda na ngemba beno na beno.+ 14 Na ndambu ya nkaka bampangi, beto ke siamisa beno: beno kebisa* bantu ya mubulu,+ beno tubila bantu ya kele na mawa* na mutindu ya ke lembika, beno sadisa bantu ya kele ngolo ve, beno vanda ntima-nda sambu na bantu yonso.+ 15 Beno keba nde muntu mosi ve kuvutula mbi na mbi na muntu ya nkaka,+ kansi ntangu yonso beno landa kusala mambu ya mbote na kati na beno mpi na bantu yonso ya nkaka.+

16 Beno vanda ntangu yonso na kiese.+ 17 Beno samba ntangu yonso.+ 18 Beno pesa matondo sambu na mambu yonso.+ Yo yina luzolo ya Nzambi sambu na beno na Kristu Yezu. 19 Beno fwa ve tiya ya mpeve.+ 20 Beno vweza ve bambikudulu.+ 21 Beno zikisa mambu yonso;+ beno kangama ngolo na mambu ya mbote. 22 Beno buya mambu ya mbi ya mitindu yonso.+

23 Nzambi ya ngemba yandi mosi kusantisa beno kibeni. Mpi yandi tanina mpeve, moyo* mpi nitu na beno bampangi sambu yo vanda ya kukonda kifu mpi ya mbote na mambu yonso na ntangu ya kukala ya Mfumu na beto Yezu Kristu.+ 24 Muntu yina ke binga beno kele ya kwikama, mpi yandi ta lungisa yo kibeni.

25 Bampangi, beno landa na kusamba sambu na beto.+

26 Beno pesa bampangi yonso mbote ti beze ya santu.

27 Mono ke bondila beno na zina ya Mfumu na kutanga mukanda yai na ntwala ya bampangi yonso.+

28 Ntima ya mbote ya nene ya Mfumu na beto Yezu Kristu kuvanda ti beno.