MUKANDA YA NTETE YA PIERE

1 Mono Piere, ntumwa+ ya Yezu Kristu, mono ke sonikila bantu yina ke zinga ntangu fioti mpi yina me panzanaka na Ponti, na Galatia, na Kapadosia,+ na Azia, mpi na Bitinia, bantu yina bo me solaka 2 na kulanda mayele ya Nzambi, Tata na beto ya kuzaba mambu na ntwala,+ bayina bo me santisa na mpeve,+ sambu bo vanda bantu ya bulemfu mpi ya bo me mwanga menga ya Yezu Kristu:+

Ntima ya mbote ya nene mpi ngemba kukuma mingi na beno.

3 Lukumu kuvanda na Nzambi mpi Tata ya Mfumu na beto Yezu Kristu, sambu na kutadila mawa na yandi ya nene, yandi salaka nde beto butuka diaka+ sambu na kivuvu ya moyo+ na nsadisa ya lufutumuku ya Yezu Kristu na bafwa,+ 4 sambu beto baka dikabu yina ke polaka ve, yina ke kumaka mvindu ve, mpi yina ke bebaka ve.+ Bo me bumbaka yo na zulu sambu na beno,+ 5 bantu yina Nzambi ke tanina na ngolo na yandi na nzila ya lukwikilu, sambu na luguluku yina ta monana ntama mingi ve na ntangu ya nsuka. 6 Beno kele na kiese mingi sambu na diambu yai; ata yo ke lomba nde beno vanda na mawa ntangu fioti sambu na mimekamu ya mutindu na mutindu,+ 7 sambu lukwikilu na beno yina me mekama,+ yina kele na mfunu mingi kuluta wolo yina ke bebaka ata bo ke mekaka yo* na tiya, kusadisa beno na kubaka lukumu mpi nkembo ntangu Yezu Kristu ta kwisa kumonika.+ 8 Ata beno me monaka yandi ntete ve, beno ke zolaka yandi. Ata beno ke mona yandi ve ntangu yai, beno ke kwikila na yandi mpi beno ke yangalala mingi ti kiese ya mingi yina bo lenda tendula ve, 9 sambu beno ke lungisa lukanu ya lukwikilu na beno, luguluku na beno.*+

10 Sambu na luguluku yai, bambikudi yina bikulaka mambu ya ke tadila ntima ya mbote ya nene yina bo zolaka kumonisila beno, bo yulaka bangiufula ti kikesa mpi bo sosaka mbote-mbote.+ 11 Bo vandaka kaka kusosa kuzaba na nki ntangu kibeni to na nki nsungi mambu yina mpeve yina vandaka na kati na bo monisaka sambu na Kristu zolaka kulungana.+ Yo vandaka kuta kimbangi na ntwala sambu na bampasi yina Kristu+ zolaka kumona mpi nkembo yina yandi zolaka kubaka na nima. 12 Bo monisaka bo nde bo vandaka kudisadila ve, kansi bo vandaka kusadila beno, sambu na mambu yina bo me zabisa beno ntangu yai na bantu yina zabisaka beno nsangu ya mbote ti mpeve santu yina Nzambi tindaka katuka na zulu.+ Bawanzio ke zolaka kibeni kutula meso na mambu yai.

13 Yo yina, beno yidika mabanza na beno sambu na kisalu;+ beno tanina kibeni mabanza na beno;+ beno tula kivuvu na beno na ntima ya mbote ya nene yina bo ta monisila beno ntangu Yezu Kristu ta kwisa kumonika. 14 Sambu beno kele bana ya bulemfu, beno bika kulanda banzala yina beno vandaka na yo ntete ntangu beno kondaka nzayilu, 15 kansi, bonso Santu yina bingaka beno, beno kuma bantu ya santu na bikalulu na beno yonso,+ 16 sambu bo me sonikaka nde: “Beno fwete vanda santu, sambu mono kele santu.”+

17 Diaka, kana beno ke binga Tata yina ke sambisaka kukonda kupona-pona+ na kutadila kisalu ya konso muntu, beno kuditwadisa ti boma+ na ntangu yina beno ke zinga ntangu fioti. 18 Sambu beno me zaba nde Nzambi katulaka beno ve na kimpika ya*+ luzingu na beno ya mpamba yina ba-nkaka* na beno bikilaka beno ti bima yina ke polaka, arza to wolo. 19 Kansi, yandi katulaka beno ti menga ya ntalu,+ bonso menga ya mwana-dimeme ya kukonda mvindu mpi ya kukonda ditono,+ menga ya Kristu.+ 20 Ya kieleka, yandi zabanaka na ntwala, na ntwala ya luyantiku ya nsi-ntoto,+ kansi yandi monanaka na nsuka ya bantangu sambu na beno.+ 21 Na nzila na yandi, beno kele bantu ya ke kwikilaka na Nzambi,+ muntu yina tedimisaka yandi na bafwa+ mpi pesaka yandi nkembo,+ sambu lukwikilu na beno mpi kivuvu na beno kuvanda na Nzambi.

22 Ntangu yai ya beno me kudikumisa* bunkete sambu beno ke lemfuka na kieleka, ebuna beno me kuma ti zola ya kieleka ya kimpangi,+ beno zolana ngolo na ntima ya mvimba.+ 23 Sambu bo me pesaka beno lubutuku ya mpa,+ bo me sala yo ve na nzila ya nkuna*+ yina ke polaka, kansi na nzila ya nkuna yina ke polaka ve, na nzila ya ndinga ya Nzambi ya moyo mpi ya kimakulu.+ 24 Sambu “bantu* yonso kele bonso matiti, mpi nkembo na bo yonso kele bonso bintuntu ya bilanga; matiti ke yumaka, mpi kintuntu ke bwaka, 25 kansi ndinga* ya Yehowa* ke bikalaka kimakulu.”+ Mpi “ndinga”* yai kele nsangu ya mbote yina bo zabisaka beno.+

2 Yo yina, beno katula mambu yonso ya mbi,+ kukusa, luvunu, kulula, mpi mitindu yonso ya kutonga. 2 Bonso bana ya me katuka kubutuka,+ beno vanda ti nzala ya ngolo ya mabele ya mpembe* ya ndinga ya Nzambi, sambu beno yela mpi beno guluka na nzila na yo,+ 3 sambu beno me mekaka* nde Mfumu kele ntima ya mbote.

4 Ntangu beno ke kwisa na yandi, ditadi ya moyo yina bantu losaka,+ kansi yina Nzambi solaka mpi yina kele mfunu na meso na yandi,+ 5 beno, bonso matadi ya moyo, bo ke tunga beno na nzo ya kimpeve+ sambu na kuvanda kinganga-nzambi ya santu, sambu na kupesa bimenga ya kimpeve+ yina Nzambi ke ndimaka na nzila ya Yezu Kristu.+ 6 Sambu Masonama ya Santu ke tuba nde: “Tala! Mono ke tula na Sioni ditadi yina mono me solaka, ditadi ya ntalu ya kinkonko ya fondasio; ata muntu mosi ve yina ke kwikilaka na yo ta wa nsoni.”+

7 Yandi kele mfunu sambu na beno, sambu beno kele bantu yina ke kwikilaka; kansi sambu na bantu yina ke kwikilaka ve, “ditadi yina bantu ya ke tungaka losaka+ me kumaka ditadi ya kinkonko ya ntete-ntete”*+ 8 mpi “ditadi ya ke budisaka sakuba mpi ditadi ya ke bwisaka.”+ Bo ke bulaka sakuba sambu bo ke lemfukaka ve na ndinga. Bo ta suka mpi mutindu yai kibeni. 9 Kansi beno kele “dikanda yina bo me solaka, banganga-nzambi yina ta vanda bantotila, dikanda ya santu,+ bantu yina fwete vanda kima ya Nzambi kibeni,+ sambu beno zabisa bisika yonso bikalulu ya kuluta mbote”*+ ya Muntu yina bingaka beno na kukatuka na mpimpa sambu beno kota na nsemo na yandi ya kuyituka.+ 10 Sambu ntete beno vandaka ve bantu ya Nzambi, kansi ntangu yai beno kele bantu na yandi;+ ntete bo wilaka beno ve mawa, kansi ntangu yai bo me wila beno mawa.+

11 Bampangi ya mono ke zolaka mingi, sambu beno kele banzenza mpi bantu yina ke zinga ntangu fioti,+ mono ke siamisa beno na kulanda kubuya banzala ya kinsuni+ yina ke nwanisaka beno.*+ 12 Beno vanda na bikalulu ya mbote na kati ya makanda,+ sambu ntangu bo ke funda beno nde beno kele bantu ya mbi, bo mona na meso na bo mosi bisalu na beno ya mbote,+ ebuna bo pesa Nzambi nkembo na kilumbu yina yandi ta kwisa kutala.

13 Sambu na Mfumu, beno lemfuka na bima yonso ya bantu me salaka,*+ yo vanda ntotila+ sambu yandi kele mfumu 14 to baguvernere bonso nde yandi me tindaka bo na kupesa bantu ya mbi ndola mpi na kukumisa bantu yina ke salaka mambu ya mbote.+ 15 Sambu luzolo ya Nzambi kele nde na ntangu beno ke sala mambu ya mbote, beno sukisa kutuba ya buzoba ya bazoba.+ 16 Beno vanda bonso bantu yina kele na kimpwanza,+ beno sadila ve kimpwanza na beno bonso mufiniku* sambu na kusala mambu ya mbi,+ kansi beno sadila yo bonso bampika ya Nzambi.+ 17 Beno pesa bantu ya mitindu yonso lukumu,+ beno zola kimvuka ya mvimba ya bampangi,*+ beno wa Nzambi boma,+ beno pesa ntotila lukumu.+

18 Bansadi kulemfuka na bamfumu na bo ti boma yonso yina me fwana,+ kaka ve na bamfumu yina kele mbote mpi makambu ngolo ve,* kansi mpi na bamfumu yina kele mpasi. 19 Sambu yo kele diambu ya mbote kana muntu ke kanga ntima na bampasi mpi ke mona mpasi ata yandi me sala mbi ve sambu na kansansa na yandi na ntwala ya Nzambi.+ 20 Inki mambote beno ke baka kana beno ke kanga ntima na fimbu ya bo ke bula beno sambu beno me sala masumu?+ Kansi kana beno ke kanga ntima na bampasi sambu beno ke sala mambu ya mbote, yo kele diambu yina Nzambi ke zolaka.+

21 Ya kieleka, bo bingaka beno na nzila yai, sambu Kristu mpi monaka mpasi sambu na beno,+ ebuna yandi bikilaka beno mbandu sambu beno landa bitambi na yandi mbote-mbote.+ 22 Yandi salaka disumu ve,+ bo monaka mpi ve luvunu na munoko na yandi.+ 23 Ntangu bo vandaka kufinga yandi,+ yandi vutulaka mafingu ve.+ Ntangu yandi vandaka kumona mpasi,+ yandi bangikaka ve, kansi yandi vandaka kutula ntima na Muntu yina ke sambisaka na lunungu.+ 24 Yandi mosi nataka masumu na beto+ na nitu na yandi na zulu ya nti,+ sambu beto fwa na yina me tala* masumu mpi beto zinga na yina me tala lunungu. Mpi “beno me belukaka na nsadisa ya bamputa na yandi.”+ 25 Sambu beno vandaka bonso mameme yina ke vila nzila,+ kansi ntangu yai beno me kwisa kuvutuka na ngungudi+ mpi nkengi ya mioyo* na beno.

3 Mutindu mosi beno bankento, beno lemfukila babakala na beno,+ sambu kana bankaka na kati na bo ke lemfuka ve na ndinga ya Nzambi, bo kuma kulemfuka na nzila ya bikalulu ya bankento na bo kukonda nde beno tuba ata kima mosi,+ 2 sambu bo ta mona na meso na bo mosi bikalulu na beno ya bunkete+ ti luzitu ya mingi. 3 Kitoko na beno kuvanda ve ya nganda—kutunga nsuki mpi kulwata bima ya wolo+ to bilele ya kitoko— 4 kansi yo vanda kimuntu ya kubumbana ya ntima na kitoko yina ke polaka ve ya kikalulu* ya pima mpi ya mawete,+ yina kele mfunu mingi na meso ya Nzambi. 5 Sambu bankento ya santu ya ntangu ya ntama yina vandaka kutula kivuvu na Nzambi vandaka kuditomisa mutindu yai, bo vandaka kulemfukila babakala na bo, 6 mutindu Sara vandaka kulemfukila Abrahami mpi kubinga yandi mfumu.+ Mpi beno ta vanda bana na yandi, kana beno ke landa kusala mambu ya mbote mpi ke wa boma ve.+

7 Mutindu mosi beno babakala, beno landa kuzinga ti bo na kutadila nzayilu.* Beno pesa bo lukumu+ bonso na dibungu ya kukonda ngolo, dibungu ya bunkento, sambu beno ta baka mpi kumosi ti bo+ dikabu ya luzingu sambu na ntima ya mbote ya nene ya Nzambi, sambu kima mosi ve kukanga bisambu na beno.

8 Nsuka-nsuka beno yonso, beno vanda ti mabanza ya mutindu mosi,*+ beno monisa kikalulu ya kuditula na kisika ya bankaka, zola ya kimpangi, mawa ya nene,+ mpi kudikulumusa.+ 9 Beno vutula ve mbi na mbi+ to mafingu na mafingu.+ Kansi, beno sakumuna,+ sambu bo me bingaka beno na nzila yai, sambu beno baka* lusakumunu.

10 Sambu “muntu yina ke zola luzingu mpi ke zola kumona bilumbu ya mbote fwete tanina ludimi na yandi na mambu ya mbi+ mpi kutanina munoko na yandi sambu yo tuba ve mambu ya luvunu. 11 Yandi fwete bika mambu ya mbi+ mpi yandi fwete sala mambu ya mbote;+ yandi fwete sosa ngemba mpi yandi fwete landa yo.+ 12 Sambu meso ya Yehowa* ke talaka bantu ya lunungu, mpi makutu na yandi ke waka ntangu bo ke bondilaka,+ kansi Yehowa* ke buyaka bantu yina ke salaka mambu ya mbi.”+

13 Ya kieleka, nani ta sala beno mbi kana beno kuma kikesa na kusala mambu ya mbote?+ 14 Kansi, ata beno ke mona mpasi sambu na lunungu, beno kele na kiese.+ Ata mpidina, mambu yina bo ke wa boma, beno wa yo boma ve,* beno kuma mpi ve kisaka-saka.+ 15 Kansi, beno santisa Kristu bonso Mfumu na bantima na beno, beno vanda ntangu yonso ya kuyilama sambu na kunwanina kivuvu na beno na ntwala ya konso muntu yina ke yula beno kikuma na yo, kansi beno sala yo ti mawete+ mpi luzitu ya mingi.+

16 Beno vanda ti kansansa ya mbote,+ sambu na konso mutindu ya bo ke tuba mambu ya mbi sambu na beno, bantu yina ke tuba mambu ya mbi sambu na beno kuwa nsoni+ sambu na bikalulu ya mbote ya beno ke monisa bonso balongoki ya Kristu.+ 17 Sambu yo kele mbote mingi kana beno ke mona mpasi sambu beno ke sala mambu ya mbote,+ kana yo kele luzolo ya Nzambi, na kisika ya kumona mpasi sambu beno ke sala mambu ya mbi.+ 18 Sambu Kristu fwaka mbala mosi mpamba sambu na masumu,+ muntu ya lunungu sambu na bantu ya kukonda lunungu,+ sambu yandi nata beno na Nzambi.+ Bo fwaka yandi na kinsuni,+ kansi Nzambi futumunaka yandi na mpeve.+ 19 Ebuna, yandi kwendaka mpi yandi samunaka na bampeve yina kele na boloko,+ 20 bayina lemfukaka ve na ntangu ya ntama ntangu Nzambi vandaka kuvingila ti ntima ya nda* na kilumbu ya Noa,+ na ntangu bo vandaka kutunga maswa,+ yina na kati na yo bantu fioti, disongidila, mioyo* nana, gulukaka na masa.+

21 Mbotika, yina me fwanana ti diambu yai, ke gulusa beno mpi ntangu yai, (na kukatula mvindu ya nitu ve, kansi na kulomba Nzambi kansansa ya mbote),+ na nzila ya lufutumuku ya Yezu Kristu. 22 Yandi kele na diboko ya kitata ya Nzambi,+ sambu yandi kwendaka na zulu, ebuna bo me tulaka bawanzio, biyeka, mpi bangolo na nsi na yandi.+

4 Sambu Kristu monaka mpasi na nitu,+ beno mpi beno vanda ti mabanza* ya mutindu mosi; sambu muntu yina me monaka mpasi na nitu me yambulaka masumu,+ 2 sambu ntangu yandi kele ntete na nitu, yandi zinga diaka ve sambu na banzala ya bantu,+ kansi sambu na luzolo ya Nzambi.+ 3 Sambu na ntangu ya ntama beno lutisaka ntangu mingi na kulungisa luzolo ya makanda+ ntangu beno vandaka kusala mambu ya mbi kukonda nsoni,* beno vandaka ti banzala ya mbi, beno vandaka kulutisa ndilu na kunwa malafu, kusala bankinsi yina bantu ke salaka mambu ya kisaka-saka, kusala bankinsi yina bantu ke nwaka malafu mingi, mpi kusala lusambu ya nzanzi ya biteki.+ 4 Bo ke yitukaka sambu beno ke kwendaka diaka ve ti bo na luzingu ya mansoni yina kele bonso poto-poto, yo yina bo ke fingaka beno.+ 5 Kansi muntu yina kele ya kuyilama na kusambisa bantu yina kele na luzingu mpi bayina me fwaka ta sambisa bo.+ 6 Ya kieleka, bo zabisaka mpi nsangu ya mbote na bafwa sambu na yo,+ sambu ata bo ke sambisa bo na kinsuni na kutadila mabanza ya bantu, bo zinga na kuwakana ti mpeve na kutadila dibanza ya Nzambi.

7 Kansi nsuka ya bima yonso me finama. Yo yina, beno vanda ti mabanza ya mbote,+ mpi beno kangula meso* ti lukanu ya kusala bisambu.+ 8 Kuluta yonso, beno zolana ngolo,+ sambu zola ke fikaka masumu mingi.+ 9 Beno yambana beno na beno kukonda kubokuta.+ 10 Na kiteso yina konso muntu me bakaka dikabu, beno sadila yo sambu na kusadilana bonso bakapita ya mbote ya ntima ya mbote ya nene ya Nzambi, yina ke monanaka na mitindu mingi.+ 11 Kana muntu ke tuba, yandi tuba bonso nde yandi ke tuba mambu yina me katuka na Nzambi; kana muntu ke sadila bankaka, yandi sala yo na nsadisa ya ngolo yina Nzambi ke pesaka;+ sambu na mambu yonso Nzambi kubaka nkembo+ na nzila ya Yezu Kristu. Nkembo mpi ngolo kele ya yandi mvula na mvula. Amen.

12 Bampangi ya mono ke zolaka mingi, beno yituka ve sambu na mimekamu ya ngolo yina beno ke kutana ti yo,+ bonso nde kima mosi ya kuyituka ke kumina beno. 13 Kansi, beno landa kuvanda na kiese+ sambu beno ke mona mpi bampasi yina Kristu monaka,+ sambu beno mona kiese mpi beno yangalala ntangu nkembo na yandi ta monana.+ 14 Kana bo ke finga beno sambu na zina ya Kristu, beno kele bantu ya kiese,+ sambu mpeve ya nkembo, disongidila mpeve ya Nzambi, kele na zulu na beno.

15 Kansi muntu mosi ve na kati na beno kumona mpasi bonso muntu ya ke fwaka bantu to muyibi to muntu ya ke salaka mambi to muntu ya ke kotaka na mambu ya bantu ya nkaka.+ 16 Kansi kana muntu ke mona mpasi sambu yandi kele Mukristu, bika nde yandi wa nsoni ve,+ kansi yandi landa kupesa Nzambi nkembo na ntangu yandi ke nata zina yina. 17 Sambu yo kele ntangu ya bo me tulaka sambu lusambisu kuyantika na nzo ya Nzambi.+ Ntangu yai, kana yo ke yantika ntete na beto,+ yo ta vanda inki mutindu sambu na bantu yina ke lemfukaka ve na nsangu ya mbote ya Nzambi?+ 18 “Mpi kana muntu ya lunungu ke guluka na mpasi, yo ta vanda inki mutindu sambu na muntu yina ke vwezaka Nzambi mpi nsumuki?”+ 19 Yo yina, bantu yina ke mona mpasi na kuwakana ti luzolo ya Nzambi fwete landa kupesa luzingu* na bo na Ngangi ya kwikama ntangu bo ke sala mambu ya mbote.+

5 Yo yina, sambu mono kele nkuluntu bonso beno, mbangi ya bampasi ya Kristu mpi muntu yina ta baka nkembo yina ta monana,+ mono ke siamisa bampangi yina kele bankuluntu na kati na beno nde: 2 Beno gungula mameme ya Nzambi+ yina bo me pesaka beno, beno keba yo mbote-mbote,* sambu bo ke pusa beno ve, kansi na luzolo yonso na ntwala ya Nzambi;+ na zola ya kubaka ve luta na banzila ya luvunu,+ kansi na kiese yonso; 3 beno sala yo mpi ve bonso bantu yina ke yala na kingolo-ngolo bantu yina kele dikabu ya Nzambi,+ kansi beno kuma bambandu sambu na mameme.+ 4 Ebuna ntangu ngungudi ya nene+ ta monana, beno ta baka mpu ya kimfumu ya nkembo yina ke bebaka ve.+

5 Mutindu mosi beno baleke, beno lemfukila bambuta.*+ Kansi beno yonso, beno lwata kudikulumusa na bangwisana na beno ti bankaka, sambu Nzambi kele mbeni ya bantu ya lulendo, kansi yandi ke monisaka ntima ya mbote ya nene na bantu ya kudikulumusa.+

6 Yo yina, beno kudikulumusa na nsi ya diboko ya ngolo ya Nzambi, sambu yandi tombula beno na ntangu ya me fwana,+ 7 na ntangu beno ke losa basusi na beno yonso* na yandi+ sambu yandi ke kudibanzaka sambu na beno.+ 8 Beno tanina mabanza na beno, beno keba!+ Mbeni na beno, Diabulu, ke kwendaka kuzieta bonso ntambu ya ke ngana, yandi ke sosa kudia muntu.*+ 9 Kansi beno vanda bambeni na yandi,+ beno vanda ti lukwikilu ya ngolo, sambu beno me zaba nde kimvuka ya mvimba ya bampangi na beno na nsi-ntoto ke kutana ti bampasi ya mutindu mosi.+ 10 Kansi, kana beno me mona mpasi mwa ntangu fioti, Nzambi ya ntima ya mbote ya nene yonso, yina bingaka beno na nkembo na yandi ya mvula na mvula+ na bumosi ti Kristu, yandi mosi ta manisa kulonga beno. Yandi ta kumisa beno kikesa,+ yandi ta kumisa beno ngolo,+ yandi ta tula beno fondasio ya ngolo. 11 Ngolo kuvanda na yandi kimakulu. Amen.

12 Na nzila ya Silvanusi,*+ yina mono ke bakaka bonso mpangi ya kwikama, mono me sonikila beno mukanda ya nkufi, sambu na kupesa beno kikesa mpi sambu na kundimisa beno nde yai ntima ya mbote ya nene ya kieleka ya Nzambi. Beno kangama ngolo na yo. 13 Nkento yina kele na Babilone, yina bo me solaka bonso beno, me tindila beno mbote, mwana na mono Marko+ mpi me tindila beno mbote. 14 Beno pesana mbote ti beze ya zola.

Ngemba kuvanda na beno yonso yina kele na bumosi ti Kristu.