Bo Monisaka Lukwikilu ya Ngolo!
1. Inki mambu ya mpasi Yezu kutubilaka?
1 Bantumwa vandaka kuwidikila na dikebi yonso ntangu Yezu vandaka kutubila kuvanda na yandi mpi nsuka ya ngidika ya bima. Mambu ya mpasi zolaka kubwila bantu— bitumba, nzala, kunikana ya ntoto, mpi bamaladi. Na nima, Yezu kutubaka nde bantu tamenga balongoki na yandi, takanga bo, tamonisa bo mpasi, mpi tafwa bo. Baprofete ya luvunu tabasika mpi takusa bantu mingi. Zola ya bantu mingi tamana.
2. Sambu na nki yo ke kima ya kuyituka na kumona nde nsangu ya mbote kelongama na ntoto ya mvimba?
2 Na nima ya kutubila mambu ya mutindu yina, yo fwete vanda nde bantumwa kuyitukaka ntangu Yezu kutubaka nde nsangu ya mbote ya Kimfumu ya Nzambi fwete longama na ntoto ya mvimba. (Mat. 24:3-14) Bubu yai beto kemona kulungana ya kuyituka ya mbikudulu yina ya kepesa kyese. Ata beto kezinga na bantangu ya mpasi, Bambangi ya Yehowa kelonga nsangu ya mbote ti kikesa. Na ntangu zola ya bantu ya nsi-ntoto kemana, zola na beto kekuma kaka mingi mpenza. Ata “bantu ya bansi yonso” kemenga beto, beto kesamuna mpenza na makanda yonso.
3. Inki bantalu ya kepesa kikesa nge kemona na rapore ya ntoto ya mvimba?
3 Yo kepesa kikesa mpenza na kutadila kisalu yina Bambangi ya Yehowa kusalaka na mvula ya kisalu yina meluta mutindu yo kemonana na lupangu yina kele na balutiti 3 tii na 6! Banda bamvula 16, bo kelutisaka bangunga miliare mosi na kulonga mpi na kukumisa bantu balongoki. Bambangi ya Yehowa memonisaka lukwikilu ya ngolo mpenza! Kuyela kuvandaka ya 5,8 na kati ya nkama na ntalu ya bapasudi-nzila, ya 3,1 na kati ya nkama na ntalu ya bansamuni, mpi ya 4,4 na kati ya nkama na ntalu ya balongoki ya Biblia. Ntalu ya bantu yina kubakaka mbotika kuvandaka 20,1 na kati ya nkama kuluta ntalu ya mvula ya kisalu ya meluta. Yo kele kyese na kumona nde bantu kiteso ya bamilio nsambwadi kesadila Yehowa na kwikama yonso, ntalu ya nene ya kuluta bantalu yonso na disolo ya luzingu ya bantu. Ntangu nge ketala lupangu yango, inki kima ya sikisiki kepesa nge mpenza kikesa?
4. Inki mambu bakala mosi kunungaka na kuyambula ntangu yandi vandaka kudibongisa sambu na kubaka mbotika?
4 Ata bantalu yina keyitukisa, beto fwete vila nde yo kele bantalu ya bantu yina kumonisaka lukwikilu na bo. Beto baka mbandu. Guillermo kuyelaka na Bolivie. Yandi butukaka na mvu 1935 mpi yandi yantikaka kusala bilanga ya coca (matiti na yo kevandaka ti cocaïne) ntangu yandi vandaka na bamvula uvwa. Banda na bumwana, yandi vandaka kutafuna matiti ya coca sambu na kufyotuna mpasi ya kisalu ya ngolo yina yandi vandaka kusala. Na nima yandi kumaka kulauka malafu mpi kunwa makaya. Ntangu yandi yantikaka kulonguka mambu yina Yehowa kelomba yandi, Guillermo yambulaka kunwa makaya mpi na nima yandi bikaka kulauka malafu. Dyambu ya kuluta mpasi kuvandaka kuyambula kikalulu na yandi ya kutafuna matiti ya coca. Yandi vandaka kusamba kukonda kulemba mpi yandi nungaka na kuyambula kikalulu yina ya mbi. Na nima ya kuyambula bikalulu na yandi ya mbi, yandi bakaka mbotika. Yandi ketuba nde “Ntangu yai mu kekudimona bunkete mpi mu ke na kyese mpenza.”
5. Inki kele mpusa na nge?
5 Yehowa kekudibanzaka mpenza sambu na bantu. Mpusa na yandi kele nde bantu yonso kubalula ntima. (2 Pie. 3:9) Yo yina mpi mpusa na beto. Bika nde ntima na beto kupusa beto na kusala yonso yina beto lenda sala sambu na kulanda na kusadisa bantu ya ntima ya masonga na kuzaba mpi kuzola Yehowa bonso beto.