Bangiufula ya Batangi

Keti Mukristu fwete vanda ti munduki sambu na kuditanina?

Minsiku yango ke monisa nde Mukristu lenda sadila ve munduki sambu na kuditanina. Yindula mambu yai:

Luzingu kele santu na meso ya Yehowa. Davidi, muyimbi-bankunga sonikaka nde: “[Yehowa] kele nto ya luzingu.” (Nkunga 36:9) Yo yina, ntangu Mukristu ke pona mutindu ya kuditanina to ya kutanina bima na yandi, yandi fwete sala yonso sambu na kukuma ve ti mfuka ya menga disongidila kufwa muntu.—Kulonga 22:8; Nkunga 51:14.

Ya kieleka, konso kima yina bantu ke sadilaka sambu na kuditanina lenda fwa muntu. Kansi munduki ke fwaka bantu kukonda mpasi yo vanda na kidiba to na luzolo.a Diaka, mabanza ya mbeni ke vandaka dezia mbi, yo yina kana yandi me mona munduki, yandi lenda bebisa diaka mambu mpi yo lenda sala nde muntu kufwa.

Ntangu Yezu songaka balongoki na kubaka bambele ya bitumba na mpimpa yina yitaka lufwa na yandi, yo vandaka ve sambu bo kuditanina. (Luka 22:36, 38) Kansi, Yezu zolaka kulonga bo dilongi yai: Balongoki na yandi fwete sala ve mubulu, ata ntangu bantu ke nwanisa bo ti minduki. (Luka 22:52) Ntangu Piere bulaka mpika ya nganga-nzambi ya nene mbele, Yezu songaka Piere nde: “Vutula mbele na nge ya bitumba na kisika na yo.” Na nima Yezu pesaka nsiku yina ke twadisaka Bakristu tii bubu yai, yandi tubaka nde: “Bantu yonso yina ke bakaka mbele ya bitumba ta fwa na mbele ya bitumba.”—Matayo 26:51, 52.

Mika 4:3 ke tuba nde bansadi ya Nzambi ta “kumisa bambele na bo ya bitumba bima ya kubundudila ntoto mpi bo ta kumisa makonga na bo bakupu-kupu.” Bakristu ya kieleka ke vandaka bantu ya ngemba. Bo ke lemfukaka na bansiku yai ya Nzambi pesaka na nzila ya ntumwa Polo nde ‘beno vutula ve mbi na mbi ata na muntu mosi’ mpi ‘beno zinga na ngemba ti bantu yonso.’ (Baroma 12:17, 18) Polo lemfukilaka bansiku yai ata na ntwala ya bigonsa mu mbandu, “bigonsa ya miyibi.” Yandi fwaka ve minsiku ya Biblia sambu na kuditanina. (2 Bakorinto 11:26) Yandi tudilaka Nzambi ntima mpi zabaka nde bandongisila ya Biblia “kele mbote kuluta binwaninu ya bitumba.”—Longi 9:18.

Bakristu ke bakaka luzingu na valere mingi kuluta bima ya kinsuni. Beto ke zabaka nde luzingu ya muntu “ke katukaka ve na bima yina yandi kele ti yo.” (Luka 12:15) Yo yina beto ke solulaka na mawete ti muyibi yina kele ti munduki, kana yandi wila beto ve, beto ke lemfukaka na ndongisila yai ya Yezu: “Beno nwana ve ti muntu yina kele muntu ya mbi.” Disongidila beto ke bikaka nde yandi baka bima yina yandi ke zola. (Matayo 5:39, 40; Luka 6:29)b Ya kieleka, beto fwete sala ve mambu yina lenda benda miyibi na nzo na beto. Kana beto ke lemfuka na bandongisila ya Biblia mpi ke ‘songa ve na lulendo yonso bima na beto ya kuzingila’ yo ta sala nde miyibi kuyiba beto ve. (1 Yoane 2:16) Diaka, kana bantu me zaba nde beto kele Bambangi ya Yehowa, bantu ya ngemba, yo lenda tanina beto.—Bingana 18:10.

Bakristu ke zitisaka kansansa ya bantu ya nkaka. (Baroma 14:21) Ntangu bampangi ya nkaka me zaba nde mpangi mosi kele ti munduki sambu na kuditanina, yo lenda yangisa kansansa na bo. Insi lenda pesa bantu nswa ya kuvanda ti minduki, kansi sambu beto ke zolaka bampangi, beto fwete sala ve ata fioti mambu yina lenda yangisa kansansa na bo.—1 Bakorinto 10:32, 33; 13:4, 5.

Bakristu ke pesaka mbandu ya mbote. (2 Bakorinto 4:2; 1 Piere 5:2, 3) Kana Mukristu kele ti munduki sambu na kuditanina, bankuluntu fwete pesa yandi bandongisila. Kana yandi ke landa kubumba munduki yango, yandi ta vanda ve mbandu ya mbote. Yo yina, yandi lenda vanda ve ti mikumba na dibundu. Mambu yai ke tadila mpi Mukristu yina kele ti munduki sambu na kutanina kisalu na yandi. Yo ta vanda mbote nde yandi sosa kisalu ya nkaka.c

Mukristu fwete pona mutindu ya kuditanina, kutanina dibuta na yandi, bima na yandi mpi kupona kisalu yina yandi ta sala. Kansi ntangu yandi ke baka balukanu yai, yandi fwete tadila minsiku ya Biblia. Nzambi me pesaka beto bansiku yai sambu yandi ke zolaka beto. Yo yina, Bakristu yina kele banduku ya ngolo ya Yehowa ke vandaka ve ti minduki sambu na kuditanina. Bo ke zabaka nde kana bo tudila Nzambi ntima mpi bo lemfuka na bansiku ya Biblia, bo ta vanda na lutaninu ya mvula na mvula.—Nkunga 97:10; Bingana 1:33; 2:6, 7.