MUKANDA YA NTETE NA TIMOTEO

1 Mono Polo, ntumwa ya Kristu Yezu na nsiku ya Nzambi, Ngulusi na beto mpi ya Kristu Yezu, kivuvu na beto,+ 2 mono ke sonikila Timoteo,*+ mwana na mono ya kieleka+ na lukwikilu:

Ntima ya mbote ya nene, mawa, mpi ngemba ya Nzambi, Tata na beto mpi ya Kristu Yezu Mfumu na beto kuvanda ti nge.

3 Mutindu mono siamisaka nge na kubikala na Efezo ntangu mono zolaka kukwenda na Masedonia, mono ke sala mutindu mosi ntangu yai, sambu nge songa bantu ya nkaka nde bo longa ve malongi ya nkaka, 4 mpi bo tula ve dikebi na masolo ya luvunu+ mpi na bandonga ya ba-nkaka. Mambu ya mutindu yai ke basisaka ve ata kima mosi ya mfunu,+ kansi yo ke basisaka kaka bangindu ya mpamba-mpamba na kisika ya kupesa kima mosi ya me katuka na Nzambi yina lenda kumisa lukwikilu ngolo. 5 Ya kieleka, lukanu ya mambu* yai kele nde beto vanda ti zola+ ya me katuka na ntima ya bunkete, na kansansa ya mbote mpi na lukwikilu+ ya kukonda luvunu. 6 Sambu bo buyaka mambu yai, bantu ya nkaka me kudikotisaka na bituba-tuba ya kukonda mfunu.+ 7 Bo ke zolaka kuvanda balongi+ ya nsiku, kansi bo ke bakisaka ve mambu yina bo ke tubaka mpi mambu yina bo ke dindamanaka ngolo sambu na yo.

8 Beto me zaba nde Nsiku kele mbote kana muntu ke sadila yo mbote;* 9 beto ke zaba nde bo ke basisaka ve nsiku sambu na muntu ya lunungu, kansi sambu na bantu yina ke fwaka nsiku+ mpi bankolami, bantu yina ke vwezaka Nzambi mpi bansumuki, bantu ya kukonda kwikama* mpi bantu ya ke vwezaka mambu ya santu, bantu ya ke fwaka batata mpi bantu ya ke fwaka bamama, bantu ya ke fwaka bantu, 10 bantu ya ke salaka pite,* babakala yina ke lalaka ti babakala,* bantu yina ke kangaka bantu na ngolo, bantu ya luvunu, bantu ya ke diaka ndefi ya luvunu, mpi konso kima ya nkaka yina ke wakana ve ti malongi ya mbote,*+ 11 na kuwakana ti nsangu ya mbote ya nkembo ya Nzambi ya kiese, yina yandi pesaka mono.+

12 Mono ke pesa ntonda na Kristu Yezu Mfumu na beto, yina pesaka mono ngolo, sambu yandi monaka mono ya kwikama na mutindu yandi pesaka mono kisalu,+ 13 ata mono vandaka ntete muntu ya ke vwezaka, ya ke monisaka bantu mpasi mpi ya kukonda luzitu.+ Ata mpidina, yandi wilaka mono mawa sambu mono vandaka kusala mambu kukonda kuzaba mpi kukonda lukwikilu. 14 Kansi Mfumu na beto monisilaka mono ntima ya mbote mingi kibeni mpi mono kele ti lukwikilu mpi zola yina kele na Kristu Yezu. 15 Mambu yai me fwana nde bo tudila yo ntima mpi bo ndima yo kibeni: Kristu Yezu kwisaka na nsi-ntoto sambu na kugulusa bansumuki.+ Na kati na bo, mono kele muntu ya ntete.+ 16 Ata mpidina, yandi wilaka mono mawa sambu na nzila na mono muntu yina kele mbandu ya nene, Kristu Yezu kumonisa ntima ya nda na yandi yonso; yandi kumisaka mono mbandu sambu na bantu yina ta kwikila na yandi sambu na kubaka luzingu ya mvula na mvula.+

17 Ntangu yai, lukumu mpi nkembo kuvanda mvula na mvula na Ntotila ya kukonda nsuka,+ yina ke polaka ve,+ yina ke monanaka ve,+ Nzambi mosi kaka.+ Amen.

18 Mwana na mono Timoteo, mono ke pesa nge ntuma* yai na kuwakana ti bambikudulu yina bo tubaka sambu na nge, sambu na nzila na yo nge landa kunwana bitumba ya mbote,+ 19 tanina lukwikilu mpi kansansa ya mbote,+ yina bantu ya nkaka me losaka, ebuna lukwikilu na bo me bebaka bonso maswa yina me beba. 20 Imeneo+ ti Alesandre kele na kati ya bantu yina, mpi mono me pesaka bo na maboko ya Satana+ sambu ndola kulonga bo na kuvweza ve Nzambi.

2 Ntete-ntete mono ke siamisa bantu yonso na kubondila, na kusala bisambu, na kulomba sambu na bankaka, mpi na kupesa matondo sambu na bantu ya mitindu yonso, 2 sambu na bantotila mpi bantu yonso yina kele na bisika ya lukumu,*+ sambu beto vanda ti luzingu ya ngemba mpi ya pima, ti kukangama ya mvimba na Nzambi mpi luzitu.+ 3 Diambu yai kele mbote mpi yo me ndimama na meso ya Ngulusi na beto, Nzambi,+ 4 yina ke zola nde bantu ya mitindu yonso kuguluka+ mpi kubaka nzayilu ya sikisiki ya kieleka. 5 Sambu kele ti Nzambi kaka mosi,+ mpi muwakanisi+ kaka mosi na kati ya Nzambi ti bantu,+ muntu mosi, Kristu Yezu,+ 6 yina kudipesaka yandi mosi nkudulu ya me fwanana sambu na bantu yonso*+—yai mambu yina bantu fwete ta kimbangi sambu na yo na ntangu ya me fwana. 7 Bo me tulaka mono nsamuni mpi ntumwa+ sambu na kimbangi yai+—mono ke tuba masonga, mono ke kusa ve—longi ya makanda+ na mambu ya lukwikilu mpi ya kieleka.

8 Yo yina, mono ke zola nde na bisika yonso bantu kulanda kusamba mpi kutombula maboko ya kwikama,+ kukonda makasi+ mpi bantembe.+ 9 Mutindu mosi, bankento fwete kuditomisa ti bilele ya me fwana,* kukonda kulutisa ndilu mpi bo vanda ti mabanza ya mbote,* kansi ve ti mitindu ya kutunga nsuki mpi wolo to mayaka to bilele ya ntalu mingi kibeni,+ 10 kansi na mutindu yina me fwana sambu na bankento yina ke tubaka nde bo ke kangamaka na Nzambi,+ disongidila, na nzila ya bisalu ya mbote.

11 Nkento kulonguka na pima na bulemfu yonso.+ 12 Mono ke pesa ve nkento nzila ya kulonga, to ya kuyala bakala, kansi yandi fwete vanda kaka pima.*+ 13 Sambu bo salaka ntete Adami, na nima Eva.+ 14 Diaka, bo kusaka ve Adami, kansi bo kusaka kibeni+ nkento mpi yandi fwaka nsiku ya Nzambi. 15 Kansi, bo ta tanina yandi na nzila ya kubuta,+ kana yandi* landa kuvanda na lukwikilu, zola, mpi busantu ti mabanza ya mbote.*+

3 Mambu yai me fwana nde bo tudila yo ntima: Kana muntu ke zola kuvanda nkengi,+ yandi ke zola kisalu mosi ya mbote. 2 Yo yina, nkengi fwete vanda muntu ya bo lenda funda ve ata na kima mosi, bakala ya nkento mosi mpamba, muntu ya ke lutisaka ve ndilu na bikalulu na yandi, muntu ya kele ti mabanza ya mbote,*+ muntu ya kisaka-saka ve, muntu ya ke yambaka banzenza,+ muntu ya me fwana na kulonga,+ 3 muntu ya ke lawukaka malafu ve,+ muntu ya nku* ve, muntu ya makambu ngolo ve,*+ muntu ya ke swanaka ve,+ muntu ya ke zolaka mbongo ve,+ 4 muntu ya ke twadisaka nzo na yandi na mutindu ya mbote, muntu yina kele ti bana ya ke lemfukaka na luzitu yonso+ 5 (sambu kana muntu me zaba ve kutwadisa nzo na yandi, nki mutindu yandi ta keba dibundu ya Nzambi?), 6 yandi fwete vanda ve Mukristu ya mpa,+ kana ve yandi ta fuluka na lulendo mpi ta bwa na ndola yina bo me zengilaka Diabulu. 7 Diaka, yandi fwete vanda mpi ti lukumu ya mbote na bantu ya nganda,+ sambu yandi bwa ve na nsoni mpi na mutambu ya Diabulu.

8 Bansadi ya kisalu mpi fwete vanda bantu yina bo lenda zitisa, bantu ya kele ve ti ndinga-zole,* bantu ya ke nwaka vinu mingi ve, bantu ya lukasi ve yina ke sosaka kubaka luta na banzila ya luvunu,+ 9 kansi bantu ya ke taninaka kinsweki ya santu ya lukwikilu ti kansansa ya bunkete.+

10 Diaka, bo meka ntete bantu yai sambu na kuzaba kana bo me fwana; na nima bo sala bonso bansadi, kana bo lenda funda bo ve ata na kima mosi.+

11 Bankento mpi fwete vanda bantu yina bo lenda zitisa, bantu ya ke kusilaka ve bantu makambu,+ bantu ya ke lutisaka ve ndilu na bikalulu na bo, mpi bantu ya kwikama na mambu yonso.+

12 Nsadi ya kisalu fwete vanda bakala ya nkento mosi, yandi fwete twadisa bana na yandi mpi nzo na yandi na mutindu ya mbote. 13 Sambu bantu yina ke salaka kisalu na mutindu ya mbote ke bakaka sambu na bo mosi lukumu ya mbote mpi masonga ya nene na lukwikilu disongidila na Kristu Yezu.

14 Mono ke sonikila nge mambu yai, ata mono ke tula ntima nde mono ke kwisa kuna na nge ntama mingi ve, 15 kansi kana mono sukinina, sambu nge zaba mutindu nge fwete kuditwadisa na nzo ya Nzambi,+ yina kele dibundu ya Nzambi ya moyo, dikunzi mpi kima ya ke simbaka kieleka. 16 Ya kieleka, kinsweki ya santu ya kikalulu yai ya kukangama na Nzambi kele nene kibeni: ‘Yandi monanaka na kinsuni,+ Nzambi ndimaka yandi bonso muntu ya lunungu na mpeve,+ yandi monanaka na bawanzio,+ bo samunaka nsangu na yandi na kati ya makanda,+ bo kwikilaka na yandi na nsi-ntoto,+ bo yambaka yandi na zulu ti nkembo.’

4 Kansi ndinga* ya Nzambi ke tuba pwelele nde na bilumbu ya nsuka, bantu ya nkaka ta yambula lukwikilu, mpi bo ta tula dikebi na mambu ya kupemama* ya ke kusaka+ mpi na malongi ya bademo, 2 na nzila ya luvunu ya bantu yina ke kusaka;+ bantu yina kansansa na bo kele bonso nde bo me zikisaka yo ti kibende ya tiya. 3 Bo ke buyisa makwela+ mpi bo ke pesa bantu nsiku ya kubuya madia+ yina Nzambi salaka sambu bantu yina kele ti lukwikilu+ mpi yina me zaba kieleka mbote-mbote kudia+ yo na nima ya kupesa matondo. 4 Sambu konso kima yina Nzambi me gangaka kele mbote,+ mpi bantu fwete buya ve+ ata kima mosi kana bo dia yo na nima ya kupesa matondo, 5 sambu yo ke kumaka ya santu na nzila ya ndinga ya Nzambi mpi ya kisambu yina bo me sala sambu na yo.

6 Kana nge pesa bampangi bandongisila yai, nge ta vanda nsadi ya mbote ya Kristu Yezu, yina ke disaka mabanza na yandi ti bangogo ya lukwikilu mpi malongi ya mbote yina nge me landaka mbote-mbote.+ 7 Kansi buya masolo ya luvunu yina ke vwezaka mambu ya santu,+ bonso yina bankento ya minunu ke taka. Diaka, sala ngolo kibeni* sambu nge kuma ti kikalulu ya kukangama na Nzambi. 8 Sambu ngalasisi ya nitu kele mfunu na mambu fioti, kansi kukangama na Nzambi kele mfunu na mambu yonso, sambu yo kele ti lusilu ya luzingu ya ntangu yai mpi ya luzingu yina ke kwisa.+ 9 Mambu yai me fwana nde bo tudila yo ntima mpi bo ndima yo kibeni. 10 Yo yina beto ke sala ngolo mpi ke sala kikesa kibeni,+ sambu beto me tulaka kivuvu na beto na Nzambi ya moyo, yina kele Ngulusi+ ya bantu ya mitindu yonso,+ mingi-mingi ya bantu ya kwikama.

11 Landa kupesa bantuma yai mpi kulonga yo. 12 Kubika ve nde muntu kuvweza kileke na nge. Kansi, kuma mbandu sambu na bantu ya kwikama na kutuba, na bikalulu, na zola, na lukwikilu, mpi na bikalulu ya bunkete. 13 Tii kuna mono ta kwisa, landa kudipesa na kutanga na meso ya bantu,+ na kusiamisa,* mpi na kulonga. 14 Kubebisa ve dikabu yina nge kele na yo, yina bo pesaka nge na nzila ya mbikudulu ntangu kimvuka ya bankuluntu tulaka nge maboko.+ 15 Yindulula mambu yai; kudipesa ya mvimba na yo, sambu bantu yonso kumona pwelele nde nge ke kwenda na ntwala. 16 Keba ntangu yonso na nge mosi mpi na malongi na nge.+ Kwamina na mambu yai, sambu kana nge ke sala yo, nge ta kudigulusa mpi nge ta gulusa bantu yina ke widikila nge.+

5 Kunganina ve mbuta-muntu+ ti bangogo ya ngolo. Kansi, bondila yandi bonso tata, baleke ya babakala bonso bampangi ya babakala, 2 bankento yina kele bambuta bonso bamama, baleke ya bankento bonso bampangi ya bankento ti mabanza ya bunkete kibeni.

3 Tula dikebi na* mifwidi ya bankento yina kele kibeni mifwidi.*+ 4 Kansi kana mufwidi ya nkento kele ti bana to bantekolo, mbote bo sadila ntete kikalulu ya kukangama na Nzambi na nzo na bo mosi+ mpi bo pesa bibuti ti ba-nkaka na bo bima yina me fwana na bo,+ sambu yo kele mambu yina Nzambi ke ndimaka.+ 5 Nkento yina kele kibeni mufwidi mpi yina me bikalaka maboko mpamba, yandi me tulaka ntima na Nzambi+ mpi yandi ke kwaminaka na kubondila mpi na bisambu mpimpa ti mwini.+ 6 Kansi mufwidi yina ke kudipesa na biese ya nitu kele ya kufwa ata yandi kele na luzingu. 7 Yo yina, landa kupesa bo malongi* yai, sambu bo vanda bantu yina bo lenda funda ve ata na kima mosi. 8 Ya kieleka, kana muntu ke lungisa ve banzala ya bantu na yandi, mpi mingi-mingi ya bantu ya nzo na yandi, yandi me buya lukwikilu mpi yandi kele mbi kuluta muntu yina kele ve ti lukwikilu.+

9 Mufwidi ya nkento yina bo fwete tula zina na yandi na lisiti fwete vanda ve ti bamvula na nsi ya 60, kana yandi vandaka nkento ya bakala mosi mpamba, 10 yina me zabanaka sambu na bisalu ya mbote,+ kana yandi sansaka bana,+ kana yandi vandaka kuyamba banzenza,+ kana yandi vandaka kuyobisa makulu ya basantu,+ kana yandi vandaka kusadisa bantu yina vandaka na mpasi,+ kana yandi vandaka kudipesa na konso kisalu ya mbote.

11 Kansi, kutula ve bazina ya mifwidi ya baleke na lisiti, sambu ntangu banzala na bo ya kuvukisa nitu ke kwisaka kutelama na kati na bo mpi Kristu, bo ke zolaka kukwela. 12 Bo ta baka ndola sambu bo me yambula lukwikilu yina bo monisaka ntete.* 13 Kaka na ntangu yina, bo ke longukaka na kukonda mambu ya kusala, bo ke kwendaka nzo na nzo; ee, bo ke kondaka kaka ve mambu ya kusala, kansi bo ke tongaka mpi bo ke kudikotisaka na mambu ya bantu ya nkaka+ mpi bo ke tubilaka mambu yina bo fwete tubila ve. 14 Yo yina, mono ke zola nde mifwidi ya baleke kukwela,+ kubuta bana,+ kutwadisa banzo na bo, mpi bo pesa ve mbeni dibaku ya kutuba mambu ya mbi. 15 Ya kieleka, bankaka me bikaka nzila ya mbote sambu na kulanda Satana. 16 Kana nkento mosi ya ke kwikilaka kele ti bantu ya dibuta na yandi yina kele mifwidi, mbote yandi sadisa bo, sambu dibundu kuvanda ve ti kizitu. Ebuna dibundu lenda sadisa mifwidi yina kele kibeni mifwidi.*+

17 Bankuluntu yina ke twadisaka na mutindu ya mbote,+ bo me fwana na kubaka lukumu mingi kibeni,+ mingi-mingi bayina ke salaka ngolo na kutuba mpi na kulonga.+ 18 Sambu masonama ya santu ke tuba nde, “Nge fwete kanga ve munoko ya ngombe ntangu yo ke niata mbuma sambu na kukatula yo bampusu,”+ mpi nde, “Muntu ya kisalu me fwana na kubaka lufutu na yandi.”+ 19 Kundima ve kana bo me funda mbuta-muntu,* katula kaka na kimbangi ya bambangi zole to tatu.+ 20 Bantu yina kele ti kikalulu ya kusala masumu,+ nganina+ bo na meso ya bantu yonso, sambu yo vanda lukebisu sambu na bantu ya nkaka.* 21 Mono ke songa nge kibeni na ntwala ya Nzambi mpi ya Kristu Yezu mpi ya bawanzio yina bo me solaka na kuzitisa bansiku yai kukonda bangindu ya mbi to kupona-pona.+

22 Kutula ve muntu maboko ntinu-ntinu;*+ kuvukana mpi ve na masumu ya bankaka; vanda kaka ti bikalulu ya bunkete.

23 Kunwa diaka ve masa,* kansi nwa ndambu ya vinu sambu na divumu na nge mpi sambu nge ke belaka mbala na mbala.

24 Masumu ya bantu ya nkaka ke zabanaka na bantu yonso, mpi yo ke nataka mbala mosi na lusambisu, kansi ya bankaka ke monikaka na nima.+ 25 Mutindu mosi mpi, bisalu ya mbote ke zabanaka na bantu yonso+ mpi bisalu ya mbote yina ke zabanaka ve na bantu yonso, bo lenda bumba yo ve.+

6 Bantu yina kele bampika* fwete landa kutadila bamfumu na bo bonso bantu yina me fwana kubaka lukumu mingi,+ sambu bantu kutuba ve ata fioti mambu ya mbi sambu na zina ya Nzambi mpi malongi na yandi.+ 2 Diaka, bampika yina kele ti bamfumu ya ke kwikilaka kukonda bo ve luzitu sambu bo kele bampangi. Kansi, bo fwete sala na luzolo mingi kuluta, sambu bantu yina ke baka mambote ya kisalu na bo ya mbote kele bantu ya ke kwikilaka mpi bampangi ya bo ke zolaka mingi.

Landa kulonga mambu yai mpi kusiamisa bo na kusala yo. 3 Kana muntu ke longa malongi ya nkaka mpi ke ndima ve malongi ya mbote,*+ yina me katukaka na Mfumu na beto Yezu Kristu, mpi yandi ke ndima ve malongi yina kele na kuwakana ti kukangama na Nzambi,+ 4 yandi me fuluka ti lulendo mpi yandi ke bakisa ve ata kima mosi.+ Yandi ke kudipesa mingi na* kuswana mpi na bantembe sambu na bangogo.+ Mambu yai ke basisaka kimpala, kuswana, kukusila bantu makambu,* kubakila bankaka bangindu ya mbi; 5 bantu yina mabanza+ na bo me bebaka mpi yina ke bakisaka diaka ve kieleka, yo ke nataka bo na kuswana ntangu yonso sambu na mambu ya fioti-fioti, mpi bo ke yindulaka nde kukangama na Nzambi kele nzila ya kubaka luta.+ 6 Ya kieleka, kukangama na Nzambi+ kele na luta mingi, kana beto ke sepela na bima yina beto kele na yo. 7 Sambu beto nataka ata kima ve na nsi-ntoto, beto lenda kwenda mpi ve ti kima ata mosi.+ 8 Yo yina, kana beto kele ti madia,* mpi bilele,* beto ta sepela ti bima yai.+

9 Kansi, bantu yina kele ti lukanu ya ngolo ya kukuma bamvwama ke bwaka na mpukumuna, na mutambu,+ mpi na banzala ya buzoba ti ya mbi yina ke nataka bantu na lufwa mpi na kubeba.+ 10 Sambu zola ya mbongo kele musisa ya mambu ya mbi ya mitindu yonso, mpi sambu bantu ya nkaka me yedisaka zola yai, bo me vidisaka lukwikilu mpi bo me kuditobulaka ti bampasi mingi.+

11 Nge muntu ya Nzambi, tina mambu yai. Kansi, landa lunungu, kukangama na Nzambi, lukwikilu, zola, kukanga-ntima, mpi mawete.+ 12 Nwana bitumba ya mbote ya lukwikilu; simba ngolo luzingu ya mvula na mvula yina bo bingaka nge sambu na yo mpi yina nge ndimaka pwelele na meso ya bambangi mingi.

13 Na meso ya Nzambi, yina ke taninaka bima yonso na luzingu, mpi ya Kristu Yezu, yina taka kimbangi ya mbote na ntwala ya Ponse Pilate,+ mono ke songa nge 14 na kuzitisa nsiku na mutindu ya kukonda ditono mpi na mutindu yina ata muntu mosi ve lenda mona kima ya kufundila nge tii ntangu yina Mfumu na beto Yezu Kristu ta monana.+ 15 Kumonana yina, Mfumu ya kiese mpi mosi kaka ta songa yo na ntangu ya bo me tulaka. Yandi kele Ntotila ya bantu yina ke yala bonso bantotila mpi Mfumu ya bantu yina ke yala bonso bamfumu;+ 16 yandi mpamba ke fwaka ve,+ mpi yandi ke zingaka na nsemo yina bantu lenda pusana ve pene-pene na yo,+ yina ata muntu mosi ve me monaka to lenda mona.+ Lukumu mpi ngolo ya kukonda nsuka kuvanda na yandi. Amen.

17 Longa* bantu yina kele bamvwama na ngidika yai ya bima* na kuvanda ve lulendo,* mpi na kutula ve kivuvu na bo na bimvwama ya ke zingaka mingi ve,+ kansi na Nzambi yina ke pesaka beto mingi kibeni bima yonso yina beto kele na yo.+ 18 Songa bo na kusala mambu ya mbote, na kuvanda bamvwama na bisalu ya mbote, na kukaba,* na kuvanda ya kuyilama sambu na kukabila bankaka,+ 19 na kudibumbila fondasio ya mbote sambu na bilumbu ke kwisa,+ sambu bo simba ngolo luzingu ya kieleka.+

20 Timoteo, bumba mambu yina bo me pesaka nge,+ buya bituba-tuba ya mpamba yina ke vwezaka mambu ya santu mpi buya kukonda kuwakana yina bo ke bingaka na luvunu yonso nde “nzayilu.”+ 21 Sambu bo kudisongaka na lulendo yonso nde bo kele ti nzayilu ya mutindu yai, bantu ya nkaka me vidisaka lukwikilu.

Ntima ya mbote ya nene kuvanda ti beno.