Banani Tavanda Baevanzelizatere?

NA LUKUTAKANU mosi ya Conseil mondial des Eglises kiteso ya bamvula 40 meluta, bantu kusyamisamaka na “kubasisa na mbala mosi mpeve ya kievanzelisme” mpi na kulonga bantu na bau na “kutambula sambu na kulonga evanzile.” Bamvula tanu na nima John A. O’Brien, mfumu ya dibundu mosi ya Katolika, sonikaka sambu na yina ketala mfunu ya kukotisa balongoki ya mpa “na kukwendaka na bau” kansi kaka “na kufongaka ve na banzo na beto.” Mpi na Yanuari 1994, Papa Jean Paul II tubaka nde yau kele “ve ntangu ya kuwa nsoni sambu na Nsangu ya Mbote, yau kele ntangu ya kulonga yau na ludi ya nzo.”

Yau kemonana nde kubingisa yai ya ntangu mosi ya baevanzelizatere, mebwaka na makutu ya kufwa. Disolo mosi na zulunalu ya Australie, Illawarra Mercury tubaka nde: “Bantu ya Katolika ya Lukumu ya Simu ya Sudi kele ve na mpusa ya kubaka mutindu ya kuta kimbangi ya Bambangi ya Yehowa sambu na lukwikilu na bau.” Muntu mosi tubaka nde kievanzelisme kele mpenza “ve na mabanza ya Katolika.” Yankaka kuyindulaka nde: “Yau kele mbote sambu na dibundu na kudimatisa, kansi na nzila ya kukokutila ve na kyelo. Mbala yankaka yau tavanda kuluta mbote na nzila ya banzo-nkanda to kusonika mikanda.” Ata dwaye mosi ya katedrale ya bwala yina zabaka ve mbotembote mpila ya kutendula bangogo ya papa. Yandi tubaka nde: “Beto talenda kusyamisa bantu na kusadila Nsangu ya Mbote yina bau zaba na luzingu na bau mosi. Ata kukwenda nzo na nzo kele ve kima yina mono kezola kutubila.” Ntu-dyambu mosi ya zulunalu yango ketubila yau mbote na bunkufi nde: “Bantu ya Katolika talanda ve imvitasio ya Papa sambu na kusamuna.”

Ata Kikristu menunga ve na kulonga evanzile, Bambangi ya Yehowa kuluta mafuku tanu kelanda ntuma ya Yezu sambu na “kwenda kukumisa bantu [“ya makanda,” NW] yonso balongoki.” (Matayo 28:​19, 20; fwanisa ti Bisalu 5:42.) Kisalu na bau ya kusamuna nzo na nzo kesalama ntangu yai na bansi kuluta 230. Nsangu ya bau kenata kele ya mboninu ya mbote, na kutendulaka balusilu ya kitoko ya Biblia sambu na makwisa. Sambu na inki kusolula ve ti bau na mbala ya nima ya bau takokutila?

[Lupangu ya kele na lutiti 32]

Keti Nge Tazola Mvutukilu Mosi?

Ata na kati ya inza yai ya mavwanga, nge lenda kubaka kyese na nsadisa ya nzayilu ya kyeleka ya Biblia kepesa na yina ketala Nzambi, Kimfumu na yandi mpi lukanu ya kitoko ya yandi kusalaka sambu na bantu. Kana nge tazola kuzaba mambu ya nkaka to nge tazola nde muntu mosi kwisa kulonguka ti nge Biblia ya ofele na inzo, beto kelomba nge na kusonika na Association “Les Témoins de Jéhovah,” B.P.634 Limete, Kinshasa, Zaïre, to na mosi na adresi mebonga na nge yina kele na lutiti 2.