Lutiti ya Nsuka

DIBUTA kele ngidika ya bantu kuzaba tuka ntama, kansi bubu yai yau kemona mpasi. Kikalulu ya kunwa dyamba mpi ya mansoni yina keyela na mutindu mosi ya boma na kati ya batoko, mpasi ya bilumbu yai ya kufwa ya makwela ti mubulu na kati ya dibuta, ntalu ya mabuta ya kele na kibuti mosi yina kelemba ve na kumata, ti bampasi yankaka ya ngolo kenata bantu yankaka na kudiyula kana luzingu ya dibuta tabonga.

Keti dibuta kele kaka na mpila ya kuvanda kisika mosi ya mbote, ya lutaninu mpi ya kepesa nsyamisa na bantu na yau? Mvutu kele nde ee, kana bantu ya dibuta kezaba kinsweki ya kyeleka ya kyese ya dibuta. Kinsweki yai kele ya kubumbana ve. Bantu memekaka yau mpi yau mebutaka mbuma ya kitoko tuka bamvu-nkama mingi, mingi kibeni. Inki kinsweki yango? Mukanda yai, Kinsweki ya Kyese ya Dibuta, kepesa mvutu. Yau kepesa mpi bambandu ya bantu lenda sadila. Bambandu yango kemonisa inki mutindu “kinsweki” yai lenda sadisa bantu na kumanisa makambu mingi ya kebwaka na kati ya dibuta. Keti kele ti muntu bubu yai kele ve na mfunu ya nsangu ya mutindu yai?