“Tala Bifwanisu!”

Mbala ikwa nge me kuditubilaka bangogo yai to me zabisaka bankaka ntangu nge kangulaka nimero mosi ya mpa ya zulunalu yai? Bifwanisu mpi bafoto ya kitoko yina bo ke basisaka na dikebi yonso ke vandaka ti lukanu mosi. Yo kele bisadilu ya kulongila yina ke pusaka beto na kuyindula mpi kumonisa mawi na beto. Yo lenda sadisa beto mingi-mingi ntangu beto ke yidika Kulonguka ya Nzozulu ya Nkengi mpi ke pesa bakomantere.

Mu mbandu, meka kuyindula kikuma yina kifwanisu ya ntete ya disolo yonso ya kulonguka ke ponamaka sambu na disolo yina. Inki yo ke monisaka? Na nki mutindu yo ke vandaka na kuwakana ti ntu-diambu to verse ya ntu-diambu? Na yina me tala bifwanisu ya nkaka, meka kuyindula mutindu bifwanisu yango ke vandaka na kuwakana ti disolo yina beno ke tadila mpi luzingu na nge mosi.

Ntwadisi ya kulonguka ya Nzozulu ya Nkengi fwete pesa dibundu dibaku ya kupesa bakomantere na konso kifwanisu, kutubila dilongi yina yo ke basisa to bupusi yina kifwanisu yango kele na yo na luzingu na bo. Bantangu ya nkaka, bo ke yikaka bangogo na nima ya bangogo yina ke monisaka kuwakana na kati ya kifwanisu ti paragrafe. Kansi na bantangu mosi buna, ntwadisi lenda baka lukanu na yina me tala nki paragrafe yo ta vanda mbote na kutadila konso kifwanisu. Mpidina, dibundu ya mvimba ta baka mambote mingi na mambu yina me salama sambu na kusadisa mutangi na kubakisa dilongi yina kele na Ndinga ya Nzambi.

Mpangi mosi tubaka yo mutindu yai: “Na nima ya kutanga disolo mosi ya kitoko yina bo me sonika, bifwanisu ke yikaka kiese mpi mpusa ya mingi na disolo yina.”