Keti Muntu Lenda Yala Mambi?
Leke mosi ya bakala melokuta kima mosi na ntoto, kisi ve yo vandaka mine, yo panzanaka na maboko na yandi mpi yo fwaka yandi meso, ebuna yandi kumaka kifwa-meso luzingu ya mvimba. Mama mosi mefika bebe na yandi bilele mpi melosa yandi na fulu mosi yina kuvandaka na lweka ya nzila. Muntu mosi ya bo katulaka na kisalu mebaka munduki, mevutuka na kisika ya kisalu mpi mefwa bantu yonso yina yandi kutanaka ti bo na kisika ya kisalu, mpi na nima yandi kudifwaka. Bakala mosi ya bantu kezitisaka mingi keladisa bana ya fyoti na kingolongolo.
YO KE mawa mingi na kumona nde bansangu ya mambu ya mbi ya mutindu yai kekuma mingi na bilumbu na beto. Dyambu ya mawa kuluta kele nde bansangu yango kesukaka mbala mingi ti mambu bonso kufwa bantu sambu bo kele bantu ya ndinga yankaka, kufwa bantu mingi na mbala mosi, mpi kiterorizme. Zulunalu mosi yina kubasikaka na 1995 kusonikaka nde: “Mvu-nkama yai ya kuluta mbi, mevanda mvu-nkama ya Satana. Mayele mpi mpusa ya ngolo ya kufwa bantu sambu na mpusu na bo ya nitu, sambu na lusambu to na kiyeka na bo memonana mingi kibeni na mvu-nkama yai, kuluta na bamvu-nkama yonso ya meluta.”
Bantu kebebisa mpi mupepe, ntoto, kemanisa bimvwama na yo, mpi kefwa bambisi ya mitindu na mitindu. Keti bantu lenda yambula kusala mambi yai mpi kukumisa ntoto kisika ya kuluta mbote, ya kukonda kigonsa? Keti kumeka na kusala mutindu yina kele bonso muntu ya kezola kukanga mupepe? Profesere mosi yina kusonikaka mambu mingi na yina metala mambi kutubaka nde: “Mono vandaka ti mpusa ya ngolo ya kusoba mambu ya nsi-ntoto. Kansi yo kemonana nde nsi-ntoto ketoma ve ata fyoti.” Ziku nge mpi kekudiwa mutindu mosi.
Beto lenda fwanisa mutindu mambu ya nsi-ntoto kekwendila ti maswa mosi ya ketambula na nzadi yina kitembo kekuma kaka ngolo konso kilumbu mpi kekuma kigonsa. Ata muntu mosi ve kezola kukwenda na nzila ya mutindu yina, kansi bikesa yonso ya bo kesala sambu na kugulusa maswa yango kenunga ve. Maswa kekwenda kaka na kudinda sambu bo kekuka ve kukanga kitembo.
Na kiteso mosi buna, kukonda kukuka ya bantu lenda vanda na kisina ya kubeba ya luzingu na bo. (Roma 3:23) Ata mpidina, kiteso ya mambi, disongidila, mutindu yo mekuma bisika yonso mpi nku ya bantu kesala, kemonisa nde kele ti kima yankaka yina ke na kisina na yo, kansi kaka sambu na kukonda kukuka ya bantu mpamba ve. Keti yo lenda vanda nde kele ti ngolo mosi ya kemonanaka ve yina kepusa bantu na kusala mambu ya mutindu yina? Kana mvutu kele nde ee, ngolo yango kele inki, mpi nki mutindu beto lenda kuditanina? Disolo yina kelanda tapesa mvutu na bangyufula yai.
[Bangogo ya kemonisa kisina ya foto ya kele na lutiti 3]
© Heldur Netocny/Panos Pictures