“Kukula Bo Ve!”

“KANA Mbangi ya Yehowa mosi to zole mekokula na kyelo na nge, kukula bo ve!” yai ndongisila ya Corriere della Sera. Zulunalu yai vandaka tubila dyambu mosi yina salamaka na Treviso, na nordi ya Italie, dyambu ya komersa mosi yina zolaka kuvidisa mbongo kiteso ya kuluta funda mosi ya ba lire (kiteso ya badollar ya U.S.A. 600 na ndambu) sambu yandi kulaka Bambangi ya Yehowa zole yina kwendaka kutala yandi.

Zulunalu yango ketuba nde, Bambangi zole yantikaka kuditendula na muntu yango na bangogo yai: “Bubu kele kilumbu ya mbote sambu na nge. Beto kele Bambangi ya Yehowa, ye beto kele ti kima mosi ya mbalu sambu na kupesa nge.” Ntangu yandi waka buna, komersa ya ntima ya mbi kangaka kyelo, yandi pesaka bau ntangu ve ya kumanisa disolo na bau.

Kana muntu yina widikilaka, yandi zolaka kuzaba nde Bambangi kwendaka na nzo na yandi sambu na kupesa portemone na yandi yina bau monaka na dibaya ya kuvandila ya parke. Ebuna Bambangi vandaka na kima yankaka ya kusala ve, bau nataka portemone ti bima ya vandaka na kati na bilo ya polise ya mfinama. Na kilumbu ya landaka, bapolise pesaka yau na munkwa na yau.

Zulunalu Il Gazzettino di Treviso tubaka nde: “Kana vandaka muntu yankaka na kisika ya [Bambangi] yina zole ya bakaka nsoni, ziku yandi zolaka . . . kubumba mbongo yina yonso ya vandaka na portemone. Kansi Bambangi ya Yehowa ve, bantu ya fwete vanda kibeni masonga.”

Inki ketindaka Bambangi ya Yehowa na kuvanda “masonga kibeni”? Kele zola na bau sambu na Nzambi mpi sambu na bampangi, na kulandaka malongi ya Yezu Kristu. (Matayo 22:​37-39) Yau yina mpi kikuma ya Bambangi ya Yehowa kekwendaka nzo na nzo na kusamuna nsangu ya mbote ya “ntoto ya mpa” ya kuluta kitoko. Nsangu ya kivuvu ya mutindu yina kele mbalu kuluta bimvwama yonso ya kinsuni!​—2 Piere 3:13.

[Lupangu ya kele na lutiti 32]

Keti Nge Tazola Mvutukilu Mosi?

Ata na kati ya inza yai ya mavwanga, nge lenda kubaka kyese na nsadisa ya nzayilu ya kyeleka ya Biblia kepesa na yina ketala Nzambi, Kimfumu na yandi mpi lukanu ya kitoko ya yandi kusalaka sambu na bantu. Kana nge tazola kuzaba mambu ya nkaka to nge tazola nde muntu mosi kwisa kulonguka ti nge Biblia ya ofele na inzo, beto kelomba nge na kusonika na Association “Les Témoins de Jéhovah,” B.P.634 Limete, Kinshasa, Zaïre, to na mosi na adresi mebonga na nge yina kele na lutiti 2.