Keti Nge Lenda Samuna na Lumingu?
1. Inki dilongi beto lenda baka na mambu yina Polo ti banduku na yandi kusalaka na bwala Filipi?
1 Yo vandaka Kisabatu, kilumbu mosi yina Bayuda mingi ya bwala Filipi vandaka kupema. Polo ti banduku na yandi ya kisalu kwendaka na mbanza yina na nsungi mosi ya nzyetelo na bo ya kimisionere. Ata muntu mosi ve zolaka kumona bo mbi kana bo pemaka mpi kilumbu yina, na nima ya kusala kisalu na bo ya kusamuna. Kansi bo zabaka nde Bayuda vandaka kuvukana na nganda ya mbanza yina sambu na kusamba, yo yina bo sadilaka mbote dibaku yina sambu na kulonga bo. Polo ti banduku na yandi ya kisalu kuvandaka na kyese kibeni ntangu Lidia kuwaka nsangu, mpi yandi ti dibuta na yandi ya mvimba kubakaka mbotika! (Bis. 16:13-15) Sambu bantu mingi bubu yai kepemaka na Lumingu, keti beto lenda sadila ve kitini ya kilumbu ya Lumingu sambu na kulonga bo?
2. Inki bampasi bantu ya Yehowa menungaka sambu na kusamuna na Lumingu kukonda mbangika?
2 Mvita Sambu na Kusamuna na Lumingu: Na mvu 1927, bo syamisaka bantu ya Yehowa na kulutisa kitini ya konso Lumingu na kisalu ya kusamuna. Kansi bo sukininaka ve na kukutana ti mbangika. Bo kangaka Bambangi mingi na États-Unis sambu bantu kufundaka bo nde bo kefwa nsiku ya Kisabatu ya Lumingu, bo keyangisa ngemba ya bantu, mpi bo keteka kukonda nswa. Kansi bantu ya Yehowa kulembaka ve. Na bamvu 1930, bo yidikaka “bakampanye ya kusamuna na bimvuka,” yina kulombaka nde bansamuni ya mabundu ya nzyunga mosi kuvukana sambu na kusala teritware mosi. Ata bo kangaka mwa ndambu ya bansamuni, bansamuni yankaka vandaka kaka kusamuna; yo yina bamfumu kukukaka ve na kukanga bansamuni yonso nzila. Keti nge kele mpenza na ntonda sambu na bibansa yina bampangi yai kusalaka sambu beto kuka kusamuna na Lumingu kukonda mbangika?
3. Inki kesalaka nde Lumingu kuvanda kilumbu mosi ya mbote sambu na kusamuna?
3 Kilumbu Mosi ya Mbote Sambu na Kusamuna: Na Lumingu, bantu mingi kekwendaka ve na kisalu. Mbala mingi bo kevandaka ti ntangu mingi. Bantu yina kekwendaka na banzo-Nzambi ketulaka dikebi na mambu ya Nzambi kilumbu ya Lumingu. Kana lukutakanu na beto kesalamaka na Lumingu, beto kevandaka dezia ti bilele ya mbote yina beto lenda basikila na kisalu ya kusamuna; keti beto lenda kudibongisa ve sambu na kubasika na kisalu ya bilanga na ntwala to na nima ya lukutakanu? Kana mpila kele, nge lenda bongisa, mpi kunata mwa kima ya kudya.
4. Inki kyese beto lenda vanda na yo kana beto sadila kitini ya kilumbu ya lumingu na kisalu ya kusamuna?
4 Kana beto sadila kitini ya kilumbu ya Lumingu sambu na kusamuna, beto takonda mpi ve ntangu ya kupema yina beto ke na mfunu na yo. Mpi beto tapema ti mawi ya kyese yina kekwisaka na nima ya kusala kisalu ya santu. (Bing. 19:23) Beto lenda vanda mpi na kyese ya kuzwa muntu mosi bonso Lidia!