Inki Mutindu Yezu Vandaka Kutadila Mambu ya Politiki?

BANSONIKI ya Baevanzile tubilaka mambu mingi ya kusalamaka na kisalu ya kusamuna ya Yezu yina salaka nde, yandi kutana ti mambu ya politiki. Mu mbandu, ntangu fyoti na nima ya kubaka mbotika na yandi ti bamvula kiteso ya 30, Dyabulu zabisaka Yezu na kuvanda mfumu ya nsi-ntoto. Na nima, ntangu yandi vandaka kusala kisalu na yandi ya kusamuna kibuka ya bantu zolaka kukumisa yandi ntotila. Dyaka, bantu pusaka yandi na kukota na mambu ya politiki. Inki Yezu salaka? Bika beto tadila mambu yango.

Mfumu ya nsi-ntoto. Baevanzile kemonisa nde Dyabulu zolaka kupesa Yezu kiyeka ya kuyala “bimfumu yonso ya nsi-ntoto.” Yindula mambu ya mbote yina Yezu zolaka kusala sambu na bampasi ya bantu kana yandi kumaka mfumu ya nsi-ntoto! Sambu na muntu yina kezolaka kusadisa bantu na masonga yonso mpi kezolaka politiki, dyambu yai lendaka kuvanda ya mbote mpenza! Kansi Yezu buyaka yo.—Matayo 4:8-11.

Ntotila. Bantu mingi yina zingaka nsungi mosi ti Yezu vandaka na mfunu ya mfumu mosi yina lendaka kumanisa bampasi na bo na yina metala mbongo mpi mambu ya politiki. Sambu bantu sepelaka na makuki yina Yezu vandaka ti yo, bo zolaka nde yandi kukota na mambu ya politiki. Yandi salaka nki? Yoane tubaka nde: “Yesu zabaka nde bo zolaka kwisa kubaka yandi na ngolo sambu na kutula yandi ntotila. Yo yina yandi katukaka pana, yandi kwendaka yandi mosi na ndambu ya bangumba.” (Yoane 6:10-15) Yo ke pwelele nde, Yezu buyaka kukota na mambu ya politiki.

Muntu ya politiki. Tala mambu yina salamaka bilumbu fyoti na ntwala ya lufwa ya Yezu. Balongoki ya Bafarize, yina vandaka na mfunu ya kubaka kimpwanza na luyalu ya Roma mpi bantu ya Herode, yina vandaka kuzola luyalu ya Roma kwendaka kusolula ti Yezu. Bo vandaka kupusa yandi na kingolongolo na kukota na mambu ya politiki. Bo yulaka yandi kana Bayuda fwete futa mpaku ya nsi Roma to ve.

Marko sonikaka mvutu yina Yezu: “Sambu na nki beno ke meka mono? Beno kwisa kunatila mono kibende mosi ya mbongo awa, mono tala yo. Bo kwisaka kunatila yandi kibende mosi, ebuna yandi yulaka bo nde: ‘Ilungi yai ti zina yai na zulu ya mbongo yai, yo kele ya nani?’ Bo nde: ‘Yo kele ya [Kaisali].’ Yesu nde: ‘Ya [Kaisali], beno pesa na [Kaisali]; ya Nzambi, beno pesa na Nzambi.’” (Marko 12:13-17) Sambu na kutubila kikuma yina Yezu pesaka mvutu yai, mukanda mosi (Church and State—The Story of Two Kingdoms) ketuba nde: “Yezu buyaka na kuvanda mesia ya politiki mpi yandi monisaka nde mambu ya Kaisali meswaswana ti mambu ya Nzambi.”

Kristu vandaka kutula dikebi na kinsukami, kukonda masonga mpi kukonda lunungu. Biblia kemonisa nde Yezu waka mpasi mingi ntangu yandi vandaka kumona bantu yina vandaka na zyunga na yandi kenyokwama. (Marko 6:33, 34) Kansi, Yezu salaka ve mambu sambu na kukatula kukonda lunungu na nsi-ntoto, ata bantu yankaka salaka yonso sambu na kukotisa yandi na mambu yina vandaka kubasisa mavwanga na bilumbu yina.

Bambandu yai kemonisa pwelele nde, Yezu buyaka kukota na mambu ya politiki. Kansi, inki beto lenda tuba sambu na Bakristu bubu yai? Keti bo fwete kota na mambu ya politiki?