Viziti na Kazakhstan

BANTU ya Kazakhstan vandaka kuzinga luzingu ya kutambula-tambula. Tii bubu yai na konso nsungi, bangungudi ya nkaka ya Kazakhstan ke nataka bambisi na bo na bisika ya kuswaswana sambu na kudisa yo. Bo ke lutisaka nsungi ya ntangu na bangumba. Ntangu nsungi ya madidi ke finamaka, bo ke nataka bambisi na bo na bisika ya ntangu, yina kele ve ti bangumba.

Bantu ya nkaka ya Kazakhstan ke zingaka na bambanza ya kutoma. Ata mpidina, bansiku, madia, mpi bima yina bo ke salaka na maboko ke monisaka nde ba-nkaka na bo vandaka ti luzingu ya kutambula-tambula. Bantu ya Kazakhstan ke zolaka kusala bankunga, kuyimba bankunga, mpi kubula miziki ti bima ya kubudila miziki ya bwala na bo.

Yourte, nzo ya bantu yina ke zingaka luzingu ya kutambula-tambula kele mbandu ya mbote ya ke monisaka mutindu bantu ke zitisaka kisika yina bo ke zingaka. Bangungudi ke sepelaka kusadila yourte mpi bantu yina ke zingaka na bambanza ke sadilaka yo mbala mingi na bankinsi. Diaka, bantu yina ke kwendaka kutala bisika ke sadilaka yourte bonso banzo. Na kati na yo, bankento ke salaka mpi kisalu ya kutula bifwanisu na bilele mpi na batapi.

Mabuta ya bantu ya Kazakhstan yina ke zingaka na babwala ke bakaka na valere bampunda na bo. Bantu ya Kazakhstan ke sadilaka bangogo kiteso ya 21 sambu na bampunda, konso ngogo kele ti ntendula na yo, mpi bo ke sadilaka bangogo kuluta 30 sambu na kutendula kulere ya mika ya mpunda. Tii bubu yai, mpunda ya mbote kele dikabu yina ke vandaka ntalu mingi mpi bo ke bakaka yo na valere mingi. Na babwala, bana ya babakala ke longukaka kunata mpunda na kileke.

Madia ya bantu ya Kazakhstan ke vandaka kaka ti misuni mpi mbala mingi bo ke tulaka ve bima yina ke pesaka ntomo na madia. Bantu ya Kazakhstan ke zolaka mingi kunwa koumiss, malafu yina bo ke salaka ti mabele ya ngombe, mpi yo ke vandaka mbote sambu na nitu; bo ke zolaka mpi shubat, yina bo ke salaka ti mabele ya shamo, yo ke tungaka nitu mpi yo ke vandaka mwa ngani.

Biro ya filiale ya Bambangi ya Yehowa na Almaty ke zodilaka kukwisa ya mbote na bantu yina ke kwisaka kusala viziti.