Bampimpa ya Kukonda Mpongi Yina Kunataka Mambote

BANTOTILA mpi kelutisaka bampimpa ya kukonda mpongi. Zeresesi, mfumu mosi ya ngolo ya Persia na mvu-nkama ya tanu N.T.B., lutisaka mpimpa mosi ya mutindu yai. Ziku yandi monaka nde yandi vilaka mukumba mosi, yau yina yandi lombaka nde bau tangila yandi mukanda ya bamfumu. Yandi waka nde Mardoke, nsadi mosi ya kwikama, tungululaka kinsweki mosi yina bantu salaka sambu na kufwa mfumu, kansi bau futaka yandi kima ve. Zeresesi silaka na kuyidika kifu yina nswalu. Mambote ya bantu ya Nzambi zwaka sambu na mambu yina yandi salaka, kemonisa nde kele Nzambi muntu katulaka ntotila mpongi na mpimpa yina.​—⁠Estere 6:​1-10.

Dibundu ya Bambangi ya Yehowa na Hermanus, mbanza mosi na lweka ya masa na Afrika ya Sudi, kele ti kikuma ya mbote ya kuyindula nkenda yai ya Biblia. Bau vandaka futila nzo sambu na balukutakanu. Bamvula mingi, bau sosaka ntoto ya kusumba sambu na kutunga Nzo na bau mosi ya Kimfumu. Nsukansuka, na 1991, bantwadisi ya mbanza pesaka bau kisika mosi ya kuluta kitoko.

Kansi, bantu yankaka tubaka nde ve, kisika yina bau lendaka tekila yau ve Bambangi ya Yehowa. Na nima ya bangonda mingi, bau zabisaka dibundu nde nsiku mosi mebasika nde bau tekila ve mabundu ntoto tii kuna bamvula tatu kuluta, ye bau botulaka kisika yango. Na Mayi 1993, dibundu sonikaka dyaka na kulomba bantwadisi nde bau tadila dyaka nzengolo na bau. Mvutu kwisaka na nsa mosi mpamba na mukanda nde, nsiku ya kukonda kuteka ntoto mekatuka ntete ve.

Na Oktobri ya mvula yina mosi, ntwadisi mosi lutisaka mpimpa ya kukonda mpongi. Yandi bakaka ntangu na kukangula mikanda ya balukutakanu ya ntama, sambu na kumona kana kuvandaka ti dyambu mosi ya kutudila dikebi. Mukanda ya Bambangi sonikaka sambu na kulomba bantwadisi na kutadila dyaka nzengolo na bau, bendaka dikebi na yandi. Yau yina, yandi silaka na kutula dyambu yina na manaka ya lukutakanu na bau ya nima. Yandi zolaka kumonisa nde Bambangi ya Yehowa lombaka ntoto na ntwala, nsiku ya kukonda kutekila mabundu ntoto basikaka na nima.

Ntama mingi ve, bau vutudilaka dibundu ntoto yina bau pesaka bau ntete na 1991! Yau kele na lweka ya nzila ya nene, kisika bamembere ya dibundu ti bantu ya kesepelaka na kyeleka kekwendaka kukonda mpasi. Bau metungaka Nzo ya Kimfumu mosi ya kitoko, yina bau tambikaka na Yehowa na Oktobri 5, 1996.

Ata dibundu kewilaka ntwadisi yina mawa sambu yandi lutisaka mpimpa mosi ya kukonda mpongi, yandi lenda baka ndembikilu na kuzaba nde Ntotila Zeresesi lutisaka mpi mpimpa mosi ya mutindu yina. Mpi bampimpa yina yonso zole nataka mambote mingi. Dibundu ya Hermanus kepesaka mpi matondo ya kuluta mingi sambu bau mezwaka Nzo ya Kimfumu ya bau mosi, mavula ya lusambu ya kugedila mpi ya kulonguka mambu ya teokrasi na mbanza yai ya kele ti bantu mingi na lweka ya masa.​—Baebreo 10:​24, 25.

[Lupangu ya kele na lutiti 32]

Keti Nge Tazola Mvutukilu Mosi?

Ata na kati ya inza yai ya mavwanga, nge lenda kubaka kyese na nsadisa ya nzayilu ya kyeleka ya Biblia kepesa na yina ketala Nzambi, Kimfumu na yandi mpi lukanu ya kitoko ya yandi kusalaka sambu na bantu. Kana nge tazola kuzaba mambu ya nkaka to nge tazola nde muntu mosi kwisa kulonguka ti nge Biblia ya ofele na inzo, beto kelomba nge na kusonika na Association “Les Témoins de Jéhovah,” B.P. 634 Limete, Kinshasa, Congo, Rép. Dém., to na mosi na adresi mebonga na nge yina kele na lutiti 2.

Keti Nge Tazola Mvutukilu Mosi?