NA TITO

1 Mono Polo, mpika ya Nzambi mpi ntumwa ya Yezu Kristu na kutadila lukwikilu ya bantu yina Nzambi me solaka mpi nzayilu ya sikisiki ya kieleka, yina ke wakana ti kukangama na Nzambi 2 mpi yina me simbama na kivuvu ya luzingu ya mvula na mvula+ yina Nzambi, yina lenda kusa ve,+ silaka tuka ntama; 3 kansi na ntangu yina yandi me tulaka, yandi zabisaka ndinga na yandi na nzila ya kisalu ya kusamuna yina yandi pesaka mono,+ na kulanda nsiku ya Ngulusi na beto, Nzambi; 4 mono ke sonikila Tito, mwana na mono ya kieleka na kutadila lukwikilu yina beto yonso kele na yo:

Ntima ya mbote ya nene mpi ngemba ya Nzambi, Tata na beto mpi ya Kristu Yezu Ngulusi na beto kuvanda ti nge.

5 Mono bikisaka nge na Kreta sambu nge sungika mambu yina vandaka kutambula mbote ve mpi sambu nge tula bankuluntu na konso mbanza, mutindu mono songaka nge: 6 kana kele ti bakala yina kele ve ti kima ya bo lenda fundila yandi, bakala ya nkento mosi mpamba, yina kele ti bana ya ke kwikilaka mpi yina bo me funda ve nde bo kele ti luzingu ya mansoni to bo kele bankolami.+ 7 Sambu yandi kele kapita ya Nzambi, nkengi fwete vanda ve ti kima ya bo lenda fundila yandi, yandi fwete vanda ve muntu ya ntu-ngolo,+ muntu ya ke waka makasi nswalu,+ muntu ya ke lawukaka malafu, muntu ya nku,* muntu ya bwimi yina ke sosaka kubaka luta na banzila ya luvunu, 8 kansi yandi fwete vanda muntu ya ke yambaka banzenza,+ muntu ya ke zolaka mambu ya mbote, muntu ya kele ti mabanza ya mbote,*+ muntu ya lunungu, muntu ya kwikama,+ muntu ya ke kudiyalaka,+ 9 yandi fwete kangama ngolo na ndinga ya kwikama* na yina me tala mayele na yandi ya kulonga,+ sambu yandi kuka kupesa kikesa* na nsadisa ya malongi yina kele ya mbote*+ mpi na kunganina+ bantu yina ke buya yo.

10 Sambu bantu mingi kele bankolami, bantu ya bituba-tuba, mpi bantu ya luvunu, mingi-mingi bantu yina ke kangamaka na luyotisu.+ 11 Yo kele mfunu na kukanga bo munoko, sambu bo ke landa kuvwalangasa banzo ya mvimba ntangu bo ke longa mambu yina bo fwete longa ve, sambu na kubaka luta na banzila ya luvunu. 12 Muntu mosi na kati na bo, mbikudi na bo mosi, tubaka nde: “Bantu ya Kreta ke vandaka ntangu yonso bantu ya luvunu, bambisi ya mbi ya mfinda, bamolo ya ke diaka mbiki.”

13 Kimbangi yai kele ya kieleka. Yo yina landa kunganina bo ngolo, sambu bo vanda ti lukwikilu ya ngolo, 14 mpi bo tula ve dikebi na masapu ya Bayuda mpi na bansiku ya bantu yina ke buyaka kieleka. 15 Mambu yonso kele bunkete sambu na bantu ya bunkete;+ kansi sambu na bantu yina kele mvindu mpi me konda lukwikilu, ata kima mosi ve ke vandaka bunkete, sambu mabanza na bo mpi kansansa na bo kele mvindu.+ 16 Bo ke tubaka pwelele nde bo me zaba Nzambi, kansi bo ke buyaka yandi na bisalu na bo,+ sambu bo kele bantu ya nzanzi mpi ya kukonda bulemfu mpi bo me fwana ve na kisalu ya mbote ya konso mutindu yina.

2 Kansi nge, landa kutuba mambu yina ke wakana ti malongi ya mbote.*+ 2 Bambuta-bantu fwete lutisa ve ndilu na bikalulu na bo, bo fwete vanda bantu ya bo lenda zitisa, bo fwete vanda ti mabanza ya mbote, bo fwete vanda na lukwikilu ya ngolo, na zola ya mingi mpi kukanga-ntima kibeni. 3 Mutindu mosi, bankento yina kele bambuta fwete vanda ti bikalulu ya bantu yina ke waka Nzambi boma, bo fwete vanda ve bantu ya ke kusilaka bantu makambu mpi bampika ya vinu, kansi bo fwete vanda balongi ya mambu ya mbote, 4 sambu bo longisila baleke ya bankento* na kuzola babakala na bo, na kuzola bana na bo, 5 na kuvanda ti mabanza ya mbote, na kuvanda bunkete, na kuvanda bantu ya ke salaka bisalu na nzo,* bantu ya mbote, yina ke lemfukaka na babakala na bo,+ sambu bantu kuvweza ve ndinga ya Nzambi.

6 Mutindu mosi, landa kusiamisa baleke ya babakala na kuvanda ti mabanza ya mbote.+ 7 Vanda mbandu na bisalu ya mbote na mambu yonso. Longa mambu ya bunkete* na luzitu yonso,+ 8 mpi sadila kutuba ya mbote yina bo lenda vweza ve,+ sambu bambeni kuwa nsoni, sambu bo ta vanda ve ti kima ya mbi ya kutuba sambu na beto.+ 9 Bampika fwete lemfukila bamfumu na bo na mambu yonso,+ mpi bo sosa kupesa bo kiese; bo fwete tudila bo ve ntembe, 10 bo lenda yiba bo ve,+ kansi bo fwete monisa nde bo lenda tudila bo ntima na mambu yonso, sambu na mitindu yonso, bo tomisa malongi ya Ngulusi na beto Nzambi.+

11 Sambu ntima ya mbote ya nene ya Nzambi me monanaka, mpi yo me natilaka bantu ya mitindu yonso luguluku.+ 12 Yo ke longaka beto na kubuya kuvweza Nzambi mpi banzala ya nsi-ntoto+ mpi na kuzinga ti mabanza ya mbote, lunungu, mpi kukangama na Nzambi na kati ya ngidika ya bima ya ntangu yai,*+ 13 ntangu beto ke vingila kivuvu ya kiese+ mpi kumonana ya nkembo ya Nzambi ya nene mpi ya Ngulusi na beto, Yezu Kristu, 14 yina kudipesaka sambu na beto+ sambu na kukatula*+ beto na mitindu yonso ya kufwa nsiku mpi kuyobisa sambu na yandi mosi bantu yina kele bantu na yandi mosi kibeni, yina kele kikesa sambu na bisalu ya mbote.+

15 Landa na kutubila mambu yai, na kusiamisa,* mpi na kunganina ti kiyeka yonso.+ Kubika ve nde ata muntu mosi kuvweza nge.

3 Landa kuyibusa bo na kuwila mpi na kulemfukila baluyalu mpi bamfumu,+ na kuvanda ya kuyilama sambu na konso kisalu ya mbote, 2 na kutuba ve mambu ya mbi sambu na muntu, na kuswana ve, na kuvanda ve makambu ngolo,*+ mpi na kumonisa mawete na bantu yonso.+ 3 Sambu beto mpi beto vandaka ntete bazoba, bantu ya kukonda bulemfu, bo vandaka kuvidisa beto nzila, beto vandaka bampika ya banzala mpi ya biese ya mutindu na mutindu, beto vandaka kuzinga na mambu ya mbi mpi na kulula, beto vandaka bantu ya nzanzi, beto vandaka kumengana.

4 Kansi ntangu ntima ya mbote ya Ngulusi na beto, Nzambi,+ mpi zola na yandi sambu na bantu monanaka, 5 (sambu na bisalu ya lunungu yina beto salaka ve,+ kansi sambu na mawa na yandi);+ yandi gulusaka beto na nzila ya masa* yina pesaka beto luzingu+ mpi ntangu yandi kumisaka beto bantu ya mpa na nzila ya mpeve santu.+ 6 Yandi tiamunaka mpeve yai mingi kibeni* na zulu na beto na nzila ya Yezu Kristu, Ngulusi na beto,+ 7 sambu ntangu Nzambi ta ndima beto bonso bantu ya lunungu na nzila ya ntima ya mbote ya nene ya muntu yina,+ beto ta kuma bantu yina ta baka dikabu+ na kuwakana ti kivuvu ya luzingu ya mvula na mvula.+

8 Mambu yai me fwana nde bo tudila yo ntima, mpi mono ke zola nde nge landa kutubila mambu yina, sambu bantu yina me kwikilaka na Nzambi kutula mabanza na bo kaka na kusala bisalu ya mbote. Mambu yai kele mbote mpi mfunu sambu na bantu.

9 Kansi buya bantembe ya buzoba, bandonga ya ba-nkaka, kuswana, mpi kunwana sambu na Nsiku, sambu yo kele mfunu ve mpi yo kele mpamba.+ 10 Sambu na muntu yina ke basisa ka-dibundu,+ buya yandi+ na nima ya kukebisa yandi mbala ya ntete mpi mbala ya zole,+ 11 sambu nge ke zaba nde muntu yina me bikisa nzila, yandi ke sala disumu, mpi yandi me kudibedisa.

12 Ntangu mono ta tindila nge Artemasi to Tisike,+ sala ngolo kibeni na kukwisa kukuta mono na Nikopolisi, sambu mono me kana kulutisa nsungi ya madidi kuna. 13 Sala yonso sambu na kupesa Zenasi, yina me zaba Nsiku mbote-mbote, mpi Apolo, bima yonso yina bo kele na yo mfunu sambu na nzietelo na bo.+ 14 Kansi bantu na beto mpi kulonguka kusala bisalu ya mbote sambu na kulungisa banzala na bo ya kuluta mfunu,+ sambu bo konda ve kubuta mbuma.+

15 Bantu yonso yina kele ti mono me tindila nge mbote. Pesa mbote na bantu yina kele ti lutondo sambu na beto na lukwikilu.

Ntima ya mbote ya nene kuvanda ti beno yonso.