“Muntu Yina Ke Pesaka Matabisi na Bantu Yina Ke Sosaka Yandi na Masonga Yonso”

Keti Yehowa ke bakaka na mbalu mambu yina bansadi na yandi ke salaka sambu na kusepedisa yandi? Bantu ya nkaka lenda tuba nde Nzambi ke kudibanzaka ve sambu na beto. Kansi kutuba ya mutindu yai ke monisaka Nzambi na mutindu ya mbi kibeni. Ndinga na yandi, Biblia ke pesa mvutu ya kieleka. Yo ke ndimisa beto nde Yehowa ke bakaka na mbalu bikesa ya bansadi na yandi ya kwikama. Beto tadila mambu ya ntumwa Polo tubaka yina kele na Baebreo 11:6.

Inki beto fwete sala sambu na kusepedisa Yehowa? Polo ke sonika nde: “Kukonda lukwikilu muntu lenda sepedisa Nzambi ve.” Simba nde Polo ke tuba ve nde yo kele mpasi na kusepedisa Nzambi kukonda lukwikilu. Kansi, ntumwa ke tuba nde muntu lenda sala yo ve ata fioti. Na bangogo ya nkaka, lukwikilu kele mfunu mingi sambu na kusepedisa Nzambi.

Lukwikilu ya nki mutindu ke sepedisaka Yehowa? Lukwikilu na beto na Nzambi ke lombaka mambu zole. Ya ntete, beto “fwete kwikila nde yandi kele.” Bambalula ya nkaka ke tubaka nde, “kukwikila nde yandi kele muntu ya kieleka” mpi “kukwikila nde yandi kele.” Inki mutindu beto lenda sepedisa Nzambi kana beto ke ndima ve nde yandi kele? Diaka, lukwikilu ya kieleka ke lombaka mambu mingi, sambu ata bademo mpi ke kwikilaka nde Yehowa kele. (Yakobo 2:19) Kukwikila nde, Nzambi kele muntu ya kieleka fwete pusa beto na kusala kima mosi, disongidila, kumonisa lukwikilu na beto na kuzinga na kuwakana ti mutindu yina ke sepedisaka yandi.​—Yakobo 2:20, 26.

Ya zole, beto “fwete kwikila nde” Nzambi ke “pesaka matabisi.” Muntu yina kele ti lukwikilu ya kieleka ke ndimaka mpenza nde bikesa na yandi ya kuzinga na kuwakana ti mutindu yina ke sepedisaka Nzambi ta vanda mpamba ve. (1 Bakorinto 15:58) Inki mutindu beto lenda sepedisa Yehowa kana beto ke ndima ve makuki to mpusa na yandi ya kupesa beto matabisi? (Yakobo 1:17; 1 Piere 5:7) Muntu yina ke tubaka nde, yo fwete vanda nde Nzambi ke tudilaka ve bantu dikebi, Nzambi ke monisaka ve ntonda mpi yandi ke kabaka ve, muntu yango me zaba Nzambi ya Biblia ve.

Yehowa ke pesaka banani matabisi? Polo ke tuba nde: “Bantu yina ke sosaka yandi na masonga yonso.” Mukanda ya bantu mingi ke sadilaka sambu na kubalula Biblia ke tuba nde bangogo ya Kigreki ya bo me balula na “kusosa na masonga yonso” ke tendula ve “kusosa kuzaba” kansi, yo ke tendula kukwenda na Nzambi “na nzila ya lusambu.” Mukanda ya nkaka ya bantu mingi ke sadilaka ke tendula nde kisongi-diambu yai ya Kigreki ke pesa ngindu ya kusala bikesa ya ngolo mpi ya mingi. Ya kieleka, Yehowa ke pesaka matabisi na bantu yina lukwikilu ke pusaka bo na kusamba yandi na luzolo yonso mpi kusadila yandi na kikesa yonso.​—Matayo 22:37.

Inki mutindu Yehowa ke pesaka bansadi na yandi ya kwikama matabisi? Yandi me sila bo matabisi ya mbalu na bilumbu yina ke kwisa, yo ke monisa kikalulu na yandi ya kukaba mpi zola na yandi ya mingi​—luzingu ya mvula na mvula na Paladisu ya ntoto. (Kusonga 21:3, 4) Ata bubu yai, bayina ke sosaka Yehowa na masonga yonso ke bakaka balusakumunu mingi. Na nsadisa ya mpeve santu na yandi mpi mayele yina kele na Ndinga na yandi, bo ke vandaka ti luzingu ya kiese mpi mutindu ya mbote ya kuzinga.​—Nkunga 144:15; Matayo 5:3.

Ya kieleka, Yehowa kele Nzambi yina ke bakaka na mbalu kisalu yina bansadi na yandi ya me kudipesaka ke sadilaka yandi na kwikama yonso. Keti kuzaba mambu yai ke pusa nge ve na kukwenda pene-pene na yandi? Kana mpidina, sambu na nki ve kulonguka mambu mingi mutindu nge lenda yedisa mpi nge lenda monisa lukwikilu yina Yehowa ta sakumuna mingi?