Bo Kezabisa Nsangu ya Mbote na Bifwa-Makutu

“BO KENATILA beno malongi ya kimpeve!” Yai kele mutindu direktere ya nzo mosi ya minunu na Navalcarnero, Madrid, na Espagne, kutendulaka ntama mingi ve baviziti ya Bambangi ya Yehowa na nzo yina. Inki kupusaka yandi na kutuba mutindu yina?

Bantu mingi ya kezingaka na Rosas del Camino kele bifwa-makutu. Kansi, sambu Bambangi mesalaka kikesa ya kulonguka Ndinga ya Bidimbu ya Kiespaniole, bo lenda solula ti bantu ya kezingaka na nzo yina. Direktere kukumisaka Bambangi sambu bo kepesaka ntangu na bo ya ofele sambu na kulonga minsiku ya kimpeve na bantu yina kevandaka na mfunu na yo. Yandi monaka bupusi ya mbote yina malongi ya nsangu ya mbote ya Kimfumu kuvandaka na yo na bantu ya kezingaka na nzo yango. Mpi bantu yango, mingimingi bayina kekukaka ve kumona to kuwa mbotembote, kesepelaka mpi mingi na baviziti ya Bambangi.

Eulogio, yina kele kifwa-meso mpi kifwa-makutu, ke na kulonguka Biblia sesepi yai ti Bambangi ya Yehowa. Kilumbu mosi ntangu bo vandaka kulonguka, mununu mosi kwisaka kupesa Mbangi poeme mosi yina bantu ya nzo yango kusonikaka sambu na kumonisa ntonda na bo. Ntu-dyambu ya poeme yango kuvandaka: “Kuvanda Mbangi.” Nge lenda kuta bangogo yai na kati na yo: “Bo kezingaka luzingu mosi ya mbote, bo kevandaka luzitu, mpi mayele na bo kekatukaka na Yehowa. Bo kekwendaka kutala bantu na banzo mbala na mbala sambu bo ketulaka ntima na Yehowa.”

Kima mepusaka Bambangi mingi na inza ya mvimba na kulonguka ndinga ya bidimbu ya bifwa-makutu ya insi na bo kele mpenza ntima yai ya bo ketulaka na Yehowa. Na mutindu yina bo kezabisaka bantu ya mutindu yai nsangu ya Biblia yina kepesaka kikesa mpi kivuvu.