BANGIUFULA YA BATANGI
Keti bantu ya Izraele vandaka kutula bangondi na zulu ya nti sambu na kufwa bo?
Na ntangu ya ntama, makanda mingi vandaka kutula bangondi ya nkaka na zulu ya nti sambu na kufwa bo. Bantu ya Roma vandaka kukangisa ngondi to kutula yandi na zulu ya nti, kisika yandi lendaka kulanda na kuzinga bilumbu mingi tii ntangu yandi zolaka kufwa sambu na mpasi, nzala ya masa ti ya madia, mpi mambu ya nkaka bonso madidi, mwini mpi mvula. Sambu na bantu ya Roma, yo vandaka ndola mosi ya nsoni yina bo vandaka kupesa na bangondi yina vandaka kusala mambu ya mbi mpenza.
Kansi, nki beto lenda tuba sambu na bantu ya Izraele? Keti bo vandaka mpi kutula bantu ya mbi na zulu ya nti sambu na kufwa bo? Nsiku ya Moize vandaka kutuba nde: ‘Kana muntu mosi me sala disumu yina ke lomba nde bo pesa yandi ndola ya lufwa, ebuna bo me fwa yandi mpi me tula yandi ke lela na zulu ya nti, mvumbi na yandi fwete bikala ve mpimpa ya mvimba na zulu ya nti. Kansi, nge fwete zika yandi kilumbu yina.’ (Kul. 21:22, 23) Yo yina yo kele pwelele nde, na ntangu ya bana ya Izraele, kana bo me zengila muntu nkanu ya lufwa, bo vandaka ntete kufwa yandi na ntwala ya kutula yandi na zulu ya nti.
Sambu na diambu yai, Levi 20:2 ke tuba nde: ‘Konso muntu ya Izraele mpi konso nzenza yina ke zinga na Izraele yina ke pesa mwana na yandi na Moleki, bo fwete fwa yandi kibeni. Bantu ya insi yina fwete fwa yandi na matadi.’ Bo vandaka mpi kufwa ‘bantu yina ke solulaka ti bampeve to kele ti mpeve yina ke zabisaka mambu yina ta salama.’ Inki mutindu? Na ‘kufwaka bo na matadi.’—Levi 20:27.
Na Kulonga 22:23, 24, beto ke tanga nde: ‘Kana bo kanga bakala mosi na kati ya bwala ke lala ti mwana-nkento ya mwense yina bo me yula dibala, beno fwete basisa bo yonso zole mpi kunata bo na kielo ya mbanza mpi kufwa bo na matadi, mwana-nkento sambu yandi bokaka ve na mbanza, mpi bakala sambu yandi pesaka nkento ya nkweno na yandi nsoni. Na mutindu yina nge fwete katula mambu ya mbi na kati na beno.’ Yo yina, na Izraele, kuta muntu matadi vandaka mutindu ya ntete-ntete yina bo vandaka kufwa bangondi yina vandaka kusala mambi ya nene.a
Yo kele pwelele nde, na ntangu ya bana ya Izraele, kana bo me zengila muntu nkanu ya lufwa, bo vandaka ntete kufwa yandi na ntwala ya kutula yandi na zulu ya nti
Kulonga 21:23 ke tuba nde: ‘Mvumbi yina ke lela na nti kele kima yina Nzambi me singa.’ Ntembe kele ve nde, kuyambula mvumbi ya muntu ya mbi “yina Nzambi me singa” na zulu ya nti na meso ya bantu yonso, vandaka bonso lukebisu sambu na bantu ya nkaka ya Izraele.
a Bantu mingi ya mayele ke ndimaka nde na nsi ya Nsiku, bo vandaka ntete kufwa ngondi na ntwala ya kutula nitu na yandi na zulu ya nti. Kansi, kele ti banzikisa ya ke monisaka nde na mvu-nkama ya ntete, Bayuda tulaka bangondi ya nkaka na zulu ya nti ya moyo mpi na nima bo fwaka na zulu ya nti yango.