Baluzayisu

◼ Mikanda ya kukabula na Mayi: Bazulunalu Nzozulu ya Nkengi ti Réveillez-vous ! Ntangu beno tavutukila bantu yina kusepelaka, ti bayina kukwisaka na Lusungiminu to na balukutakanu yankaka ya dibundu kansi ya kevukanaka ve mbala na mbala ti dibundu, beno fwete sala ngolo sambu na kupesa bo mukanda Inki Biblia Kelongaka Mpenza? Lukanu na beno fwete vanda ya kuyantika kulonguka ya Biblia. Yuni: Inki Biblia Kelongaka Mpenza? Kana bawi kele dezia ti mukanda yai, bansamuni lenda pesa bo konso mukanda ya balutiti 192 yina mpusu na yo meyantika kukuma ya ntama to konso mukanda yina ya bo basisaka na ntwala ya mvu 1995.

◼ Na lukutakanu ya kisalu ya mposo ya kebanda na Mayi 10, nkuluntu mosi tatanga dyaka mukanda ya Desembri 7, 2009 ya ketubila kutadila dyaka ‘lukanu sambu na Nzo ya Kimfumu.’ Na lukutakanu ya kisalu ya mposo ya kebanda na Mayi 17, mutambusi ya kimvuka ya bankuluntu tazabisa dibundu lukanu ya mpa sambu bo ndima yo. Na nima, yandi tatindila biro ya filiale kopi mosi ya lukanu yina.

◼ Na kilumbu ya Mposo Mayi 29, 2010, dibuta ya Betele tavanda ti bisalu ya metala bo mosi, mpi na kilumbu ya Mposo Yuni 12, 2010, bo tasala kisalu ya kutula bunkete na Betele ya mvimba. Yo yina, beto kelomba beno na kusala ve programe ya kukwenda kutala Biro ya Filiale to bampangi ya kesalaka na Betele na bilumbu yina zole.

◼ Beto kele na kubaka bangidika sambu na kutindila konso dibundu amvelopi mosi ya kele ti baformilere sambu na mvu 2011 na bisika yina lukutakanu ya distrike tasalama. Sekretere fwete sala yonso sambu na kubaka amvelopi yai.