DILONGI 7

Keti Nge Ke Waka Boma mpi Ke Kudiwaka Nge Mosi?

Tala mwana-bakala yai kele na kifwanisu. Yandi ke monana bonso nde yandi kele yandi mosi mpi ke wa boma, mpidina ve? Keti nge me kudiwaka mutindu yina?— Bantangu ya nkaka, beto yonso ke waka mutindu yina. Biblia ke tubila banduku ya Yehowa yina kudiwaka bo mosi mpi waka boma. Mosi na bo kele Eliya. Bika beto longuka disolo na yandi.

Ntotila-nkento Yezabele me wa makasi ngolo — Yezabele sosaka kufwa Eliya

Eliya vandaka kuzinga na Izraele tuka ntama kibeni, na ntwala nde Yezu kubutuka. Akabi, ntotila ya Izraele, vandaka ve kusambila Yehowa, Nzambi ya kieleka. Yandi ti nkento na yandi Yezabele vandaka kusambila Baale, nzambi ya luvunu. Yo yina, bantu mingi ya Izraele yantikaka mpi kusambila Baale. Ntotila-nkento Yezabele vandaka muntu ya mbi kibeni mpi yandi vandaka kusosa kufwa bantu yonso yina vandaka kusambila Yehowa, tanga mpi Eliya! Keti nge me zaba diambu yina Eliya salaka?—

Eliya tinaka! Yandi kwendaka ntama na ntoto ya zelo na zelo mpi bumbanaka na kati ya dibulu ya matadi. Na mabanza na nge, sambu na nki yandi salaka mpidina?— Yandi waka boma. Kansi, Eliya vandaka ve ti kikuma ya kuwa boma. Sambu na nki? Sambu yandi zabaka nde Yehowa lendaka kusadisa yandi. Na bilumbu yina katukaka kuluta, Yehowa monisaka Eliya ngolo na yandi. Kilumbu mosi, Yehowa pesaka mvutu na kisambu ya Eliya mpi tindaka tiya katuka na zulu. Yo yina, na mbala yai mpi Yehowa lendaka kibeni kusadisa Eliya!

Yehowa me pesa mvutu na kisambu ya Eliya mpi me tinda tiya katuka na zulu; Eliya na kati ya dibulu ya matadi; Eliya me wa kiese ntangu Yehowa me zabisa yandi bangogo ya ke pesa kikesa — Inki mutindu Yehowa sadisaka Eliya?

Ntangu Eliya vandaka na kati ya dibulu ya matadi, Yehowa yulaka yandi nde: ‘Inki nge ke sala awa?’ Eliya vutulaka nde: ‘Mono mpamba me bikala na lusambu na nge. Mono kele mono mosi, mpi mono ke wa boma nde bo ta fwa mono.’ Eliya yindulaka nde bo fwaka bansambidi yonso ya nkaka ya Yehowa. Kansi, Yehowa zabisaka Eliya nde: ‘Ve, yo kele ve kieleka. Kele ti bantu 7 000 ya nkaka ya ke landa kusambila mono. Vanda kikesa. Mono kele ti kisalu mingi ya kupesa nge!’ Keti nge ke yindula nde Eliya sepelaka ntangu yandi waka diambu yina?—

Inki dilongi nge lenda baka na mambu yina kuminaka Eliya?— Nge fwete wa ve boma to kudiwa nge mosi. Nge kele ti banduku yina ke zolaka Yehowa mpi ke zolaka nge. Diaka, Yehowa kele ngolo mingi mpi yandi ta sadisa nge ntangu yonso! Keti nge me wa kiese na kuzaba nde nge kele ve nge mosi?—

TANGA NA BIBLIA NA NGE