Dikwela Mosi ya Bamvula 403 Mekota Mavwanga

NA Suède, Dibundu ti Leta vandaka kusepela na ngwisana mosi ya ngolo bamvula kuluta kiteso ya 400. Ntangu yai, dikwela na kati ya lusambu ti luyalu mebanda kulemba.

Dibundu ya Misioni tulamaka bonso lusambu ya Leta na 1593, ye bantu yonso ya Suède vandaka na ntuma ya kuvanda bantu ya kubotama na dibundu. Bamvula mingi na nima, na bamvu 1850, bau yidikaka dyambu yango. Yau vandaka dyaka mfunu ve nde bantu ya Suède kubotama; kansi ata mpila yina, bau vandaka kutangama kaka bantu ya Dibundu ya Misioni. Na mutindu yina, yau vandaka kulombama nde bau futa 1 na kati ya nkama ya mbutu ya kisalu na bau ya mvula mosi, sambu na kusadisa dibundu mpi na kufuta bisalu yankaka ya bantu yonso yina dibundu kesalaka. Ntama mingi ve, nsoba yankaka salamaka. Kubanda na 1952, bantu ya Suède lendaka kubasika na dibundu na kulandaka nsiku mpi kubaka kimpwanza ya kukonda kufuta ndambu ya kuluta mingi ya mpaku ya dibundu.

Na bamvula ya mekatuka kuluta, Dibundu ya Misioni landaka na kuvidisa luyalu na yandi na zulu ya bantu ya Suède. Yau vandaka kima ya lenda kangisama ve, sambu bantu 10 na kati ya nkama ya kezingaka na Suède kele banzenza, bantu ya Misioni ve, na kati na bau kele Bayuda, Bakatolika, ti Bamizuluma. Yau yina, na luyantiku ya 1996, bantu ya Suède 86 mpamba na kati ya nkama vandaka na Dibundu ya Misioni, mpi ntalu yango kelanda kaka na kukita.

Nkadilu ya kukonda kuzola kuwa ya keyela kesosa kukabula Dibundu ti Leta. Yau meyitaka kutubama ntete nde yau kelomba ve nde ntotila kuvanda kaka muntu ya Misioni, mpi bana ya bibuti yina kele bantu ya Misioni fwete vanda ve na kingolongolo bantu ya Dibundu ya Leta ya Misioni. Dyaka, na kulandaka zulunalu mosi (The Dallas Morning News), tii ya beto kekuma na mvu 2000, “baparoise ti leta fwete tesa ntalu ya bimvwama mingi mpi kukabisa yau. Ntalu ya mbongo yai ya dibundu konso mvula mafunda ya mafuku ya badolare 1,68 fwete kukita, mbongo yai ya kekatukaka mingimingi na bampaku.” Kana mvu-nkama ya mpa meyantika imene, dibundu yau mosi taponaka ba episikopo na yau.

Ntangu nkadilu ya kukonda kuzola kuwa ti kukita ya ntalu ya bantu ya dibundu kele na kunyokula Kikristu, Bambangi ya Yehowa na Suède kelanda na kuyela mingi. Annuaire des Témoins de Jéhovah 1997 kezabisa nde bansamuni ya Kimfumu ya Nzambi kele 24487 na insi yina, mpi mfinama bantu 10 na kati ya nkama kele na kusamuna bonso baministre bapasudi-nzila ya ntangu yonso. Bamingi na kati na bau kele na kuzwa mabaku ya nene ya kisalu. Mu mbandu, na balukutakanu ya distrike 1995 ya Bambangi ya Yehowa, bimvuka ya bankwelani 20 salaka ndomba sambu na ndongolo ya kimisionere na Gilead, Nzo-Nkanda ya Biblia ya la Société Watchtower. Na ntangu yina, kiteso ya bantu ya Suède 75 vandaka mebakaka mapolomi na banzo-nkanda ya ntete mpi vandaka na kisalu ya kimisionere na bandambu ya kuswaswana ya inza. Na ntembe ve, mbandu ya mbote ti mikanda mpi baviziti na bau ya kikesa vandaka na bupusi ya mbote na bayina kesosa ntangu yai kubaka dibaku yai ya nene.

Yau yina, ntangu mafuku mingi na kati ya Kikristu kele na kunyokwama na mabanza, Bambangi ya Yehowa ‘ke sepela, ke yimba ti kiese na ntima.’​—⁠Yezaya 65:​13, 14.

Ata na kati ya inza yai ya mavwanga, nge lenda kubaka kyese na nsadisa ya nzayilu ya kyeleka ya Biblia kepesa na yina ketala Nzambi, Kimfumu na yandi mpi lukanu ya kitoko ya yandi kusalaka sambu na bantu. Kana nge tazola kuzaba mambu ya nkaka to nge tazola nde muntu mosi kwisa kulonguka ti nge Biblia ya ofele na inzo, beto kelomba nge na kusonika na Association “Les Témoins de Jéhovah,” B.P.634 Limete, Kinshasa, Zaïre, to na mosi na adresi mebonga na nge yina kele na lutiti 2.

[Lupangu ya kele na lutiti 30]

(Sambu na kumona mambu yonso, tala mukanda)

Suède