“Beto Yonso Kele Bana ya Dibuta Mosi”

NA BAMVULA ya mekatuka kuluta, mabanza ya mbi sambu na lusambu ti kuponapona mpusu ya nitu yalumukaka na ntoto ya mvimba. Luswaswanu ya bikanda butaka kufwa bantu, kumwesa mpasi, ti bampasi yankaka ya nsoni. Na kutadilaka lapolo mosi ya Amnesty International, kufwa banswa ya muntu pusaka bantu kuluta mafuku 23 na inza ya mvimba na kutina banzo na bau na 1994.

Na Rwanda mpamba, bau fwaka bantu kuluta 500000 ye bantu yankaka kuluta 2000000 kumaka barefizie na nima ya nku ya kufwa bantu yina basikaka na kati ya Batutsi ti Bahutu. Zulunalu ya Belgique Le Soir tubaka nde: “Mingimingi bau nyokulaka Bambangi ya Yehowa sambu bau buyaka na kubaka minduki.” Bambangi ya Yehowa kekotaka ve na bitumba ya minduki. Ata mpila yina, bankama na kati na bau kufwaka na nku yina. Yau keyibusa beto bangogo ya Yezu songaka balongoki na yandi: “Sambu beno . . . kele bantu ya nsi-ntoto ve; yo yina bantu ke mengaka beno.”​—⁠Yoane 15:⁠19.

Dibuta mosi ya Mbangi​—⁠Eugène Ntabana, nkento na yandi, ti bana na yandi zole​—⁠vandaka zinga na ntu-mbanza, Kigali. Ntangu yandi vandaka tendula bukatikati ya Bukristu na bamfinangani na yandi, Eugène vandaka tubila mbala mingi bougainvillier, kintuntu mosi ya kemataka mpi keyelaka mbote na bisika ya ntangu mingi.​—⁠Matayo 22:⁠21.

Eugène vandaka tendula nde: “Awa na Kigali, bougainvillier kebutaka bintuntu ya mbwaki, ya mafuta, mpi bantangu yankaka bintuntu ya mpembe. Kansi, yau yonso kele kaka na dibuta mosi. Yau kele mutindu mosi ti bantu. Ata beto kele na bampusu ya nitu ya kuswaswana, bisina ya bikanda ya kuswaswana, beto yonso kele bana ya dibuta mosi, dibuta ya bantu.”

Mawa mingi, ata bau vandaka na kikalulu ya ngemba mpi ya bukatikati, kibuka mosi ya bantu ya kiwina ya menga fwaka dibuta ya Ntabana. Ata na ntangu yina, bau fwaka kaka na kwikama. Beto lenda tula ntima nde Yehowa Nzambi talungisa lusilu na yandi na bantu ya mutindu yina, ye yandi tafutumuna bau sambu na kukota na inza yina tavanda dyaka ve ti mabanza ya mbi sambu na bankaka. (Bisalu 24:15) Na ntangu yina, dibuta ya ba Ntabana, kumosi ti bantu yankaka, “ta zinga mbote na ngemba mpenza na ntoto.”​—⁠Nkunga 37:⁠11.

[Lupangu ya kele na lutiti 32]

Keti Nge Tazola Mvutukilu Mosi?

Ata na kati ya inza yai ya mavwanga, nge lenda kubaka kyese na nsadisa ya nzayilu ya kyeleka ya Biblia kepesa na yina ketala Nzambi, Kimfumu na yandi mpi lukanu ya kitoko ya yandi kusalaka sambu na bantu. Kana nge tazola kuzaba mambu ya nkaka to nge tazola nde muntu mosi kwisa kulonguka ti nge Biblia ya ofele na inzo, beto kelomba nge na kusonika na Association “Les Témoins de Jéhovah,” B.P.634 Limete, Kinshasa, Zaïre, to na mosi na adresi mebonga na nge yina kele na lutiti 2.