Kuvanda Ve na Kikalulu ya Simoni!

KUVANDAKA ti muntu mosi na Samaria, na mvu-nkama ya ntete T.B., zina na yandi Simoni. Bo vandaka kuzitisa yandi mingi. Yandi vandaka kukusa bantu mingi na nzila ya bisalu ya mazi. Bantu yankaka bandaka kutuba nde: “Muntu yai ke na ngolo ya Nzambi, ngolo yina ya bo ke bingaka ‘Ngolo ya Nene.’ ”​—⁠Bisalu 8:​9-11.

Kansi, ntangu Simoni bakaka mbotika mpi kumaka Mukristu, yandi monaka ngolo mosi ya kuluta ngolo yina yandi vandaka na yo ntete: ngolo ya Nzambi pesaka bantumwa ya Yezu sambu na kupesa bantu yankaka makabu ya kuyituka ya mpeve santu. Simoni yitukaka mingi, ye yandi bakaka ngindu ya kupesa bantumwa mbongo mpi yandi tubaka nde: “Beno pesa mono mpi ngolo yai, sambu muntu yina ya mono ta tula maboko, yandi kubaka Mpeve ya Nzambi.”​—⁠Bisalu 8:​13-19.

Ntumwa Piere nganinaka Simoni mpi tubaka nde: “Fwa ka nge ti mbongo na nge, sambu nge me banza nde nge lenda baka na mbongo ngolo yai ya Nzambi ke pesaka! Nge lunga kukota ve na kisalu yai, sambu ntima na nge kele ya kieleka ve na meso ya Nzambi.”​—⁠Bisalu 8:​20, 21.

Nkenda yai ya Biblia kemonisa kikalulu mosi ya bo kebingaka nde “kikalulu ya Simoni.” Bo ketendulaka nde yo ke “disumu ya kuteka to kusumba kiyeka na kati ya dibundu.” Mukanda ya Katolika mosi (New Catholic Encyclopedia) kendima nde kubanda na mvu-nkama ya 9 tii kuna mvu-nkama ya 11, “kikalulu ya Simoni kumaka mingi na bakuvan, na kisalu ya kimumpe, ya kinganga-nzambi, ti na kisalu ya kipapa.” Encyclopædia Britannica ya uvwa (1878) ketuba nde: “Kana nge longuka nkenda ya balukutakanu ya Katolika yonso ya mesalamaka sambu na kupona bapapa, nge tandima nde mbala yonso ya bo keponaka papa, kikalulu ya Simoni kekotaka na kati. Mbala mingi yo kesalamaka kimuntu-kimuntu, na mpenza penza, ye yo kepesaka nsoni ya kutuba ve.”

Kansi, Bakristu bubu yai fwete vanda ve ti kikalulu ya Simoni. Mu mbandu, kubaka kikalulu ya kupesa bima konso ntangu na bayina ya nge kemona nde bo lenda matisa nge mikumba. Dyaka, bayina mpi kevandaka ti kiyeka ya kumatisa bankaka mikumba, lenda pesa yo ve kaka na bayina lenda kabila bo to kekabilaka bo bima. Bambandu yai yonso zole kemonisa kikalulu ya Simoni yina Masonuku kebuya ngolo. Piere songaka Simoni nde: “Yo yina, nge fweti balula ntima, bikisa mabanza na nge ya mbi. Samba Mfumu Nzambi; ziku yandi ta lolula nge sambu na mabanza [“mayele na nge ya mbi,” New Jerusalem Bible] yina ya nge bakaka na ntima na nge. Sambu mono ke mona nde ntima na nge kele bululu, nge mpi me kangamaka na bansinga ya mambu ya mbi.”​—⁠Bisalu 8:​22, 23.

Simoni salaka kima mosi ya mbote na nima, yandi bakisaka nde yandi vandaka na mpusa mosi ya mbi mpenza. Yandi bondilaka bantumwa nde: “Beno mosi [beno] sambila mono na Mfumu sambu ata mambu mosi kubwila mono ve na mambu yina yonso ya beno me tuba.” (Bisalu 8:24) Bakristu ya kyeleka fwete baka dilongi mosi ya mfunu na nkenda yai. Bo fwete tina kikalulu ya Simoni.