Beno Sikila Ya Kwikama Mpi Beno Zinga!

“FINGA Nzambi mpi fwa!” Lutiti ya lutaninu na beto kemonisa nkento ya Yobi, yina vandaka kutubila yandi ti bangogo yina; ya kunyokula. Yau vandaka meluta penepene na bamvula 3600. Dyaka ndwanisa ya munoko ya kukuminaka nsadi ya kwikama ya Nzambi ketubila mingi zulunalu mosi yina ketadila kubwa ya ntoto bubu yai. Muntu ya kwikama Yobi kumonaka mpasi ya ngolo na kuvidisaka​—⁠bibwisi na yandi, nzo na yandi, ti bana na yandi kumi. Ntangu yai nitu na yandi kunyokwamaka na maladi ya kukonda kumana, na kutesaka nsuka ya ndilu ya mvibidilu na yandi. Sambu na inki kikuma? Mbeni ya nene ya Nzambi mpi ya bantu, Satana Dyabulu, vandaka kulanda lukanu na yandi na kutubaka nde muntu lenda ve kubikala ya kwikama na Nzambi na kati ya mimekamu ya ngolo.​—⁠Yobi 1:​11, 12; 2:​4, 5, 9, 10.

Bubu yai, bonso na ntangu ya Yobi, “nza ya mvimba keyalama na ngolo ya nkwa-mambi,” Satana Dyabulu. (1 Yoane 5:19) Ya kyeleka, yau kemonana mbotembote na ntangu na beto, kadi “yina ya kebingamaka Dyabulu mpi Satana, yina kepukumunaka bantu ya ntoto ya mvimba,” kukatulamaka na mazulu sambu na kulosama na ntoto. (Kusonga 12:​9, NW) Yau yina kikuma ya bampasi ya mingi ya bantu kemona na ntangu na beto. Mvita ya ntete ya nza ya mvimba, ya kuyantikaka na 1914, kusongaka “luyantiku ya bampasi ya mingi” yina kelanda na kukuma ngolo na bamvu-nkama ya makumi zole.​—⁠Matayo 24:​7, 8.

Na kati ya nza yai ya nku mpi ya mbi, keti nge keyindula nde nge mekuma na ndilu yina ya bantu lenda kuvibidila? Keti nge mekudiyulaka ve nde: ‘Inki kele lukanu ya luzingu?’ Yobi lendaka kuyindula mutindu yina, kansi yandi kuvidisaka ve lukwikilu na Nzambi, ata yandi salaka bifu. Yandi tubilaka kukangama na yandi na bangogo yai: “Tii mono tafwa mono tabika ve kwikama na mono!” Yandi vandaka kutula ntima nde Nzambi tazola ‘kuzaba kwikama na yandi.’​—⁠Yobi 27:5; 31:⁠6.

Yezu Kristu, Mwana ya Nzambi, mpi kuvibidilaka na kati ya mimekamu awa na ntoto. Satana kunwanisaka Yezu na bampila mingi. Mu mbandu, ntangu yandi mekaka Yezu na zulu ya ngumba, yandi moninaka bansatu na yandi ya kinsuni mpi yandi mekaka kukangama na yandi na Ndinga ya Nzambi. (Matayo 4:​1-11) Yandi bangikaka Yezu na kupusaka balongi ya bansiku ya meyambulaka lukwikilu ti bafarize ti luvunu na bau na kunyokulaka yandi, na kufundaka yandi nde yandi kevweza bansiku, mpi na kuwakanaka sambu na kufwa yandi. (Luka 5:21; Yoane 5:​16-18; 10:​36-39; 11:57) Bau kusalaka Yezu mbi kuluta bansyamisi tatu ya luvunu ya Yobi.​—⁠Yobi 16:2; 19:​1, 2.

Na kati ya kilanga ya Getsemane, bonso Yezu vandaka kupusana na mimekamu ya kuluta ngolo, yandi tubaka na balongoki na yandi nde: “Moyo na mono kele na ntantu mingi, tii na lufwa.” Na nima, “yandi tulaka ilungi na yandi na nsi, na kusambaka mpi na kutubaka nde: ‘Tata na mono, kana mpila kele, bika dikopa yai kuluta na ntwala na mono. Kansi, bonso mono kezola ve, kansi bonso nge mezola.’ ” Na nsukansuka, na zulu ya nti ya mpasi, yandi kulungisaka bangogo ya mbikudulu ya Bankunga 22:​1, Yezu kubokaka nde: “Nzambi na mono, Nzambi na mono, sambu na inki nge meyambula mono?” Kansi na nsukansuka Nzambi kuyambulaka Yezu ve sambu yandi lundaka kwikama na yandi ya kukuka, pesaka mbandu sambu Bakristu ya kyeleka yonso kulanda yau. Yehowa kupesaka nsendo na kukangama ya Yezu na kufutumunaka yandi mpi kutombulaka yandi na mazulu. (Matayo 26:​38, 39, NW; Mt 27:46; Bisalu 2:​32-36; 5:30; 1 Piere 2:21) Nzambi tapesa nsendo na bayina yonso kemonisa kwikama ya mutindu yina sambu na yandi.

Kwikama ya Yezu kepesa mvutu ya nene na ntembe ya Satana kaka ve kansi mpi na kimenga ya luzingu ya muntu ya kukuka kupesaka nkudulu na nsadisa na yau, bantu ya kwikama lenda kubaka luzingu ya mvula na mvula. (Matayo 20:28) Ntetentete, Yezu kuvukisaka “kibuka ya fyoti” ya bansolami yina kwisaka fwete kuyala ti yandi na kati ya Kimfumu ya mazulu. (Luka 12:32) Na nima na yau, “kibuka ya nene” kuvukisamaka sambu na luguluku na “mpasi ya nene,” mpi sambu na kubaka luzingu ya mvula na mvula na kati ya Kimfumu ya Nzambi na ntoto.​—⁠Kusonga 7:​9, 14-17.

Yobi vandaka ya kwikama, mpi yandi vandaka na kati ya mafuku na mafunda ya bafwa yina bau tafutumuna na kukuma bamambere ya ngidika ya ngemba to “ntoto ya mpa.” (2 Piere 3:13; Yoane 5:​28, 29) Bonso yau kesongama na lutiti ya lutaninu ya nima ya zulunalu, kwikama kuvandaka na nsendo na yau na nsungi ya Yobi ntangu Yehowa “sakumunaka nsuka ya Yobi . . . kuluta luyantiku na yandi.” Yandi kubakaka ngolo ya kimpeve na kukumaka muntu yina “vandaka kusumuka ve ti bikobo na yandi.” Nzambi kukumisaka luzingu na yandi nda na kuyikaka yandi bamvula 140. Na yina metala bima ya kinsuni, yandi pesaka Yobi fwokula na zole bima ya yandi vandaka na yau na ntwala, mpi Yobi “kubutaka mpi bana ya babakala nsambwadi ti ya bankento tatu,” bana ya bankento vandaka kumonana ya kuluta kitoko na kati ya nsi yango. (Yobi 2:10; 42:​12-17) Kansi bumvwama yai yonso kuvandaka kaka na balusakumunu ya fyoti na kutadila yina ya bantu ya kwikama tabaka na kyese na kati ya Paladisu ya “ntoto ya mpa.” Nge mpi lenda kubaka mambote na kati ya kyese, bonso tatendula balutiti kelanda!

[Caption on page 4]

[Ntendula ya Bifwanisu ya lutiti 4]

Yezu kupesaka mbandu ya kukuka ya muntu ya kwikama