Keti Beto Lenda Nunga Ve na Kunwana ti Kinsukami?

BANTU yina kekwendaka kutala biro ya Organisation des Nations unies na Mbanza ya New York kemonaka Biro ya Bantu yina ketalaka mambu ya Kimvwama mpi ya Luzingu ya bantu, ti batiyo mpi bansinga ya kuran ya bo mebikisaka na mpenza na plafo ya kisika bantu yonso kelutilaka. Nkento yina ketambusaka bantu yina kekwendaka kutala nzo yango ketendula nde: “Bisalu ya ‘plafo’ yai ya memanaka ve kele kidimbu ya keyibusaka nde bisalu ya Organisation des Nations unies ya metala kimvwama mpi luzingu ya bantu memanaka ntete ve. Kisalu ya kusala tavanda kaka sambu na kutomisa luzingu ya bantu na ntoto ya mvimba.”

Ata kimvuka ya Bantu yina mekudipesaka mpenza sambu na kusosa kutomisa luzingu ya bantu yonso, kisalu na bo kemana kaka ve. Yo kele kyese na kuzaba nde, ntangu yandi salaka kisalu na yandi awa na ntoto na mvu-nkama ya ntete ya T.B., Yezu kutubaka nde: “Mpeve ya Mfumu Nzambi kele na mono. Yandi solaka mono sambu na kuzabisa Nsangu ya Mbote na bansukami.” (Luka 4:18) Inki “Nsangu ya Mbote” yandi zabisaka? Yo vandaka nsangu yina ketadila Kimfumu yina Yehowa Nzambi, muntu yina kekumaka kisika ya “bansukami . . . ke tininaka . . . na ntangu ya mpasi,” tatula na lutwadisu ya Ntotila Yezu Kristu. Inki mambu Kimfumu yango tasala? Yezaya kubikulaka nde: “Mfumu Nzambi . . . ta sadisa fete sambu na bantu yonso ya nsi-ntoto, fete mosi ya madia ya kitoko mpenza ti ya vinu ya kuluta kitoko. Yandi ta sukisa lufwa kimakulu! Yandi ta katula mansanga na meso ya bantu yonso.”​—Yezaya 25:4-6, 8.

Keti nge tazola kuzaba mambu mingi yina ketubila mutindu Kimfumu ya Nzambi “tatomisa luzingu ya bantu na ntoto ya mvimba,” na mpila nde kinsukami kumana? Tanga mambu yai kele awa na nsi sambu na kuzaba inki mutindu nge lenda zwa longi mosi ya mefwana yina takwisa kusonga nge mambu mingi yina Biblia ketuba na mambu ya mutindu yai.