Zinga Mvula na Mvula na Kiese na Ntoto!

Kamukanda yai kusonamaka sambu na kusadisa nge na kuzaba yina ya kusalaka ntoto na bima nyonso ya kele na zulu na yau. Nge tazaba nde, Nzambi ya kusalaka ntoto, yandi ke na zina, ye mpi sambu na nki yandi salaka muntu ye diaka nki mutindu nge lenda zinga mvula na mvula na kiese na ntoto.

Beto me tula kivuvu nde bifwanisu yai mingi ya kele na kati tasadisa nge na kubaka ngindu ya kuluta mbote ya bima nyonso yina. Sambu na kumona mfunu mingi mpenza na mambu yai, yau ke lomba na nge kutanga mikapu ya Biblia ya me sonama na nsi ya ndambu ya bifwanisu. Na mutindu yina, nge tazaba mwa bansilulu ya kitoko ya Nzambi ya kele na kati na Biblia ye mpi nge tazaba yina ya Nzambi ke tubila nge na kusala sambu na kumona mfunu na mambote ya talanda kusalama na bansilulu yina.

Mbala yankaka nge tazola mpi kusadila kamukanda yai sambu na kusadisa bantu yankaka. Yau tapesa nge diaka nzila ya kusadisa bana na nge na kuzaba Nzambi. Kana nge ke zingaka na nsi mosi ya bambuta mingi kuzaba kutanga ve, nge lenda kusadila bifwanisu sambu na kuzabisa bau bangindu ya Nzambi, na mutindu nde bau mpi lenda kupesa lusadisu na bantu yankaka.

Kulonguka mukanda yai tasadisa nge ye nge tasadisa nkweno na kuzinga na kiese na paladisu.