Baka Lukanu ya Kulonguka Biblia ti Muntu

¹ “Beno tala mbote bilanga: Bambuma me yela, ntangu me kuma penepene na kukatula yo.” (Yoa. 4:35) Ntembe kele ve nde bangogo yai ya Yezu Kristu kutubaka ketadila kisalu ya kusamuna ya Bakristu bubu yai.

² Beto kelanda na kukutana ti bantu ya ntima masonga yina kele na mpusa ya kulonguka banzila ya Yehowa. Yo kemonana pwelele na ntalu ya balongoki ya mpa yina kebaka mbotika konso mvula. Inki nge lenda sala kana nge kele mpenza na mpusa ya kulonguka Biblia ti muntu?

³ Baka Lukanu: Ntetentete, baka lukanu ya kuyantika kulonguka mbala na mbala Biblia ti muntu. Kuvila ve lukanu na nge na ntangu nge kekwenda na kisalu ya kusamuna. Sambu kisalu na beto ya Bukristu kelombaka kulonga mpi kusamuna, beto yonso fwete sosa mabaku mingi ya kulonguka Biblia ti bantu.​—⁠Mat. 24:14; 28:​19, 20.

⁴ Bangindu Yankaka ya Beto Fwete Vila Ve: Yo kele mfunu mingi nde bansamuni ya Kimfumu kusala bisambu ya masonga. Bantangu yankaka beto kekutanaka ti bantu yina kusambaka Nzambi sambu yandi sadisa bo na kubakisa Biblia. Yo kele lusakumunu mpenza na kumona mutindu Yehowa kesadila beto sambu na kukutana ti bantu ya mutindu yina mpi kulonga bo!​—⁠Agai 2:7; Bis. 10:​1, 2.

⁵ Mpangi-nkento mosi kusambaka sambu na kulonguka Biblia ti muntu, mpi yandi tulaka batrakiti Aimeriez-vous en savoir plus sur la Bible ? na kisika na yandi ya kisalu. Nkento mosi kubakaka trakiti mosi, kutangaka yo yonso, mpi yantikaka na kufulusa lupangu yina kevandaka na nsuka ya batrakiti. Mpangi-nkento yango kusolulaka ti yandi, mpi yandi kumaka kulonguka Biblia ti nkento yango.

⁶ Bansamuni yina kelongukaka Biblia ti bantu kukonda mpasi lenda sadisa nge na kulungisa lukanu na nge ya kulonguka Biblia ti muntu. Samba sambu Nzambi kusadisa nge na kulungisa lukanu yina, mpi sadila mabaku yonso sambu na kulungisa lukanu yango. Ziku, ntama mingi ve nge tazwa kyese ya kulonguka Biblia ti muntu.