Bantu Mingi Ta Guluka Ntangu Nsuka Ta Kwisa—Nge Lenda Guluka mpi

Biblia ke zabisa beto nde nsuka ta nata mpasi. Yo ke tuba nde: “Mpasi ya nene ta vanda, mpasi mosi ya me bwaka ntete ve katuka na luyantiku ya nsi-ntoto tii bubu yai . . . Ya kieleka, kana bo kumisaka ve bilumbu yina nkufi, ata nsuni mosi ve zolaka kuguluka.” (Matayo 24:21, 22) Kansi, Nzambi ke sila beto nde bantu mingi ta guluka. Biblia ke tuba nde: “Insi-ntoto ke luta . . . , kansi muntu yina ke salaka luzolo ya Nzambi ke bikalaka kimakulu.”—1 Yoane 2:17.

Kana nge ke zola kuguluka na nsi-ntoto yai ya ke luta mpi ‘kubikala kimakulu,’ nki nge fwete sala? Keti yo ke lomba nde nge bumba bima mingi ya kinsuni? Ve. Biblia ke siamisa beto na kusala mambu ya nkaka ya mfunu. Yo ke tuba nde: “Sambu bima yai yonso fwete kuma bonso masa na mutindu yai, beno tadila mutindu ya bantu yina beno fwete vanda. Beno fwete vanda bantu ya bikalulu ya santu mpi kusala bisalu ya ke monisa kukangama na Nzambi, na ntangu beno ke vingila mpi ke yibuka ntangu yonso kukala ya kilumbu ya Yehowa.” (2 Piere 3:10-12) Baverse ya kele na zulu mpi ya kele na nsi ke monisa nde “bima yai yonso” ya fwete kuma bonso masa kele bamfumu ya ke yala nsi-ntoto yai mpi bantu yonso ya ke zola luyalu na bo na kisika ya kuzola luyalu ya Nzambi. Yo ke pwelele nde kana beto bumba bima ya kinsuni, yo ta gulusa beto ve na mpasi yai.

Ya kieleka, sambu beto guluka, beto fwete kudipesa na Yehowa Nzambi mpi kuvanda ti bikalulu ya ke sepedisa yandi. Beto fwete sala bisalu ya ke pesa yandi kiese. (Sefania 2:3) Na kisika ya kulanda bantu mingi ya ke tulaka ve dikebi na bidimbu yina ke monisa pwelele nde beto ke zinga na bilumbu ya nsuka, yo ke lomba nde beto “yibuka ntangu yonso kukala ya kilumbu ya Yehowa.” Bambangi ya Yehowa lenda songa nge na Biblia mutindu nge lenda guluka ntangu nsuka ta kwisa.