Kikalulu ya Kuluta Mfunu ya Longi Mosi ya Mbote

1. Inki kele kikalulu ya kuluta mfunu ya longi mosi ya mbote?

¹ Inki kesadisaka muntu na kuvanda longi mosi ya mbote ya Biblia? Mayele ya nzo-nkanda? Eksperiansi? Mayele ya kubutukila? Ve, yo kele kaka kikalulu yina kelungisaka bansiku yonso, yina kesadisaka bantu na kuzaba balongoki ya Yezu, mpi yina kele kikalulu ya kuluta nene mpi ya kitoko na kati ya bikalulu ya nene ya Yehowa. (Yoa. 13:35; Gal. 5:14; 1 Yoa. 4:8) Yo kele zola. Balongi ya mbote kemonisaka zola.

2. Sambu na nki beto fwete zola bantu ya beto kelonga?

² Zola Bantu: Yezu, Longi ya Nene, monisaka zola sambu na bantu, mpi zola yina pusaka bo na kuwidikila yandi. (Luka 5:12, 13; Yoa. 13:1; 15:13) Kana beto ke kudibanza-banza sambu na bantu, beto ta ta kimbangi na mabaku yonso. Mambu yankaka bonso bangika mpi kukonda dikebi ya bantu talembisa beto ve. Beto tatudila bantu yina beto kelongaka dikebi ya masonga, mpi beto tayidika mutindu na beto ya kusamuna sambu na kulungisa bampusa na bo. Beto tavanda na luzolo ya kubaka ntangu ya kulonguka ti konso longoki ya Biblia, mpi ya kudibongisa na ntwala ya konso kulonguka.

3. Inki mutindu zola sambu na bakyeleka ya Biblia kesadisaka beto na kisalu ya kusamuna?

³ Zola Bakyeleka ya Biblia: Yezu zolaka bakyeleka ya Biblia mpi yandi bakaka yo bonso bima ya ntalu. (Mat. 13:52) Kana beto kezola kyeleka, beto tatuba na kyese yonso, mpi yo lenda pesa bawi na beto mpusa ya kuwidikila beto. Zola ya mutindu yai tasadisa beto na kutula dikebi na nsangu ya mfunu ya beto kelonga, na kisika ya kudibanza-banza sambu na bandilu na beto; mpidina beto tawa ve boma na kisalu ya kusamuna.

4. Inki mutindu beto lenda yedisa zola?

⁴ Yedisa Zola: Inki mutindu beto lenda yedisa zola sambu na bantu? Kana beto keyindula zola yina Yehowa mpi Mwana na yandi memonisilaka bantu, mpi kinsukami ya kimpeve ya bantu ya teritware na beto. (Mar. 6:34; 1 Yoa. 4:10, 11) Zola na beto sambu na bakyeleka ya Biblia takuma ya mudindu kana beto kelonguka beto mosi mpi keyindulula mbala na mbala. Zola kele kitini ya mbuma ya mpeve. (Gal. 5:22) Sambu na yo, beto lenda bondila Yehowa sambu na kubaka mpeve santu, mpi sambu yandi sadisa beto na kuyedisa zola. (Luka 11:13; 1 Yoa. 5:14) Ata mayele na beto ya nzo-nkanda, bamvula ya beto mesala na kyeleka, to mayele na beto ya kubutukila kele ya nki mutindu, beto lenda vanda balongi ya mbote ya Biblia kana beto kemonisa zola.