Beto Vandaka Ntete Bankoyi, Ntangu Yai Beto Mekuma Mameme!

Ntangu beto vandaka baleki, mono ti Sakina, banzo na beto vandaka penepene. Sakina vandaka nene mpi ngolo, kansi mono vandaka nkufi mpi fyoti. Beto vandaka kuswana mbala mingi, kansi kilumbu mosi beto nwanaka ngolo kibeni. Banda kilumbu yina, beto vandaka kutubana ve mpi kupesana mbote ve. Nsukansuka, beto kabwanaka mpi beto vandaka kuzaba dyaka ve bansangu ya konso muntu.

Na mvu 1994, mono yantikaka kulonguka Biblia ti Bambangi ya Yehowa, kimuntu na mono yantikaka kubaluka fyotifyoti. Na nima ya bamvula iya, ntangu beto kwendaka na lukutakanu ya sipesiali ya kilumbu mosi yina kusalamaka na Bujumbura, na insi ya Burundi, mono kuyitukaka mingi na kukutana ti Sakina. Mono vandaka na kyese mingi na kumona nde yandi vandaka na lukutakanu yina, kansi beto pesanaka ve mbote na kikesa mingi. Na nima, mono yitukaka mingi ntangu mono monaka yandi na kati ya bantu yina zolaka kubaka mbotika! Yandi mpi kubalulaka mpenza luzingu na yandi. Yandi vandaka dyaka ve muntu ya vandaka kuzola kunwana mpi ya beto vandaka kuswana na yandi mbala na mbala. Yo vandaka kyese mpenza na kumona yandi kemonisa kudipesa na yandi na Nzambi na meso ya bantu na kubaka mbotika ya masa!

Ntangu yandi basikaka na masa, mono kwendaka ntinu sambu na kuyamba yandi mpi mono tubilaka yandi na ndinga ya malembe na dikutu nde: “Keti nge keyibuka dyaka mutindu beto vandaka kunwana?” Yandi tubaka nde “ee, mono keyibuka. Kansi yo kele mambu ya melutaka. Mono kele muntu ya mpa bubu yai.”

Beto zole ke na kyese ya kuzaba kyeleka ya Biblia yina kevukisaka bantu mpi sambu beto mebalula kimuntu na beto yina kuvandaka bonso ya nkoyi sambu na kukuma ti kimuntu ya kele bonso mameme ya Yehowa Nzambi, yina kele Ngungudi ya Nene. Ya kyeleka, kyeleka ya Biblia kebalulaka mpenza luzingu ya bantu.