Baministre ya Bakristu Fwete Sambaka

1. Inki kele mfunu sambu na kusala kisalu na beto ya kusamuna?

¹ Beto lenda sala ve kisalu ya kusamuna na ngolo na beto mosi. Yehowa muntu kepesaka beto ngolo ya kusala yo. (Filp. 4:13) Yandi kesadilaka bawanzyo na yandi sambu na kusadisa beto na kuzwa bantu ya mefwanana ti mameme. (Kus. 14:6, 7) Yehowa muntu kesalaka nde bankeni ya kyeleka ya beto kekunaka mpi kelosilaka masa kuyela. (1 Kor. 3:6, 9) Yo kele mfunu mpenza nde baministre ya Bakristu kutula ntima na Tata na beto ya zulu na kisambu!

2. Inki kele mwa mambu yina beto lenda samba sambu na yo?

² Sambu na Beto Mosi: Beto fwete samba na konso dibaku yina beto kesamuna. (Ef. 6:18) Inki kele mwa mambu yina beto lenda samba sambu na yo? Beto lenda samba sambu na kuvanda ti mabanza ya mbote na yina metala teritware na beto mpi sambu na kuvanda na kikesa. (Bis. 4:29) Beto lenda lomba Yehowa na kutwadisa beto na bantu ya ntima ya mbote yina beto lenda longuka Biblia ti bo. Kana muwi meyula beto ngyufula mosi, beto lenda sala kisambu ya nkufi na nsi ya ntima sambu Yehowa kusadisa beto na kupesa mvutu ya mefwana. (Neh. 2:4) Beto lenda lomba mpi mayele sambu kisalu ya kusamuna kuvanda kaka na kisika ya ntete na luzingu na beto. (Yak. 1:5) Dyaka, Yehowa kesepelaka ntangu beto kekotisaka na bisambu na beto bangogo ya kuvutula matondo sambu na dibaku ya beto kele na yo ya kuvanda baministre na yandi.—Kol. 3:15.

3. Inki mutindu kusamba sambu na bankaka kesadisaka na kuyalumuna kisalu ya kusamuna?

³ Sambu na Bankaka: Beto mpi “fweti samba Nzambi sambu na bankaka,” nkutu kutanga bazina ya bampangi Bakristu kana yo mefwana. (Yak. 5:16; Bis. 12:5) Keti kimbefo ketulaka bandilu na mambu yina nge lenda sala na kisalu ya kusamuna? Kana mpidina, samba sambu na bampangi Bakristu yina kele ti mavimpi ya mbote. Kumona ve mpamba ngolo ya bisambu ya nge kesalaka sambu na mambote na bo! Yo kele mpi mbote na kusamba sambu bamfumu kuvanda ti mabanza ya mbote na yina metala kisalu ya kusamuna, na mpila nde bampangi na beto “kuvanda na luzingu mosi ya pima ti ya ngemba.”—1 Tim. 2:1, 2.

4. Sambu na inki beto fwete kwamina na kisambu?

⁴ Kuzabisa nsangu ya mbote na bantu ya nsi-ntoto ya mvimba kele kisalu mosi ya nene mpenza. Kana beto “kwamina na kisambu,” beto talungisa kisalu yango ti lusadisu ya Yehowa.—Roma 12:12, NW.