MUKANDA YA ZOLE NA TIMOTEO

1 Mono Polo, ntumwa ya Kristu Yezu na luzolo ya Nzambi na kutadila lusilu ya luzingu yina kele na nzila ya Kristu Yezu,+ 2 mono ke sonikila Timoteo, mwana yina mono ke zolaka mingi:+

Ntima ya mbote ya nene, mawa, mpi ngemba ya Nzambi, Tata na beto mpi ya Kristu Yezu Mfumu na beto kuvanda ti nge.

3 Mono ke pesa Nzambi matondo, yina mono ke sadilaka kisalu ya santu ti kansansa ya bunkete, mutindu ba-nkaka na mono salaka; mono ke yibukaka nge ntangu yonso na ntangu mono ke bondilaka mpimpa ti mwini. 4 Kana mono ke yibuka mansanga na nge, mono kele ti nzala ya ngolo ya kumona nge, sambu mono fuluka na kiese. 5 Sambu mono ke yibuka lukwikilu na nge ya kukonda luvunu,+ lukwikilu yina vandaka ntete na nkaka na nge ya nkento Loisi mpi na mama na nge Enise; kansi mono ke tula ntima nde yo kele mpi na nge.

6 Yo yina mono ke yibusa nge na kupedisa bonso tiya dikabu ya Nzambi yina nge bakaka ntangu mono tulaka nge maboko.+ 7 Sambu Nzambi pesaka beto ve mpeve ya kukonda kikesa,+ kansi yandi pesaka beto mpeve ya ngolo,+ ya zola, mpi ya mabanza ya mbote. 8 Yo yina, kuwa ve nsoni sambu na kimbangi ya Mfumu na beto+ to sambu na mono, muntu ya boloko sambu na yandi, kansi ndima kumona mpasi+ sambu na nsangu ya mbote mpi tula ntima na ngolo ya Nzambi.+ 9 Yandi gulusaka beto mpi yandi bingaka beto na kuvanda bantu ya santu,+ sambu na bisalu na beto ve, kansi sambu na lukanu na yandi mosi mpi ntima ya mbote na yandi ya nene.+ Yandi monisilaka beto yo na kuwakana ti Kristu Yezu tuka ntama, 10 kansi ntangu yai yandi me monisaka yo pwelele na nzila ya kumonana ya Ngulusi na beto, Kristu Yezu,+ yina me katulaka lufwa+ mpi me songaka beto na nzila ya nsangu ya mbote+ mutindu beto lenda baka luzingu+ mpi nitu yina ke polaka ve;+ 11 bo solaka mono na kuvanda nsamuni, ntumwa, mpi longi na yo.+

12 Yo yina mono ke mona mpi mpasi,+ kansi mono ke wa nsoni ve.+ Sambu mono me zaba Muntu yina mono me kwikilaka na yandi, mpi mono ke tula ntima nde yandi lenda tanina mambu yina mono me bumbaka na yandi tii na kilumbu yina.+ 13 Landa kusimba mbandu ya mambu ya mbote*+ yina nge waka na mono ti lukwikilu mpi zola yina ke katukaka na bumosi ti Kristu Yezu. 14 Bumba kimvwama yai ya mbote ya bo me pesaka nge na nzila ya mpeve santu, yina ke zinga na kati na beto.+

15 Nge me zaba nde bantu yonso ya provense ya Azia+ me tina mono, tanga mpi Fizele ti Ermogene. 16 Mfumu kuwila nzo ya Onezifore+ mawa, sambu yandi pesaka mono kikesa mbala mingi, mpi yandi waka ve nsoni ya miniololo na mono. 17 Kansi, ntangu yandi vandaka na Roma, yandi sosaka mono ngolo mpi yandi monaka mono. 18 Mfumu kupesa yandi nzila sambu Yehowa* kuwila yandi mawa na kilumbu yina. Mpi nge me zaba mbote bisalu yonso yina yandi salaka na Efezo.

2 Ebuna nge, mwana na mono,+ landa kubaka ngolo na ntima ya mbote ya nene yina kele na Kristu Yezu; 2 mpi mambu yina nge waka na mono yina bambangi mingi mpi tubilaka,+ mambu yai pesa yo na bantu ya kwikama, ebuna bo mpi ta fwana kibeni na kulonga bantu ya nkaka. 3 Sambu nge kele soda ya mbote+ ya Kristu Yezu, ndima na kumona mpasi.+ 4 Muntu mosi ve ya ke salaka kisalu ya kisoda ke kudikotisaka* na mambu ya mumbongo ya luzingu,* sambu muntu yina bakaka yandi na kisalu ya kisoda kundima yandi. 5 Ata na bansaka, muntu yina ke salaka yo ke bakaka lufutu* kaka kana yandi me sala yo na kulanda bansiku.+ 6 Muntu yina ke salaka kisalu ya ngolo na bilanga fwete vanda muntu ya ntete na kubaka bambuma. 7 Yindula ntangu yonso mambu ya mono ke tuba; Mfumu ta pesa nge mayele ya kubakisa* mambu yonso.

8 Yibuka nde bo tedimisaka Yezu Kristu na bafwa+ mpi yandi vandaka mwana ya Davidi,*+ na kuwakana ti nsangu ya mbote yina mono ke longa;+ 9 sambu na yo mono ke mona mpasi mpi bo me tula mono na boloko bonso muntu ya ke salaka mbi.+ Ata mpidina, ndinga ya Nzambi kele ve ya kukangama.+ 10 Yo yina, mono ke landa kukanga ntima na mambu yonso sambu na bantu yina bo me solaka,+ sambu bo mpi kubaka luguluku yina kele na nzila ya Kristu Yezu, kumosi ti nkembo ya mvula na mvula. 11 Mambu yai me fwana nde bo tudila yo ntima: Ya kieleka kana beto fwaka kumosi ti yandi, beto ta zinga mpi kumosi ti yandi;+ 12 kana beto landa kukanga ntima, beto ta yala mpi ti yandi bonso bantotila;+ kana beto buya yandi, yandi mpi ta buya beto;+ 13 kana beto me konda kwikama, yandi ke bikalaka ya kwikama, sambu yandi lenda kudibuya ve.

14 Landa kuyibusa bo mambu yai, mpi longa bo* na meso ya Nzambi nde bo nwana ve sambu na bangogo, diambu yina kele ve mfunu ata fioti sambu yo ke nataka mpasi na* bantu yina ke widikila. 15 Sala ngolo kibeni na kudimonisa muntu yina Nzambi me ndimaka, muntu ya kisalu yina kele ve ti kima ya kuwila nsoni, muntu yina ke longaka mpi ke tendulaka ndinga ya kieleka mbote-mbote.+ 16 Kansi buya bituba-tuba ya mpamba yina ke vwezaka mambu ya santu;+ sambu yo ta nata na kuvweza Nzambi mingi kuluta, 17 mpi mambu ya bo ke tuba ta panzana bonso mputa yina ke diaka nitu. Imeneo ti Filete kele na kati na bo.+ 18 Bantu yai me yambulaka kieleka, bo ke tubaka nde lufutumuku me salamaka ntama,+ mpi bo ke vwalangasa lukwikilu ya bantu ya nkaka. 19 Ata mpidina, fondasio ya ngolo ya Nzambi kele kaka ya kutelama, mpi yo kele ti kidimbu yai, “Yehowa* me zaba bantu na yandi,”+ mpi, “Bika konso muntu yina ke bingaka zina ya Yehowa*+ kuyambula mambu ya kukonda lunungu.”

20 Na nzo ya nene, yo ke vandaka ve kaka ti bisadilu* ya wolo mpi ya arza kansi mpi ya mabaya ti ya ntoto; ya nkaka sambu na kisalu ya lukumu kansi ya nkaka diaka sambu na kisalu ya kukonda lukumu. 21 Yo yina, kana muntu me kabwana ti bisadilu yina kele sambu na kisalu ya kukonda lukumu, yandi ta vanda kisadilu* sambu na kisalu ya lukumu, kisadilu yina bo me santisaka, yina kele mfunu sambu na munkwa na yo, mpi yina bo me yidikaka sambu na konso kisalu ya mbote. 22 Yo yina, tina banzala ya kileke, kansi landa lunungu, lukwikilu, zola, ngemba, kumosi ti bantu yina ke bingaka Mfumu na ntima ya bunkete.

23 Diaka, buya bantembe ya buzoba mpi ya kukonda mfunu,+ sambu nge me zaba nde yo ke basisaka bitumba. 24 Sambu mpika ya Mfumu fwete nwana ve, kansi yandi fwete vanda muntu ya mawete na bantu yonso,+ muntu yina me fwana na kulonga, muntu yina ke kudiyalaka kana bo sala yandi mbi,+ 25 mpi muntu yina ke longaka bankolami ti mawete.+ Mbala ya nkaka Nzambi lenda pesa bo nzila ya kubalula ntima,* ebuna yo sadisa bo na kuzaba kieleka mbote-mbote,+ 26 mpi bo lenda vutukila mabanza na bo mpi kutina mutambu ya Diabulu, sambu yandi me kangaka bo ya moyo sambu bo sala luzolo na yandi.+

3 Kansi zaba mambu yai: na bilumbu ya nsuka+ bantangu ya mpasi mpi ya nku ta vanda. 2 Sambu bantu ta vanda bantu ya ke kudizolaka, bantu ya ke zolaka mbongo, bantu ya ke kudikumisaka, bantu ya lulendo, bantu ya ke vwezaka, bantu ya ke lemfukaka ve na bibuti, bantu ya ke pesaka ve matondo, bantu ya me konda kwikama, 3 bantu ya ke zolaka ve bantu ya nkaka, bantu ya ke zolaka ve kuwakana, bantu ya ke kusilaka bankaka makambu, bantu ya me konda kudiyala, bantu ya nku, bantu ya ke zolaka ve mambu ya mbote, 4 bantu ya ke tekaka bankaka, bantu ya ntu-ngolo, bantu ya me fuluka ti lulendo, bantu ya ke zolaka biese na kisika ya kuzola Nzambi, 5 bantu ya ke monanaka nde bo ke zolaka mambu ya Nzambi, kansi bo ke buyaka ngolo ya mambu yina;+ kansi nge, tina bantu yai. 6 Sambu na kati na bo kele ti babakala yina ke kotaka na banzo ti mayele ya mbi mpi bo ke nataka bonso bampika bankento yina kele ngolo ve, yina me fuluka ti masumu, mpi yina ke landaka banzala ya mutindu na mutindu; 7 bo ke longukaka ntangu yonso kansi bo ke kukaka ve ata fioti kuzaba kieleka mbote-mbote.

8 Mutindu Yanesi ti Yamberesi nwanisaka Moize, bantu yina mpi ke landa kunwanisa kieleka. Mabanza na bo me bebaka kibeni, mpi Nzambi ke ndimaka bo ve sambu bo ke tambulaka ve na kuwakana ti lukwikilu. 9 Kansi bo ta kwenda ve na ntwala, sambu buzoba na bo ta monana pwelele na bantu yonso, mutindu buzoba ya babakala yina zole monanaka pwelele.+ 10 Kansi nge me landaka mbote-mbote malongi na mono, mutindu na mono ya kuzinga,+ lukanu na mono, lukwikilu na mono, ntima ya nda na mono, zola na mono, kukanga-ntima na mono, 11 bambangika ti bampasi bonso yina mono monaka na Antioshe,+ na Ikoniumi,+ mpi na Listre.+ Mono kangaka ntima na bampasi yai, mpi Mfumu gulusaka mono na bampasi yina yonso.+ 12 Ya kieleka, bantu yonso yina ke zola kuzinga na kukangama na Nzambi na bumosi ti Kristu Yezu, bo ta monisa bo mpi mpasi.+ 13 Kansi bantu ya mbi mpi bantu ya luvunu ta salaka diaka mbi kuluta, bo ta kusaka bantu mpi bantu ta kusaka bo.+

14 Kansi nge, landa kaka mambu yina nge longukaka mpi yina bo ndimisaka nge na kukwikila,+ sambu nge me zaba banani longaka nge yo 15 mpi nde yantika bumwana+ nge me zaba masonama ya santu,+ yina lenda kumisa nge mayele sambu nge guluka na nzila ya lukwikilu yina nge kele na yo na Kristu Yezu.+ 16 Masonuku yonso kele ya kupemama na Nzambi+ mpi yo kele mfunu sambu na kulonga,+ sambu na kunganina, sambu na kusungika mambu, sambu na kupesa ndola na lunungu,+ 17 sambu muntu ya Nzambi kuvanda ya kukuka kibeni, mpi ya kufwana kibeni sambu na konso kisalu ya mbote.

4 Na ntwala ya Nzambi mpi ya Kristu Yezu, yina ta sambisa+ bantu yina kele na luzingu mpi bafwa,+ mpi na nzila ya kumonana na yandi+ mpi ya Kimfumu na yandi,+ mono ke songa nge kibeni nde: 2 Longa nsangu;+ sala yo kukonda kusukinina* na bantangu ya mbote mpi na bantangu ya mpasi; nganina,+ kebisa ngolo, siamisa, ti ntima ya nda yonso mpi mayele ya kulonga.+ 3 Sambu yo ta vanda ti nsungi mosi yina bantu ta buya kuwa malongi ya mbote,*+ kansi na kulanda banzala na bo mosi, bo ta baka balongi sambu bo zabisa bo mambu yina bo* ke zola kuwa.+ 4 Bo ta yambula kuwa kieleka mpi bo ta tula dikebi na masolo ya luvunu. 5 Kansi nge, tanina mabanza na nge na mambu yonso, kanga ntima na bampasi,+ sala kisalu ya nsamuni,* lungisa mbote-mbote kisalu na nge.+

6 Sambu mono me kudipesa bonso makabu ya malafu+ yina bo ke tiamuna, mpi ntangu yina mono ke katuka na kimpika+ me finama. 7 Mono me nwana bitumba ya mbote,+ mono me manisa kubaka ntinu,+ mono me tanina lukwikilu. 8 Yantika ntangu yai, bo me bumbila mono mpu ya kimfumu ya lunungu;+ Mfumu, zuzi ya lunungu,+ ta pesa mono yo bonso matabisi na kilumbu yina,+ na mono kaka ve, kansi mpi na bantu yonso yina ke vingila kumonana na yandi ti nzala ya ngolo.

9 Sala ngolo kibeni na kukwisa nswalu awa na mono. 10 Sambu Demasi+ me bikisaka mono sambu yandi zolaka ngidika yai ya bima,* mpi yandi me kwendaka na Tesalonika, Kresensi me kwendaka na Galatia, mpi Tito me kwendaka na Dalmatia. 11 Luka mpamba muntu kele ti mono. Kwisa ti Marko, sambu yandi ta sadisa mono na kisalu. 12 Kansi mono me tinda Tisike+ na Efezo. 13 Ntangu nge ta kwisa, nata kazaka yina mono bikisaka na Troasi na nzo ya Karpo, mpi barulo, mingi-mingi yina ya mpusu ya mbisi.*

14 Alesandre, yina ke salaka bima ya kwivre, salaka mono mambu mingi ya mbi. Yehowa* ta futa yandi na kutadila bisalu na yandi.+ 15 Nge mpi, nge fwete keba sambu na yandi, sambu yandi buyaka nsangu na beto ngolo kibeni.

16 Ntangu mono sambaka na mbala ya ntete, ata muntu mosi ve vandaka na lweka na mono, bo yonso yambulaka mono—Nzambi kutangila bo ve mambu yina. 17 Kansi, Mfumu telamaka pene-pene na mono mpi yandi pesaka mono ngolo, sambu mono samuna mbote-mbote nsangu ya mbote mpi sambu makanda yonso kuwa yo;+ mpi yandi katulaka mono na munoko ya ntambu.+ 18 Mfumu ta katula mono na konso kisalu ya mbi; yandi ta gulusa mono mpi ta kotisa mono na Kimfumu na yandi ya zulu.+ Nkembo kuvanda na yandi mvula na mvula. Amen.

19 Pesa mbote na Prisila ti Akilasi+ mpi na nzo ya Onezifore.+

20 Eraste+ bikalaka na Korinto, kansi mono bikisaka Trofime+ na Mileti sambu yandi vandaka maladi. 21 Sala ngolo kibeni na kukwisa na ntwala ya nsungi ya madidi.

Ebulusi, Pudensi, Lini, Klodia ti bampangi yonso, me tindila nge mbote.

22 Mfumu kuvanda ti mpeve yina nge ke monisa. Ntima ya mbote na yandi ya nene kuvanda ti beno.