Luzingu na Nge Kekwenda na Wapi?

• Bantu mingi mekudipesaka mpenza na mambu ya luzingu ya konso kilumbu na mpila nde bo ketulaka ve dikebi mingi na kisika ya bo kekwenda.

• Biblia kezabisa beto mambu ya kitoko yina tasalama na bilumbu kekwisa. Yo kekebisa beto mpi nde nsoba mosi ya nene yina takotisa mavwanga na bimvuka ya bantu tasalama. Kana beto kezola kubaka mambote mpi kutina mpasi, beto fwete baka desizio ya mbote kukonda kusukinina.

• Bantu yankaka mezaba mambu ya Biblia ketubaka mpi kemekaka na kusadila mambu yango, kansi bo kebikaka nde basusi ya luzingu kunata bo na nzila ya mbi.

• Keti nge kesepela na nzila yina luzingu na nge ke na kubaka? Ntangu nge kesalaka programe ya mambu yina nge tasala, keti nge ketadilaka mutindu yo lenda simba balukanu ya luzingu na nge yina talungana bamvula mingi na nima?

[Lupangu/Bifwanisu ya kele na lutiti 9]

Inki Mambu Kele Mfunu Mingi Sambu na Nge?

Inki mfunu nge tapesa na mambu yai kelanda? Sonika ntalu ya kemonisa kisika ya konso dyambu.

Mingi na kati na yo kele ti kisika ya kufwana na luzingu, kansi kana yo kelomba nde nge pona, inki kima nge tatula na kisika ya ntete? ya zole? mpi buna na buna.

․․․Bansaka

․․․Kisalu na mono

․․․Mavimpi na mono

․․․Kyese na mono mosi

․․․Nkwelani na mono

․․․Bibuti na mono

․․․Bana na mono

․․․Nzo mosi ya kitoko, bilele ya mbote

․․․Kuluta bantu yankaka na mambu yonso

․․․Lusambu ya Nzambi

[Lupangu ya kele na lutiti 10, 11]

Keti Mambu ya Nge Keponaka Kenataka Nge na Kisika ya Nge Kezola Mpenza Kukwenda?

TADILA BANGYUFULA YAI

BANSAKA: Keti bansaka ya mono keponaka kevutudilaka mono ngolo ya mu vidisaka? Keti bansaka yango ketadila byese yina lenda tula mavimpi na mono na kigonsa, to nkutu kubikila mono kifu na nitu luzingu ya mvimba? Keti yo kele mutindu ya “nsaka” yina kepesaka kyese mbala yankaka mwa ntangu fyoti, kansi yina lenda pesa mpasi ntangu ya nda? Ata nsaka ya mono kepona kele mbote, keti mono kelutisaka ntangu mingi kibeni na yo na mpila nde yo kebakaka kisika ya mambu yina meluta mfunu?

KISALU NA MONO: Keti yo kesadisaka mono na kuzwa bima ya mfunu ya luzingu, to keti mono kele mpenza mpika na yo? Keti yo kelombaka mono na kusala mambu yina kebebisa mavimpi na mono? Keti mono kezolaka kusala bantangu ya ngika na kisalu na mono, to kulutisa ntangu ti nkwelani to bana na mono? Kana patro na mono melomba mono na kusala kisalu mosi ya keyangisa kansansa na mono to yina kebakaka kisika ya mambu ya kimpeve mbala na mbala, keti mono tasala yo kaka sambu na kutanina kisalu na mono?

MAVIMPI NA MONO: Keti mono kemonaka yo mpamba, to keti mono kesalaka ngolo ntangu yonso sambu na kutanina yo? Keti mono ketubilaka yo ntangu yonso? Keti mutindu mono kebakaka yo kesongaka nde mu kekudibanzaka sambu na dibuta na mono?

KYESE NA MONO MOSI: Keti yo kebakaka kisika ya ntete na mabanza na mono? Keti mono ketulaka yo na ntwala ya kyese ya nkwelani to ya dibuta na mono? Keti mutindu mono kesosaka yo kewakana ti mutindu nsambidi ya Nzambi ya kyeleka fwete sosa yo?

NKWELANI NA MONO: Keti mono kemonaka nkwelani na mono bonso nduku na mono kaka ntangu mono kezolaka kulungisa bampusa na mono? Keti mono kezitisaka nkwelani na mono bonso muntu yina mefwana na kubaka lukumu? Keti lukwikilu na mono na Nzambi kevandaka ti bupusi na mutindu mono ketadilaka nkwelani na mono?

BIBUTI NA MONO: Kana mono kele ntete mwana, keti mono kelemfukilaka bibuti na mono, disongidila, kupesa bo mvutu na luzitu yonso, kusala bisalu ya nzo ya bo kepesaka, kuvutuka na nzo na konso ntangu ya bo ketulaka, kubuya banduku mpi mambu yina bo kekebisaka mono? Kana mono kele mbuta, keti mono kewidikilaka bibuti na mono ti luzitu mpi kepesaka bo lusadisu ya mefwana ntangu bo kevandaka na yo mfunu? Inki ketwadisaka bangwisana na mono ti bo, keti kele mambote na mono mosi to bandongisila ya Ndinga ya Nzambi?

BANA NA MONO: Keti mono kelungisaka mukumba ya kulonga bana na mono bikalulu ya mbote, to keti mono kevingilaka nde banzo-nkanda kusala yo? Keti mono kelutisaka ntangu ti bana na mono, to keti mono kebikaka nde bo lutisa ntangu mingi na ntwala ya biteki ya kusekinina, ya televizio, to ya ordinatere? Keti mono kepesaka bana na mono ndola konso ntangu ya bo kekondaka kuzitisa bangibusa ya Nzambi, to keti mono kesalaka yo kaka ntangu mono kele na makasi?

NZO MOSI YA KITOKO, BILELE YA MBOTE: Inki ketwadisaka dikebi ya mono kepesaka na kulwata mpi na bima na mono, keti ngindu ya kuyitukisa bantu ya kezingaka penepene na mono? keti mambote ya dibuta na mono? to sambu mono kele nsambidi ya Nzambi?

KULUTA BANTU YANKAKA NA MAMBU YONSO: Keti mono kemonaka nde yo kele mfunu na kusala mambu mbote? Keti mono kesalaka yonso sambu na kuluta bantu yankaka? Keti yo keyangisaka mono kana muntu yankaka mesala kima mosi ya kuluta mbote?

LUSAMBU YA NZAMBI: Keti kundimama na Nzambi kele mfunu mingi na meso na mono kuluta kundimama na nkwelani, na bana, na bibuti, to na mfumu na mono ya kisalu? Keti mono tazola kutula kisalu ya Nzambi na kisika ya zole sambu na kulanda na kuvanda ti luzingu mosi ya mbote?

TADILA BANDONGISILA YA BIBLIA TI DIKEBI YONSO

Inki kisika Nzambi kebakaka na luzingu na nge?

Longi 12:13: “Zitisa Nzambi, lemfuka na bansiku na yandi, sambu yai kele kisina ya Nzambi me sadilaka muntu.”

KUDIYULA NDE: Keti luzingu na mono kemonisaka nde mono ketadilaka mambu mutindu yina? Keti bulemfu na bansiku ya Nzambi kevandaka ti bupusi na mutindu mono kelungisaka mikumba na mono na nzo, na kisalu, to na nzo-nkanda? To keti mambu yankaka to basusi ya luzingu kevandaka na bupusi na ntangu ya mono metulaka sambu na Nzambi?

Bangwisana ya nki mutindu nge kele na yo ti Nzambi?

Bingana 3:5, 6: “Tula ntima na nge yonso na Mfumu Nzambi; kutula ntima ve na mambu ya nge mosi ke yindulaka nde nge zaba. Yindula Mfumu Nzambi na mambu yonso ya nge ke salaka, yandi ta songa nge nzila ya mbote.”

Matayo 4:10: “Nge fweti samba Mfumu Nzambi, Nzambi na nge. Kaka yandi mpamba nge fweti samba!”

KUDIYULA NDE: Keti mono kekudiwaka mutindu yina sambu na Nzambi? Keti bisalu na mono ya konso kilumbu mpi mutindu mono keyidikaka mambu ya mpasi ya mono kekutanaka na yo kemonisaka kutula ntima mpi kudipesa ya mutindu yina?

Inki mfunu nge kepesaka na kutanga mpi kulonguka Biblia?

Yoane 17:3: “Kana bo zaba nge Nzambi mosi ya kieleka, ti Yesu Kristo yina ya nge tindaka, yo ke songa nde bo ke na moyo ya mvula na mvula.”

KUDIYULA NDE: Keti mfunu ya mono kepesaka na kutanga Ndinga ya Nzambi mpi kuyindulula na mudindu mambu yo ketubaka kemonisaka nde mono kekwikilaka mpenza na yo?

Inki mfunu nge kepesaka na kukwenda na balukutakanu ya dibundu ya Bukristu?

Baebreo 10:24, 25: “Beto banzila bantu ya nkaka na kati na beto na kupesa bo kikesa ya kuzola bampangi ya nkaka kuluta diaka mbote ti kusadila bo mambu ya mbote. Konso ntangu beto fweti kutana kaka na bisambu; . . . sambu beno ke mona nde kilumbu yina ya Kristo ta sambisa bantu yo yai mpi kele na nzila.”

Nkunga 122:1: “Mono vandaka na kiese ntangu bo songaka mono nde: ‘Beto kwendeno na nzo ya Mfumu Nzambi!’”

KUDIYULA NDE: Keti mutindu na mono ya kuzinga kemonisaka ntonda sambu na lutwadisu yai ya kele na Ndinga ya Nzambi? Na ngonda ya meluta, keti mono kondaka lukutakanu mosi ya Bukristu sambu mono bikaka nde kima yankaka kubaka kisika na yo?

Keti nge kezabisaka bankaka ti kikesa mambu ya metala Nzambi mpi lukanu na yandi?

Matayo 24:14: “Bo ta longaka Nsangu yai ya Mbote ya Kimfumu na nsi-ntoto ya mvimba, . . . ebuna na nima, nsuka ya ntoto ta kwisa.”

Matayo 28:19, 20: “Yo yina, beno kwenda kukumisa bantu yonso balonguki na mono: . . . beno longa bo mpi na kulanda mambu yonso ya mono vandaka kusonga beno na kusala.”

Nkunga 96:2: “Beno yimbila Mfumu Nzambi bankunga, beno kumisa yandi! Konso kilumbu beno songa bantu nsangu ya mbote nde yandi ke gulusaka beto!”

KUDIYULA NDE: Keti kisalu yai kele mpenza na kisika yina yo fwete vanda na luzingu na mono? Keti mutindu mono kesala yo kemonisa nde mono kebakisa mpenza nde ntangu ya beto kezinga kele ya mbi?