Kapu 34

Yezu Kepona Bantumwa na Yandi

KITESO ya mvula mosi ti ndambu meluta kubanda Yoane Mbotiki kumonisaka Yezu bonso Dimeme ya Nzambi mpi Yezu kuyantikaka kisalu na yandi na ntwala ya bantu yonso. Na ntangu yina Andre, Simoni Piere, Yoane mpi ziku Yakobo (Mpangi ya Yoane), mpi dyaka Filipo ti Natanaele (yina kebingamaka mpi Bartelemi), kukumaka balongoki na yandi ya ntete. Na nima ya ntangu fyoti, bankaka mingi kuvukanaka na bau sambu na kulanda Kristu.

Ntangu yai Yezu meyilama sambu na kupona bantumwa na yandi. Bayina takuma bankundi na yandi ya kisalu yina talongama mbotembote. Kansi na ntwala ya kusola bau, Yezu mekwenda na ngumba mpi yandi mevanda mpimpa ya mvimba sambu na kusamba, ngatu sambu na kulomba mayele ti lusakumunu ya Nzambi. Ntangu ntongo metana, yandi mebinga balongoki na yandi mpi na kati na bau yandi mesola 12. Kansi, mutindu bau kelanda kuvanda bana ya nzo-nkanda ya Yezu, bau kebingama mpi balongoki ya Yezu kaka.

Yezu mepona sambanu, bayina bazina na bau mepesama na zulu, kele bau yina kukumaka balongoki na yandi ya ntete. Matayo, yina Yezu kubingaka na biro ya mpaku, mesolama mpi. Bayina ya nkaka tanu ya mesolama kele Yudasi (yina kebingamaka mpi Tadei), Yudasi Iskarioti, Simoni muntu ya Kana, Toma, mpi Yakobo mwana ya Alfeo. Yakobo yai bau kebingaka yandi mpi Yakobo ya Fyoti, mbala ya nkaka sambu yandi kele fyoti na kinsuni to leke na bamvula na ntwala ya ntumwa Yakobo.

Na ntangu yai bayayi 12 mevanda ti Yezu kubanda mwa ntangu, mpi yandi mezaba bau mbote. Ya kyeleka, mingi na kati na bau kele bampangi na yandi mosi. na ntembe ve, Yakobo ti mpangi na yandi Yoane kele bisoni ya ntete ya Yezu. Mpi yau lenda kuvanda nde Alfeo kuvandaka mpangi ya Yozefi, tata ya lundi ya Yezu. Ebuna mwana ya Alfeo, ntumwa Yakobo, lenda kuvanda mpi kisoni ya Yezu.

Ya kyeleka, Yezu kele na mpasi ve na kuyibuka bazina ya bantumwa na yandi. Kansi keti nge lenda kuyibuka bau? Ee, kaka yibuka nde bantu zole kele ti zina ya Simoni, zole kele ti zina ya Yakobo, zole kele ti zina ya Yuda, mpi nde Simoni kele ti mpangi ya bakala Andre, mpi nde Yakobo kele ti mpangi ya bakala Yoane. Yai kele nsapi ya kuyibukila bantumwa nana. Bayankaka iya kele: kalaki ya mpaku (Matayo), muntu yina kwisaka kubefula na nima (Toma), muntu yina kubingamaka na nsi ya nti (Natanaele), ti nduku na yandi Filipo.

Bantumwa Kumi na mosi kele bantu ya Galilea. Teritware ya kisina ya Yezu. Natanaele kele muntu ya Kana. Filipo, Piere, ti Andre kele bantu ya Betsaida, na nima Piere ti Andre mekwenda kuzinga na Kapernaumi, yau kemonana nde Matayo mpi vandaka kuzinga kuna. Yakobo ti Yoane kuvandaka na kisalu ya kuloba ye mpi yau kemonana nde bau kuzingaka na kati to mfinama ti Kapernaumi. Mbala ya nkaka Yudasi Iskarioti, yina kutekaka Yezu na nima, kele ntumwa mosi kaka ya kele muntu ya Yudea. Marko 3:​13-19; Luka 6:​12-16.

▪ Inki bantumwa kemonana nde bau kele bampangi ya Yezu?

▪ Banani kele bantumwa ya Yezu, mpi inki mutindu nge lenda kuyibuka bazina na bau?

▪ Bantumwa yango kukatukaka na inki babwala?