Sambu na Nki Beto Kevutukilaka Bantu Mbala na Mbala

1. Inki ngyufula kebasika na yina metala kisalu na beto ya kulonga?

¹ Na bisika mingi, beto kesalaka teritware na beto mbala na mbala. Beto kevutukaka mbala na mbala na banzo yina beto longaka dezia, ata mbala yankaka muntu ya beto kutaka kusongaka beto nde yandi kusepelaka ve na kyeleka. Sambu na nki beto kevutukilaka mbala na mbala bantu yina kundimaka ve nsangu na beto?

2. Inki kele kikuma ya ntetentete ya beto kekwaminaka na kisalu ya kusamuna?

² Zola Sambu na Yehowa mpi Sambu na Bantu: Kikuma ya ntetentete ya kepusaka beto na kukwamina na kisalu ya kusamuna kele zola na beto sambu na Yehowa. Ntima na beto kepusaka beto na kulanda kuzabisa bantu yankaka mambu ya metala Nzambi na beto ya nene. (Luka 6:45) Zola na beto sambu na Yehowa kepusaka beto na kulemfuka na bansiku na yandi mpi na kusadisa bantu yankaka na kusala mutindu mosi. (Bing. 27:11; 1 Yoa. 5:⁠3) Beto talanda kusala kisalu yai na kwikama yonso ata bantu kendima to kebuya nsangu na beto. Ata ntangu bantu vandaka kunyokula bo, Bakristu ya mvu-nkama ya ntete kulandaka “kaka” na kusamuna. (Bis. 5:42) Ntangu bantu kebuyaka na kuwidikila beto, na kisika ya kubika nde yo lembisa beto, beto kebikalaka ya kwikama sambu na kumonisa zola na beto ya ngolo mpi kudipesa na beto ya mvimba na Yehowa.

3. Inki mutindu zola sambu na bantu tasadisa beto na kulanda na kusamuna?

³ Beto kekwaminaka mpi sambu beto kevandaka na zola ya nkweno. (Luka 10:27) Yehowa kezola ve nde ata muntu mosi kufwa. (2 Pie. 3:⁠9) Ata na bateritware yina beto kesalaka mingi, beto kelanda na kuzwa bantu yina kezola kusadila Yehowa. Mu mbandu, na Guadeloupe, muntu 1 na kati ya bantu 56 kele Mbangi ya Yehowa. Ata mpidina, na mvula meluta, bantu 214 kubakaka mbotika. Kiteso ya bantu 20000 kuvandaka na Lusungiminu na Guadeloupe, disongidila muntu 1 na kati ya bantu 22!

4. Na nki mitindu bateritware kesobaka?

⁴ Bansoba na Teritware: Bantu ya kevandaka na teritware na beto kesobaka mbala na mbala. Kilumbu yankaka ya beto takwenda na nzo mosi ya bantu kundimaka ve, muntu yankaka ya dibuta yina, ziku yina mewaka ntete ve nsangu na beto, lenda kangula kyelo mpi kuwidikila beto. To beto lenda kuta nde bantu yankaka meyingaka bo na nzo yina, ebuna bantu yango memonisa mpusa. Bana yina bibuti na bo vandaka kubuya nsangu meyela mpi bo kezinga dyaka ve ti bibuti na bo. Bana yango lenda ndima kuwa nsangu ya Kimfumu.

5. Inki lenda pusa bantu na kuyantika kundima nsangu?

⁵ Bantu mpi kesobaka. Ntumwa Polo ‘vandaka ntete kutuba mambu ya mbi sambu na Nzambi, yandi vandaka kumonisa Bakristu mpasi mpi kuvwenza Nzambi.’ (1 Tim. 1:13) Mutindu mosi, na ntangu mosi buna bantu mingi yina kesadila Yehowa bubu yai kuvandaka kusepela ve na kyeleka. Bankaka nkutu vandaka kumenga nsangu ya mbote na ntangu mosi buna. Mutindu mambu kesoba na ntoto, bambeni yankaka to bantu yina vandaka kundima ntete ve lenda ndima na kuwa nsangu. Bankaka lenda ndima nsangu na nima ya kukutana ti dikambu mosi ya mpasi, bonso lufwa ya muntu mosi ya dibuta, kuvidisa kisalu, makambu ya mbongo to mavimpi ya mbote ve.

6. Sambu na nki beto fwete landa na kusamuna ti kyese?

⁶ Ngidika yai ya bima mekuma mpenza na nsuka, kansi kisalu na beto ya kusamuna mpi ya kulonga fwete salama nswalu. (Yez. 60:22) Yo yina, beto kelanda na kusamuna ti kyese mpi kesala kikesa sambu na kulanda kuvanda na nkadilu ya mbote. Ziku muntu yankaka yina beto tasolula ti yandi tawidikila beto. Beto fwete landa na kutuba! ‘Kana beto sala mpidina, beto ta gulusa moyo na beto mosi, beto ta gulusa mpi moyo ya bantu yina ke waka malongi na beto.’​—⁠1 Tim. 4:⁠16.