Sambu na Nki Bambangi ya Yehowa Kelembaka Ve na Kuvutukila Beno?

Na inza ya mvimba, Bambangi ya Yehowa mezabanaka mbote nde bo kelembaka ve na kusala kisalu na bo ya kulonga nzo na nzo. Bantu mingi kekudiyulaka nde sambu na nki Bambangi kelembaka ve na kuvutukila bo, mingimingi kana bo kuyambaka ve mbote nsangu ya Bambangi yango na mbala ya ntete. Mikanda zole ya kukatukaka na insi ya Russie kesadisa beto na kutendula kikuma ya kesalaka nde bo lemba ve na kuvutukila bantu.

Masha, mwana-nkento mosi ya mbanza Khabarovsk ya bamvula 19, kendima nde: “Na kuta masonga, ntete mu vandaka kusala yonso sambu na kutina Bambangi ya Yehowa.” Kansi, na nima ya kutanga mwa bazulunalu yina Bambangi mebasisaka, yandi sobaka bangindu na yandi. Masha kesonika nde: “Mambu yonso ya mu tangaka kusepedisaka munu mingi mpi yo kangulaka munu, kansi kima ya kuluta mfunu kele nde kana muntu ketanga bazulunalu yango, yandi takuma kutadila inza na mutindu yankaka. Mu yantikaka kubakisa malembe-malembe sambu na nki bo kepesaka bantu lukanu na luzingu.”

Svetlana, nkento mosi ya mbanza Ussuriysk yina kele na kitamina ya bakilometre 80 na nordi ya Vladivostok, kusonikaka nde: “Mono meyantika kutanga Nzozulu ya Nkengi mpi Réveillez-vous ! kaka bilumbu yai. Bazulunalu yai kele mfunu mingi na bilumbu na beto. Mu kesepelaka mingi na masolo na yo yonso. Yo kevandaka kitoko mingi, yo kelongaka mambu mingi, mpi yo kekangulaka muntu mabanza. Matondo! Matondo mingi sambu beno kele na inza yai mpi sambu na kisalu ya mbote mpi ya mfunu ya beno kesala.”

Bambangi ya Yehowa ya inza ya mvimba ketulaka dikebi mingi na ngyufula yai ya ntumwa Polo ya fwete pusa muntu na kuyindula: “Nki mutindu bo lenda wa nsangu yina, kana muntu me longaka bo yo ntete ve?” (Roma 10:14) Sambu na nki kubaka ve mwa minuta sambu na kuwidikila Bambangi na mbala ya nima ya bo takwisa kutala nge? Nge mpi lenda sepela na nsangu ya kepesaka kikesa yina kele na Ndinga ya Nzambi, Biblia.