Sambu na Kulanda Mbandu ya Yezu, Vanda . . .

MUNTU YA KE WILAKA BANKAKA MAWA

Sambu Yezu vandaka muntu ya kukuka, yandi kutanaka ve ti bampasi mpi basusi yina mingi ke kutanaka ti yo. Kansi, yandi vandaka kuwila bantu mawa. Yandi vandaka kusadila bo mambu mingi kuluta yina vandaka mfunu. Mawa pusaka yandi na kusadisa bantu. Yindula bambandu yina ke na Bakapu 32, 37, 57, 99.

MUNTU YA BO LENDA SOLULA TI YANDI KUKONDA MPASI

Bantu ya bamvula yonso—baleke ti bambuta —vandaka kumona nde bo lenda solula ti Yezu kukonda mpasi sambu yandi vandaka ve kuvweza bantu to kumonana nde yandi me luta bo. Sambu bo monaka mutindu Yezu vandaka kutudila bo dikebi, bantu vandaka kuzola kuvanda pene-pene na yandi. Sambu na kumona mambu yina, tala Bakapu 25, 27, 95.

MUNTU YA KE SAMBAKA MINGI

Mbala mingi, Yezu vandaka kusamba Tata na yandi, na kingenga mpi ntangu yandi vandaka ti bantu ya nkaka yina vandaka kusambila Tata na yandi. Yandi sambaka na mabaku mingi, kaka ve na ntangu ya kudia. Yandi sambaka sambu na kupesa Tata na yandi mersi, sambu na kukumisa yandi, mpi sambu na kusosa lutwadisu na yandi na ntwala ya kubaka badesizio ya nene. Tadila bambandu yina kele na Bakapu 24, 34, 91, 122, 123.

MUNTU YA KUKONDA BWIMI

Bantangu ya nkaka, ntangu yo lombaka nde yandi pema mpi kulutisa ntangu ya mbote, Yezu tulaka bampusa na yandi na lweka sambu na bantu ya nkaka. Yandi vandaka ve kuditula na kisika ya ntete. Na diambu yai mpi, yandi pesaka mbandu yina beto lenda landa mbote-mbote. Longuka mutindu bo ke monisa mbandu yina na Bakapu 19, 41, 52.

MUNTU YA KE LOLULAKA

Yezu sukaka ve kaka na kulonga mfunu ya kuvanda ti kikalulu ya kulolula—yandi monisaka kikalulu ya kulolula na bangwisana na yandi ti balongoki na yandi mpi bantu ya nkaka. Yindulula bambandu yina kele na Bakapu 26, 40, 64, 85, 131.

MUNTU YA KIKESA

Biblia tubaka na ntwala nde Bayuda mingi ta buya kundima Mesia mpi nde bambeni na yandi ta fwa yandi. Yo yina, Yezu lendaka kaka kusala mambu fioti sambu na bantu. Kansi, yandi kotilaka lusambu ya kieleka na kikesa yonso. Yandi ke pesa mbandu sambu na balongoki na yandi yonso yina ke kutanaka ti bantu yina ke ndimaka ve nsangu to nkutu kimbeni. Tala Bakapu 16, 72, 103.

MUNTU YA KUDIKULUMUSA

Yezu lutaka bantu ya kukonda kukuka na mambu mingi kibeni, mu mbandu na nzayilu mpi mayele. Ntembe kele ve nde kikalulu na yandi ya kukaka pesaka yandi makuki ya nitu mpi mayele yina lutaka bantu yonso ya vandaka pene-pene na yandi. Ata mpidina, yandi sadilaka bantu ya nkaka na kudikulumusa. Nge ta mona malongi ya ke tadila diambu yai na Bakapu 10, 62, 66, 94, 116.

MUNTU YA NTIMA-NDA

Yezu vandaka kumonisa ntangu yonso ntima-nda na bantumwa na yandi mpi na bantu ya nkaka ntangu bo landaka ve mbandu na yandi to bo sadilaka ve mambu yina yandi tubaka. Na ntima-nda yonso, yandi vutukilaka mbala na mbala malongi yina bo vandaka ti yo mfunu sambu bo pusana pene-pene ya Yehowa. Yindulula mbandu ya ntima-nda ya Yezu na Bakapu 74, 98, 118, 135.