Dikwela ya Bumwense?

NA KUSOSAKA kuwakanisa ngindu ya bumwense ya kimakulu ya Maria ti makwela na yandi ti Yozefi, bantu mingi ya kesalaka bifwanisu ti biteki kesalaka Yozefi bonso mununu. Bau keyindulaka nde Yozefi vandaka mingimingi bonso ntanini ya Maria, kansi bonso bakala na yandi ve. Kansi, ntama mingi ve, Papa Jean Paul II pesaka ngindu ya mutindu yankaka na dyambu yai. Yandi ketuba nde Yozefi “vandaka ve mununu na ntangu yina.” Kansi, “kimuntu na yandi ya kukuka na ntima, yina katukaka na dyenga ya Nzambi, tindaka yandi na kuzinga makwela na yandi ti Maria na zola ya bumwense.”

Kana ya kyeleka Maria zolaka kubikala mwense kimakulu, sambu na inki yandi kwelaka? Papa kepesa mvutu nde “Beto lenda tuba nde na ntangu ya kifianse na bau, Yozefi ti Maria wakanaka na kuzinga luzingu ya bumwense.”

Kansi, Biblia kemonisa mambu mutindu yankaka. Mukanda ya Matayo ketuba nde “Yozefi zabaka Maria ve tii kuna yandi butaka mwana ya bakala.” (Matayo 1:​25, beto bantu metengimisa bisono.) Na nima ya lubutuku ya Yezu, makwela ya Maria ti Yozefi vandaka dyaka ve ya bumwense. Evanzile kemonisa nzikisa mosi ya dyambu yai na nima, kisika yau kemonisa nde Yezu vandaka ti baleke ya babakala mpi ya bankento.​—Matayo 13:​55, 56.

Na yau, ata Biblia ketuba nde Maria vandaka mwense ntangu yandi butaka Yezu, kikuma yankaka kele ve na kutuba nde yandi zingaka na bumwense na luzingu na yandi yonso ya kulandaka ti Yozefi.