MUKANDA YA NTETE YA YOANE
1 Beto ke sonikila beno mambu ya ke tadila ndinga ya luzingu,+ yina kele katuka luyantiku, yina beto me waka, yina beto me monaka na meso na beto mosi, yina beto me talaka mpi yina maboko na beto me simbaka, 2 (ya kieleka, luzingu monanaka, ebuna beto monaka, beto ke ta kimbangi,+ mpi beto ke zabisa beno luzingu ya mvula na mvula,+ yina vandaka ti Tata mpi yina monanaka na beto), 3 yina beto monaka mpi waka, beto ke zabisa beno yo mpi,+ sambu beno mpi beno vanda na kinduku* ti beto. Beto kele na kinduku yai ti Tata mpi ti Mwana na yandi Yezu Kristu.+ 4 Beto ke sonika mambu yai sambu kiese na beto kuvanda ya kulunga.
5 Yai nsangu yina beto waka na yandi mpi yina beto ke zabisa beno: Nzambi kele nsemo,+ mpi na yandi* mpimpa kele ve ata fioti. 6 Kana beto tuba nde, “Beto kele na kinduku ti yandi,” kansi beto ke landa kutambula na mpimpa, beto ke kusa mpi beto ke landa kieleka ve.+ 7 Kansi, kana beto ke tambula na nsemo mutindu yandi mosi kele na nsemo, beto kele na kinduku beto na beto, mpi menga ya Mwana na yandi Yezu ke katula masumu na beto yonso.+
8 Kana beto tuba nde, “Beto kele ve na disumu,” beto ke kudikusa+ mpi kieleka kele ve na kati na beto. 9 Kana beto funguna masumu na beto, yandi kele ya kwikama mpi ya lunungu yo yina yandi ta lolula masumu na beto mpi ta katula mambu na beto yonso ya kukonda lunungu.+ 10 Kana beto tuba nde, “Beto me salaka ve disumu,” beto ke kumisa yandi muntu ya luvunu, mpi ndinga na yandi kele na beto ve.
2 Bana na mono ya fioti, mono ke sonikila beno mambu yai sambu beno sala ve masumu. Kansi, kana muntu me sala disumu, beto kele na nsadisi yina kele ti Tata, Yezu Kristu,+ muntu ya lunungu.+ 2 Mpi yandi kele kimenga ya kuwakanisa+ beto ti Nzambi sambu na masumu* na beto;+ sambu na masumu na beto kaka ve kansi mpi sambu na masumu ya nsi-ntoto ya mvimba.+ 3 Kana beto ke landa kuzitisa bansiku na yandi, yo ke tendula nde beto me zaba yandi. 4 Muntu yina ke tuba nde, “Mono me zaba yandi,” kansi yandi ke zitisa ve bansiku na yandi, yandi kele muntu ya luvunu, mpi kieleka kele ve na yandi. 5 Kansi muntu yina ke zitisa ndinga na yandi, zola ya Nzambi me kumaka kibeni ya kukuka na muntu yina.+ Na diambu yai, beto me zaba nde beto kele na bumosi ti yandi.+ 6 Muntu yina ke tuba nde yandi kele na bumosi ti yandi, yandi fwete landa mpi kutambula mutindu muntu yina tambulaka.+
7 Bampangi ya mono ke zolaka mingi, mono ke sonikila beno, nsiku ya mpa ve, kansi nsiku ya ntama yina beno me bakaka katuka luyantiku.+ Nsiku yina ya ntama kele ndinga yina beno me waka. 8 Diaka, mono ke sonikila beno nsiku ya mpa, yina kele ya kieleka sambu na yandi mpi sambu na beno, sambu mpimpa ke luta mpi nsemo ya kieleka ke sema dezia.+
9 Muntu yina ke tubaka nde yandi kele na nsemo kansi yandi ke mengaka+ mpangi na yandi, yandi kele kaka na mpimpa.+ 10 Muntu yina ke zolaka mpangi na yandi kele na nsemo,+ mpi yandi kele ve ti kima ya ke budisaka sakuba. 11 Kansi muntu yina ke mengaka mpangi na yandi kele na mpimpa mpi yandi ke tambulaka na mpimpa;+ yandi ke zabaka ve kisika yina yandi ke kwenda,+ sambu mpimpa me fwaka meso na yandi.
12 Bana ya fioti, mono ke sonikila beno sambu bo me lolula masumu na beno sambu na zina na yandi.+ 13 Batata, mono ke sonikila beno sambu beno me zaba muntu yina kele katuka luyantiku. Baleke, mono ke sonikila beno sambu beno me nungaka muntu ya mbi.+ Bana ya fioti, mono ke sonikila beno sambu beno me zaba Tata.+ 14 Batata, mono ke sonikila beno sambu beno me zaba muntu yina kele katuka luyantiku. Baleke, mono ke sonikila beno sambu beno kele ngolo+ mpi sambu ndinga ya Nzambi kele na beno+ mpi beno me bedisaka muntu ya mbi.+
15 Beno zola ve nsi-ntoto mpi bima yina kele na nsi-ntoto.+ Kana muntu ke zola nsi-ntoto, zola ya Tata kele ve na kati na yandi;+ 16 sambu bima yonso yina kele na nsi-ntoto—nzala ya nitu+ mpi nzala ya meso+ mpi kusonga na lulendo yonso bima na nge ya kuzingila*—ke katukaka ve na Tata, kansi yo ke katukaka na nsi-ntoto. 17 Diaka, nsi-ntoto ke luta, nzala na yo mpi ke luta,+ kansi muntu yina ke salaka luzolo ya Nzambi ke bikalaka kimakulu.+
18 Bana ya fioti, yai ngunga ya nsuka, mpi mutindu beno me waka nde mbeni ya Kristu ke kwisa,+ katuka ntangu yai bambeni ya Kristu mingi me basikaka;+ yo yina beto me zaba nde yo kele ngunga ya nsuka. 19 Bo vandaka na kati na beto kansi bo bikisaka beto sambu bo vandaka ve bantu na beto;+ sambu kana bo vandaka bantu na beto, bo zolaka kubikala ti beto. Kansi bo me kwendaka sambu yo monana nde bantu yonso ve kele bantu na beto.+ 20 Santu me tulaka beno mafuta+ mpi beno yonso kele ti nzayilu. 21 Mono ke sonikila beno ve sambu beno me zaba ve kieleka,+ kansi sambu beno me zaba yo, mpi sambu ata luvunu mosi ve ke katukaka na kieleka.+
22 Nani kele muntu ya luvunu, keti yo kele ve muntu yina ke buyaka nde Yezu kele Kristu?+ Yandi yina mbeni ya Kristu,+ muntu yina ke buyaka Tata ti Mwana. 23 Muntu yina ke buyaka Mwana, Tata ke ndimaka yandi mpi ve.+ Kansi muntu yina ke ndimaka Mwana,+ Tata mpi ke ndimaka yandi.+ 24 Ebuna beno, mambu yina beno me waka katuka luyantiku fwete vanda na beno.+ Kana mambu yina beno me waka katuka luyantiku kele na beno, beno ta vanda mpi na bumosi ti Mwana mpi na bumosi ti Tata. 25 Diaka, diambu yina yandi mosi me silaka beto yo yai: luzingu ya mvula na mvula.+
26 Mono ke sonikila beno mambu yai sambu na bantu yina ke sosa kukusa beno. 27 Kansi beno, mafuta yina yandi tulaka beno,+ yo kele na beno, mpi beno kele ve na mfunu nde muntu kulonga beno; kansi mafuta yina yandi tulaka beno ke longa beno mambu yonso,+ mpi yo kele ya kieleka, yo kele ya luvunu ve. Mutindu yo me longaka beno, beno bikala na bumosi ti yandi.+ 28 Yo yina, bana ya fioti, beno bikala na bumosi ti yandi, sambu beto vanda ti masonga+ ntangu yandi ta monana mpi sambu beto tina yandi ve na nsoni na kukala na yandi. 29 Kana beno me zaba nde yandi kele muntu ya lunungu, beno me zaba mpi nde konso muntu yina ke salaka mambu ya lunungu kele mwana na yandi.+
3 Beno tala nki mutindu Tata me zolaka beto,+ sambu bo binga beto bana ya Nzambi!+ Mpi beto kele mutindu yina. Yo yina nsi-ntoto me zaba beto ve,+ sambu yo me zabaka yandi ve.+ 2 Bampangi ya mono ke zolaka mingi, ntangu yai beto kele bana ya Nzambi,+ kansi mutindu beto ta vanda me monana ntete ve.+ Beto me zaba nde ntangu yandi ta monana, beto ta vanda bonso yandi, sambu beto ta mona yandi mutindu yandi kele. 3 Mpi konso muntu yina kele ti kivuvu yai na yandi ke kudikumisaka bunkete,+ mutindu muntu yina mpi kele bunkete.
4 Konso muntu yina ke salaka disumu ke fwaka mpi nsiku, mpi disumu kele kufwa nsiku. 5 Beno me zaba mpi nde yandi monanaka sambu na kukatula masumu na beto,+ mpi yandi kele ve ata ti disumu mosi. 6 Konso muntu yina kele na bumosi ti yandi ke salaka ve disumu;+ ata muntu mosi ve yina ke salaka disumu me monaka yandi to me zabaka yandi. 7 Bana ya fioti, muntu mosi ve kukusa beno; muntu yina ke salaka mambu ya lunungu kele muntu ya lunungu, mutindu muntu yina kele muntu ya lunungu. 8 Muntu yina ke salaka disumu me katuka na Diabulu, sambu Diabulu ke salaka disumu katuka luyantiku.*+ Mwana ya Nzambi me monanaka sambu na kikuma yai: sambu na kufwa bisalu ya Diabulu.+
9 Konso muntu yina kele mwana ya Nzambi ke salaka ve disumu,+ sambu nkuna* na yandi kele na muntu yina, mpi yandi ke salaka ve disumu, sambu yandi kele mwana ya Nzambi.+ 10 Bana ya Nzambi mpi bana ya Diabulu ke monanaka na diambu yai: Konso muntu yina ke salaka ve mambu ya lunungu mpi muntu yina ke zolaka ve mpangi na yandi+ me katukaka ve na Nzambi. 11 Sambu nsangu ya beno me waka katuka luyantiku yo yai, nde beto fwete zolana;+ 12 kansi ve bonso Kaini, yina katukaka na muntu ya mbi mpi fwaka mpangi na yandi.+ Ebuna sambu na nki yandi fwaka yandi? Sambu bisalu na yandi vandaka ya mbi,+ kansi bisalu ya mpangi na yandi vandaka ya lunungu.+
13 Bampangi, beno yituka ve kana nsi-ntoto ke menga beno.+ 14 Beto me zaba nde beto vandaka bonso bantu ya kufwa kansi ntangu yai beto kele na luzingu,+ sambu beto ke zolaka bampangi.+ Muntu yina ke zolaka ve kele kaka ya kufwa.+ 15 Konso muntu yina ke mengaka mpangi na yandi kele muntu ya ke fwaka bantu,+ mpi beno me zaba nde ata muntu mosi ve ya ke fwaka bantu kele ti luzingu ya mvula na mvula.+ 16 Mambu yai me sadisaka beto na kuzaba zola, sambu yandi pesaka luzingu* na yandi sambu na beto,+ mpi beto fwete pesa luzingu* na beto sambu na bampangi na beto.+ 17 Kansi, kana muntu kele ti bima ya kinsuni ya nsi-ntoto yai, ebuna yandi me mona mpangi na yandi me konda bima kansi yandi ke buya kuwila yandi mawa, nki mutindu zola ya Nzambi kele na muntu yina?+ 18 Bana ya fioti, beto fwete zola kaka ve na bangogo to na ludimi,+ kansi na bisalu+ mpi na kieleka.+
19 Yina mutindu beto ta zaba nde beto me katukaka na kieleka, mpi beto ta ndimisa ntima na beto na ntwala na yandi 20 na konso kima yina bantima na beto lenda bedisa beto, sambu Nzambi kele nene kuluta bantima na beto mpi yandi me zaba mambu yonso.+ 21 Bampangi ya mono ke zolaka mingi, kana bantima na beto ke bedisa beto ve, beto kele ti masonga na ntwala ya Nzambi;+ 22 mpi konso kima yina beto ke lomba yandi,+ yandi ke pesaka beto yo, sambu beto ke zitisaka bansiku na yandi mpi beto ke salaka mambu yina ke pesaka yandi kiese. 23 Ya kieleka, nsiku na yandi yo yai: beto kwikila na zina ya Mwana na yandi Yezu Kristu+ mpi beto zolana,+ mutindu yandi songaka beto. 24 Diaka, muntu yina ke zitisaka bansiku na yandi kele na bumosi ti yandi, mpi yandi kele na bumosi ti muntu yina.+ Mpi na nzila ya mpeve yina yandi me pesaka beto, beto me zaba nde yandi kele na bumosi ti beto.+
4 Bampangi ya mono ke zolaka mingi, beno kwikila ve konso diambu ya kupemama,*+ kansi beno meka mambu ya kupemama* sambu na kuzaba kana yo me katuka na Nzambi,+ sambu bambikudi mingi ya luvunu me basikaka na nsi-ntoto.+
2 Yai mutindu beno ta zaba kana mambu ya kupemama me katuka na Nzambi: Mambu yonso ya kupemama yina ke ndimaka nde Yezu Kristu kwisaka na nitu ya kinsuni, me katukaka na Nzambi.+ 3 Kansi, konso diambu ya kupemama yina ke ndimaka ve Yezu, me katukaka ve na Nzambi.+ Diaka, yo kele diambu ya kupemama ya mbeni ya Kristu yina beno waka nde yo ke kwisa,+ mpi ntangu yai yo me kumaka dezia na nsi-ntoto.+
4 Bana ya fioti, beno me katukaka na Nzambi, mpi beno me nungaka bo,+ sambu muntu yina kele na bumosi ti beno+ kele nene kuluta muntu yina kele na bumosi ti nsi-ntoto.+ 5 Bo me katukaka na nsi-ntoto;+ yo yina bo ke tubaka mambu yina ke katukaka na nsi-ntoto mpi nsi-ntoto ke wilaka bo.+ 6 Beto me katukaka na Nzambi. Muntu yina me zaba Nzambi ke wilaka beto;+ muntu yina me katukaka ve na Nzambi ke wilaka beto ve.+ Yina mutindu beto ke salaka luswaswanu na kati ya mambu ya kupemama ya kieleka mpi mambu ya kupemama ya luvunu.+
7 Bampangi ya mono ke zolaka mingi, beto landa kuzolana,+ sambu zola ke katukaka na Nzambi, mpi konso muntu yina ke zolaka kele mwana ya Nzambi mpi yandi me zaba Nzambi.+ 8 Muntu yina ke zolaka ve me zaba Nzambi ve, sambu Nzambi kele zola.+ 9 Yina mutindu zola ya Nzambi monanaka sambu na beto, nde Nzambi tindaka Mwana na yandi mosi kaka ya kubutuka+ na nsi-ntoto sambu beto baka luzingu na nzila na yandi.+ 10 Zola yina kele mutindu yai: yo kele ve nde beto me zolaka Nzambi, kansi nde yandi muntu zolaka beto mpi yandi tindaka Mwana na yandi bonso kimenga ya kuwakanisa+ beto ti yandi sambu na masumu* na beto.+
11 Bampangi ya mono ke zolaka mingi, kana Nzambi me zolaka beto mutindu yai, beto mpi beto fwete zolana.+ 12 Ata muntu mosi ve me monaka Nzambi.+ Kana beto landa kuzolana, Nzambi kele kaka na kati na beto mpi zola na yandi me kumaka ya kukuka na kati na beto.+ 13 Yina mutindu beto me zaba nde beto kele na bumosi ti yandi mpi yandi kele na bumosi ti beto, sambu yandi me pesaka beto mpeve na yandi. 14 Diaka, beto mosi me monaka mpi beto ke ta kimbangi nde Tata tindaka Mwana na yandi bonso ngulusi ya nsi-ntoto.+ 15 Muntu yina ke ndimaka nde Yezu Kristu kele Mwana ya Nzambi,+ Nzambi kele na bumosi ti muntu yina mpi yandi kele na bumosi ti Nzambi.+ 16 Ebuna beto me zabaka mpi beto ke ndimaka zola yina Nzambi kele na yo sambu na beto.+
Nzambi kele zola,+ mpi muntu yina ke bikala na zola, yandi ke bikala na bumosi ti Nzambi mpi Nzambi ke bikala na bumosi ti yandi.+ 17 Na mutindu yai, zola kumaka ya kukuka na kati na beto, sambu beto vanda ti masonga*+ na kilumbu ya kusambisa, sambu mutindu muntu yina kele, beto mpi beto kele mutindu yina na nsi-ntoto yai. 18 Kana zola kele, boma ke vandaka ve,+ kansi zola ya kukuka ke katulaka boma, sambu boma ke tudilaka beto bandilu. Ya kieleka, muntu yina ke waka boma me kumaka ve ya kukuka na zola.+ 19 Beto ke zolaka, sambu yandi zolaka beto ntete.+
20 Kana muntu ke tuba nde, “Mono ke zolaka Nzambi,” kansi yandi ke menga mpangi na yandi, yandi kele muntu ya luvunu.+ Sambu muntu yina ke zolaka ve mpangi na yandi,+ yina yandi ke monaka, yandi lenda zola ve Nzambi, yina yandi ke monaka ve.+ 21 Mpi yandi me pesaka beto nsiku yai, nde muntu yina ke zolaka Nzambi fwete zola mpi mpangi na yandi.+
5 Konso muntu yina ke kwikila nde Yezu kele Kristu, yandi kele mwana ya Nzambi;+ mpi konso muntu yina ke zolaka Tata, yandi ke zolaka mwana na yandi. 2 Yai mutindu beto ke zabaka nde beto ke zolaka bana ya Nzambi,+ ntangu beto ke zolaka Nzambi mpi ke zitisaka bansiku na yandi. 3 Sambu zola ya Nzambi ke tendula nde beto zitisa bansiku na yandi;+ nkutu bansiku na yandi kele kilo ve,+ 4 sambu konso muntu yina kele mwana ya* Nzambi ke nungaka nsi-ntoto.+ Mpi yai kununga yina me nungaka nsi-ntoto, disongidila lukwikilu na beto.+
5 Nani lenda nunga nsi-ntoto?+ Keti yo kele ve muntu yina ke kwikila nde Yezu kele Mwana ya Nzambi?+ 6 Yandi yina muntu kwisaka na nzila ya masa mpi menga, Yezu Kristu, ti masa mpamba ve,+ kansi ti masa ti menga.+ Mpi mpeve ke taka kimbangi,+ sambu mpeve kele kieleka. 7 Sambu bambangi kele tatu: 8 mpeve,+ masa,+ ti menga;+ mpi yonso tatu kele na kuwakana.
9 Kana beto ndima kimbangi ya bantu, kimbangi ya Nzambi kele nene kuluta. Sambu yai kimbangi yina Nzambi ke taka, kimbangi yina yandi taka sambu na Mwana na yandi. 10 Muntu yina ke kwikilaka na Mwana ya Nzambi kele ti kimbangi na kati na yandi. Muntu yina ke kwikila ve na Nzambi me kumisa yandi muntu ya luvunu,+ sambu yandi me ke kwikila ve na kimbangi yina Nzambi me taka sambu na Mwana na yandi. 11 Mpi yai kimbangi, nde Nzambi pesaka beto luzingu ya mvula na mvula,+ mpi luzingu yina kele na Mwana na yandi.+ 12 Muntu yina kele ti Mwana kele ti luzingu yina; muntu yina kele ve ti Mwana ya Nzambi kele ve ti luzingu yina.+
13 Mono ke sonikila beno mambu yai sambu beno zaba nde beno kele na luzingu ya mvula na mvula,+ beno bantu ya ke kwikilaka na zina ya Mwana ya Nzambi.+ 14 Mpi beto ke tulaka ntima* sambu na yandi+ nde, konso kima yina beto ke lomba na kuwakana ti luzolo na yandi, yandi ke waka beto.+ 15 Kana beto me zaba nde yandi ke wa beto sambu na konso kima yina beto ke lomba, beto me zaba nde beto ta baka bima yina beto ke lomba sambu beto me lomba yandi yo.+
16 Kana muntu me mona mpangi na yandi ke sala disumu yina ke nataka ve na lufwa, yandi fwete samba sambu na yandi, ebuna Nzambi ta pesa yandi luzingu.+ Yo ke tadila bantu yina ke sala ve disumu yina ke nataka na lufwa. Kele ti disumu yina ke nataka na lufwa.+ Mono ke zabisa yandi ve na kusamba sambu na disumu yina. 17 Mambu yonso ya kukonda lunungu kele disumu,+ kansi kele ti disumu yina ke nataka ve na lufwa.
18 Beto me zaba nde konso muntu yina kele mwana ya Nzambi ke salaka ve disumu, kansi muntu yina kele mwana ya Nzambi* ke kebaka yandi, mpi muntu ya mbi lenda simba* yandi ve.+ 19 Beto me zaba nde beto me katukaka na Nzambi, kansi nsi-ntoto ya mvimba kele na nsi ya kiyeka ya muntu ya mbi.+ 20 Kansi, beto me zaba nde Mwana ya Nzambi me kwisaka,+ mpi yandi me pesaka beto mayele* sambu beto baka nzayilu ya muntu yina kele muntu ya kieleka. Mpi beto kele na bumosi ti muntu yina kele muntu ya kieleka,+ na nzila ya Mwana na yandi Yezu Kristu. Yandi kele Nzambi ya kieleka mpi luzingu ya mvula na mvula.+ 21 Bana ya fioti, beno tina biteki.+
To “kimvuka.”
To “na bumosi ti yandi.”
To “kimenga ya kufika masumu; nzila ya kulembika masumu.”
To “kudisikisa sambu na bima yina nge kele na yo.”
To “katuka ntangu yandi yantikaka.”
Disongidila, nkuna yina lenda buta, to lenda buta bambuma.
To “moyo.”
To “mioyo.”
Na kisina, “konso mpeve.”
Na kisina, “bampeve.”
To “kimenga ya kufika masumu; nzila ya kulembika masumu.”
To “beto tula ntima.”
Na kisina, “konso kima yina me butukaka na.”
To “ke ndimaka ti masonga yonso.”
Disongidila, Yezu Kristu, Mwana ya Nzambi.
To “kanga.”
Na kisina, “mayele ya kubakisa mambu mbote-mbote.”