MUKANDA YA ZOLE NA BATESALONIKA

1 Mono Polo ti Silvanusi* mpi Timoteo,+ beto ke sonikila dibundu ya Batesalonika, bayina kele na bumosi ti Nzambi Tata na beto mpi Mfumu Yezu Kristu:

2 Ntima ya mbote ya nene mpi ngemba ya Nzambi, Tata na beto mpi ya Mfumu Yezu Kristu kuvanda na beno.

3 Bampangi, beto fwete pesa Nzambi matondo ntangu yonso sambu na beno. Yo me fwana mutindu yina, sambu lukwikilu na beno ke yela mingi kibeni mpi zola yina beno yonso kele na yo sambu na bankaka ke kuma mingi.+ 4 Yo yina, beto ke kudikumisaka sambu na beno+ na kati ya mabundu ya Nzambi sambu beno ke kanga ntima mpi beno kele kaka ti lukwikilu, ata beno ke kutana ti* bambangika mingi mpi bampasi mingi.+ 5 Yo kele nzikisa ya ke monisa nde Nzambi ke sambisa na lunungu, mpi yo ke sala nde Nzambi kumona nde beno me fwana na kukota na Kimfumu na yandi yina beno ke monaka kibeni mpasi sambu na yo.+

6 Sambu ya kieleka, yo kele lunungu nde Nzambi kumonisa mpasi na bantu yina ke monisaka beno mpasi.+ 7 Kansi beno bantu yina ke mona mpasi, Nzambi ta lembika beno ti beto ntangu Mfumu Yezu+ ta monana na zulu ti bawanzio na yandi ya ngolo+ 8 na tiya ya ke pela ngolo, ntangu yandi ta vutula mbi na bantu yina me zaba ve Nzambi mpi na bantu yina ke lemfukaka ve na nsangu ya mbote ya Mfumu na beto Yezu.+ 9 Mfumu ta sambisa bantu yai mpi yandi ta pesa bo ndola ya lufwa ya mvula na mvula+ ebuna bo ta vanda diaka ve na ntwala na yandi mpi ya nkembo ya ngolo na yandi, 10 ntangu yandi ta kwisa sambu na kubaka nkembo kumosi ti basantu na yandi mpi sambu bantu yonso yina kwikilaka kutala yandi na kilumbu yina ti kuyituka, sambu beno kwikilaka na kimbangi yina beto taka.

11 Yo yina, beto ke sambaka ntangu yonso sambu na beno, sambu Nzambi na beto kumona nde beno me fwana na kubinga ya yandi me bingaka beno+ mpi na ngolo na yandi kusala mambu yonso ya mbote yina yandi ke zola ti konso diambu ya lukwikilu. 12 Yo kele mpidina sambu zina ya Mfumu na beto Yezu kubaka nkembo na nzila na beno, mpi beno na bumosi ti yandi, na kulanda ntima ya mbote ya nene ya Nzambi na beto mpi ya Mfumu Yezu Kristu.

2 Kansi bampangi, sambu na kukala ya Mfumu na beto Yezu Kristu+ mpi kuvukana na beto ti yandi,+ beto ke lomba beno 2 na kubika ve nde mabanza na beno kukuma kisaka-saka nswalu mpi na kuwa boma ve sambu bantu ke tuba nde kilumbu ya Yehowa*+ me kwisa, yo vanda bo ke tuba yo na nzila ya mambu ya kupemama*+ to na nzila ya nsangu ya munoko to na nzila ya mukanda yina ke monana bonso nde yo me katuka na beto.

3 Muntu kukusa* beno ve na mutindu mosi buna, sambu kilumbu yina ta kwisa ve kana kukolama*+ me kwisa ntete ve mpi kana muntu ya ke fwaka nsiku+ me monana ntete ve, mwana ya lufwa.+ 4 Yandi kele mbeni mpi yandi ke kudinangula na zulu ya konso muntu yina bo ke bingaka nzambi to ya kima yina bo ke sambilaka, yo yina yandi me vanda na tempelo ya Nzambi, mpi yandi ke kudimonisa na meso ya bantu yonso nde yandi kele nzambi. 5 Keti beno ke yibuka ve nde ntangu mono vandaka ntete ti beno, mono vandaka kuzabisa beno mambu yai?

6 Ebuna ntangu yai, beno me zaba muntu yina ke kanga muntu ya ke fwaka nsiku nzila, sambu yandi ta monana na ntangu na yandi ya bo me tulaka. 7 Ya kieleka, diswekamu ya mambu yai ya kufwa nsiku ke sala dezia kisalu,+ kansi yo ta vanda mutindu yai kaka tii kana muntu yina ke kanga nzila ntangu yai kukatuka na nzila. 8 Ebuna na ntangu yina, muntu ya ke fwaka nsiku ta monana; Mfumu Yezu ta fwa yandi na nsadisa ya mpeve ya munoko na yandi+ mpi ta kumisa yandi kima ya mpamba ntangu kukala na yandi ta monana.+ 9 Kansi kukala ya muntu ya ke fwaka nsiku ke wakana ti kisalu ya Satana+ kumosi ti bidimbu ya nkumbwa ya mutindu na mutindu, bidimbu ya luvunu, mpi mambu ya kuyituka+ 10 ti luvunu yonso ya kukonda lunungu+ sambu na bantu yina ke vila, bonso ndola sambu bo ndimaka ve mpi bo zolaka ve kieleka sambu bo guluka. 11 Yo yina Nzambi ke bika nde ngolo mosi ya luvunu kukusa bo, sambu bo ndima mambu ya luvunu,+ 12 na mpila nde bo sambisa bo yonso sambu bo ndimaka ve mambu ya kieleka kansi bo waka kiese na mambu ya kukonda lunungu.

13 Kansi, beno bampangi yina Yehowa* ke zolaka, beto fwete pesa Nzambi matondo ntangu yonso sambu na beno, sambu Nzambi solaka beno+ katuka luyantiku sambu na luguluku na mutindu yandi santisaka beno+ ti mpeve na yandi mpi na nzila ya lukwikilu na beno na kieleka. 14 Yandi bingaka beno na luguluku yai na nzila ya nsangu ya mbote yina beto ke zabisaka, sambu beno baka nkembo ya Mfumu na beto Yezu Kristu.+ 15 Yo yina bampangi, beno vanda ngolo+ mpi beno landa kusimba bansiku yina bo me longaka beno,+ yo vanda na nsangu ya munoko to na mukanda yina katukaka na beto. 16 Diaka, bika Mfumu Yezu Kristu yandi mosi mpi Nzambi Tata na beto, yina zolaka beto+ mpi pesaka beto kikesa ya kimakulu ti kivuvu+ ya mbote na nzila ya ntima ya mbote ya nene, 17 kulembika bantima na beno mpi kukumisa beno ngolo* sambu ntangu yonso beno sala mpi beno tuba mambu ya mbote.

3 Bampangi, sambu na kumanisa, beno landa kusamba sambu na beto,+ sambu ndinga ya Yehowa* kulanda kumwangana nswalu+ mpi kubaka nkembo, kaka mutindu yo ke salama kuna na beno, 2 mpi sambu beto guluka na maboko ya bantu ya ke kotaka bankaka nsoki mpi ya bantu ya mbi,+ sambu bantu yonso+ ve ke vandaka ti lukwikilu. 3 Kansi Mfumu kele ya kwikama; yandi ta pesa beno ngolo mpi yandi ta tanina beno na muntu ya mbi. 4 Diaka, beto ke tula ntima na Mfumu sambu na beno nde, beno ke zitisa mpi beno ta landa kuzitisa mambu ya beto songaka beno. 5 Bika Mfumu kulanda kutwadisa bantima na beno sambu beno zola Nzambi+ mpi beno kanga ntima+ sambu na Kristu.

6 Ntangu yai bampangi, na zina ya Mfumu Yezu Kristu, beto ke songa beno nde, beno vanda ntama ti konso mpangi yina ke tambula na mutindu ya kisaka-saka+ kansi ve na kuwakana ti bansiku* yina beno* bakaka na beto.+ 7 Sambu beno mosi me zaba mutindu beno fwete landa mbandu na beto,+ sambu beto kuditwadisaka ve na mutindu ya kisaka-saka na kati na beno, 8 mpi beto diaka ve madia ya muntu ya ofele.*+ Kansi, mpimpa ti mwini beto salaka kisalu ya ngolo mpi ya ke lembisa sambu beto vanda ve kizitu ya nene ata na muntu mosi na kati na beno.+ 9 Yo kele ve nde beto kele ve ti nswa+ ya kubaka lusadisu na beno, kansi beto salaka mpidina sambu beto zolaka kuvanda mbandu yina beno fwete landa.+ 10 Ya kieleka, ntangu beto vandaka ti beno, beto vandaka kusonga beno nde: “Kana muntu ke zola kusala ve, yandi dia mpi ve.”+ 11 Sambu beto ke wa nde bantu ya nkaka na kati na beno ke tambula na mutindu ya kisaka-saka,+ bo ke sala ve kisalu ata fioti, kansi bo ke kudikotisa na mambu yina me tala bo ve.+ 12 Beto ke songa bantu yina mpi beto ke longisila bo na zina ya Mfumu Yezu Kristu nde bo fwete sala na pima mpi kudia madia yina bo mosi ke baka.+

13 Kansi beno bampangi, beno yambula ve kusala mambu ya mbote. 14 Kansi kana muntu ke lemfuka ve na mambu ya beto me sonika na mukanda yai, beno tula yandi kidimbu mpi beno bika kuvukana ti yandi,+ sambu yandi wa nsoni. 15 Beno baka yandi ve bonso mbeni, kansi beno landa kukebisa yandi+ bonso mpangi.

16 Mfumu ya ngemba yandi mosi kupesa beno ngemba ntangu yonso, na mitindu yonso.+ Mfumu kuvanda ti beno yonso.

17 Yai mbote na mono, mono Polo, yina mono me sonika na diboko na mono mosi;+ yo kele kidimbu na konso mukanda; yai mutindu mono ke sonikaka.

18 Ntima ya mbote ya nene ya Mfumu na beto Yezu Kristu kuvanda ti beno yonso.