Sambu na Inki Ve Kuvukana ti Bau?

NDJAUKUA ULIMBA kele ti bamvula 73, ye na mvula ya meluta, yandi tambulaka bakilometre 450 na makulu, mpi yau bakaka yandi bilumbu 16.

Mbuta muntu yai salaka nzyetolo yai ya nda sambu na kuvanda na lukutakanu mosi ya nene ya Bambangi ya Yehowa kesalaka konso mvula. Na nima ya lukutakanu, ti kyese mingi mpi ngolo ya yandi bakaka na kimpeve, yandi vutukaka na bwala na yandi​—⁠yandi tambulaka dyaka na makulu bilumbu 16. Keti yau vandaka kulemba ya mpamba? Ve, ata fyoti ve! Ndjaukua Ulimba kesalaka nzyetelo yai konso mvula tuka mwa bamvula mingi.

Bakala yai, muntu ya Afrika, kele na kati ya bantu kuluta bamilio 15 na bansi kuluta 230, yina vukanaka na balukutakanu ya nene ya Bambangi ya Yehowa na mvula ya meluta. Ya kyeleka, bankaka salaka ve nzyetelo ya bilumbu mingi sambu na kukuma na kisika ya lukutakanu. Bamingi kwendaka na kamio, na tre, to na avio. Keti nge vandaka na kati na bau?

Na 1998, balukutakanu ya nene tasalama dyaka na ntoto ya mvimba, mingimingi na nsungi ya kisiwu. Kana nitu kuvanda mbote, ziku Ndjaukua Ulimba tabaka dyaka nzila yai ya nda sambu na kuvanda pana. Yandi tavanda na kati ya bantu yankaka mingi yina talanda manaka ya malongi mosi ya bau tasadila na luzingu, tatunga lukwikilu, mpi tapesa bau kikesa. Lukutakanu yai tavanda dyambu ya nene ya mvu sambu na bayina yonso tavanda pana. Beto mebinga nge mpi na kyese yonso na kuvanda pana. Bambangi ya Yehowa tavanda na kyese mingi ya kuzabisa nge kisika lukutakanu yango tasalama penepene na bwala na beno.

[Lupangu ya kele na lutiti 32]

Keti Nge Tazola Mvutukilu Mosi?

Ata na kati ya inza yai ya mavwanga, nge lenda kubaka kyese na nsadisa ya nzayilu ya kyeleka ya Biblia kepesa na yina ketala Nzambi, Kimfumu na yandi mpi lukanu ya kitoko ya yandi kusalaka sambu na bantu. Kana nge tazola kuzaba mambu ya nkaka to nge tazola nde muntu mosi kwisa kulonguka ti nge Biblia ya ofele na inzo, beto kelomba nge na kusonika na Association “Les Témoins de Jéhovah,” B.P. 634 Limete, Kinshasa, République démocratique du Congo, to na mosi na adresi mebonga na nge yina kele na lutiti 2.