Sambu na Nki Beto Fwete Tula Dikebi na Kimfumu ya Nzambi?

Bamilio ya bantu na ntoto ya mvimba ke tulaka kivuvu na Kimfumu ya Nzambi. Bo ke landaka mbandu ya Yezu mutindu yandi longaka balongoki na yandi na kusamba nde: “Kimfumu na nge kwisa, luzolo na nge kusalama awa na ntoto bonso na zulu.”—Matayo 6:10, Bible na Kituba.

Bantu mingi ke tulaka dikebi ya ngolo na Kimfumu ya Nzambi kansi yo ke monana nde mabundu mingi kibeni ke tula dikebi ya fioti na Kimfumu yango. Sambu na diambu yai, H. G. Wells muntu ya istware tubaka nde: Yo ke yitukisa mpenza na kumona luswaswanu na mutindu Yezu, na malongi na yandi, vandaka “kubaka na valere . . . dilongi yina yandi bingaka nde Kimfumu ya Zulu.” Kansi, bubu yai mabundu mingi ya Kikristu “ke pesaka yo kisika mosi ya fioti na malongi na bo.”

Bambangi ya Yehowa me swaswana ti mabundu yango sambu bo ke tulaka dikebi ya ngolo na Kimfumu ya Nzambi. Mu mbandu, zulunalu na beto yai ya nge ke tanga ke basikaka na bandinga 220. Bo ke niemaka bakopi na yo kiteso ya bamilio 46 mpi yo kele zulunalu yina bo ke kabulaka mingi na ntoto ya mvimba. Inki kele nsangu ya ntete-ntete ya zulunalu yai? Ntu-diambu na yo kele: Nzozulu ya Nkengi Kesamunaka Kimfumu ya Yehowa.a

Sambu na nki Bambangi ya Yehowa ke salaka mpenza bikesa sambu na kusamuna Kimfumu ya Nzambi? Ntete-ntete, sambu beto ke kwikilaka nde Kimfumu ya Nzambi kele nsangu ya mfunu ya Biblia, mukanda ya kuluta mfunu na nsi-ntoto. Diaka, beto ke ndimaka nde Kimfumu ya Nzambi mpamba ta manisa bampasi yina bantu ke kutana ti yo bubu yai.

Bambangi ya Yehowa ke salaka ngolo na kulanda mbandu ya Yezu na mutindu bo ke tulaka dikebi na Kimfumu ya Nzambi. Ntangu Yezu vandaka na ntoto, Kimfumu ya Nzambi bakaka kisika ya ntete na luzingu na yandi mpi na kisalu na yandi ya kusamuna. (Luka 4:43) Sambu na nki Kimfumu vandaka mfunu mingi sambu na Yezu? Sambu na nki yo ke mfunu sambu na nge? Beto ke lomba nge na kutadila bamvutu ya Biblia yina bo me tubila na masolo ya ke landa.