‘Mayele Kemonikaka ya Kieleka na Bisalu na Yo’
1. Inki mutindu bantu yankaka ketadilaka kisalu na beto?
1 Bantangu yankaka beto lenda kutana ti bawi yina kebuya kuwa beto sambu bo kebakisa beto ve to sambu bo mezabisaka bo mambu ya mbi na yina metala Bambangi ya Yehowa. Ziku mambu yina bimwangi nsangu ketubaka sambu na beto mebebisaka mabanza na bo. Na bisika yankaka bo kebingaka beto “kadibundu mosi ya kigonsa.” Inki beto fwete sala kana beto kutana ti mambu ya mutindu yai?
2. Inki tasadisa beto na kulemba ve nitu kana bo ketuba mambu ya mbi sambu na beto?
2 Vanda Kaka ti Nkadilu ya Mbote: Na mvu-nkama ya ntete, mbala mingi bantu vandaka kubakisa ve Yezu mpi bansadi yankaka ya Yehowa mpi kutuba mambu ya mbi sambu na bo. (Bis. 28:22) Ata mpidina, bo bikaka ve nde mambu yina ya mbi kupusa bo na kuwa nsoni na kisalu na bo ya kusamuna. Yezu kutubaka nde: ‘Mayele kemonikaka ya kieleka na bisalu na yo.’ (Mat. 11:18, 19) Yandi landaka na kusala luzolo ya Tata na yandi ti kikesa, ti kivuvu nde bantu ya kesosaka kyeleka tabakisa mfunu ya nsangu ya mbote. Beto lenda buya kulemba nitu na kuyibukaka nde Mwana ya Nzambi kukutanaka ti mambu ya mbi ya mutindu mosi.
3. Sambu na inki bansangu ya mbi mpi kimbeni fwete yitukisa beto ve?
3 Yezu kumonisaka nde nsi-ntoto tamenga balongoki na yandi kaka mutindu bo mengaka yandi. (Yoa. 15:18-20) Yo yina, bansangu ya mbi mpi kimbeni yina beto kekutana na yo bubu yai fwete yitukisa beto ve. Ya kyeleka, beto fwete vingila na kukutana ti mambu mingi kibeni ya mutindu yai na ntangu beto kekota na bilumbu ya nsuka mpi mutindu makasi ya Satana kelanda na kukuma ngolo. (Kus. 12:12) Beto lenda sepela sambu mambu yai kemonisa nde nsi-ntoto ya Satana tafwa ntama mingi ve.
4. Kana bantu metubila beto mambu ya mbi na ntangu beto kezabisa nsangu ya mbote, nki beto fwete sala?
4 Pesa Mvutu na Ntima ya Mbote: Kana muntu metubila beto mambu ya mbi, konso ntangu beto fwete pesa mvutu na ntima ya mbote mpi na mawete. (Bing. 15:1; Kol. 4:5, 6) Kana mpila kele, beto lenda kuka kutendudila muwi ya masonga nde kele ti bansangu mingi ya luvunu na yina metala Bambangi ya Yehowa to kuyula yandi sambu na nki yandi keyindula mutindu yina. Mvutu na beto ya mawete lenda pusa yandi na kutula ntembe na mambu yina yandi mewaka na yina metala Bambangi ya Yehowa mpi na kuwidikila na mbala ya nima yina Mbangi takwenda kutala yandi. Kansi, kana muwi kele na nganzi, yo lenda vanda mbote na kukatuka na kisika yina na luzitu yonso. Beto lenda tula ntima nde ata bantu yankaka kebaka beto konso mutindu yina, Yehowa kebakaka kisalu na beto ya kusamuna na valere.—Yez. 52:7.